Era Rusi, gati për Festivalin Mesdhetar

[Fiori]

Këngëtarja e re, do të përfaqësojë Shqipërinë në edicionin e katërt të Festivalit të Muzikës Mesdhetare që do të zhvillohet në Antalia


Pas Eurosongut në pranverë, muzika e lehtë shqiptare, do të ketë një tjetër ballafaqim në skenat ndërkombëtare. Do të jetë Festivali Mesdhetar i Muzikës, që do të zhvillohet në datën 21 shtator në Antalia të Turqisë, ku Shqipëria do të përfaqësohet me këngëtaren 20-vjeçare Era Rusi, e cila do të interpretojë këngën, "Nuk je ëndërr", me muzikë të Edmond Zhulalit dhe tekst të Agim Doçit, më të cilën u vlerësua me çmim të dytë në Festivalin Kombëtar të RTSH-së edicionin e fundit. Kështu, dyshja e autorëve, Zhulali-Doçi, do të kenë një tjetër ballafaqim ndërkombëtar, pas Festivalit Evropian të Këngës, tre vjet më parë, ku u përfaqësuan me Anjeza Shahinin dhe arritën një sukses jo të vogël, duke zënë vendin e 7-të. Kësaj radhe, sfidantja do të jetë po një këngëtare e re, Era Rusi, e cila është afirmuar për herë të parë në festivalin e fundit, duke lëshuar sinjalet e një këngëtareje me të ardhme për vokalin e saj të veçantë dhe cilësinë e interpretimit. Era Rusi, e cila studion për muzikë në Greqi, pritët të vijojë studimet në Amerikë dhe, Festivali Mesdhetar, është për të, pika më e lartë ku ka mbërritur në raport me moshën dhe karrierën e saj ende të papërfillshme. Sipas drejtorit të Radio Tiranës dhe njëherësh Festivalit në RTSH, Gëzim Podgorica, kënga është dërguar tek organizatorët e Fest-Meditterano, të cilët paraprakisht kanë dhënë vlerësime pozitive. Ajo është regjistruar në studiot e radios me një kualitet të lartë e interpretuar anglisht, sipas përkthimit të Xhuli Myftarit. Anglisht, tha Podgorica, ajo ka dalë shumë e bukur dhe sipas vlerësimit që ka dhënë për të, autori i tekstit, Agim Doçi. Por në evenimentin e Antalias, interpretimi do të jetë live. Për këtë, këngëtarja Era Rusi, po bën përgatitje maksimale, së bashku me kompozitorin Zhulali.

Fest-Meditterano, do të jetë një tjetër provë për muzikën e lehtë shqiptare. ekskluzivitetin e përfaqësimit aty e ka RTSH-ja, ashtu si në Eurosong. Festivali Mesdhetar, është një ekuivalent i Eurosongut, por jo në ato përmasa. Aty marrin pjesë të gjitha vendet që lagen nga ujërat e Mesdheut, më shumë se gjysma e vendeve që përfaqësohen në Festivalin Evropian. Evenimenti ishte planifikuar të organizohej në datën 8 shtator, por u shty për më datën 21, si pasojë e konfliktit mes Izraelit e Libanit, ku të dyja vendet janë pjesëmarrëse. Juria e Festivalit do të jetë e përbërë nga përfaqësues të të gjitha vendeve, e Shqipëria do të përfaqësohet nga drejtori i Festivalit Kombëtar të fundvitit, Gëzim Podgorica. Ai u shpreh, se ndryshe nga pjesëmarrja në Eurosong, kësaj here nuk ekzistojnë problemet e fondeve që do të kondiciononin suksesin apo dështimin e këngës përfaqësuese. "Përfaqësimi do të jetë në nivelet më të larta, sipas përgatitjeve që janë bërë dhe mbetet së ç`vlerësim do të japë juria", tha Podgorica.

Si rregull, pjesëmarrja në Fest-Meditterano, i takon këngës së dytë fituese në Festivalin Kombëtar. "Nuk je ëndërr", u rendit e dyta në Fest-in e fundit, pas "Zjarr e ftohtë" e interpretuar nga Luiz Ejlli, e cila la një shijë të hidhur në përfaqësimin e saj në Eurosong. Drejtori Podgorica tha se ishte Fest- Meditterano ofron një shans për një përfaqësim sa më dinjitoz të muzikës së lehtë shqiptare, ndonëse maksimalja e vlerësimit në këtë eveniment, ka qenë për Eneida Tarifën, që zuri vendin e 5-të në edicionin e vitit të kaluar. Shqipëria nuk ka marrë pjesë vetëm në edicionin e parë. Në të dytin u përfaqësua me Ardian Trebickën, ndërsa në të tretin, me Eneida Tarifën. Ky i sivjetshmi është i katërti edicion. Fest-Meditterano, është një eveniment i ri muzikor evropian, që tenton të bëhet traditë e përvitshme. Të përbashkët me Eurosongun, ka organizimin e natës finale dhe mënyrën e vlerësimit të këngëve. Por ndryshon skema e vendorganizimit, ku është lënë si rregull që festivali të organizohet vetëm në Turqi, që është dhe vendi iniciator i këtij evenimenti.

Gazeta Shqip

[hope31]

me pelqen Era dhe kenga e saj qe zuri vendin e 2

shpresoj dhe uroj per nje cmim ne Fest-Meditterano

[goldian]

suksese Era Rusi

[Albo]

Flet për “Tema” përfaqësuesja e Festivalit Mesdhetar të Këngës që zhvillohet në Turqi deri më 21 shtator

Era Rusi: “Ndoshta edhe kësaj radhe sjell fitore”

Shqipëria po përfaqësohet në Festivalin Mesdhetar të Këngës që po zhvillohet në Turqi, nga data 14 deri më 21 shtator 2006, me këngëtaren Era Rusi, me këngën “Nuk je endërr”. Kënga është kompozim i Edmond Zhulalit me tekst të Agim Doçit dhe e përkthyer në anglisht nga June Taylor. Era ka besim se do bëj një përfaqësim të denjë, sepse sipas saj “kënga është madhështore”. Era Rusi është përballur me konkurset që në moshën 10 vjeçare dhe në repertorin e saj kishte vetëm këngë të emrave të mëdhenj të të muzikës italiane (Ivana Spanja) ashtu dhe asaj amerikane (Tyna Tvvrner). Era Rusi u largua nga Shqipëria kur ishte 14 vjeç, kur fitoi një të drejtë studimi në Institutin “Filipos Nakas” në Athinë, ku edhe studion aktualisht. Ajo ka përfaqësuar Shqipërinë në Festivalin Europian të fëmijëve me këngën “Ëndrra jote” duke fituar çmimin e madh “Grand Prix”. Në vitin 1998 e pret një tjetër garë ajo e Festivalin Botëror (Egjypt-Kairo) dhe përsëri nuk vjen pa një çmim duke rrokur atë të vendit të 5-të. Me përfaqësinë e Era rusit, kjo është hera e tretë që Shqipëria merr pjesë në këtë eveniment të këngës mesdhetare, pas debutimit të këngëtarit Ardian Trebicka dhe Eneida Tarifa.

Intervista

A varet suksesi i një këngëtari nga imazhi i tij?

Suksesi i një këngëtari varet nga shumë gjëra që janë të lidhura me njëra-tjetrën. Në rradhë të parë është imazhi i tij. Domethënë një figurë shoqërore dhe artistike e dashur, e mirëpritur e kulturuar, e respektuar. Dhe së dyti janë zgjedhjet e përshtatëshme dmth pershtatja e stilit të këngëve, teksteve, lookut etj,etj., gjetjet e veçanta, përshtatja e shijeve të publikut, por edhe duke edukuar shije tek publiku.

Vini e sigurt në fillimet e karrierës suaj, a të tremb ajo?

Pyetje e vështirë. Nëse karriera varet nga performanca ime, përpjekjet për të arritur më të mirën me zërin dhe interpretimin tim, kjo nuk më tremb. Jam munduar shumë për të arritur këtu ku jam sot dhe do të vazhdoj të punoj.

Megjithatë të kesh karrierë të sukseseshme do të thotë të kesh publik të gjerë dhe kompozitorë të aftë, ose kjo kërkon fat në gjetjen e një manaxheri të sukseseshëm, i cili e përdor zërin tënd si një veçori për të prodhuar një produkt muzikor të veçantë të pëlqyeshëm nga publiku.

Erdhët në Tiranë që nga Greqia për të punuar për fenstivalin?

Unë përfaqësoj Shqipërinë në Festivalin Mesdhetar të Këngës që po zhvillohet në Turqi nga data 14 deri më 21 shtator 2006 me këngën “Nuk je endërr”. Është një kompozim i Edmond Zhulalit, me tekst të Agim Doçit dhe e përkthyer në anglisht nga June Taylor. Kam besim se do bëjmë një përfaqësim të denjë, sepse kënga është me të vërtetë madhështore.

Mendon se do të vish me fitore?

Kur isha e vogël ëndërroja më shumë, ndërsa tani jam më me këmbë në tokë. Nuk e di se si do ndihesha vërtet, por do ishte fantastike për mua, për punën që kemi bërë dhe orët e vona në studio. Por mbi të gjitha si perfaqësuese e vendit tim do të bëja krenar gjithë Shqipëtarët kudo nëpër botë. Sigurisht që edhe humbja është sukses se fiton një eksperiencë, sado që kjo mund të jetë edhe me humbje. Faktikisht unë kam fituar një gjë shumë të madhe, pjesëmarrjen në një Festiaval ku marrin pjesë 39 shtete. Është një mundësi fantastike për mua për t’u dëgjuar nga një auditor kaq i madh dhe për të dëgjuar e mësuar eksperienca ndërkombëtare. Çdo konkurim është një sfidë ndërsa vlerësimi është shumë kompleks. Unë kam besim tek kënga dhe tek interpretimi im. Nuk mund të them se do të kthehemi në Shqipëri me trofe, pasi nuk i kam dëgjuar këngët e tjera konkuruese, por mendoj se kemi realizuar diçka të bukur dhe që do të vlerësohet. Do të jem shumë e lumtur nëse Shqipëria do të bëjë dallim atje.

A ke patur eksperienca konkurrimi më parë?

Po, disa të tilla pasi unë kam marrë pjesë në shumë konkurse kombëtare dhe ndërkombëtare në Shqipëri, në Greqi, në Egjypt dhe kam fituar.... Ndoshta edhe kësaj radhe sjell fitore?!...

Punon shumë?

Pa diskutim, unë gjithmonë punojë e jo më përpara një evenimenti të tillë që ritmi i tyre shtohet. Për 5 vjet rresht kam punuar intensivisht në 2 shkolla njëkohësisht, paradite dhe pasdite, prova, koncerte. Kur kthehesha në mesnatë në shtëpi isha kaq e lodhur sa e vetmja dëshirë ishte një dush i ngrohtë dhe pak gjumë.

Çfarë të tremb?

Asgjë. Në këtë kohë jam e plotësuar më të gjitha elementët për të mos më trembur asgjë.

Pse zgjodhe Greqinë për të studiuar?

Unë isha vetëm 14 vjec për të jetuar vetëm në një vend tjetër. Në Greqi kisha të afërmit e mi, me të cilët kam jetuar gjatë kësaj periudhe dhe që shpreh rastin për ti falenderuar, duke qenë artist kishin lidhje me rrethet artistike atje.

Si vendose të konkurosh në festivalin e fundvitit në Tiranë?

Skena shqiptare më ka munguar jashtë mase në këto 6vjet që jam larguar, sepse unë e kam shijuar në tërë dimensionet e saj magjinë e skenës së Pallatit të Kongreseve që në Festivalin Europian dhe deri në interpretimin në edicionin e parë të Këngës Magjike në vitin 1999. Unë isha vetëm 14 vjeç dhe konkuroja me të mëdhenjtë e muzikës shqiptare dhe largimi im ishte si ndërprerja e një fluturimi. Përgatitesha për edicionin e dytë të Këngës Magjike 2000 pas prezantimit në TVSH, kur mora vesh se më kishin pranuar në shkollën e muzikës në Athinë. Kështu që e lashë konkurimin në mes…Qysh prej asaj kohe nuk kam marrë pjesë në asnjë eveniment në Shqipëri për arsye të angazhimeve të ngryshme në Greqi dhe jashtë, por pjesëmarrja në Festival ka qenë një pikësynim që jo vetëm e realizova, por po më shpie në një eveniment tjetër si ky i fundit.

Era, duke ju uruar fitoren, çfarë mund të thoni për këngën tuaj?

Kënga që do të interpretoj unë në festival është është një këngë e mbështetur në një tekst emocionant që ka mendim dhe ndjenjë në shkallën sipërore. I këndohet dashurisë, ndjenjës më madhështore njerëzore…Kështu që edhe muzika e përputhur mrekullisht me një tekst të tillë e duke mbajtur parasysh edhe karakteristikat e zërit tim, është si një himn…Të paktën ashtu e ndjej unë…Shpresoj që këtë këngë ashtu si e priti publiku shqiptar, ta presë edhe publiku turk, duke arritur jo vetëm misionin e saj, por edhe ambicjet e të gjithë popullit tonë.

Tema