Ligji i ri: Ndjekje penale për ata që nuk denoncojnë krimin

[Albo]

Propozohen ndryshimet në Kodin Penal, hetim dhe ekstradim për aktet terroriste

“Dënohet kush nuk spiunon në polici”

Ministria: Ndjekje penale edhe atyre që blejnë mallra të vjedhura

Ndëshkime penale për ata persona që blejnë dhe vënë në përdorim mallra, apo mjete të vjedhura.

Ministria e Drejtësisë ka hartuar një paketë ndryshimesh ligjore në Kodin Penal, ku parashikohet përgjegjësi ligjore për personat që blejnë makina, apo celularë të përdorur. Nëpërmjet një deklarate zyrtare, Ministria e Drejtësisë konfirmoi dje se projekti për ndryshimet në Kodin Penal shqiptar përmban tri pika. Pas pikës së parë, e cila përcakton dënime për ata persona që qarkullojnë mallra, produkte apo sende të vjedhura, pika e dytë bën fjalë për bashkëpunimin e qytetarëve me organet e policisë dhe Prokurorisë. Pavarësisht se përmbajtja aktuale e Kodit Penal parashikon dënime për personat që japin kallëzime, dëshmi, apo informacione të rreme në polici dhe Prokurori, projekti i Ministrisë së Drejtësisë shkon më tej duke ashpërsuar këtë masë dënimi. Sipas burimeve zyrtare, qëllimi i ashpërsimit të dënimeve në këtë rast, është ngritja në nivelin e një përgjegjësie ligjore e detyrës, që qytetarët kanë për të bashkëpunuar me organet e drejtësisë.

Ndryshimet
Sipas zyrtarëve të Ministrisë së Drejtësisë, ndryshimet në Kodin Penal parashikojnë dënime penale për ata persona që blejnë ose përdorin mallra të vjedhura. “Qëllimi i këtyre ndryshimeve në Kod është penalizimi i veprave penale, të cilat janë shumë të rënda. Penalizimi për këtë vepër se bashku me penalizimin e pastrimit të parave shërben për të luftuar krimin ekonomik dhe sidomos trafikimin e mjeteve të vjedhura motorike”, tha Ministria e Drejtësisë. Sipas saj, “ky ndryshim në Kodin Penal dënon veç grabitësit, edhe ata që përvetësojnë një mall të vjedhur, duke e blerë atë”. Sipas burimeve zyrtare, nëpërmjet këtij ndryshimi synohet frenimi i rivënies në qarkullim të mallrave të vjedhura, si dhe ndërprerja e zinxhirit të akteve kriminale. Lidhur me ashpërsimin e dënimit për kallëzimet, dëshmitë dhe informacionet e rreme, Ministria e Drejtësisë pohoi se “Kjo masë ka si qëllim të mbrojë të njëjtat vlera që mbron aktualisht penalizmi i dëshmisë së rreme, duke rritur në rang detyre ligjore, detyrimin qytetar për të bashkëpunuar me organet e ligjit”. Pika e tretë e ndryshimeve të propozuara nga Ministria e Drejtësisë është thuajse e njëjtë me një paketë ndryshimesh të propozuar një vit më parë nga i njëjti institucion.

Terrorizmi
Bëhet fjalë për terrorizmin. Sipas ndryshimeve që dje janë propozuar nga Ministria e Drejtësisë “për një sërë veprash të papranueshme si: gjenocidi, krimet e luftës, krimet kundër njerëzimit dhe terrorizmi, duke pasur parasysh rrezikshmërinë e këtyre veprave, ligji penal shqiptar do të veprojë pavarësisht ku dhe kush i ka kryer. Në rastet e këtyre krimeve, Ministria e Drejtësisë kërkon të ndiqet parimi ekstrado dhe përndiq penalisht për të dyshuarit, pasi ky është një parim i kërkuar nga shumë konventa, ku Republika e Shqipërisë është palë. Veç kësaj, Ministria e Drejtësisë kërkon të përfshihet në Kodin Penal një përcaktim i qartë i organizatës terroriste dhe i veprave penale që plotësojnë figurën e një veprimi terrorist, duke bërë dallimin nga organizata kriminale dhe krimet e kryerja prej saj. t.s/k.b



* Kallezimi
Përmbajtja aktuale e Kodit Penal në nenin 272 parashikon dënim deri në një vit burg, për personat që bëjnë njoftime të rreme për vepra penale të paqena në organet e rendit. Neni 305 i Kodit Penal parashikon një dënim nga gjobë deri në pesë vite burg për personat që paraqesin kallëzime, prova dhe informacione të rreme në polici, apo në Prokurori.
* Vjedhja
Kodi Penal në përmbajtjen e tij aktuale nuk parashikon dënime, apo sanksione të tjera ligjore ndaj personave që përvetësojnë me anë të blerjes, mallra, apo sende të vjedhura. Në Kodin Penal parashikohet ndjekje penale vetëm për grabitësit, apo hajdutët që përvetësojnë në mënyrë të paligjshme mallrat, apo sendet e tjetrit.
* Terrori
Përcaktimi i vetëm në Kodin Penal aktual për terrorizmin është neni 230. Sipas tij, akte terroriste janë veprimet e dhunshme ndaj jetës, shëndetit të njerëzve, lirisë vetjake nëpërmjet rrëmbimit të tyre, apo të mjeteve të udhëtimit masiv, që kanë për qëllim turbullimin e rëndë të rendit publik dhe ngjalljen e frikës dhe pasigurisë në masë. Kjo dënohet me jo më pak se 15 vjet burg deri në burg të përjetshëm.


Ndryshimet e propozuara

* Pika 1
Ndëshkime penale për personat, që blejnë dhe vënë në qarkullim mallra, mjete, apo sende të vjedhura.
* Pika 2
Përcaktimin si përgjegjësi ligjore të qytetarëve, të njoftimit të organeve të drejtësisë për një vepër penale.
* Pika 3
Bërja e dallimit mes organizatës kriminale dhe organizatës terroriste, si dhe përcaktimi i krimeve që përbëjnë akt terrorist
* Pika 4
Shtimi i nenit 282/b që përcakton dënimin për ata persona që mësojnë të tjerët për përdorimin e armëve luftarake, të cilat më pas përdoren për realizimin e veprave penale.

[Albo]

Maxhoranca miraton me 69 vota pro, 29 kundër e 2 abstenime ligjin për dënimin e të zgjedhurve vendorë, nëse nuk denoncojnë mbjelljen e marijuhanës në njësitë e tyre

Gjinushi - Olldashi, batutat në Kuvend

Anila Rama

TIRANË - Shqyrtimi në seancë plenare i amendamenteve të projektligjit të qeverisë “Për barnat narkotike dhe lëndët psikotrope”, që kanë të bëjnë me denoncimet e krerëve të njësive vendore për bimët narkotike në komunat apo bashkitë përkatëse u shoqërua dje me debate të ashpra, deri në fyerje personale, mes kryetarit të PSD-së, Skënder Gjinushi dhe ministrit të Brendshëm, Sokol Olldashi. Madje për pak sharjet nuk kaluan në kacafytje. Precipitimi i situatës erdhi pas përgjigjes së dhënë nga ministri Olldashi, lidhur me disa pyetje që deputeti socialdemokrat, Gjinushi, i drejtoi atij lidhur me kushtetutshmërinë e draftit, madje duke e konsideruar të papranueshëm ligjërisht ndëshkimin penal për drejtuesit e njësive vendore, në rast se në territoret e tyre mbillen lëndë narkotike “kanabis sativa”, e ata nuk e njoftojnë policinë. Ministri Olldashi, duke iu përgjigjur menjëherë Gjinushit, tha se nuk duhet të deformojmë frymën e draftit, pasi ligji synon që kryetarët e komunave të monitorojnë territorin që administrojnë për mbjelljet e bimëve narkotike. Por Olldashi ka shtuar më tej se nuk kishte ndërmend t’i përgjigjej njërës prej pyetjeve të Gjinushit, pasi deputeti i PSD-së kishte konflikt interesi me këtë projektligj. “Unë besoj që nuk meritoj t’i përgjigjem 9 pyetjeve të tij, për shkak se kam dyshime serioze që z. Gjinushi ka konflikt interesash me këtë ligj, sepse, duke iu referuar akuzave të dy ish-nënkryetarëve të tij, zoti Gjinushi është një njeri që është marrë me skafe dhe unë nuk e kam ditur kurrë se çfarë ka pasur brenda skafeve të tij”, - tha Olldashi. Pas kësaj, Gjinushi e cilësoi ministrin Olldashi si rrugaç, bandit, kryetrafikant, që edhe mandatin e deputetit e kishte fituar me votat e bandave. Madje, Gjinushi i ka kujtuar Olldashit se e njihte familjarisht prej vitesh, dhe se vetëm ai nuk mund t’i bënte moralistin. Gjinushi u kap edhe me kryetaren e Kuvendit, Jozefina Topalli, e cila i kujtoi se nuk mund të fliste në këtë mënyrë se e ndalonte rregullorja parlamentare. “Prandaj, sa kohë do të vini ministra banditë dhe rrugaçë si Olldashi dhe meqenëse ke burrërinë që të fshihesh prapa atij kryelegeni që keni kryeministër, atëherë hajdeni të dy bashkë, bëni kallëzim penal dhe mos ia kërko kryetarit të komunës, sepse ti ke shumë gjëra dhe paske mbyllur sytë vetë dhe po sipas këtij ligji, t’i përgjigjesh penalisht”, - tha Gjinushi gjatë replikës së pazakontë me Olldashin. Kryetarja Topalli është detyruar të ndërpresë seancën pas situatës së krijuar, kur në podium për të folur rreth draftit ishte ngritur edhe deputeti Spartak Ngjela, i cili nuk pranonte të linte radhën për të folur Olldashit, i cili kërkonte të bënte një kundërreplikë me Gjinushin. Ndërkohë, Gjinushi sërish është afruar te vendet ku qëndrojnë ministrat, duke vazhduar debatin me Olldashin e madje duke kapur edhe mikrofonin që ndodhej aty. Në shkëmbimin e batutave mes tyre është përfshirë edhe zv. kryeministri Ilir Rusmali, të cilit Gjinushi iu kanos me mikrofonin e TVSH-së, por që i është rrëmbyer nga dora nga Olldashi. Më pas seanca ka filluar e qetë dhe debati parlamentar ka vijuar rreth amendamenteve. Kryetari i grupit parlamentar të PS-së, Pandeli Majko, tha se në parim ishte dakord me luftën kundër kultivimit të lëndëve narkotike, por ai ka kërkuar që në draft të bashkangjitej amendamenti i propozuar prej tyre, për krijimin e një komiteti të zgjedhuar. Sipas tij, kjo strukturë do të mund të krijonte një sistem afatgjatë informacioni. Pavarësisht debateve e tensionit të krijuar, drafti në fjalë është miratuar me 69 votat pro të maxhorancës, 29 kundër të opozitës dhe 2 abstenimet e deputetëve të PBDNJ-së, Spiro Peçi e Leonard Solis, ndërsa Spartak Ngjela, që është shprehur kundër ndryshimeve të propozuara, nuk ka qenë në sallë në momentin e votimit.

Ngjela: Ligji i qeverisë, antikushtetues
Deputeti i PD-së, Spartak Ngjela, kundërshtoi dje në Kuvend nismën e qeverisë që parashikon ndjekje penale, për të gjithë kryetarët e njësive vendore, në territoret e të cilëve konstatohet se mbillen e kultivohen lëndë narkotike kanabis sativa. Sipas tij, amendamentet e propozuara nga Ministria e Brendshme për t’u përfshirë në ligjin “Për barnat dhe lëndët prikotrope”, janë antikushtetuese, dhe se ato, nëse duhet të miratoheshin, duhet t’i bashkangjiteshin Kodit Penal. “Me këto dispozita futemi të Kodi Penal, që miratohet me 3/5. Nëse nuk i keni votat, lëreni për më vonë. Nuk mund të shkelet Kushtetuta. Edhe po e miratuat siç e keni vendosur, do t’ua kthejnë institucionet kushtetuese, filtrat kushtetues, konsitucionalistët nuk do t’ua pranojnë”, - tha Ngjela. Më pas Ngjela nuk ka marrë pjesë as në procesin e votimit.

Replikat dje në Kuvend:

Olldashi:

Për t’ju përgjigjur edhe pyetjes së fundit që bëri z. Gjinushi, unë besoj që nuk e meriton t’i përgjigjem 9 pyetjeve të tij, për shkak se kam dyshime serioze që z. Gjinushi ka konflikt interesash me këtë ligj, sepse, duke iu referuar akuzave të dy ish-nënkryetarëve të tij, zoti Gjinushi është një njeri që është marrë me skafe dhe unë nuk e kam ditur kurrë se çfarë ka pasur brenda skafeve të tij

Gjinushi –Olldashit
Për sa kohë do të vini ministra banditë, që janë zgjedhur vetëm me votat e bandave...

Topalli-Gjinushit: Rregullorja ju ndalon të flisni me këtë gjuhë!

Gjinushi -Topallit
Rregulloren shko tregoja sat ëme, more vesh, ti!

Gjinushi -Olldashit
Prandaj, sa kohë do të vini ministra banditë dhe rrugaçë si Olldashi dhe meqenëse ke burrërinë që të fshihesh prapa atij kryelegeni që keni kryeministër, atëherë hajdeni të dy bashkë, bëni kallëzim penal dhe mos ia kërko kryetarit të komunës, sepse ti ke shumë gjëra dhe paske mbyllur sytë vetë dhe po sipas këtij ligji, ti përgjigjesh penalisht. Këto përrallat tuaja mund t’ia tregoni fëmijëve tuaj, mund t’ia tregoni kujt të doni. Por, kryetrafikant je ti, me gjithë Lazaratin tënd, me gjithë ata që të kanë mbështetur në zgjedhjen tënde si deputet. Pra, ushtro detyrën aty, laje gojën kur flet, sepse nuk mund të prekësh as dinjitetin dhe as personalitetin tim. Nuk je bërë as dje dhe as sot. Të njoh që pa lindur, familjarisht, por nuk do të hyj në këto lojëra të qelbura të tuat. Unë të pyes seriozisht për një skandal që kërkon të bësh dhe që po imiton absolutisht fjalimin e Enver Hoxhës në Mat që nuk mund të hesht e të mbyll sytë kryetari i komunës. Çfarë do të thotë kjo?! Në komunë ka vjedhje, ka vrasje, do të mbyllë sytë kryetari i komunës, në komunë mbillet hashash, në komunë ka trafik prostitutash. Në komunë dhe bashki bëhen, ku do bëhen. Dhe në qoftë se kryetarët e bashkive dhe komunave qenkan përgjegjësit, pse është ministria jote? Ti del tepër, dhe ti tepër je! Ti je vetëm një copë rrugaçi dhe vazhdo të qëndrosh kështu!

Topalli-Gjinushit
Normalisht, unë mendoj se disa njerëz vërtet mendojnë se ministri është tepër, sepse ai ka prishur shumë punë gjatë kësaj periudhe dhe sukseset e Ministrisë së Brendshme, vërtet mund të kenë prishur punë. Ministria e Brendshme ka bërë atë që ju nuk e keni bërë në 9 vjet, prandaj shikojeni mirë këtë punë.

Olldashi
Z. Gjinushi, unë kam diçka fare të thjeshtë. Ngrihu z. Gjinushi prapë nga vendi, sepse edhe unë të njoh prej shumë vjetësh. Qetësohu! E para e punës është që të komplimentoj për gjuhën e pedagogut që përdor dhe kjo tregon se je njeri i kulturuar dhe meriton …
Topalli
Me atë fjalë që keni përdorur, z. Gjinushi, unë nesër mbledh Byronë e Parlamentit dhe të përjashtoj nga parlamenti. Po, po, këtë e bëj unë, këtë e bëj unë!
Olldashi -Gjinushit
Akuzat i kanë bërë nënkryetarët e tu dhe jo unë.
Dedja -Topallit
Bëje, mblidhe Byronë, do të hysh në histori që përjashtove një ish-kryetar Parlamenti! Ai është profesor, është shkencëtar ndërkombëtar.

[Albo]

SHKODER/ Antidroga arreston 54-vjeçarin Dedë Lumi

Pranga kryeplakut, s’denoncoi kanabisin e mbjellë

Zef PALI

SHKODER – Arrestohet i pari drejtues vendor për mosdenoncim të kultivimit të bimëve narkotike. Kryeplaku Dedë Lumi, i fshatit Bëne të komunës së Shllakut është arrestuar dje se në 10 parcela, u gjetën 7200 rrënjë kanabis sativa. Mos denoncimi në polici, ka çuar në pranga kryeplakun. Burime nga policia e Shkodrës bëjnë të ditur se 52-vjeçari është arrestuar të mërkurën pasdite, rreth orës 19.00, në shtëpinë e tij. Vepra penale për të cilën akuzohet Lumi, është për mosveprim, ndihmë të autorëve të kultivimit të bimës narkotike dhe mos dhënie ndihme policisë.
Zbulimi
Burime nga policia e Shkodrës bëjnë të ditur se 7200 rrënjë kanabis të shpërndara në 10 parcela janë asgjësuar dje gjatë një aksioni të bluve të Shkodrës në fshatin Bënë të komunës Shllak. Bimët narkotike ishin kultivuar në terren malor në toka të shpyllëzuara pa pronar të ligjshëm, larg qendrave të banuara. Policia ende nuk ka ndonjë autor të kultivimit të bimëve narkotike, ndërsa është duke punuar për identifikimin dhe arrestimin e autorëve të kësaj vepre penale. Sipas policisë, kryeplaku duhej të denonconte ekzistencën e bimës narkotike në zonën që ai administron. “Lumi e njihte kanabisin. I kemi trajnuar dhe kemi treguar se cila është bima dhe cilat janë përgjegjësitë e pushtetit lokal në rast se gjendet kanabis në zonën adminitruese”. Kështu janë shprehur burime nga policia e qytetit verior. Sipas ligjit dhe marrëveshjes së nënshkruar me qëllim heqjen Shqipërisë nga harta e kultivuesve të bimës narkotike, drejtuesit e pushtetit lokal duhet të tregojnë rastet e kultivimit të bimës narkotike.
Dëshmia
Sipas burimeve nga policia, vetë kryeplaku Dedë Lumi ka pohuar se kishte dieni për këto parcela. Ai ka thënë se dinte që në bjeshkë, në rrëzë të malit kanë qenë të mbjella disa parcela me një bimë që atij i ishte dukur e dyshimtë. Në lidhje se pse nuk ka bërë denoncim për këto fusha të mbjella, ai është përgjigjur se nuk e kishte menduar këtë gjë. Kaq ka mjaftuar për të vënë prangat kryeplakut, që ky veprim i bluve i ka ardhur si rrufeja në kohë të mirë.

Aksioni
Që në mëngjesin e të mërkurës, 80 forca policie të Antidrogës janë nisur drejt terrenit malor të Shllakut, Shalës dhe Shoshit. Pasi kanë gjetur 420 rrënjë në Mazrek dhe 1200 në afërsi të Shllakut, specialistët e Antidrogës kanë mundur të zbulojnë njëra pas tjetrës 10 parcela të shpyllëzuara, 8 në Bebë dhe 2 në Bjeshkët e Cukalit. Ndërsa kanë asgjësuar bimën narkotike, blutë i kanë vënë prangat kryeplakut. Policia mendon që përmes arrestimit të kryeplakut, të shkojë drejt identifikimit të autorëve të kultivimit të bimës narkotike.

Tirana Observer