Prishtinë
Ramiz Alia pritet në Kosovë si kryetar shteti
Takohet me Presidentin Sejdiu, Kryeministrin Çeku, me Thaçin e Surroin
Alma Lama
Ish-udhëheqësi i fundit komunist i Shqipërisë, Ramiz Alia, zhvilloi një vizitë në fundjavë në Kosovë, ku është pritur me të gjitha atributet e një kreu shteti. Megjithëse i ftuar privatisht nga një stacion televiziv, ish-presidenti i Republikës është pritur nga të gjithë krerët e institucioneve në Kosovë, si dhe liderët e partive politike. Alia është pritur disi me entuziazëm që kur ka vënë këmbën në Aeroportin e Sllatinës. Makina të blinduara i janë vënë në gatishmëri për ta sjellë në Prishtinë. Vizitën e tij e ka nisur duke vënë lule në përmendoret e dëshmorëve të UÇK-së, Luan Haradinajt, dhe Sali Çekut në Deçan. Po kështu, ai ka bërë nderime edhe në Gllogjan. Presidenti i parë shqiptar qëndroi edhe në shtëpinë e një ish-të burgosuri shumë të njohur politik të viteve ‘80. Smajl Haradinaj, dita e dytë e ish-presidentit ka nisur me takimet me Presidentin e Kosovës, Fatmir Sejdiu, Kryeministrin Agim Çeku, kryetarin e PDK-së, Hashim Thaçin, liderin e ORA-s, Veton Surroin, dhe kryetarin e AAK-së, Ramush Haradinajn. Alia kishte shprehur vetë dëshirën që të takohej me udhëheqësit kosovarë dhe këta të fundit e kanë pritur pa hezitim. Takimet janë konsideruar private dhe jo të hapura për median. Asnjë deklaratë nuk është bërë në asnjë nga vizita e ish-presidentit të parë të Shqipërisë. Por burime pranë takimeve thonë se çështja e statusit të Kosovës ka qenë në qendër të të gjitha takimeve. Presidenti Alia ishte për herë të parë në Kosovë, ku dha një intervistë ekskluzive për KTV-në. Ramiz Alia, në vitin 1982, u zgjodh si personi më besnik dhe i Enver Hoxhës. Pas vdekjes së ish-diktatorit, ai u zgjodh në krye të vendit. Pas Parlamentit të parë demokratik, Alia u zgjodh gjithashtu President, por si rezultat i fitores së Partisë Demokratike në zgjedhjet e parakohshme në 1992-in, ai dha dorëheqjen nga ky post. Udhëheqësi i fundit komunist i Shqipërisë dhe Presidenti i parë i Republikës demokratike postkomuniste, Ramiz Alia, aktualisht është në moshën 81-vjeçare, por gëzon një shëndet të mirë, falë edhe kujdesit që ai i kushton vetes së tij. Ramiz Alia, origjinën e largët të familjes së tij e ka nga Kosova, prej ku paraardhësit e ish-presidentit u zhvendosën në Shkodër.
Gazeta Shqip
Ramiz Alia eshte ujk i vjeter ne politike. Si mendoni a ja vlen te degjohet keshilla e Ramiz Alise per Kosoven?
Krijoni Kontakt