A eshte Turpnimi historik për Albin Kurtin

[Irfan]

KOSOVA PËRPARA PËRPLASJEVE
Nga Ramush Tahiri
Jun 15, 2006, 10:46

Email'o
Print'o



Ramush Tahiri
Asht thanë e po thuhet se viti 2006 asht viti i zgjidhjes së çashtjes kosovare. Këte bile po e thotë edhe kryeadministratori ndërkombëtar i Kosovës, i emnuem prej Sekretarit të Përgjithshëm të Kombeve të Bashkueme. Mirëpo çfarë zgjidhje ka me qenë kjo. A ka me qenë zgjidhja që ka me i kënaqë shqiptarët, apo serbët, apo të dy palët apo ndërkombëtarët…?

Krejt kjo asht e lidhun edhe me faktin se si kqyret Kosova, si problem shqiptar, si problem serb, si problem serbo-shqiptar apo si problem ndërkombatar… apo krejt këto bashkë. Poashtu asht fort e randësishme se cili element në kët vjetin vendimtar konsiderohet se asht ma i randësishmi dhe cili do të mirret parasysh në krahasim me elementat apo faktorët e tjerë. Poashtu me cilat mjete e me cilat metoda asht parapa për me u zgjidhë çashtja e Kosovës: njianshëm, me marrëveshje, me imponim, me mbështetje ndërkombëtare, me gjysmbështetje apo me bojkotim ndërkombëtar. Prap asht e randësishme a shihet Kosova si çashtje qytetare, si çashtje kombëtare, e përzieme apo si çashtje e pazgjidhun shqiptaro-serbe.

Shtrohet sypozimi i paramenduem: nëse Serbia dhe Kosova mirren vesh ndërmjet veti, dhe kjo marrëveshje prodhon stabilitet dhe paqë e qetësi, atëherë a do ta pranonte këte bashkësia e faktori ndërkombëtar, apo edhe ai do t’i kishte interesat e veta gjeopolitike, gjeostrategjike, politike, ekonomike apo interesat e ndikimet e tjera. Në kët lamsh asht edhe e randësishme me u marrë vesh a konsiderohet Kosova si çashtje e pazhgjidhun apo si problem i pazgjidhun…



Turpnimi historik për Albin Kurtin



Asht turp, asht marre për krejt Kosovën, për intelektualët, për shtresën politike, për institucionet që sot në përvjetorin e çlirimit të Kosovës Albin Kurti dhe pjestarët e lëvizjes “Vetëvendosja” ndodhen në burg. Ironia asht se kur Albini ihte në burgjet e Serbisë, Kosova protestonte dhe kërkonte lirimin e tij, kur regjimi serb e liroi, Kosova dhe UNMIK-u po e fut në burg. Albini e “Vetëvendosja” protestuen e protestojnë paqësisht tue kërkue largimin e UNMIK-t , tue kërkue ndaljen e negociatave në Vjenë, ndërpremjen e procesit të decentralizimit dhe tue kërkue vetvendosjen e popullit të Kosovës si të drejtën ma themelore me vendosë për fatin e për të ardhmen e vet. Krejt këto janë kërkesa shumë normale dhe shumë të drejta që nuk e di se dikush mundet me i kundërshtue e mos me u pajtue. Bllokada që i banë aktivistët e “Vetvendosjes” hymjes në ndërtesën, dikur të Ushtrisë Jugosllave, e sot e UNMIK-ut, në qendër të Prishtinës, u thye me dhunë të egër nga Shërbimi Policor i Kosovës, që asht pjesë e policisë së UNMIK-ut, dhe me arrestimin e me denimin e shpejtë me burgim dhetëditor të ma shumë se pesëdhetë të rijve e të rejave kosovare. Këto protesta krejt të ligjshme, nga niveli i administratës ndërkombëtare e kosovare u cilësuen si veprime anmiqsore dhe kundër pamvarsisë së Kosovës. Policia po ta kishte marrë urdhnin ka mujt me e zhbllokue rrugën dhe hymjen e me i nxjerrë protestuesit në platonë e Pallatit të Rinisë. Por, simbolika e veprimit të dorës së fortë të shtetit të dobtë ishte me i shpërnda me dhunë dhe me i burgosë protestuesit… Veprim i këtillë nuk u ba kur serbët e katundeve të Kosovës i bllokojshin rrugët kryesore të Kosovës, kur edhe i kallshin autobusët e I maltretojshin udhëtarët e kalimtarët e rastit. Kështu policia e Kosovës dhe e UNMIK-ut e as autoritetet e përkohshme qeverisëse nuk vepruen kur serbët qytetarë të Kosovës me gurë e përzunë nga Mitrovica kryeministrin e Kosovës, Bajram Rexhepin. Kështu nuk vepruen as nuk veprojnë kur bllokohet Ura e Ibrit nga strukturat paraushtarake serbe, të quejtuna Roja të Urës. Kështu nuk po veprohet as tashti kur komunat e veriut të Kosovës po e deklarojnë ndërpremjen e të gjitha marrëdhanieve me IPVQ-t dhe po i vnojnë rojat, forcat e veta e po kërkojnë kthimin e policisë e strukturave ushtarake të Serbisë. UNMIK-u e as Qeveria e Kosovës, as TMK-ja prej kah vjen Kryeministri, kurrë nuk e mundësuen lëvizjen e lirshme të kosovarëve shqiptarë në nji të tretën e territorit të Kosovës tash e shtatë vjetë… Presidentin Sejdiu e bojkotuen me turp dhe e fyen banorët serbë të enklavës së Shterpcës, kur bashkë me Kryeadministratorin e Kosovës u bani nderë e i vizitoi si udhëheqësi ma i naltë i vendit . Krejt këto veprime të serbëve të Kosovës, të nxituna botnisht prej Beogradi, po tolerohen dhe po durohen prej frigës se mundet me u ba ma keq dhe se gjendja mundet me dalë prej kontrollit. Ka të drejtë Albini kur thotë se administrata ndërkombëtare asht dasht me u vnue në Serbi e jo në Kosovë, sepse Serbija ka ba gjenocid e jo Kosova. Se Kosova asht çashtje e zgjidhun keq e shqiptarëve e jo e serbëve, dhe se kriza asht ba sepse kundër shqiptarëve bahej shtypja, gjenocidi dhe shpërngulja prej trojeve të veta etnike…

Njohësit e rrethanave dhe ekspertët tana këto veprime të institucioneve kosovare dhe të UNMIK-ut nuk i shohin si nji përjashtim, por veçse si nji rregull e vazhdimsi të nji politike joparimore dhe të padinjitetshme. Sot në Kosovë ndërtohen edhe me pare të buxhetit të Kosovës shpijat e shkatërrueme të serbëve, por deri tash nuk asht ndërtue nga ky buxhet asnji shpi e shqiptarëve, as e nji dëshmori apo e ndonji familje të masakrueme. Serbia edhe sot përzihet në Kosovë me krejt strukturat e veta legale e jolegale, në krejt institucionet e organet. Serbija në të gjitha tubimet ndërkombëtare deklarohet se Kosova asht krahina e saj e jugut, se asht nën sovranitetin e integritetin e saj, se e ka legjitimitetin e vazhdimin shtetnor të Jugosllavisë… porse kjo Serbi deri me sot, shtatë vjet mbas Rezolutës 1244 të KS të OKBs nuk e ka ndërtue asnji shtëpi, nuk e ka dhanë asnji dinar për rindërtimin e asaj që ushtria dhe policia serbe e kanë shkatërrue në Kosovë. Serbia nuk e ka kompenzue asnji familje, asnji fëmi jetim të Kosovës që ia vranë nanën, babën, vllaun, motrën apo krejt anëtarët e familjes … që n’ate kohë konsideroheshin e ishin qytetarë të Jugosllavisë, ndërsa sot po në bazë të kësaj Rezolute, Serbijai i konsideron qytetarë të vet. Nuk ka kush që e detyron Serbinë t’i kthejë kufomat e shqiptarëve, fëmi e pleqë, burra e gra të vramë në Kosovë e të dërguem me iu humbët gjurmët në Serbi. Nuk ka kush që e shtin me i ba hulumtimet për djegien e kufomave të civilëve shqiptarë të Kosovës në Maçkaticë të Serbisë…

Asht nji paradoks. Sot ka ma shumë shqiptarë të burgosun në numër dhe ma shumë të denuem me vite burgu në Kosovë, për ngjarjet e marsit 2004, sesa ka serbë të denuem në numër apo në kohëzgjatje me burg për krejt masakrat, vrasjet, dhunimet, djegijet që u banë në Kosovë. Këto vepra kriminale nuk ishin të vogla, mbi dymbëdhetë mijë të vramë, mbi njëzet mijë femna të dhunueme, mbi tridhetë mijë të plagosun, mbi tre mijë të zhdukun, mbi 130 mijë shpija të shkatërrueme e të djeguna, fabrikat e shkatërrueme e të vjedhuna…

Tue i dijtë krejt këto, asht jasht mendjes së shëndosh që po kërkohet prej shqiptarëve me ba kompromise, që po kërkohet me ba decentralizim, që po kërkohet me u krijue komuna të reja me shumicë etnike serbe edhe në ato vende ku as krajli e as Milosevic’i nuk kanë mujt me i krijue apo nuk u ka ra në mend me i krijue, që serbëve lokalë të Kosovës me ju dhanë nën administrim me llojet e ndryshme të autonomisë rreth 30 përqind të territorit të Kosovës.

Asht e çuditshme si kanë ndrrue gjanat. Mentaliteti që dikur e kundërshtonte ministrin kosovar se qysh ka mujt me u takue me kolegun e tij serb, “a thue je ti prej Gjakove”, tue i pasë ndërmend masakrat e kidnapimet në Gjakovë, tash premton e arsyeton tetëqind hektarë tokë për Manastirin e Deçanit që nga pronat private të shqiptarëve duhet me u ba zonë e mbrojtun. Asht e habitshme që popullsia shumicë e Kosovës ashtu si tash e gati njiqind vjet, prap po bahet e po mbetet peng i popullsisë pakicë. Serbët edhe atëhere edhe tash shfrytëzohen kundër interesave të popullit shumicë. Edhe atëhere edhe tash shfrytëzohen si dorë e zgjatun dhe si intrument i politikave të regjimeve serbe. Jemi ba si në kohën e konsujve serbë kur mjaftonte nji shpifje e denoncim i tyne e shqiptarit nga autoritetet turke i vnohej konopi në fyt, e vnohej në trekambsh ditën e pazarit.

Anomali asht sesi delegacioni i Kosovës pranon me u ba zonë e mbrojtun kulturore historike nji monument i ndërtuem në vitin 1953 në Gazimestan, e nuk pranon të bahet zonë e mbrojtun nji monument i ndërtuem pesëqind vjet përpara si asht Tyrbja e Sulltan Muratit, e ndërtueme në vitin 1453. Nuk asht çudi që delegacioni i Kosovës me mentalitetin e historianëve tanë me propozue ndoshta edhe me e rrxue Tyrben, se asht e nji sulltani pushtues, e me ia lshue vendin mitit serb të tradhtisë së Kosovës. Përnjimend edhe ashtu janë shumë afër monumenti serb (Aleksandar Deroko, 1953) me Turben e Muratit. Ekspertët e delegacionit kosovar propozojnë bile pesëdhetë metra zonë të mbrojtun për monumentet serbe, thojnë asht e parapame me norma ndërkombëtare, por nuk propozojnë për xhamitë, që iu kanë futë rrugën deri në temele, si asht Xhamia e Bajazitit në Qendër të Prishtinës, e ndërtueme menjihere mbasë Betejës së Kosovës apo Xhamia e Mbretit, ku thuhej se ruhet guri i Lazarit në të cilin turqit ia kishin shkurtue kryet, mbasi ishte dorëzue, por që ma vonë trupin ia kishin dorëzue serbve, të cilën mujtën edhe gjashtëqind vjet ma vonë me e shetitë nëpër Kosovë, në lëvizjen e tyne të “ndodhjes së popullit”.



Loja me Vjenën mundet me pasë pasoja



Asht thanë dhe asht vërtetue se dokumentet me të cilat delegacioni i Kosovës po shkon në bisedimet e Vjenës, në origjinal bahen në gjuhen angleze, e mandej vetëm përkthehen. Nëse dikush banë vërejtje, duhet krahasue me versionin anglisht. Ekipi i Unitetit e din kete. Kjo zatën edhe vlenë për çdo dokument tjetër edhe për ligjet e miratueme nga Kuvendi i Kosovës. Nëse ka mospajtime në tekstet, versioni anglisht dominon, apo asht bazë. Delegacioni i Kosovës pa e pyet Kuvendin e Kosovës, edhepse kjo asht e drejtë ekskluzive e tij, i propozon komunat e reja me shumicë etnike serbe. Bile tue i marrë edhe ndryshue edhe territoret e komunave ekzistuese pa i pyet kuvendet e tyne komunale, dhe pa i pyet banorët lokalë apo pronarët e tokave. Si në rastin e Manastirit të Deçanit. Fodullëku dhe mospërfillja e dinjitetit qytetar dhe kombëtar asht ba normë e sjelljes dhe e veprimit të këtyne përfaqsuesve të popullit apo të institucioneve. Nuk propozohet vetëm ndrrim administrativ i territorit, por edhe kompetenca të reja të fushëveprimit të komunave që sot asnji komunë e Kosovës, por as vet Kosova nuk i ka në fushën e ekonomisë, kredive të jashtme, donacioneve, e të mos përmendim policinë e gjyqësinë. Krejt këto duhet me u zbatue dhe me pasë garanci dhe mbikqyrje ndërkombëtare. Tue pa udhën e pakrye, tash Grupi Politik Strategjik i Kosovës deklaron se ata nuk kanë kompetencë dhe autorizim nënshkrimin e dokumentit të bisedimeve, por këte do ta bajë si thojnë “ekipi i elefantve”, tue mendue në delegacionin e nivelit ma të naltë institucional të Kosovës. Por, nuk kanë kallzue pse e kanë zgjedhë fjalën ‘elefant’, për mend, trashsi, ngathtësi apo për sjellje. Derisa delegacioni serb nuk lëshon pe dhe nuk bisedon e as nuk prezenton kurgja që asht jasht interesave të tyne, delegacioni i Kosovës asht dorëshlirë dhe propozon asi zgjidhje, të cilat nuk e din a mujnë me i kalue e aprovue në Kuvendin e Kosovës. Duket se shpresojnë se këto zgjidhje të tyne që asnjihere nuk i prezentojnë në detale në publik apo në Kuvend, nga frika e daljes së sekretit përpara kohe, ato do t’i imponon faktori ndërkombëtar dhe kështu do t’i lajnë duert përpara popullit, i cili ka respekt dhe falendërim për bashkësinë ndërkombëtare që e shpëtoi prej gjenocidit serb dhe që i kthyen nëpër shpijat e veta dhe e çliruen Kosovën. Populli këtyne nuk iu idhnohet, edhepse zgjidhjet nuk janë të favorshm edhe me to nuk pajtohet.

Kosova dhe minsitria përkatëse e themelueme veç për kët punë nuk e ban reformën e përgjithshme të pushtetit lokal dhe as ndamjen e re territorialo-administrative të Kosovës. Nuk e ban si nevojë të gjithë qytetarëve të Kosovës e tash po bajnë gara me e ba si nevojë të serbëve të Kosovës. Të cilëve, nga pesë komunat që i kanë, po dojnë me iu dhanë edhe pesë të tjera me territor që kur nuk e kanë pasë, që së bashku me monumentet kulturore historike dhe me vendet e shejta të mbrojtuna të tyne, do t’i bajnë llojin e mbrojtun në Kosovë. Të paprekshëm dhe që nuk i japin llogari askujt dhe që nuk respektojnë asnjë ligj apo obligim qytetar të Kosovës, jo vetëm në taksa dhe në pagim të shërbimve që edhe ashtu nuk i kanë përmbush edhe përpara. Dikujt nga delegacioni i Kosovës i ka ra ndërmend dhe publikisht thotë se serbët duhet ta kenë komunën e tyne urbane në vend që serbët të kthehen me jetue në Prishtinë e qytetet e tjera të Kosovës dhe këte e thojnë sikur Zveçani, Novobërda, Leposavic nuk qenkan qendra urbane, por tash po u dashka me iu ndërtue qendren e re urbane në Graçanicë, me iu ba komunë gjysën e Lipjanit apo Mitrovicën e Veriut…

Lëshimi pe dhe joparimor, gjithmonë ka dhanë kundërefekt. Ka ngjall kundërshti. Kundrimi e kushtëzimi i pamvarsisë së Kosovës me autonominë e decentralizimin ma përpara të Kosovës, pa u ba edhe regjistrimi i popullsisë e për të cilin fakt u shtyen edhe zgjedhjet lokale, asht qasje që nuk ofron zgjidhje. Gjithashtu pikënisja në zgjidhje nga dy entitete tue i lanë anash të tjerët apo tue e shmangë pikënisjen qytetare gjithashtu prodhon destabilizim… Kjo qasje edhe i ka trimnue serbet e veriut të Kosovës që ta shpallin mosndëgjueshmëninë institucionale dhe territoriale karshi institucioneve të Kosovës dhe vet zgjidhjes së statusit të saj. Kërcnimet me shpërngulje masive të serbëve, nëse Kosova bahet e pamvarun, tash janë ba publike. Organizimet e strukturave paralele në komunat e në enklavat serbe, që janë pjesë e pashkëputun në strukturat e kierarkisë së Serbisë, tash janë praktikë e etablueme dhe krejt normale. Edhe si struktura edhe si financim. Shtet në shtet, si ekstraterritorialitet të lidhun direkt me Serbinë, për dallim me veprimin paralel shqiptar në Kosovë në vitet tetëdheta që nuk ishte i lidhun me Shqipninë…



UNMIK-u ka dështue plotësisht. Nuk mund të ketë referenca pozitive për ndonji mision të ngjashëm kudo tjetër në botë. Përjashto këtu fazën e rindërtimit. UNMIK-u si duket edhe e ka tolerue organizimin paralel të serbëve në Kosovë. Nuk ka qenë i interesuem as me pengue E ka tolerue edhe mospjesëmarrjen në institucione, tue e nxitë edhe marrjen e pagave të deputetëve dhe beneficionet e tjera. Sistemi i vlerave të dyfishta apo me thanë ma mirë të përmbysuna në Kosovë, asht institucionalizue. UNMIK-u i ka pengue të gjitha veprimet e shumicës edhe nëse ato janë marrë në institucione dhe në mënyrë demokratike. Edhepse nuk asht në mandatin e tij, ai ka mbështet edhe ndryshimin e kufijve të Kosovës, në dam të saj e në dobi të Maqedonisë.



Si dikur në Kroaci, Kosova do të përballet me kryengritjen serbe në veriun e saj. Me rrezikim të ndamjes etnike për lumin Ibër. Edhe këtu vlejnë standardet e dyfishta dhe nuk do të lejohet simetria me Luginën e Preshevës, që rrezikohet me shpërngulje humane të popullsisë. Për decentralizimin simetrik në Kosovë e në Preshevë, në Sanxhak apo në Vojvodinë, në kritere të njejta dhe në kompetenca të njejta as që mund të bahet fjalë.

Kosova po i zhvillon bisedimet sikur këtu kurrë mos me u pas ba lufta. Këto bisedime ndoshta do të kishin pasë nji logjikë sikur të ishin ba në vitin 1986, por kurrsesi jo tash në vitin 2006. Kohnat janë tjera. Pasojat janë tjera. Zgjidhjet janë tjera.

Institucionet e Kosovës duhet me e kthye dinjitetin e vet, me dalë faqebardhë përpara popullit dhe përpara historisë.

Hap i parë duhet me kanë lirimi i Albin Kurtit dhe djemve e vashave kosovare prej burgut. Dhe me iu kërkue publikisht falje për këtë veprim institucional të ultë, kundërhistorik dhe kundër të ardhmes së Kosovës.
by gazetajava.com

Albin Kurti,ne te mire apo ne te keqe te Kosoves???

ju kisha luture te diskotojm se bashkur

[fjollat]

Albin Kurti,ne te mire apo ne te keqe te Kosoves???

Çështja e Statusit të Kosovës dhe të gjitha problemet që ngërthen në vete kjo çështje nuk e kanë zanafillën në 1999 kur u vendos administrata Ndërkombëtare në Kosovë, ky problem është i kahmotshëm, që kur mbahet mend emri Kosovë. Të gjithë ne, kush më tepër e kush më pak, e njohim historinë e Kosovës dhe dështimin e plotë të shqiptarëve për pavarësim të Kosovës. Nëse sjellim në kujtesë të kaluarën jo të largët të Kosovës dhe trazirat që i përjetuan nga serbët deri në momentin e ndërhyrjes së NATOs, nuk do të kishte vend për dilema nëse "Albin Kurti vepron në të mirë apo në të keqe të Kosovës"! Ky zotëriu mos gabofsha kërkon largimin e UNMIK-ut nga Kosova?!! Në vend të përgjigjes, unë do të parashtroja një pyetje: Ku ishte Albin Kurti në kohën kur serbi i deportoi gjsmën e Kosovës në Maqedoni, Shqipëri e Mal të Zi? Vallë në këtë mënyrë synon ta bëj Kosovën të pavarur? Apo ndoshta synimi i tij është që Kosova të mbetet pjesë e Serbisë përgjithmonë, sepse, ky njeri dhe lëvizja e tij nuk kanë kurrfarë fuqie për të bërë "vetëvendosje"!

[Mendimi_Juaj]

Une po habitem pak si eshte e mundur qe dikush ketu pa pasur informacion te plote diskuton se pari, dhe se dyti si i lejon vetes te beje komente per gjera qe nuk ka njohur te plote.

Se pari Albin Kurti nuk ka pasur mundesine te ndaloj largimin e shqiptareve ne 1999, se pari sepse serbet e futen ne burg bashke me shume te tjere, mirepo ishte Kurti dhe Demaqi qe nuk pranuan marreveshjen e Rambujes, ne baze te se ciles eshte sot Unmiku ne Kosove.

Albini ishte dhe vazhdon te jete ne rruge ose ne burg, ne kohen kur Kosoves po i caktohet fati nga keto monologje ne Vjene. Them monologje sepse askush perveq shqiptareve atje spo ben propozime e leshime.

Nese te kerkosh Vetevendosje dhe Liri per Kosoven eshte gabim atehere ky eshte i vetmi gabim qe ka bere gjithmone Albin Kurti, mirepo te gjithe ata qe kete e konsiderojne gabim nuk konsideroj se do te duhej te diskutonin ne nje vend qe quhet forum Shqiptar.

[murik]

Po mire sipas jush dhe Albinit si duhet te zgjidhet ceshtja e Ksoves?
Kosova kaloi ne disa faza deri sa erdhi ketu ku eshte sot.Nuk ka qene kurre ndonjehere ne historine shqiptare nje Kosove kaq prane zgjidhjes perfundimtare,dhe me kaq perkrahje nderkombetare.Nuk mund te hedhim poshte sakrificat e popullit shqiptar qe nga Idriz Seferi,Shaban Palluzha e deri te Adem Jashari,por nuk mund te mohojme rolin vendimtar te komunitetit nderkombetar.
Albin Kurti i ngjan me shume anarkisteve te viteve 1968,si puna e Lionel Jospin-it dhe Edi Rames te 2006.Kosova ka qeveri,ka opozite,ka polici,ka nje ushtri ne formin e siper,dhe keto u arriten me ndihmen e nderkombetareve.C'kerkon Albini?
Konflikt te hapur me bashkesine nderkombetare,pikerisht tani qe ceshtja po shkon drejt zgjidhjes perfundimtare?

[Mendimi_Juaj]

Une nuk mendoj pikerisht si Albin Kurti, prandaj sakte nuk munde te ju them cfare kerkon, mirepo nga ato qe shihen me nje kend me ndryshe gjerat jane siq thote ai ne shume fusha.

Nese per nje moment largojme perden qe kane shkaktuar gjith keta aktoret qe pershkruajte me lart si kinse pozit opozit unmik e plot kesi, verejme se ne fakt ketu po luhet nje loje mjaft e pa qarte per Kosoven.

Marreveshja e Rambujes dhe kjo ketu kane ngjashemeri te medha dhe sigurisht edhe rezultatet do ti kene te ngjashme. Te mos filloj me rend ti perserit, vetem qendrimi jo serioz i Beogradit ndaj negociatave duke derguar atje njerez pa kompetenca per ndryshime, dhe qendrimi i tyre i ngurte ( asnje leshim deri sot ska bere beogradi nga deklararimi i pare, nderkaq pas cdo takimi tregohem per zemergjeresi te pales kosovare). Si dhe loja e Beogradit me Rusine ne keshillin e Sigurimit ne te cilin do te caktohet fati i Kosoves tregojne per skenar te njejte me Rambujene. Ne Vjene nuk kane shkruar shqiptaret te pyeten dicka apo te merren vesh dicka, por atje kane shkuar qe te dalin ne pah mos marreveshjet dhe ne fund keshilli i sigurimit te thote fjalen e tij qe per neve asnjehere nuk ka qene e kenaqshme.

Sa i perket unmikut mos i perzieni me bashkesine nderkomebetare. ata jane me teper nje grumbull burakratesh qe bejne si ju do qejfi siq munde te marresh shembull se asnjeri nga administratoret e deri tashem nuk ka ndjekur nje politik te njejte disa me teper si pro serb si hakerup e disa kinse me teper pro shqiptar si Petersen. kjo eshte loja e policit te keq dhe policit te mire. Megjithate te gjithe keta nuk ben tjeter pos leshime te serbise. I pari marreveshjen Hakerup Qoviq, i dyti 800 hektaret e shqiptareve i fali manastirit te Deqanit duke i hapur rruge ne kete menyre te fitojne te gjitha kishat tjera ne kosove te cilave tani me ju thone serbe edhe zyrtarisht. Ne fillim dukej sikur po bisedohet per status ne fakt dolen shume tema, si decentralizimi apo legjitimimi i enklavave serbe dhe trashegimia kulturore apo vjedhja e kultures nga serbia.

Ne Fund them se bashkesia nderkomebetare siq munde ta shihni nuk deshiron probleme dhe asaj nuk i intereson cfare statusi ka kosova per derisa ajeshte ne lufte apo konflikt si quhet. Nese qytetaret e Kosoves nuk vetedijsohen te kerkojne masivisht referendum siq pati te drejte te kete Mali i Zi nje marreveshje e re hiq e favorshme munde te pasoj se shpejti. Kujto Deklaraten e para disa diteve te kreut te Rusise se marreveshje te imponuar nuk guxon te kete kunder serbise.

p.s Bashkesia nderkomebetare per neve, nuk eshte UNMIKU por ajo eshte Amerika dhe per fat te keq si zakonisht ajo e zene me pune te tjera tani

Me Respekt

[RTP]

Asht turp, asht marre për krejt Kosovën, për intelektualët, për shtresën politike, për institucionet që sot në përvjetorin e çlirimit të Kosovës Albin Kurti dhe pjestarët e lëvizjes “Vetëvendosja” ndodhen në burg.

Albini a po tregohet trim me dal neper rruget e Kosoves e me ba protesta.Ateher?

Kur te dali ne rruge,
duhet dit se e pret dajaku, e besa e pret edhe burgu.

Çka ka ketu tashti per tu ankue?