Saimir Strati thyen rekordin Guiness

[Albo]

Kuriozitet - Piktori dhe artisti i mozaikëve, Saimir Strati, gati të thyejë Rekordin Botëror me mozaikun më të madh në botë realizuar me gozhdë. Ngujimi nën mbik[qyrjen e të dërgurave të Ginesit

Një shqiptar synon ginesin me 500 kg gozhdë


Elsa Demo

Saimir Strati ndihet i mbushur shpirtërisht e psikologjikisht të thyejë një rekord. As më pak, as më shumë, por një rekord Gines. Një rekord për mozaikun më të madh që do të realizohet me 500 kg gozhdë. Një gjë gjigante kërkon dhe një subjekt gjigant: autoportreti i legjendës Leonardo Da Vinci “i skicuar” dhe “i pikturuar” me një sasi të tillë gozhdësh që nuk i kalojnë 3 centimetrat.
Si mund të jetë rekord “një çmenduri” që nuk është provuar akoma se mund të thyhet? Kushdo mund ta bënte këtë pyetje ndaj të cilës 40-vjeçari nga Tirana, nuk e quan të nevojshme të mbushë mendjet dyshuese, veçse me veprën-projekt gati për zbatim. Nuk zotëron tjetër bindje. Artisti piktor, mozaiçist, anëtar i Shoqatës Britanike të Mozaikut Modern prej dy vitesh, në 6 korrik 2006 reshti së qëni një aplikant në Rekordet Gines. Ai ka tashmë një marrëveshje me përgjegjësin e rekordeve në Londër, menaxherin Amarilis Espinoza, dhe numri i regjistrit të shqiptarit është 155731. Ndërsa pritet ardhja e arbitrit që do të çertifikojë veprën, Saimir Strati përgatitet për të kontrolluar energjinë e tij në reality show. 12 orë punë në ditë për një vepër në përmasat 2m x 4m brenda 24 ditëve. Punë që do të mbikëqyret nga një juri shqiptare në përbërje të së cilës do të jenë juristë, avokatë, noterë dhe njerëz të medias që do të mbajnë një proces-verbal. Kështu pra rekordi quhet “Mozaiku më i madh me gozhdë”; është hera e parë në botë që vendoset një rekord në këtë fushë dhe me thyerjen e rekordit, autori pozicionohet i pari në renditjen e konkurrentëve të fushës. Strati ka zgjedhur autoportretin e famshëm të Leonardo da Vincit, artisti dhe figura e preferuar për gjeninë e këtij njeriu. “Ai vetë ka qenë një kërkues i madh dhe unë e zgjodha për të shkuar në këtë rrugë të pashkelur. Kjo nuk është një vepër arti. Dhe për thyerjen e rekordit nuk ka shumë rëndësi të qenurit e tillë. Madje për këtë rekord unë nuk do të preferoja një krijim timin”. Saimiri, një person aspak impulsiv, thekson edhe një herë se ky nuk është rekord i forcës, por një rekord inteligjent. E veç kësaj, ai e ka thyer frikën, frikën që edhe “bota”, ajo përtej izolimit të vendit të tij, mund të thyhet. Si me shaka, në kontekstin e debateve të ditës në media, edhe mund t’ia demonstronte veprën e tij AA Gill-it, artikullshkruesit fyes për Shqipërinë dhe shqiptarët. Por stop deri këtu. Brenda delireve të tilla nuk bëhet kjo vepër. Saimir Strati prej 15 vitesh krijon me mozaikë, jo vetëm në dy por edhe në tredimensional. Ai është kërkues i lëndës, i “gurit” të mozaikut që nga lëvozhgat e vezës, qelqi, e deri tek disqet. Për shembull, para një viti ka realizuar me 400 disqe në përmasat pak më shumë se natyralja portretin-mozaik të Adriano Çelentanos. Ndërsa portretin e Leonardo Da Vincit ai do ta realizojë në reliev dërrase ku do të ngulen pak nga pak me çekiç 500 kg gozhdë të errëta e të çelëta, ose ndryshe të kromuara e të nikeluara. E gjithë puna mund të peshojë 700 kg.
Asnjë qindarkë veç diplomës Gines, nuk përfiton Saimiri. Vepra depozitohet përfundimisht në këtë institucion rekordesh dhe tashmë është përcaktuar qëllimi i saj-humanitar. Do të thotë se fitimet dhe menaxhimi do të bëhet nga Rekordi i “çmendurive” Gines. Në librin e Rekordeve Gines që prej themelimit në 1955, pas Agim Agushit, i vetmi shqiptar që ka hyrë në 2005, për rekordin e mbajtjes së topit me kokë ulur, ndoshta Strati do të jetë i dyti, por i vetmi në fushën që ka zgjedhur.
E gjitha kjo i kushton artistit që tenton rekordin jo vetëm energji, lodhje, punë në një ambient të mbyllur e nën mbikëqyrje –ky ambjent mund të jetë Piramida në Tiranë – por edhe një shumë të madhe parash, diku tek 30 mijë euro, me mbështjejen e sponsorëve të cilët do të reklamohen përbri flamurit shqiptar. “Kam aq bindje sa nuk mund të bind ndokënd se do të dështojë. Gozhda e fundit dmth, diplomë”. Saimiri e ka gjithçka gati: çekiç dhe gozhdë. Është çështje ditësh.


Kush është
Saimir Strati është 40 vjeç. Është diplomuar për pikturë në Akademinë e Arteve të Bukura në 1989. Po këtë vit fiton Çmimin e Parë në Konkursin Kombëtar të Arteve të Aplikuara. Ka punuar si restaurator i mozaikëve në sitet antike të Butrintit, Apolonisë dhe Bylisit. Në 1996 hap të parën ekspozitë personale. Dy vjet më pas një tjetër ekspozitë ku prezanton bashkë me pikturën edhe punët e para në mozaik.

Shekulli

[Davius]

Piktori dhe artisti i mozaikëve, Saimir Strati, nis sot aventurë punën për të thyer Rekordin Botëror me mozaikun më të madh në botë realizuar me gozhdë. Është një Da Vinçi 500 kg gozhdë

Saimir Strati, nis sot aventura e Ginesit

Saimir Strati, njeriu që synon të thyejë Rekordin Botëror Gines nis sot aventurën në orën 10 në Qendrën Ndërkombëtare të kulturës. Rekord do të jetë realizimi i një mozaiku me 500 kg gozhdë 3 cm, në përmasat 2m X 4m që ka për subjekt autorpotretin e Leonardo Da Vinci. Lajmin e ka bërë të ditur vetë Strati i cili nga nesër do të jetë i ngujuar si në një reality shoë, nën mbikëqyrjen e një jurie. 40-vjeçari nga Tirana anëtar i Shoqatës Britanike të Mozaikut Modern aplikoi për në Rekordet Gines dhe realizoi një marrëveshje me menaxherin Amarilis Espinoza. Numri i regjistrit të shqiptarit është 155731. Saimiri do të punojë nga 12 orë gjatë 24 ditëve për të thyer rekordin e quajtur “Mozaiku më i madh me gozhdë”. Vepra do të depozitohet përfundimisht në këtë institucion rekordesh dhe tashmë është përcaktuar qëllimi i saj-humanitar. Fitimet dhe menaxhimi do të bëhet nga Rekordet Gines. Në librin e Rekordeve Gines që prej themelimit në 1955, pas Agim Agushit, i vetmi shqiptar që ka hyrë në 2005, për rekordin e mbajtjes së topit me kokë ulur, ndoshta Strati do të jetë i dyti, por i vetmi në fushën që ka zgjedhur.

Saimir Strati është diplomuar për pikturë në Akademinë e Arteve të Bukura në 1989. Po këtë vit fiton Çmimin e Parë në Konkursin Kombëtar të Arteve të Aplikuara. Ka punuar si restaurator i mozaikëve në sitet antike të Butrintit, Apolonisë dhe Bylisit. Në 1996 hap të parën ekspozitë personale. Dy vjet më pas një tjetër ekspozitë ku prezanton bashkë me pikturën edhe punët e para në mozaik. Prej 15 vitesh ai krijon mozaikë, jo vetëm në dy por edhe në tredimensional me lëvozhgat e vezës, me qelq, deri dhe me disqe.

Gazeta SHEKULLI

[Davius]

Jam i përgatitur për të qenë në librin Guinness

Mozaiku më i madh me gozhdë është një rekord botëror i cili do të vij në Shqipëri nga piktori Saimir Strati. Vepra puna për të cilën filloi dje, konsiston në një mozaik gozhdësh të ngulura në një platformë druri me përmasa 4m x 2m, i cili do të paraqesë autoportretin e Leonardo da Vinçit. Për realizimin e saj, është parashikuar të përdoren 400 deri në 500 mijë gozhdë industriale të disa llojeve dhe tipeve të ndryshme. Si rezultat i një komunikimi gati gjashtë mujor me Organizatën Botërore të Rekordeve Guinness është siguruar që vepra të kandidojë për rekordin botëror Mozaiku më i madh me gozhdë.Saimir Strati aderon pranë kësaj organizate me numrin e anëtarësisë 155731ndërsa vepra konkuron me numrin e pretendimit 171723. Me nënshkrimin nga ana e Saimir Stratit të Marrëveshjes për Tentativën për Rekord me Organizatën Guinness është dërguar nga kjo e fundit udhëzuesi me kërkesat specifike për rekordin, i cili, së bashku me e-mailin shoqërues, përbëjnë autorizimin për fillimin e punës. Sipas konsultimeve me regjistrin e rekordeve të Organizatës Guinness është hera e parë që punohet për një rekord të tillë. Krijimi i veprës është parashikuar të zgjasë rreth 25 ditë. Puna për krijimin e saj do të kryhet nga Saimir Strati i vetëm në Odeonin e Qendrës Ndërkombëtare të Kulturës “Arbnori” si dhe personelin e saj për ndihmën dhe dashamirësinë që kanë treguar duke vënë në dispozicion ambientet e zhvillimit të punës si dhe zotërinjtë: Fatmir Memaj, Gentian Tabaku, Florian Nepravishta, Mina Koxhaku, Alban Qafa, Klodian Seferaj, si dhe Nasi Bisha i cili do të jetë reporteri i këtij evenimenti të rendësishëm.

-Si ju lindi ideja për të bërë këtë intervistë?

Unë kam 15 vjet që merrem me mozaikë dhe kryesisht me teknikat e reja. Më pëlqen që të jap një gjë të re ndryshe nga ata mozaikët klasik. Një nga këto ide të reja është edhe ky mozaik me gozhdë. Kam aplikuar diçka më parë dhe më pas më lindi ideja që të thyej një rekord botëror ose të vendos më saktë një rekord botëror sepse nuk është vendosur akoma.

-Kush ju ka bërë ftesën apo me kë keni bashkëpunuar për tu bërë një nga kandidatët për rekord Guinness?

Anëtarësimi në këtë organizatë të rekordeve botërore ishte një ide dhe iniciativë personale. Ky institucion ka një sekretari me të cilët mund të kontaktosh dhe më pas operon dhe nëse pranohesh ngjitesh në statuse të ndryshme. Unë i kam kaluar të gjitha statuset dhe tani më ngelet vetëm të marr statusin përfundimtar.

-Pse zgjodhët një pikturë të Leonardo do Vinçit për këtë mozaik?

Leonardo do Vinçi ka qenë gjeni edhe për kohën e vet dhe vazhdon të jetë akoma edhe sot. Ai është një njeri dimensional e meriton një vepër dimensionale. Rekordi në vetvete vlerësohet nga dimensionet. Ai ka një madhësi prej katër metër me dy metër dhe mozaiku më i madh është pesë metër katror. Dhe për këtë vendoset rekordi Guinness për dimensionin e madh të tij. Meqënëse ky mozaik ka një dimension të madh atëherë meriton një njeri të madh si është Leonardo da Vinçi.

-Ky është mozaiku i parë që vendos një rekord të kësaj gjinie?

Po. Ky është i pari mozaik rekord. Unë e vendos i pari këtë rekord në “Librin Gines”. Ky mozaik është një ide e veçantë dhe kjo përbën një nga pikat më të rëndësishme të kësaj organizate.

-Ju jeni edhe piktor përveç se keni shumë vite që punoni mozaik. Kush është më e dashur për ju piktura apo mozaiku?

Unë kam filluar me pikturën dhe nuk mund t’a braktis por vazhdoj të pikturoj gjithmonë dhe më pak. Më duhet të bëj pikturat për mozaike.

-Ju keni bërë disa ekspozita. Kur do të vini me një ekspozitë të re për publikun?

Mendoj se do të bëj një ekspozitë vetëm me mozaik menjëherë pas vendosjes së rekordit Guinness.

-Pas vendosjes së rekordit Guinness cilat janë projektet tuaja?

Pas vendosjes së rekordit kam menduar që të bëj pak pushim pasi puna për këtë vepër ka qenë shumë e lodhshme dhe kam nevojë për pushim. Që të futesh në atë libër të madh i cili është i treti në botë për nga shitjet është pak e vështirë. Më vjen keq që nuk ka asnjë kopje në shitje të librit Guinness në Shqipëri. Më pas qëndron plani im për ekspozitën me mozaik.

-Si e ndieni veten si personi i parë që vendos një rekord të tillë në të gjithë botën?

Kënaqësia është e shumëfishtë sepse unë jam i përgatitur që të futem në atë libër gjigand të rekordeve botërore.

-Është e vështirë që të realizosh një vepër me përmasa të tilla dhe për më tepër me gozhdë. Kush është më e madhe për ju kënaqësia apo lodhja?

Për deri sa është edhe rekord edhe vepër arti kënaqësia mbizotëron. Po të vendosnin një rekord për të numëruar gozhdët unë nuk do të merrja pjesë, sepse nuk është e lehtë dhe jo më t’i ngulësh ato qindra gozhdë në një mozaik.

-Sa është numri i gozhdëve që do të përdoren për këtë mozaik?

Atë do e zbulojmë bashkë në fund, Pasi unë t’a kem përfunduar atë.

Gazeta SOT

[Albo]

Saimir Strati thyen rekordin Guiness

Për herë të parë Shqipëria pranohet në librin e rekordeve Guinnes. Certifikatën e parë për vendin tonë e ka rrëmbyer piktori Saimir Strati, i cili u pranua në rekordet botërore me portretin e Leonardo da Vinçit të formuar me gozhdë. Përfaqësuesi i rekordeve Guinnes, Kristinan Skot, pas matjes së portretit, i cili kishte përmasat 4 x 2 (m), vendosi t'i japë piktorit shqiptar rekordin e ri. Strati ka punuar prej 25 ditësh për portretin që përmban 5 000 gozhdë. Çdo ditë ai punonte nga ora 8 e mëngjesit deri në 4 të pasdites dhe 5:30 deri në 10 të mbrëmjes. Piktori u shpreh se ndjehej shumë i kënaqur që u regjistrua në rekordet botërore, që, sipas tij, nuk ishte e pamundur dhe mund të arrihej me punë. Vepra të tjera të Stratit janë edhe një portret i Elvis Pristlit me CD dhe një pikturë e formuar me lëvozhga veze. Strati kishte aplikuar edhe më parë në Guinnes me një bisht cigareje të formuar me kokrriza rëre. Gjatë marrjes së certifikatës, portreti i Da Vinçit shoqërohej edhe me një ekspozitë mozaikësh të tjerë.

Panorama

[Zemrushja]

Urime piktorit Saimir Strati...

Na behet qejfi kur zbulohen talente te tilla per Shqerine.. na bejne te ndihemi me krenare qe jemi shqiptar :)

[amaro]

Në librin e Rekordeve Gines që prej themelimit në 1955, pas Agim Agushit, i vetmi shqiptar që ka hyrë në 2005, për rekordin e mbajtjes së topit me kokë ulur, ndoshta Strati do të jetë i dyti, por i vetmi në fushën që ka zgjedhur.

Hyrja e pare tek libri Gines i Takon Mbretit Zog me rekordine tij Absolut :
Zogu Pinte rregullisht 254 cigare ne dite .

[Fiori]

Tek kjo fotografi Saimiri eshte duke punuar portretin e Leonardo Da Vincit...

[Fiori]

Strati: Paratë e Leonardos do shkojnë për bamirësi

Alma Mile

Saimir Strati hap një kategori të re në librin e rekordeve “Guinnes”. Autoportreti i Leonardos, një vepër e vërtetë arti

Është hequr në fytyrë dhe flokët e gjatë si ato të Leonardos e tregojnë edhe më të imtë. Megjithatë tepër i gëzuar. “Ishte e lodhshme, por gjithçka arrihet me këmbëngulje”, - thotë ai, ndërsa shtrëngon duart e dhjetëra njerëzve që nuk duan të humbin rastin që ta përgëzojnë. Saimir Strati është shqiptari i parë që hyn në rekordet “Guinnes”. Mbrëmjen e së martës, ishte vetë përfaqësuesi i kësaj market të famshme, Christian Scott, i cili pasi verifikoi të gjitha faktet, regjistrimet, fotografitë dhe mati përmasat e veprës, deklaroi me një buzëqeshje 24 carat se Shqipëria tashmë ka të parin emër në Rekordet “Guinnes”. Kaq u desh që në sallë të shpërthenin duartrokitje dhe blice pa fund aparatësh fotografikë. Për 25 ditë me radhë Strati realizoi autoportretin e Leonardo Da Vinçit, në një sipërfaqe prej 8 metrash katrorës. Të gjithin me gozhdë të përmasave dhe nuancave të ndryshme. Mahnitëse. Sytë e thellë, vetullat e trasha, flokët dhe mjekrra e derdhur, një dritëhije që do ta kishte zili dhe vetë Leonardoja. Sa hyn në odeonin e Qendrës Ndërkombëtare të Kulturës, apo piramidës, ku për 25 ditë, Strati qëndroi i përkulur mbi veprën e vet, zor se mund ta besosh që portreti i vendosur në qendër të sallës së nxehtë, nuk është një pikturë. Struktura është aq unike, saqë nuk lë vend për dyshime. Në shoqërinë e veprave të tjera të realizuara në formë mozaikësh nga Strati, ku përveç gozhdëve përdoren edhe materiale të tjera si gurë, qelq, CD, madje edhe lëvozhga vezësh, portreti i Da Vinçit është në të vërtetë një kryevepër. Edhe i dërguari i rekordeve “Guinnes”, të cilit i ka rënë rasti të shqyrtojë shumë raste të tilla, nuk mund ta mohojë se bëhet fjalë për një vepër të vërtetë arti. “Saimiri bëri zgjedhjen e duhur, duke filluar që nga portreti i përzgjedhur deri tek materialet. Në listën e rekordeve ne kemi lloje të ndryshme mozaikësh, të realizuar me materiale dhe përmasa nga në të ndryshmet, por nuk kemi një të tillë. Saimiri krijoi një kategori të re rekordesh, të cilin mund ta konkurrojnë të tjerë në të ardhmen”, - thotë Scott. Për Startin rekordi Guinnes ishte një sfidë, një ëndërr e hershme që ai e realizoi. Por kjo nuk do të thotë se ai do ndalet këtu. “Kam 20 vjet që merrem me mozaikët, ata janë jeta ime”, - thotë artisti, ndërsa shton se nuk do mundohet të thyejë rekordin e vendosur nga vetë ai, por të realizojë diçka tjetër. Sa i përket fatit të veprës, i dërguari nga Londra thotë se ajo i përket autorit dhe është e drejta e tij të bëjë ç’të dojë me të. Ndërsa vetë Strati thotë se tashmë vepra i përket Rekordeve “Guinnes” dhe sipas kontratës, në rast se ajo shitet, të ardhurat do të shkojnë vetëm për bamirësi. Gjithsesi pritet një tjetër konfirmim nga Londra dhe një tjetër ceremoni ku do të dorëzohet edhe çertifikata, që vërteton se Saimir Strati është tashmë një prej mijëra personazheve që kanë shënuar një rekord. Mendohet që autoportreti Leonardo da Vinçit të jetë realizuar me një sasi prej 500 mijë gozhdësh. “E gjithë vëmendja ime u përqëndrua tek vepra. T’ju them numrin e saktë të gozhdëve është e njëlloj si të pyesësh një kompozitor se sa nota ka hedhur në partiturën e tij”, - thotë Strati, i cili gjatë gjithë mbrëmjes bëri fotografi me të pranishmit në ceremoni, që donin të kishin në kujtimet e tyre edhe një shkrepje me rekordmenin.

Shekulli

[RTP]

http://www.mosaicart-sast.com/


http://www.edicom.ch/fr/news/culture...ontent=2057866

http://articles.news.aol.com/news/_a...05103409990001

http://www.smh.com.au/ftimages/2006/...012669657.html

http://www.impactlab.com/modules.php...ticle&sid=9165

http://www.stuff.co.nz/stuff/0,2106,...9a4560,00.html

http://www.china.com.cn/world/txt/20...nt_7133400.htm

http://www.avmaroc.com/actualite/art...is-a42715.html

http://www.triera.net/novica.php?id=A130599

http://www2.cronica.com.mx/nota.php?id_nota=259548

http://uk.news.yahoo.com/05092006/80...ir-strati.html

http://webcenters.netscape.compuserv...0DiCaprio&id=4




http://haber.mynet.com/detail_news/?...te=05Eylul2006

Eh,lexone edhe `haberin`turk .
Shihni me cfar fotoje sherbehen

[Fiori]

"Të ardhurat nga Da Vinçi, për bamirësi"
Per Gazeten Panorama ANILA MEMA

Më në fund Shqipëria hyn zyrtarisht në librin e rekordeve "Gines". Saimir Strati, piktori 43-vjeçar nga Vlora, shënohet si fituesi i pari i çmimit më të madh botëror për veprat e veçanta.

Me portretin e Leonardo da Vinçit të punuar më gozhdë industriale, mbrëmjen e së hënës, në ambientet e QKK, anglezi Christian Scott, gjyqtari i këtij çmimi, e ka vlerësuar si artistin e parë që çel një sesion të ri në "Gines". "Kjo është diçka krejt unike dhe spektakolare. Jemi mahnitur. Nuk ka pasur asnjëherë një mozaik të bërë me gozhda. Gozhda është gjëja e rëndësishme, madje në rekordet "Gines", nuk ka pasur asnjëherë punë të tillë", shprehet Scott. Portreti i Da Vinçit, i punuar nga piktori shqiptar, ka përmasat katër me dy metra dhe është një nga portretet më të mëdha realizuar për të. Por çfarë do të ndodhë me portretin pas pranimit në "Gines". Sipas Saimir Stratit, ende nuk dihet ndonjë gjë konkrete, deri në një fazë të dytë, kur përfaqësuesit e rekordit botëror të vendosin. "Në fillim unë aplikova që të ardhurat do të shkojnë për bamirësi, por nuk mund të them se cili është destinacioni i veprës", shton piktori.

Së fundmi ia arritët qëllimit. Shqipëria hyn zyrtarisht në rekordet "Gines" falë punës suaj. Si do ta quanit këtë moment?
Në këtë pikë jam i lumtur. Shqiptarët tashmë e kanë një "Gines" dhe të kesh një "Gines" është një atribut, unë kështu e kam menduar. Por që të marrësh një atribut duhet të punosh dhe vetëm të punosh. Ndaj edhe sot ndodhem këtu, me ju dhe me këtë sukses. Sigurisht, rekordi është individual, por kënaqësia për ta sjellë atë në Shqipëri është më e madhe.
Ç'do të ndodhë me veprën tani pas pranimit në rekordet "Gines". Cili do të jetë destinacioni i saj?

Dua të them se ka qenë një punë e gjatë dhe e madhe për t'u bërë, por tanimë jam i kënaqur për rezultatin. Të them të drejtën ende nuk e di se çfarë do të bëhet me portretin e Leonardo da Vinçit, që tashmë ka hyrë në listën e rekordit "Gines". Kjo është pjesë e protokollit. Duhet një moment i dytë për të vendosur për fatin e saj, pasi mua të më dorëzohet diploma dhe pastaj të plotësohet pjesa protokollare. Por dua të them se në momentin e parë që unë kam aplikuar për rekordin "Gines", ideja ishte që kjo vepër, pasi të shitej, paratë e saj të shkonin për bamirësi. Tani më duhet të pres të vijë një konfirmim tjetër nga "Gines"-i, sepse zotëria Christian Scott është gjyqtar dhe jo ekspert për menaxhimin. Ndërsa për sa i përket destinacionit, edhe unë vetë do të isha kurioz se ku do të shkonte, por këtë gjë nuk e di.
Këto kohë deri në përgjigjen e dytë ku do të qëndrojë vepra?
Sigurisht vepra, së bashku me punët e tjera, me të cilat shoqërohet në këtë ekspozitë, do të qëndrojë në ambientet e QNK. Sigurisht do të jetë e hapur për vizitorët.

Si mund t'i cilësoni këto 25 ditë të punës suaj?
Duke qenë orë të gjata pune, veç lodhjes aty brenda ka qenë edhe kënaqësia, të cilën më shumë se kurrë e ndjej tani.
Suksesin ia dedikoni Leonardos?

Në fakt deri diku po, pasi ky portret shpesh më është dukur i pambyllur, i cili në një moment të caktuar të duket sikur mund të vazhdonte. Mendova ta realizoja në një formë tepër të veçantë, siç janë gozhdët, por edhe portreti i tij përherë më ka nxitur që të punoj. Dua të theksoj se rekord përbën vetëm dimensioni i portretit, që është katër me dy metra, nuk përbën as numri i gozhdëve dhe as koha rekord. Unë vetë e vendosa këtë limit kohor.
Ç'do të bëni nesër?
Pasi të çlodhem tërësisht, do të filloj t'i kushtohem sërish krijimtarisë sime. Pasi për shumë kohë kam pasur një shkëputje të madhe me të. Sigurisht nuk mund të them që do të punoj sërish në këtë kategori, por ju premtoj se nga fundi i vitit kam një surprizë.

• 25 DITE
piktori shqiptar, Saimir Strati, ka punuar për portretin e madh të Leonardo da Vinçit, i cili tashmë është pjesë e rekordit "Gines"

• 155 MIJEështë numri që aderon Strati pranë "Gines"-it, ndërsa vepra e krijuar me gati 500 mijë gozhdë konkurron me numrin e pretendimit 171723

[Albo]

Saimir Strati për herë të dytë drejt librit Guinnes

Nga Dhurata Hamzai

“Kur fillon ta njohësh mirë Saimir Stratin, ta njohësh si artist dhe si njeri, pyet veten: nga vjen ai, vjen nga një e shkuar e largët apo vjen nga e ardhmja”, shkruan për të shkrimtari i njohur Zija Çela. Shkrimtari vëren se Saimiri ka një simbiozë në punë dhe në jetë, ka një binjakësi shpirti i tij artistik. “Ka dukje, buzëqeshje të vetvetishme, vlime e përvëlime të avullta, ka diçka të gëzueshme e diçka të trishtueshme, me një fjalë, ka ngjyra. E kjo, s’di përse, të sjell ndër mend ylberin”, thotë Çela. Në të vërtetë Saimir Strati duhet prezantuar me bujë, jo se nuk ka ekzistuar si artist i madh, si njeri i madh e mik i madh i artit dhe i shkrimtarëve. Madje edhe pse është një tip i këndshëm, ai s’u bë dot një nga emrat më të njohur në median shqiptare. Dhe kjo, jo për faj të tij, por ngaqë vetia e tij krijuese nuk mundet të mishërohet, nuk mund të mvishet, të kukullazohet, pasi është tepër frymore. Çfarëdo gjëje të mirë e të bukur të bëjë Saimir Strati, në faqet kulturore të gazetave do t’i thonë “hej, stop” kukullat barbi, ose velinat me emrat Çiljeta, Zajmina e Pamela për të cilat shkruhet çdo ditë. Me përjashtim të shkrimtarit Zija Çela që ka folur për Stratin dhe veprën e tij, pasi ka njohur nga afër krijimtarinë, vetëm një herë ndodhi që Saimir Strati të shfaqej në të gjitha gazetat ditore. Dhe kjo jo për merita të gazetarëve të kulturës. Nuk ndodhi as kur ai bëri kryeveprën e tij me gozhdë, as kur e mbaroi në mes të Qendrës Kulturore të Tiranës (Piramida), por disa kohë më vonë kur me portretin e Da Vinçit të punuar me gozhdë Saimir Strati do të vendoste definitivisht një rekord botëror në librin Guinnes. Në të vërtetë kjo ndodhi për meritë të Scott Christie, anëtar i jurisë së çmimit Guiness që erdhi posaçërisht nga Londra në Tiranë dhe u shpreh për median vendase se “vepra e Saimir Stratit është diçka krejt unikale dhe spektakolare në botë”.

Një vit më parë

Një vit më parë piktori Strati kishte konceptuar vetë një ide me destinacion që të kishte emrin e tij në librin e rekordeve Guinnes. As vetë nuk e dinte nga i erdhi kjo ide, por e dinte mirë që do t’ia arrinte qëllimit. Strati vjen nga atdheu i mozaikëve, por një mozaik i punuar me lëndë të papërdorura më parë mund të perceptohej vetëm në imazhet frymore të Saimir Stratit. Si mik në këtë atë skenë të përvuajtshme krijimtarie, rekordi Strati zgjedh autoportretin e Leonardo da Vinçit, sepse veç ai mundi t’i jepte vërtetë kurajë. Për piktorin Strati Da Vinçi ka qenë njeriu që e arrinte atë që për të tjerët ishte e paarritshme. Shkrimtari Zija Çela e kujton me emocion rekordin e tij një vit me parë duke e përshkruar në këtë mënyrë: “Do t’i qëndronte fjalës që më kishte thënë apo, i pushtuar nga trysni të paparashikuara, do të ndryshonte mendje? Çka do të thoshte se, në atë telajo druri me përmasa të atilla që meritojnë të quhen të formatit fasadë, ku do të niste jeta e veprës, cila zonë do të prekej në fillim? Kur ra çekiçi i parë (ishte si të thuash, kur ra martina e parë), edhe ra përmbi gozhdë, desh fola me zë, mos o Zot, ia nxori kokërdhokun. Por pikërisht me gozhdë ai nisi të konturonte syrin e djathtë, sepse kishte hyrë drejt e në anatominë më delikate të portretit, atë që përcakton karakterin”. Ndërsa me tej duke profetizuar fatin e artistit Zija Çela shkruan: “Më pas, ndërsa kumbimi i çekanit vazhdoi ditë me radhë, për autorin dhe veprën e tij për fat të mirë u dëgjuan shumë lodra, u fol në gazeta e televizione, brenda e jashtë vendit, madje lajmëruan dhe angjencitë më prestigjioze të medias botërore. Kurse tash ka rënë heshtja, është krijuar distanca, koha e qetësisë, e nevojshme për përsiatje”.

Lajmi i pashkruar...

Por ndërsa barbiushkat lodrojnë e këndojnë me “çupa- çupa” plazheve të Shqipërisë e publiku për to nga gazetarët ka mësuar shumë; se me kë shoqërohen, me kë flenë, çfarë picash hanë, çfarë parfumi kanë e deri tek çfarë u thotë mami për ngjyrën e flokëve, numurin e bikinive, firmën e shampove, heshtja që qarkon veprimtarinë artistike të Saimir Stratit nuk duket sikur vjen nga koha e qetësisë, ose nga koha e nevojshme për përsiatje, sepse profesionalisht do të ishte vërtetë lajm që piktori ka çelur një ekspozitë personale me 20 punime dhe ndryshe nga sa veprojnë piktorët në këto raste ai është ulur paq në ambjentet e Qendrës Ndërkombëtare të Kulturës në kryeqytet duke punuar mbi 14 orë punë intensive në ditë një vepër madhështore. Me sa duket për të mos humbur kohë ai mban pranë mbi 1 milion kunja dhëmbësh. Ka vendosur për të bërë mozaikun më të madh në botë. Shkopinjtë e hollë të drurit këtë herë do të jenë lënda e parë për një vepër arti. Ai po vrapon drejt rekordit Guinnes dhe ende nuk po e konsiderojnë lajm gazetarët, kur ai jo shumë larg por një vit më parë rrëmbeu ekskluzivisht rekordin Guinnes. Saimir Strati po vrapoka sërish drejt një rekordi të ri. Ka caktuar datën 4 shtator si ditë të përfundimit të veprës së tij. Nuk heziton ashtu si ka bërë një vit më parë të pohojë se ky është një hap i sigurt për të hyrë sërish në librin Guinnes. Ai e di se deri më sot nuk ekziston një mozaik i tillë. Ndërsa gjyqtarët e Guinnes, një vit më parë autoportretin e Leonardo Da Vinçit e vlerësuan si “çudia e gozhdëve”, tashmë çudia e dyte është ajo e një milion kunjave të drurit. Kësaj vepre Saimir Strati ka menduar t’i kushtojë 40 ditë punë, e cila ka nisur disa ditë më parë në sy të gjithëve me vendosjen e kunjës së parë. Kunja e parë ngjante veçse si një vrimë e vogël gjilpere. Kjo është e rrallë..! Tema që ka zgjedhur këtë herë të afron një simbisje në zemër, sa herë që ai prek telajon gjigante me kunjat drusorë majëmprehtë. Vepra i referohet Jezu Krishtit dhe ringjalljes së tij. Gjatë këtyre ditëve Saimir Strati nuk bezdiset aspak nga vizitorët që po e ndjekin ndërsa ai është duke punuar. Ata e shohin me habi, jo të gjithë e dinë që ai është artisti shqiptar që hapi rrugën e rekordeve Guines në art. Puna e tij po filmohet në çdo simbisje të kunjit, në çdo detaj dhe pas tij qëndron një komision i përbërë nga njerëz të fushave të ndryshme, mes të cilëve edhe një jurist. Ndërsa të gjithë këta s’kanë gjasa të shohin ndonjë hile në këtë garë, së paku mundet ta ndihmojnë që të mos ta zërë gjumi në vetmi. Saimir Strati është piktor dhe aplikon në teknikat skulpturale prej 16 vitesh. Ai krijon mozaikë dydimensional dhe tredimensional. Strati e merr mozaikun nga qytetërimet e lashta dhe e sjell në kohën tonë duke i dhënë stilin e tij, frymën, ritmin, vulën e modernitetit. Ai është kërkues i lëndës, së mozaikut që nis nga lëvozhgat e vezës, gozhdat, qelqi, e deri tek disqet. Dy vjet më parë realizoi me 400 disqe në përmasat pak më shumë se natyralja portretin-mozaik të Adriano Çelentanos. Në fakt libri i rekordeve Guinnes, që botohet çdo fillimviti, është botuar për herë të parë më 1951 nga anglezi Hufh Beaver. Kanë kaluar 56 vjet që libri botohet në 100 vende të botës, në më shumë se 20 gjuhë të planetit. Kur Strati një vit më parë hyri në librin e rekordeve, shkrimtari Zija Çela tha: “Natyrisht, Guinnes-i nuk është shtëpia e mirëfilltë e artistëve, por është shtëpia e rekordmenëve të tjerë të botës, ndërsa rezultati i Stratit, bashkë me rekordin, pikërisht sepse vjen nga arti mbetet unik dhe për Guinnes-in”, ndërsa madhështinë e veprës së tij e ka komentuar në këtë mënyrë: “Mirëpo që nga ajo gjetje inteligjente dhe deri tek shndërrimi i mprehtësisë në art, nuk ka qenë e lehtë. Se shihni, në mos paça lajthitur, çfarë më sugjeron rezultati. Siç pohon shkenca, çdo njeri në organizmin e tij ka ca hekur. Por ka shumë njerëz, e pra dhe mjaft artistë, që këtë hekur e lënë të ndryshket... Jo, Saimir Strati është xhins tjetër, ai hekuri i tij është në gjendje inkandeshente, në një formë llave, atë hekur ai e kthen në gozhdë, në 500 mijë gozhdë, të cilat i nxjerr nga vetja dhe ia jep Da Vinçit në një vepër të pasprovuar për nga lloji, të denjë për galeri e muzeume. Natyrisht, gozhdët që u përdorën vërtet janë industriale, por industria nuk prodhon art, kurse gozhda, ndryshe nga balta dhe ndryshe nga gipsi, që është gjithashtu një lloj balte, nuk është njohur ndonjëherë për lëndë arti. Pikërisht mjetin që dikur i mori jetën një vigani të qiellit, Jezu Krishtit, artisti e rinovon për t’i dhënë jetë një vigani të historisë, Leonardo Da Vinçit”.

I pari

Strati është i pari shqiptari që ka hyrë në Librin Guinnes në fushën e artit të mozaikëve. Ai është diplomuar në pikturë në Akademinë e Arteve të Bukura në 1989 dhe po këtë vit fitoi Çmimin e Parë në Konkursin Kombëtar të Arteve të Aplikuara. Ka punuar si restaurator i mozaikëve në sitet antike të Butrintit, Apolonisë dhe Bylisit. Në 1996 hapi ekspozitën e parë personale. Tre vjet më pas çeli një ekspozitë, ku prezantoi bashkë me pikturën edhe punët e para në mozaik.

Tema

[RaPSouL]

Me te vertet duhet te krenohemi qe kemi edhe nje perfaqesues shqiptar ne librin e Guinnes , suksese te metutjeshme Stratit , edhe ishalla perfaqesohemi edhe me me shume persona me lemi te ndryshme.

Respekte.!

[Harakiri]

Une vizitova galerine e tij ne Tirane. Per fat te keq nuk dija c'ti thoja kur erdhi prane se mendoja mos e ofendoja duke thene dicka pa rendesi. Shyqyr qe isha me nje shoqe qe e hoqi ate peshe nga une :)

[Dorontina]

qka me then Bukuri krenari , urime dhe vazhdim ....
ushqehemi edhe me bukurin qe sjell syri ....
Bravo na duhen shembujt e mir te dalin ne sken, bravo juve qe shkruni e na njoftoni me te.

[shigjeta]

Pasioni dhe vullneti i njeriut, çfare nuk ben ...

Mozaiku me kokrra kafeje në Guinness

Artisti Saimir Strati ka shënuar për herë të gjashtë emrin e tij në Librin Guinness, duke krijuar kësaj here një rekord të ri, atë të mozaikut më të madh në botë me kokrra kafeje prej 25 metra katrore, ku për krijimin e këtij mozaiku Strati ka punuar 18 orë në ditë, përballë mozaikut me subjekt, ’’Një botë, një familje, një kafe”.

Sheyda Subashi Gimish ishte përfaqësuesja zyrtare e Gunniss-it e cila tha se detyra ime është të verifikoj këtë përpjekje dhe për të arritur të hysh në Librin Guinness ka edhe disa rregulla.

Pikësëpari artisti duhet të punojë në ambient të hapur dhe i gjithë mozaiku duhet të krijohej me kokrra kafeja jo më të mëdha se 2,5 me 2, 5 cm dhe për këtë rast kemi hapur një kategori të re pas kryerjes së matjeve ajo tha se kemi një rekord të ri dhe i dorëzoi atij certifikatën e 6-të

Vetë artisti tha se ja dedikoj të gjithë popujve të 5 kontinenteve që kanë mbështetur popullin shqiptar në 99 vjet pavarësi.

Ky mozaik që është krijuar nga miliona kokrra kafeje nga artisti shqiptar Sajmir Strati, ka hyre në librin e rekordeve si një prej mozaikëve më të mëdhenj me kokrra kafeje. Strati ka përdorur 140 kg kokrra kafeje, disa prej tyre në ngjyrë të zezë për të realizuar një valltare braziliane, një bateriste japoneze, një këngëtare të muzikës kauntri amerikane, një fizarmonist evropian dhe një baterist afrikan.

Ndërkohë që edhe mediet e huaja i kanë dedikuar një artikull të plotë artistit shqiptar ku thuhej se Shqipëria bën mozaikun më të madh në botë me kokrra kafeje.

Bota Sot

[Guri i Kuq]

Pas njëqind vjetesh,kur asnjë nga kjo gjeneratë nuk do jetë,Saimir Strati do jetë emër i nderuar në librat e artit.....
Ndoshta do jetë ndër shumë pakëz shqiptarë që do përmendet...si gjeni...!
I lumtë !

[benseven11]

http://www.odditycentral.com/news/sa...fee-beans.html
Shume bukur

[Marya]

ketij i them durim dhe talent


dua ti futem edhe une , po me kokrra orizi:p

[sirena_adria]

" Sponsorizimi i artistëve të mëdhenj nga biznesi vendas një histori suksesi që duhet ndjekur "


Artisti i Mozaikut Modern dhe mbajtësi i 11 Rekordeve Guinness, Saimir Strati hap në Tiranë ekspozitën e tij më të re, të titulluar “PATRIOT”, mbështetur nga rrjeti i markatave të veglave të punës gjermane BAUMARKET!

BAUMARKET, lideri gjerman i veglave të punës ka qenë ndër vite mbështetësi kryesor i artistit Saimir Strati me vegla pune dhe aksesorë, për realizimin e disa prej projekteve të tij prestigjoze të cilat kanë arritur të marrin shumë çmime ndërkombëtare, si dhe rekorde Guinness.

Kësaj rradhe Saimir Strati do të promovojë një ekspozitë personale të titulluar “Patriot”.
Me krijimtarinë e tij të veçantë, Artisti ka arritur të realizojë shumë vepra arti, prej të cilave 11 janë çertifikuar nga Guinness World Records.

I dekoruar “Nder I Kombit” nga Presidenti i Republikës, dhe vlerësuar nga shumë organizata kulturore dhe institucione të rëndësishme artistike botërore, Saimir Strati është anëtar i Shoqatës Britanike të Mozaikut Modern dhe është një nga 4 artistët që udhëheqin mozaikun modern sot në botë. Edhe në këtë projekt, artisti Saimir Strati do të sposorizohet nga BAUMARKET, rrjeti i markatave të veglave të punës gjermane, me tashmë 60 filiale në të gjithë Shqipërinë.

Çfarëdo që jeni duke kërkuar për projektin tuaj të radhës, punën dhe shtëpinë, në markatat BAUMARKET do të gjeni mbi 10.000 produkte cilësore. Ekipi BAUMARKET sjell për ju vazhdimisht ide, trende dhe inovacion në shumëllojshmërinë e produkteve që ofron, duke garantuar markat më të mira dhe shërbimin më të mirë.

“Miq, mbështetës, dashamirës të artit, ju ftoj për të marrë pjesë në ekspozitën time personale tek @kalaja_e_tiranes nga data 15-23 Prill e titulluar “PATRIOT”! Ndihem i emocionuar për të zbuluar ekspozitën time më të fundit, kulmin e viteve të punës së palodhur dhe pasionit. Falenderoj pa masë @kalaja_e_tiranes për mundësinë si dhe sponsorat për mbështetjen e madhe. @baumarket.albania ! Ju mirëpres!”- shkruan Saimir Strati në një postim në rrjetet sociale.


Gazeta Panorama

http://www.panorama.com.al/sponsoriz...duhet-ndjekur/

[Albo]

Strati në 'Odeon": Humba 7.5 të shikimit, në Shqipëri s'kanë interes për veprat e mia

VIDEO

Të punuarit me mozaik është sa sfiduese, po aq edhe e mrekullueshme për Saimir Stratin. Rekordmeni u shpreh në "Odeon" se me gjithë përpjekjen e tij për të lartësuar emrin e Shqipërisë nëpër botë, me fitoret e veprat e shumta, shteti shqiptar nuk e ka vlerësuar krijimtarinë e tij.

"Kur kam bërë rekordin me kunja dhëmbësh kam humbur 7.5 të shikimit, që nuk është pak për një artist të artit pamor, figurativ.

Sot njihem si ai artisti që u bënë magji materieve. Shqipëria është akoma në fazën e një sistemi hibrid. Nuk i jepet rëndësi kulturës dhe artit. Nuk ka asnjë lloj interesi në Shqipëri për veprat e mia. Kjo ndoshta sepse nuk i jam atashuar asnjë force politike, jam vetëm shqiptar", u shpreh Saimir Strati.

Rekordmeni i mozaikëve ka gjurmë në historinë e artit pamor, ngase veprat e tij kanë çelur një kapitull të veçantë për Shqipërinë, për mënyrën se si janë krijuar, pasi artisti eksperimenton me materialet e teknikat që radhiten nga më interesantet të ekzekutuara deri më tani në botë.

Skeptikët për rekordin e Saimir Stratit, artisti: Theva mentalitetin vetë-diskriminues

Jeta e Saimir Strati i është dedikuar tërësisht punimeve me mozaik.

Një udhë artistike e mbushur me plotë suksese, ngase veprat e Saimir Stratit kanë folur në shumë gjuhë të botës.

I ftuar në emisionin "Odeon" në Syri Tv, artisti foli gjatë rreth krijimtarisë që është përzgjedhur nga anekënd botës si më e veçanta, e për të cilën është shpërblyer për origjinalitetin, duke u radhitur 11 herë si fitues i "Guinness".

Egla Xhemalaj: Është bukur që të flitet për Shqipërinë. Është bukur që vendi jonë i vogël të përfaqësohet denjësisht në botë, e të lakohet si një nga vendet specifik ku punohet mozaiku mrekullisht bukur. Ju keni bërë që Shqipërinë të njihet ndërkombëtarisht anekënd botës, me punimet tuaja e në veçanti me ato për të cilat flitet shumë, ngase janë pjesë e një libri të rekordeve "Guinness".

Ka qenë në vitin 2006 apo jo, portreti i Leonardo da Vincit, i cili ju bëri pjesë të një udhe të gjatë, patjetër një udhe e vështirë, por megjithatë një udhë shumë fitimprurëse për ju si artist ngase vjen një kohë që artisti kapërcen nga një stad në një stad e kështu përfaqëson vendin në kompeticione të huaja.

Si ka qenë ajo kohë Zoti Strati? Sa e rëndësishme është që artisti të krijojë një lloj trampoline, për t'u bërë pastaj e për t'ju përqasur atij aspekti që nga njëra anë e identifikon si artist nga ana tjetër duket si një qenie mbinatyrore, kështu do ta quaja.

Saimir Strati: Tani që janë realizuar 11 rekorde, tani që është folur në të gjitha gjuhët e botës, sepse është ajo veçanti që unë çdo materie e kthej në art dhe kam realizuar mozaikë në dimensione gjigante gjë që s'është parë as dëgjuar ndonjëherë, sepse 9 prej rekordeve janë kategori të reja. Kjo më bënë shumë herë më të veçantë edhe për teknikën e mozaikut edhe pse këto vepra janë rekorde botërore Guinness. Ajo që unë e ndjej, që nuk ndodh ta ndjej dikush që është përtej Shqipërisë është të qenurit shqiptar dhe dashuria e madhe për vendin dhe dëshira e jashtëzakonshme për të plotësuar një pjesë të një pazëlli, se ne kemi kulturë më shumë se 3000-4000 vjet.

Nëse do filloj të shkruhet dhe të thuhet do na duhet shumë vite, po unë jam i lumtur dhe krenarë që jam pjesë e atyre artistëve që kanë lënë një shenjë për ta identifikuar Shqipërinë për mirë. Momenti i parë ka qenë një rekord i realizuar me gozhdë, ka qenë portreti i Leonardo da Vincit, në vitin 2006. Në atë kohë nuk kishin certifikatë në Shqipëri të rekordeve "Guinness". Askush brenda territorit të Shqipërisë nuk kishte realizuar një vepër të denjë për të qenë pjesë e librit të rekordeve, që në fakt është Enciklopedia më e famshme në botë, e shkruar dhe e thënë. Ishte dhe një detyrim i madh që përveç veprës që do të realizoja me gozhdë, të vendosja dhe Shqipërinë në listën e vendeve që realizojnë me mozaik brenda vendit të tyre. Ideja për të bërë Leonardo da Vincin me gozhdë ka qenë shumë e thjeshtë.

Në televizor dëgjoj një lajm që thotë, është shpikur një printer që e bënë Monalizën e Da Vincit në masë 92% së bashku me ato frakturat, e plasaritjet.

Ndërkohë, e përjetova atë lajmin sikur Da Vincin e kishin gozhduar. Kisha vite që e studioja, vazhdoj ta studioj edhe sot. Ai është një gjeni, nuk mbaron kurrë. Thashë do bëj diçka që të mos ketë printer e robotikë. Kur e mendova gjigande Thashë ta provoj të jetë edhe rekord. Kapriçoja nuk ka qenë vetëm për t'u bërë rekord, ka qenë që ne të mos industrializohemi. Është një sëmundje që po vazhdon shumë keq dhe tani. Në krijimtarinë time, unë marrë materialet industriale dhe e kthej në art.

Në 2006 miqtë e mi ishin skeptikë se thonin nuk ka mundësi të realizohet një vepër në Shqipëri, e këtyre përmasave.

Askush nga e gjithë bota nuk kishte realizuar një vepër të tillë me gozhdë, kështu që do të isha i pari. Skepticizmi i njerëzve më dukej i pakuptimtë. Të gjithë thonin është e parealizueshme. Në barrën e kësaj përgjegjësie e nisa, e realizova kështu që nuk është se vendosa një kategori të re në librin e rekordeve "Guinness".

Nuk ishte kjo ajo që më kënaqi më shumë, por thyerja e atij mentalitetit vetëdiskriminues, që ne nuk bëjmë e ne nuk jemi. Ne bëjmë, ne jemi dhe duhet të jemi sepse të parët tanë janë ata që e kanë lënë këtë si dëshmi.

Në "Odeon", mjeshtëri i mozaikut foli për proceset e krijimit, ndërsa u ndal edhe për receptimin e veprës në dy kohë.

Rekordmeni i mozaikëve, Saimir Strati: Ja pse më duartroket bota

Rekordmeni i "Guinness", Saimir Strati, tregoi në "Odeon" se si është pritur e receptuar vepra e tij përtej kufijve.

Një nga arsyet që artisti duartrokitet kaq gjatë përtej Shqipërisë, është puna e jashtëzakonshme që bënë për të marrë materialet e industriale e për t'i kthyer mrekullisht në art, nga e cila përftohet një shije e veçantë estetike.

Egla Xhemalaj: Artistët në përgjithësi jetojnë si bohemë të vërtetë, si njerëz që i rebelohen realitetit, si njerëz që përpiqen që këtë hapësirë ta mbushin me ngjyra. Ju keni jetuar si një njeri që ka krijuar kaq shumë vepra arti të realizuara kaq bukur, në formë estetike, po gjithashtu edhe në përmbajtje. Është shumë e rëndësishme që kur të vijë një moment, artisti të lërë një bagazh të gjatë e të gjerë, e të gjallë po ashtu të veprës së tij. Të shihet e të kundrohet mirë nga pasardhësit, po megjithatë si ju kanë pritur përtej kufijve, aty ku njerëzit kanë kërshërinë ta njohin veprën e një artisti, por kanë kërshërinë ta njohin edhe artistin vetë, Saimir Stratin këtë herë.

Saimir Strati: Është shumë bukur që jo vetëm si artist, si Saimir Strati por një nga kushtet që unë vendosja është që para se të më thuhet apo shkruhej emri, të dilte së pari kombësia. Është shumë me rëndësi që Shqipëria të prezantohet mirë. Jam i lumtur që kam lënë shenja kudo në botë. Kur më pyesin, pse Shqipëria ka mundësi të tilla, u them sepse jemi në vend që na përfshinë Mesdheu. Meqë po flasim për këtë pjesë është një nga sekretet më të veçanta, që gjithë mozaikët më të bukur në botë janë në zonën e Mesdheut. Si duket aty ka qenë qendra e kulmit njerëzor.

Mozaikët janë më të parë, më të prekshëm. Ata që na tregojnë edhe për lashtësinë. Mozaikët kanë më shumë informacion për jetën e shoqërinë, në cilat statuse jetonin. Natyrisht një mozaik në kohët e perandorive helene dhe romake e më pas, i kanë poseduar vetëm njerëz me një status, me një famë të jashtëzakonshme. Mozaiku është elitar. Sot është pak në zhdukje sepse njerëzit janë thjeshtëzuar në shije, kjo është e përgjithshmja.

Kur lëviz nëpër botë sheh që ka njerëz që e duan. Për këtë vlerësohem shumë në botë, për pjesën që po i jap art të bërë me materie industriale, kundër industrisë.

Saimir Strati: Të ruajmë traditën, inteligjenca artificiale do shuhet

I njohur si artisti që i ka dedikuar një hapësirë të veçantë traditës, në këto kohë kur përpjekjet më të mëdha janë për të përqafuar artin bashkëkohor, Saimir Strati që la lartësuar emrin e Shqipërisë në botën mbarë thotë me krenari në "Odeon" se është e rëndësishme që tradita të ruhet, ajo tregon të shkuarën tonë, prej nga kemi rrënjët.

"Me shumë rëndësi është të ruhet ajo pjesë e traditës. Kjo do të thotë se pjesa e shashkave që hidhen, pjesa e shpëlarjes së trurit përmes inteligjencës artificiale do kaloj shumë shpejtë, prandaj mbijetojnë njerëzit e mençur. Ata do të lënë shenjat. Asnjëherë nuk do të jetë, sa like bëjnë budallenjtë apo u përsos X. Çfarë ka shkruar një i mençur do të mbetet. Këto janë ato lodrat që ne përdorim me buzëqeshje ose edhe pa buzëqeshje.

Ndonjëherë na dhemb se shohim që kjo është luftë. Lufta ka dëshmorë dhe kur bien dëshmorët e saj sidomos kur i ke miq, është mbase ajo që të dhemb më tepër. Pjesa tjetër mbetet e lirë, ngase secili duhet të ketë trungun e vet, për të përsosur veten dhe atë që di të bëj më mirë. Mos ta harruar që duart janë bërë për të prekur materie dhe për ta kthyer në vepra arti e në gjëra të mira", u shpreh artisti.

Prej vitesh artisti punon edhe me grupe fëmijësh e studentësh që ëndërrojnë të ndjekin udhën e tij.

Në "Odeon" Strati u shpreh se një nga këshillat më të herëpashershme që iu ka jep atyre, është të dashurit e vendit, të punuarit fortë dhe shpalosurit e vlerave.

Syri