-Shqiptarët në Maqedoni, që votuan me 65 % programin e BDI-së, nuk vendosën që të jem në opozitë; Deputetin e 18-të që e humbëm, VMRO-ja e ka dhuratë nga PDSH-ja
++++++++++++
-Me pazarllëqe të fshehta VMRO-DPMNE-ja e Nikolla Gruevskit dhe PDSH-ja e Arbën Xhaferit arritën që të merren vesh dhe me këtë rast e shkelën vullnetin e shumicës së shqiptarëve në Maqedoni
++++++++++++++
INTERVISTË EKSKLUZIVE me liderin e BDI-së Ali Ahmetin
Ahmeti: Nuk jam në opozitë
Mbes në qëndrimin se Maqedonia është atdheu im
Arsim Sinani
Tetovë, 19 gusht – “Shqiptarët në Maqedoni nuk vendosën që BDI-ja të jetë parti opozitare, por ata ia dhanë besimin që t’i mbrojë interesat e tyre. Shqiptarët në Maqedoni votuan për programin zgjedhor të BDI-së dhe fitorja është jashtëzakonisht e thellë. Mbi 65 për qind e shqiptarëve votuan për këtë opsion...”, ka thënë në intervistën ekskluzive për “Epokën e re”, Ali Ahmeti. Ai ndër të tjera flet për gjendjen paszgjedhore në Maqedoni; protestat që koalicioni BDI-PPD i ka organizuar në shenjë pakënaqësie me jopërfshirjen e këtij koalicioni në qeverinë e re maqedonase; shqetësimin që ia ka krijuar zëvendësimi i një deputeti shqiptar me një maqedonas falë PDSH-së; hapat që do të ndërmerr BDI-ja në të ardhmen etj.
Shqiptarët në Maqedoni votuan për programin zgjedhor të BDI-së
Epoka e re: Z. Ahmeti si po i kaloni këto ditë vere në “opozitë”?
Ahmeti: Më duket se përkundër qëndrimeve të mia të drejtën për ta vënë në opozitë një parti politike e ka populli, e shqiptarët në Maqedoni nuk vendosën që BDI-ja të jetë parti opozitare, por që t’i mbrojë interesat e tyre. Shqiptarët në Maqedoni votuan për programin zgjedhor të BDI-së dhe fitorja është jashtëzakonisht e thellë d.m.th. mbi 65 për qind e shqiptarëve votuan për këtë opsion. Por, akrobacionet politike që bëhen brenda Maqedonisë unë nuk i kuptoj, sepse nga 2002 në këtë vend përveç BDI-së, që ishte force e re politike me vizion shumë të qartë, të tjerët janë trupa të teatrove të vjetër dhe sigurisht mund t’i bashkojnë shumë qëndrime të përbashkëta që unë nuk i di. Me një fjalë, e gjithë kjo që po ndodh nuk është në të mirë të Maqedonisë, kuptohet nuk është as në të mirë të shqiptarëve, sepse thellohet mosbesimi në mes të maqedonasve dhe shqiptarëve, dhe ky vend për të ecur përpara i duhet besim reciprok në mes të komuniteteve më të mëdha si bartëse kryesorë të integritetit, sovranitetit e përgjegjësive politike për realizimin e qëllimeve madhore të cilat ne i kemi. Por, ja që me pazarllëqe të fshehta VMRO-DPMNE-ja e Nikolla Gruevskit dhe PDSH-ja e Arbën Xhaferit arritën që të merren vesh dhe me këtë rast e shkelën vullnetin e shumicës së shqiptarëve në Maqedoni.
Përpjekja për depërtim të së vërtetës
Epoka e re: Ju mendoni se jeni të dëmtuar?
Ahmeti: Me këtë rast nuk është dëmtuar BDI-ja, por janë të dëmtuar shqiptarët në tërësi dhe kjo neve na brengos. Nuk është çështja se ne (si parti) jemi dëmtuar.
Më duhet të them se disa mediume të paguara prej partive politike thonë se BDI dhe PPD me çdo kush insistojnë që të jenë pjesë e koalicionit. Kjo nuk qëndron fare, sepse këtu shkelet një e drejtë legjitime, në radhë të parë e drejta e votuesit shqiptar, dhe nëse e heqim një paralele mes komunitetit maqedonas dhe atij shqiptar, si do ta përjetonte komuniteti maqedonas nëse shqiptarët nuk e respektojnë vullnetin e shumicës së komunitetit maqedonas? Ne përpiqemi që në këtë drejtim t’i sqarojmë njerëzit, të komunikojmë drejtpërsëdrejti me votuesit tanë, por edhe me ata që nuk kanë votuar fare, e ata paraqesin një pjesë bukur e madhe, që ta kuptojnë drejt se ne insistojmë që të mbrohet vota dhe dinjiteti shqiptar.
Për protestat
Epoka e re: Një cikël protestash i përfunduat. Tash me çfarë formash do të vazhdoni, si do ta shprehni ju pakënaqësinë tuaj?
Ahmeti: Po. Ne, një formë të protestave e paraqitëm për tetë ditë me radhë për të dhënë alarmin e parë që nga Struga deri në Kumanovë me bllokadat në rrugë, me qëllim që të trokasim në ndërgjegjen e qoftë mandatarit Nikolla Gruevski, qoftë të PDSH-së që të mos bëjnë hapa të shpejtuara. Mendojmë që politikisht e arritëm qëllimin.
Të mërkurën e ndërpremë këtë lloj të protestave me bllokada.
Tani i kemi filluar takimet me qytetarët për të marrë edhe mendimin e tyre për vazhdimin e shprehjes së revoltës së mëtutjeshme në drejtim të mospërfilljes që po i bëhet votës së shumicë shqiptare në Maqedoni. Nuk e di, ndoshta mund të ketë protesta nëpër qytete, mund të ketë përpara institucioneve… Për këtë do ta shohim, do ta përcaktojmë në takimet e ardhshme që do t’i kemi me organet drejtuese të partisë si dhe me partnerin e koalicionit, PPD-në, me të cilën konsultohemi vazhdimisht.
Besim i thellë në Abdyladi Vejselin
Epoka e re: Kur jemi te koalicioni me PPD-në, a mendoni se Abdyladi Vejseli do të vazhdojë të ju mbështes juve?
Ahmeti: Është shumë e sigurt se z. Abdyladi Vjeseli e mbështet koalicionin, sepse ne bashkë kemi hyrë në këtë fushatë elektorale, bashkë i kemi fituar zgjedhjet parlamentare dhe bashkë do ta ndërtojmë strategjinë e veprimit të mëtutjeshëm politik se si do t’i dalim zot këtij besimi që neve na e dha elektorati shqiptar në Maqedoni.
Epoka e re: A mendoni se z. Vejseli nuk do të lëviz nga deklaratat që i ka dhënë deri tash dhe se do t’u qëndrojë besnik juve dhe partisë suaj?
Ahmeti: Unë jam shumë i sigurt që z.Vejseli nuk bën demagogji me deklarata. Edhe ju vetë do të bindeni që vërtet Abdyladi Vejseli është shumë i vendosur në drejtim të respektimit të fjalës së dhënë, pikësëpari, nga vetë ai si lider, si udhëheqës i Partisë së Prosperitet Demokratik, por edhe nga organet drejtuese, nga të cilat organe drejtuese ai ka mbështetje të plotë. (VIJON)
BOX
T: ‘Ruaje zot Shqipërinë prej shqiptarëve’. Kurrë s’do t’ia bëja si PDSH-ja, që emrin Besnik ta shkelë me Zhivko
Deputetin e 18 që e humbëm, VMRO-ja e ka peshqesh nga Partia Demokratike Shqiptare
Epoka e re: Në raundin e dytë ku u rivotua në disa vendvotime shqiptare, BDI-ja e humbi një deputet. Pse ndodhi kjo?
Ahmeti: Kjo është pyetje që e shtrojnë shumica dërrmuese e shqiptarëve dhe përgjigja është shumë e qartë, deputetin e 18 që e humbëm, VMRO-ja apo Partia e z.Grueveski e ka peshqesh nga Partia Demokratike Shqiptare dhe tamam kjo i ngjan asaj thënies së moçme shqiptare ‘Për inat të s’ime re më vdektë djali’. Do të thotë, nën propagandimin e PDSH-së, VMRO-DPMNE-a arriti që me votën e disa shqiptarëve, BDI-së t’ia zbres numrin e deputetëve nga 18 në 17. Ky ishte pastër si rezultat i angazhimit të PDSH-së, për çfarë unë shpreh keqardhje. Kurrë në jetën time nuk do të kisha vepruar kësisoj, pavarësisht se në çfarë raportesh unë do të isha me një parti apo me një individ maqedonas që ta dëmtoj partinë apo njerëzit që i takojnë të së njëjtës origjinë apo të njëjtit gjak. Mirëpo, ja që gjëra të tilla ndodhin për fatin tonë të keq dhe uroj që për Partinë Demokratike Shqiptare kjo të jetë një mësim i keq që ndodhi më 19 korrik. Me këtë rast do ta kujtoj thënien e Faik Konicës, që me të vërtetë është shumë aktuale gjatë kohë ,derisa nuk kemi zgjidhje të mira, ‘Ruaje zot Shqipërinë prej shqiptarëve’.
Epoka e re: Z. Ahmeti sa është e vërtetë se atë natë kur e keni kuptuar se e keni humbur një deputet keni qenë shumë nervoz. Kështu flitet të paktën nëpër Çarshinë e Tetovës?
Ahmeti: Nuk do të isha bërë nervoz sikur t’i kisha humbur zgjedhjet, besomëni. Por, nuk desha që ta përjetoj që një parti politike shqiptare ta ndihmojë një parti të komunitetit maqedonas dhe që deputetin e quajtur Besnik Emshiu ta zëvendësojë deputeti me emrin Zhivko, mbiemrin nuk ia mbaj mend.
Epoka e re: D.m.th. rëndë e keni përjetuar këtë?
Ahmeti: T’ua them të drejtën juve edhe lexuesve të “Epokës së re”, shumë rëndë e kam përjetuar këtë.
Krijoni Kontakt