Pas 70 vjetesh Katedrala e re ne Tivar !!

[NoName]

Pas shtatëdhjetë vjetësh dhurohet trualli për ndërtimin e Katedrales së re në Tivar


Të enjten, më 9 mars 2006, në ndërtesën e komunës së Tivarit, u nënshkrua marrëveshja mes komunës dhe Arqipeshkvisë së Tivarit mbi ndarjen – dhurimin e tokës për ndërtimin e katedrales së re në pjesën e re të qytetit.
Marrëveshjen e nënshkruan mons. Zef Gashi, arqipeshkëv i Tivarit, dhe zonja Anka Vojvodić, kryetare e komunës së Tivarit.
Gjatë aktit të nënshkrimit të marrëveshjes ishin të pranishëm arqipeshkvi i Tivarit në pension, mons. Pjetër Perkoliqi, famullitari i Tivarit p. Krešimir Djaković, parohu i Tivarit, Radoman Mijajlović, imami kryesor i Tivarit, Mujdin Mulaimi, dhe tre përfaqësues katolikë, anëtarë të këshillit në Kuvendin komunal të Tivarit: Matija Ćetković, Nedjeljko Đurović dhe Dragan Perajković.
Pas nënshkrimit të marrëveshjes, të pranishmëve iu drejtua zonja Vojvodić, kryetare e Komunës. Ajo shprehu kënaqësinë që trualli për katedralen e re në pjesën e re të qytetit iu dhurua Arqipeshkvisë së Tivarit, institucionit më të vjetër fetar, kulturor dhe qytetar në këto troje. Në veçanti ajo theksoi faktin se në Tivar së shpejti do të fillojë ndërtimi i tri objekteve të rëndësishme të tri bashkësive fetare: Katedrales së rë katolike, tempullit ortodoks dhe xhamisë, gjë që do të kontribuojë edhe më shumë në tolerancën dhe në bashkëjetesën e njerëzve në këtë qytet.
Mons. Zef Gashi, duke iu drejtuar të pranishmëve, para së gjithash e falënderoi kryetaren e komunës për zgjidhjen e kërkesës për ndërtimin e Katedrales, që ishte bërë nga mons. Nikola Dobrečić-i disa dekada më parë dhe theksoi se Katedralja me siguri do ta stolisë qytetin tonë, sikurse edhe objektet e bashkësive të tjera fetare dhe do të kontribuojë në thellimin e harmonisë jetësore të të gjithë qytetarëve.
Me rastin e nënshkrimit të marrëveshjen për dhurimin e truallit për Katedrale e shprehën kënaqësinë e tyre edhe parohu ortodoks dhe imami i Tivarit, duke e uruar dhe përgëzuar arqipeshkvin e Tivarit, mons. Gashin.
Arqipeshkvi i Tivarit në pension, mons. Pjetër Perkoliqi, iu falënderua pushtetit shtetëror dhe kryetares së komunës për kontributin që dhanë në zgjidhjen e kësaj çështjeje të rëndësishme.
Në pyetjen e gazetarëve se kur pritet të fillojë ndërtimi i Katedrales dhe a janë siguruar mjetet përkatëse, arqipeshkvi Gashi theksoi se ndërtimi do të fillojë së shpejti, kurse udhëheqësve shtetërorë u bëri te ditur se Arqipeshkvia nuk kërkon kurrfarë huazimi të hollash ose ndihmë nga shteti, por vetëm që t’i lirohen mjetet e bllokuara në bankë, të cilat janë të dedikuara për këtë qëllim.
Në mbledhjen e mbajtur më 30 janar 2006, Kuvendi komunal solli vendimin mbi kalimin e së drejtës së tokës përkatëse për ndërtim në Arqipeshkvinë e Tivarit, që kap hapësirën prej 4. 985 m², brenda së cilës 2. 400 m² për Katedrale dhe 440 m² për shtëpinë e meshtarit, duke e liruar nga pagimi i komunalive. Arqipeshkvia është e detyruar të fillojë punën në afat prej një viti. Nëse nuk e bën këtë, marrëveshja prishet dhe humbet e drejta për këtë truall.
Besimtarët e famullisë së Zojës së Papërlyer në Tivar, e pritën me shumë gëzim dhe e kremtuan këtë ngjarje të rëndësishme.
Lutjen e parë që t`i ndahet trualli Arqipeshkvisë për ndërtimin e Katedrales pushtetit komunal ia kishte drejtuar arqipeshkvi, mons. Nikola Dobrečić-i, qysh më 1937. Komuna kishte marrë vendim, por për shkak të Luftës së dytë Botërore, nuk qe e mundur të fillonin punimet e ndërtimit. Pas Luftës së dytë Botërore, pushteti komunist në qytetin e Tivarit, ia mori Arqipeshkvisë më se 60. 000 m² tokë. Lutjet që ia drejtuan pasardhësit e mons. Dobrečić-i, arqipeshkvi mons. Aleksandar Tokić-i dhe mons. Pjetër Perkoliqi, qenë refuzuar, kurse me ndryshimet demokratike u dhanë premtimet se çështje do të zgjidhej pozitivisht. Pra, është dashur të pritet gati 70 vite, që edhe katolikët e Tivarit të fitojnë hapësirën (truallin) në pjesën e re të qytetit, ku do të mund ta lëvdojnë e t’i përkushtohen Zotit.
Këtë ngjarje të rëndësishme e përcollën shumë gazetarë si dhe kamerat e televizionit shtetëror.
E falënderojmë Zotin e mirë dhe ndërmjetësen tonë, të Lumen Virgjër Mari, për këtë dhuratë të madhe.

[Labeati]

Sikurse e permendi NoName, kisha katolike ne Tivar ka histori 2000 vjecare dhe lidhje te ngushte me katolicizmin ne shqiptare, edhe kleri eshte i perziem... keshtu qe eshte lajm i gezueshem qe po rikthehet katedralja ne kete qytet buze Adriatikut.