Fatmir Limaj

[Llapi]

RDK organizon mbrëmje rinore në Mitrovicë, për nder të nënkryetarit të PDK-së z.Fatmir Limaj

30.11.2006
Sot një vjet ish-komandanti emblematik i Ushtrisë Çlirimtare të Kosovës, politikani pragmatik i Kosovës, nënkryetari aktual i Partisë Demokratike të Kosovës, z.Fatmir Limaj, ka triumfuar edhe në betejën e ngadhënjimit të drejtësisë ndërkombëtare.
Sot një vjet më parë, z.Fatmir Limaj është shpallur i pafajshëm nga ana e Tribunalit të Hagës, duke shënuar kështu edhe një fitore të vlerave sublime të Ushtrisë Çlirimtare të Kosovës dhe të pastërtisë së luftës çlirimtare.
Me këtë rast, për nder të shënimit të përvjetorit të parë të triumfit të z.Fatmir Limaj dhe të luftës së UÇK-së edhe në Tribunalin e Hagës, Rinia Demokratike e Kosovës organizon një mbrëmje rinore në Mitrovicë. Mbrëmja mbahet në lokalin “Lux” dhe fillon në orën 20:00.

[Llapi]

Nënkryetari Limaj: Liria e Kosovës është fituar me përfundimin e luftës çlirimtare!

Mitrovicë, 30.11.2006
Sot në Mitrovicë, nën organizmin e Rinisë Demokratike të Kosovës u kremtua njëvjetori, i fitores së madhe të popullit shqiptar, i lirimi nga Gjykata Ndërkombëtare në Hagë të ish-komandantit të UÇK-së dhe nënkryetarit të PDK-së, z.Fatmir Limaj.
Në këtë mbrëmje të organizuar në mënyrë madhështore nga RDK-ja, ku ishin të pranishëm një numër shumë i madh i të rinjve dhe qytetarëve mitrovicas, përveç komandant Çelikut, të pranishëm ishin edhe nënkryetari tjetër i PDK-së, z.Bajram Rexhepi, kryetari i RDK-së z.Memli Krasniqi si dhe anëtarë të tjerë të strukturave udhëheqëse të PDK-së.


Mbrëmjen e shpallën të hapur kryetari i RDK në degën e Mitrovicës. Pastaj morën fjalën nënkryetari i PDK-së z.Bajram Rexhepi si dhe kryetari i RDK-së z.Memli Krasniqi, të cilët në fjalët e tyre i uruan mirëseardhje z.Limaj në Mitrovicën e cila gjithnjë ka mbështetur sakrificat dhe punën e nënkryetarit të PDK-së, z.Fatmir Limaj.

Pas fjalëve të tyre u shfaq një dokumentar televiziv për z.Limaj, i cili u prit me shume emocione nga të pranishmit.

Më pas fjalën e mori nënkryetari i PDK-së z.Fatmir Limaj i cili së pari falënderoj qytetarët Mitrovicas për mbështetjen dhe përkrahjen që ja kanë dhënë atij në kohën më të vështirë.

Në fjalën e tij z.Limaj tha se: Është vështirë të përshkruhet me fjalë ndjenja kur vëren se ke mbështetjen e plotë të popullit tënd. Sot jam i emocionuar për shkak të këtij organizimi të rinisë, këtu kam rastin të shoh të rinj që janë për herë të parë këtu, por edhe djem dhe vajza me të cilët kemi vënë themelet e rinisë dhe të partisë.”

“Lirinë e kemi fituar vet, kemi derdhur gjak për këtë tokë. Falënderojmë të gjithë ata që na kanë ndihmuar. Por, ne e kemi fituar lirinë dhe gjërat e falura mund të merren ndërsa ato të fituarat nuk merren kurrë”-tha z.Limaj.

Duke folur për luftën çlirimtare të UÇK-së, z. Limaj tha: “Sot, kur pashe këtë dokumentar pashë rreth 50 djem që kanë bërë hapërimin e lirisë së Kosovës, e tani nuk janë më në mesin tonë. Gjaku i tyre i derdhur dhe lufta e tyre dhe bashkëluftëtarëve të tyrae janë garanca e vetme e shtetësisë së Kosovës. Liria e Kosovës është fituar me përfundimin e luftës çlirimtare, pra në qershor të vitit 1999”

Duke folur për procesin negociator nënkryetari i PDK-së shprehi besimin e tij në këtë proces dhe shprehi bindjen se Kosova do të fitoj pavarësinë e saj. Duke folur për këtë çështje z.Limaj theksoi se: Për deri sa Hashim Thaçi dhe bashkëluftëtarët e tij janë në procesin negociator nuk duhet askush në Kosovë të friksohet se negociatat mund të shkojnë në drejtimin e gabuar”.

Në fund z.Limaj kërkoj nga të rinjtë mitrovicas që të mobilizohen për fitoren e PDK-së në mënyrë që të përfundoj keqqeverisja e tanishme dhe Kosova ta ketë udhëheqjen që e meriton, me njerëz të dëshmuar në krye.

[Llapi]

Nënkryetari i PDK-së Fatmir Limaj: Gjaku i dëshmorëve të UÇK-së është garancë e shtetësisë së Kosovës.

[Llapi]

Beteja për Kosovën po zhvillohet në kancelaritë e fuqive të mëdha - thotë nënkryetari LIMAJ

02.12.2006
Unë e di se qytetari i Kosovës sot i ka një milion arsye të jetë i pakënaqur, por njëkohësisht e di se qytetari i Kosovës me miliona herë ka dëshmuar se e do shtetin e vet, e do vendin e tij dhe është i gatshëm të japë më shumë për vendin e vet. Dhe në mesin e pakënaqësisë që i ka një milion arsye dhe dëshirës për të bërë shtetin, unë i ftoj qytetarët e Kosovës që të jemi në të dytën.
- tha mes tjerash në një intervistë ekskluzive për Agjensinë e Lajmeve “Kosovapress” nënkryetari i Partisë Demokratike të Kosovës, z.Fatmir Limaj.


Kosovapress: Si e vlerësoni vendimin e Gjykatës së Tribunalit të Hagës tash një vit pas lirimit tuaj ?

Limaj: Nëse kthehemi një vit mbrapa, normalisht kemi qenë në një gjendje krejt tjetër, në situatë krejt tjetër, kemi qenë para një vendimi që do të përcaktonte jo të ardhmen tonë, por të ardhmen historike të vendit edhe të organizimit të cilit i kemi shërbyer dhe kemi qenë pjesë e saj, d.m.th. të ardhmen e vetë Ushtrisë Çlirimtare të Kosovës. Ju e dini vendimin e gjykatës si ka qenë. Fatkeqësisht ai vendim nuk ka qenë i plotë në dobi të tonën, për faktin që një nga ish-bashkëluftëtarët tanë është dënuar. Është fjala për Haradin Balajn, mirëpo procedura gjyqësore e ankesës vazhdon dhe ne kemi shumë shpresë që në procesin e ankesës me fakte plotësuese që mund të vijnë nga pala mbrojtëse edhe Haradini do të kthehet në shtëpi. Sa ka ndikuar pozitivisht lirimi im, personalisht nuk dua të lëshohem në këtë, por mund të merret me mend se çka do të thotë një vendim i tillë në aspektin privat dhe profesional.

Kosovapress: Ju i keni munguar për një kohë politikës dhe proceseve që janë zhvilluar në Kosovë. Ku janë dallimet e proceseve politike kur puna juaj është ndërprerë dhunshëm dhe cili është përjetimi i atëhershëm dhe tash ?

Limaj: Ka qenë një kohë krejt tjetër kur është ngritur aktakuza, sepse ne kemi qenë në procese krejt tjera politike që kanë qenë tema kryesore atëherë, ndërsa sot ose pas lirimit tim merremi me një temë krejt tjetër të rëndësishme.
Pra, jemi në momente krejt të tjera politike. Atëherë jemi marrë me ndërtimin e institucioneve në Kosovë, tash po merremi më tepër me përmbylljen e shtetësisë së Kosovës dhe për një vit kemi arritur që komunitetit ndërkombëtar t’ia paraqesim se si do të duket Kosova e pavarur. Ne para komunitetit ndërkombëtar me ato bisedime që kemi pasur dhe me ato dokumente që kemi paraqitur, konkretisht kemi treguar se cili është qëllimi i ynë për të ndërtuar shtetin, se çfarë shteti ne dëshirojmë. Kemi dhënë projekte dhe dokumente konkrete se si e shohim ne funksionimin e shtetit të ardhshëm të Kosovës. Ne kemi hyre në një çështje krejtësisht konkrete nga ajo që ka qenë e kaluara dhe mendoj që për këtë vit është krejt normale që mund të kemi pakënaqësi, secili veç e veç dhe tërësisht si popull, për faktin se të gjithë kemi pritur që statusi final i Kosovës do të përfundojë në vitin 2006. Ky ka qenë një vendim i vetë Grupit të Kontaktit, i cili ka paraparë përmbylljen e statusit në 2006, ku pastaj nga vetë elita politike kosovare vazhdimisht është përcjell ky mesazh dhe në një mënyre apo tjetër është përgatitur populli që në vitin 2006 do të përfundojë çështja e statusit të Kosovës. Zhvillimet e fundit treguan se duhet ende kohë. Ky proces është pak më i komplikuar, duhet edhe pak kohë që të binden edhe të tjerët, të cilët ende kanë rezerva në shtetin e ri të Kosovës, në statusin final të Kosovës. Këtë fakt, unë të paktën kështu e shoh. Ne kemi një vazhdim ose shtyrje të procesit edhe për një kohë. Shpresoj që mos të jetë shumë e gjatë, shpresoj që shumë shpejt ata që kanë pasur nevojë në argumente shtesë të binden për një gjë të tillë dhe ta bëjmë përmbylljen e shtetit të Kosovës.

Kosovapress: Cili është kontribut i juaj në proceset që po zhvillohen tash?

Limaj: Kontributi im brenda krejt kësaj ka pasur një qëllim. Ne duhet të jemi në proces bashkë me faktorin ndërkombëtar. Ne duhet t’i shërbejmë procesit dhe ta përmbyllim atë. Gjithashtu, qëllimi im është identifikuar, është interes historik, kombëtar, njerëzor, individual i secilit nga ne që ta përmbyllim këtë fazë të rëndësishme të Kosovës në përputhshmëri të plotë me vullnetin e popullit të Kosovës. Shteti i ardhshëm i Kosovës duhet t’i ruajë në ecjen e tij drejt ndërtimit të shtetit dhe funksionalizimit të shtetit partnerët e vet që i ka fituar në rrethana krejtësisht tjera, shumë të vështira, në rrethana që atëherë u rrezikonim si popull. Atëherë i kemi ndërtuar disa aleanca dhe mendoj se këta aleatë populli i Kosovës duhet t’i ruajë dhe se bashku më ta të udhëtojë në këtë proces që jemi sot, dhe për mua është shumë i rëndësishëm procesi i pas definimit të statusit të Kosovës, pra ndërtimi i shtetit. Kosova në familjen e madhe botërore të shteteve nuk do të mund të funksionojë si duhet nëse nuk do të ketë mbështetje të vazhdueshme të aleatëve që janë pjesë ose përbërëse e lojës dhe skenës politike ndërkombëtare. Kosovës, jo vetëm sot, por përjetësisht, i duhet të ketë partneritet dhe ta fillojë partneritetin me ata, të cilët e kanë ndihmuar që të çlirohet. Qëllimi tjetër imi ka qenë, në të gjitha këto bisedime, që pala kosovare një gjë duhet ta ketë parasysh, të jetë shumë e hapur dhe transparent me këta miq dhe të jetë në përputhshmëri me linjat e tyre, po njëkohësisht të bëjë të qartë, zëshëm dhe të argumentojë se nuk është në interesin as të Kosovës dhe as të partnerëve tanë ndërkombëtarë të nxjerrim krijesa artificiale dhe të bëjmë eksperimente,të cilat qysh në fillim janë të dështuara dhe nuk funksionojnë. D.m.th. ne mund të shkojmë të bisedojmë dhe të ofrojmë, dhe nga ajo që ne ofrojmë ndonjëherë mund të duket jashtë asaj që është standarde, por deri aty ku nuk dëmtohet funksionalizimi i shtetit të Kosovës, deri aty ku nuk dëmtohet substanca e shtetit të Kosovës. Kjo ka qenë edhe qëllimi që në komunikim me ndërkombëtarët këtë gjë ta themi qartazi, sepse interes i Kosovës është që me miqtë e vet të jetë e hapur dhe jo të driblojë. Ne marrim obligime për ato që mundemi t’i përmbushim, ne nuk duhet të themi po për ato gjërat që nuk mund t’i përmbushim, për ato gjëra që dështojnë, por duhet të marrim obligim për të gjitha ato që ne mund t’i përmbushim.

Mendoj se dokumentet që kemi bërë janë në drejtim të asaj që marrim obligime, të cilat do të mund t’i përmbushim. Mendoj se rikyçja ime në politike e ka pasur qëllim që edhe unë të jap kontributin tim për të ruajtur partneritetin me ndërkombëtarët dhe njëkohësisht për të nxjerrë Kosovën me një përmbajte ose me një substancë të një shteti të pavarur dhe një shteti funksional. Sa ka qenë i madh apo i vogël kontributi im, mbetet që të vlerësohet, por unë i besoj këtij procesi dhe besoj që deri tani kështu është puna dhe të shikoj se si do të shkojë në të ardhmen. Mirëpo këto gjera nuk varen nga njerëzit, por varen nga një proces që ne të gjithë së bashku duhet të punojmë.

Kosovapress: Këto ditë është temë trajtimi mundësia e krijimit të një qeverie gjithëpërfshirëse. A i nevojitet Kosovës një qeveri e tillë?

Limaj: PDK-ja ka dalë me një ofertë shumë herët për Qeveri të Unitetit dhe kjo gjë ka qenë shumë më herët, e sidomos në 5-6 muaj e fundit, dhe kjo ka qenë në tavolinën e të gjithë të interesuarve, e të gjithë atyre që duhet t’i ofrohet një ofertë e tillë. Mirëpo çdo ditë e më shumë po zbehet një ofertë e tillë, sepse edhe PDK ka disa momente të caktuara të brendshme të zhvillimit që jemi sot. Kjo ka qenë para 6 muajve për dy arsye, e para se nëse e shikojmë historinë e ndërtimit të shteteve, secili popull është mobilizuar në momentet historike për të qenë unik, për të arritur qëllimin historik, qëllimin për të bërë shtetin. Ne kemi menduar se në kohën në të cilën është duke kaluar Kosova, në momentet tash kur kanë filluar bisedimet për statusin, Kosovës i duhet një unitet, jo një unitet formal, por një unitet praktik, ekzekutiv, veprues dhe i fuqishëm, një qeveri e fuqishme dhe një elitë politike e fuqishme, e cila di të marrë përgjegjësi dhe bart peshën e përgjegjësisë edhe para qytetarëve të Kosovës, edhe para komunitetit ndërkombëtar. Kjo elitë politike do të jetë e gatshme dhe e ka kredibilitetin, e ka mbështetjen e masës për ta çuar Kosovën në përmbyllje të statusit dhe për ta çuar në fazën e transicionit, apo në fazën e implementimit të marrëveshjes së statusit deri në zgjedhje. Për këtë fazë, 6 muaj, një vit, apo sado që të zgjatë, kemi menduar se është në interesin e vendit që të ndërtojmë një qeveri të unitetit për të kaluar këtë fazë tepër të rëndësishme për vendin tonë. Demokracia, ne e kuptojmë relacionin pozitë dhe opozitë dhe kjo ka pasur kuptimin kur është krijuar kjo pozitë dhe opozitë, sepse bisedimet për statusin nuk janë dukur në atë kohë kur është bërë ndërtimi i koalicioneve pozitë-opozitë, mirëpo nuk është tash gjendja në Kosovë siç ka qenë në vitin 2004, sot jemi para zhvillimeve krejt të reja. Pra, ne duhet të kemi një unitet veprues të qytetarit dhe të jemi afër tij, t’i shpjegojmë, të marrim përgjegjësisë para qytetarit. Praktikisht sot kemi një qeveri e cila shantazhohet nga ministrat e saj dhe mjafton që një ministër mos të votojë dhe bie qeveria. Ai ministër mund të jetë shkelësi më i madh i ligjit, por kryeministri nuk mund ta largojë për faktin se krejt qeveria varet nga ai. Ne kemi kërkuar që në këtë kohë tepër të rëndësishme, qeveria duhet t’i ketë së paku 90 vota në parlament për ta çuar Kosovën drejt përmbylljes së statusit.

Kosovapress: A mendoni se kjo është e domosdoshme si proces politik apo për shkak se qeveria nuk është treguar efikase për t’i realizuar qëllimet e saja?

Limaj: Janë shumë faktorë, është edhe ideja se është e rëndësishme për procesin e vendit, por edhe padyshim se kjo qeveri ka dëshmua se është jashtëzakonisht e papërgatitur profesionalisht, është e komprometuar, nuk e ka autoritetin në masë dhe mbi të gjitha nuk e ka mbështetjen te strukturat e veta politike. Duke i pasur parasysh këto rrethana pason ajo që e deklarova me herët. Neve na duhet një lidership i fuqishëm, i cili merr përgjegjësi dhe i cili ka mbështetje, dhe një elitë politike, e cila e ka besimin te populli, sepse do të ndihet më lehtë në këto proces që po hyjmë.

Kosovapress: Nga shumë analistë dhe subjekte të ndryshme është theksuar se opozita ka vepruar sikur të ishte pjesë e qeverisjes dhe se deri më tani nuk ka zhvilluar proces opozitar. A është bërë kjo për hir të statusit apo i ka munguar një njohje e veprimeve opozitare?

Limaj: Për të folur për zhvillimet e brendshme në Kosovë ne duhet kemi parasysh të gjitha specifikat me të cilat ballafaqohet ky vend. Kosova është në momentin e përcaktimit të fatit të saj. Ky është rast specifik dhe kjo është ajo që e tregon krejt specifikën e pozicionit politik që ka Kosova. Pra, përderisa ne e kemi një vend ende të padefinuar me status, atëherë si mund të jenë të definuara marrëdhëniet politike brenda këtij vendi, si mund të jenë të definuara pozita dhe opozita, sa mund ato të luajnë një rol normal të zhvillimeve demokratike ashtu siç bëhet nëpër vendet normale? Tërë ky vit na ka shkuar në bisedime, në atmosferën e bisedimeve dhe si mund që një parti opozitare të ndërtojë marrëdhënie opozitare kur për partinë në opozitë dhe për partinë në pozitë dhe për qytetarët e Kosovës imperativi një dhe i vetëm është Kosova shtet, të punojmë për shtetin e Kosovës. Dhe të gjitha këto forca politike janë të involvuara në atë proces negociator, praktikisht ne nuk mund të bëhemi opozitë e shtetit të Kosovës. PDK në këtë rast i ka luajtur dy role, shpesh paradite është kritikuar qeveria dhe pasdite kanë shkuar së bashku në Vjenë. Normalisht, kjo para qytetarit mbjell dyshime, çka është duke ndodhur këtu, para dite e kritikon dhe pasdite shkon bashkë me të. Dhe krejt kjo ka ndodhur për shkak se paralelisht në Kosovë po zhvillohen dy procese. Rasti është krejt specifik. Ne nuk mund t’i japim vetës aq komoditet sa për të prishur proceset dhe vështirë është tash që të bëhet vija e ndarjes. Kur është për statusin jemi të gjithë së bashku, ndërsa për keqqeverisjen ne luajmë rolin tonë opozitar. Ne jemi munduar ta përcjellim keqqeverisjen vazhdimisht dhe të shpalosim pakënaqësitë tona edhe në grupin parlamentar dhe në aktivitete tjera politike.

Kosovapress: Por, pse nuk ka qenë e zëshme sa duhet me ato veprime që nuk e dëmtojnë statusin?

Limaj: Edhe kjo çështje është e ndërlidhur drejtpërdrejt më statusin final të Kosovës, sepse qetësia dhe stabiliteti politik është një argument që duhet pala kosovare ta afirmojë para komunitetit ndërkombëtar, e sidomos para atyre të cilët ende kanë dyshime për shtetin e Kosovës, për të thënë këtë njerëz dinë të ndërtojnë stabilitet politik. Ne mund të flasim për marrëdhënie tona të brendshme, por ata të tjerët jashtë nesh edhe në qoftë se na shikojnë, ky vend i cili më ngulm po kërkon krijimin e shtetit dhe në anën tjetër këta grinden mes vete ende pa e bërë shtetin dhe nuk fokusohen në çështjen kryesore, atëherë shtrohet pyetja se a e meritojnë këta që të kenë shtetin.
Prandaj krejt këto zhvillime qeveria i ka shfrytëzuar maksimalisht në mënyrën më të keqe të mundshme. Këtë pozicion ajo e ka keqpërdorur, këtë pjekuri politike të opozitës, këtë gatishmëri të opozitës për të punuar sa më shumë në ndërtimin dhe definimin sa më të shpejtë të statusit. Ka raste kur disa nga ministrat shpeshherë e kanë keqpërdorur, duke shfrytëzuar këtë moment të rëndësishëm historik të Kosovës. Ata e kanë shfrytëzuar edhe për keqmenaxhim, edhe për gjëra të tjera. Prandaj ju keni të drejtë të thoni nga një anë se opozita nuk ka qenë e zëshme, por në anën tjetër opozita e ka obligim që para qytetarëve të Kosovës, para votuesve të vet që ta përmbyllë statusin final të Kosovës bashkë me partitë tjera, dhe ne nuk mund të jemi aq komod që të dëmtojmë proceset historike në shërbim të proceseve ditore.

Kosovapress: T’i kthehemi lirimit tuaj të bërë para një viti nga Gjykata e Hagës. Pritja dhe vizitat që Juve ju janë bërë nga qytetarët ka dëshmuar se populli ynë e do njeriun e vet, e do Ushtrinë Çlirimtare të Kosovës dhe shtetin. Çka ju thoni qytetarëve?

Limaj: Unë e di se qytetari i Kosovës i ka sot një milion arsye të jetë i pakënaqur, por njëkohësisht e di se qytetari i Kosovës me miliona herë ka dëshmuar se e do shtetin e vet, e do vendin e tij dhe është i gatshëm të japë shumë për vendin e vet, dhe në mesin e pakënaqësisë që i ka një milion arsye dhe dëshirës për të bërë shtetin, unë i ftoj qytetaret e Kosovës që të jemi në të dytën, ta bëjmë shtetin, të vazhdojmë të qëndrojmë të palëkundur, me besim të plotë brenda këtij procesi për të bërë shtetin e Kosovës. Këtu nuk ka parti politike. Kur t’i drejtohesh qytetarit të Kosovës me një apel të tillë, i drejtohesh çdo qytetari pa dallime politike. Zhvillimet e fundit, por edhe ato që mund të na vijnë, nuk guxojnë në asnjë mënyrë që të na bëjnë nervoz dhe të na frustrojnë për të dëmtuar proceset politike. Ju e dini çka kemi kaluar. Unë ju ftoj të imagjinoni 96-tën, dhjetë vjet përpara. Tani po futemi në 2007, mendojeni `97-tën si ka qenë. Miqtë tanë po kërkojnë edhe pak kohë, dhe ne duhet të pajtohemi, nuk kemi alternativë tjetër. Miqtë tanë kërkojnë kohë që statusi i ardhshëm i Kosovës, shteti i Kosovës, të jetë i pranueshëm edhe për disa vende të cilat kanë hezitime dhe ne nuk bëjmë asgjë më tepër, sepse nuk ka rrugë tjetër. I ftoj qytetarët e Kosovës që të qëndrojnë bashkë me aleatët, të cilët na kanë ndihmuar për t’u çliruar, kuptohet me luftën tonë çlirimtare, por pa ndihmën e tyre nuk do të ishim ku jemi sot.

A ka alternativë tjetër Kosova? Nuk ka alternativë tjetër, përveç që të ecim krah për krah me aleatët e saj. Por, a mund të na tradhtojnë, apo mund të ketë diçka më pak se pavarësia? Nuk mund të ketë. Ky vend ka dëshmuar se sa herë këtu është vendosur politikisht në kundërshtim me vullnetin e shumicës, asnjëherë nuk ka pasur sukses zgjidhja dhe për këtë besoj se janë të vetëdijshëm edhe aleatët tanë dhe të gjithë se çfarëdo zgjidhje që nuk respekton vullnetin e shumicës nuk është zgjidhje, kjo hap kriza, hap Kutinë e Pandorës dhe hap dilema të tjera. Ne jemi këtu për ta thënë një gjë të tillë, se çdo gjë që është nën vullnetin e popullit nuk ka asnjë forcë që mund të na shtinë të pranojmë dhe për këtë mund t’i siguroj qytetarët e Kosovës. Ne nuk mund t’i ndalim ndoshta proceset, por ne mund t’iu themi qytetarëve të Kosovës se ne deri këtu ishim dhe tash e tutje ne nuk mund të jemi. Në Kosovë më nuk bëhen zhvillime jotransparente, nuk lejojmë më për Kosovën të vendoset nëpër zyre pa e ditur populli. Këtë duhet të kemi qartë, ne jemi këtu për mos të lejojmë një gjë të tillë dhe për Kosovën dhe qytetarët e Kosovës nuk mund të vendoset prapa skenave. Jam i bindur se Kosova në këtë proces do të dalë një shtet i suksesshëm, një shtet që mund ta mbajë veten dhe një shtet funksional. Unë e kam këtë bindje, dëshiroj që këtë bindje time t’ia shpreh qytetarit tim, sepse unë besoj në këtë proces, besoj në angazhimin e Shteteve të Bashkuara të Amerikës dhe aleatëve të saj, ata të cilët na kanë ndihmuar në kohën më të vështire dhe besoj që së bashku me ta do të përmbyllim procesin e statusit të Kosovës, por edhe do të fillojmë ndërtimin e shtetit të ri të Kosovës. Dhe këto zhagitje, që unë po i quaj zhagitje nuk janë në realitet zhagitje, sepse beteja për Kosovën po zhvillohet në kancelaritë e fuqive të mëdha. Miqtë tanë po punojnë pa ndërprerë në bindjen e atyre të cilët kanë dilema në shtetin e Kosovës. Shpresoj se nuk do të stërgjatët procesi i statusit dhe definitivisht viti i ardhshme të jetë vit i shtetit të ri të Kosovës, i shtetit funksional të Kosovës, shtetit i cili ka shumë punë, detyre e telashe që pastaj fillon t’i zgjidhë ato një milion pakënaqësi që i kanë qytetarët e Kosovës.

Unë e vazhdoj të shpreh mendimet e mia perfekte për atë që ka bërë populli i Kosovës për mua personalisht, besoj se deri më tani, pas një vit të lirimit, nuk i kam zhgënjyer. Unë i siguroj që do të vazhdoj të punoj, t’i jap tërë energjitë e mia në përputhshmëri të plotë me interesat e tyre, me interesat e qytetarëve të Kosovës. Me aq sa di dhe aq sa mundem, do të jem komplet i angazhuar që interesi i qytetarëve të Kosovës, pavarësisht se cilës parti politike i takojnë, ai do të jetë numër një dhe është numër një në agjendën time dhe unë funksionoj nga ky parim. Respekt dhe falënderime për të gjithë qytetarët e Kosovës të cilët kanë qenë në ditët më të vështira afër meje.

Intervistoi: Kimete Krasniqi

[Llapi]

Limaj ; Bisedimet nuk janë duke u bërë për të drejtat e shqiptarëve por për shtetin e Kosovës

fatmir_limaj Fatmir Limaj dhe Jakup Krasniqi në një debat me qytetar në Gjilan, i cili u mbajt gjatë fundjavës, thanë se Kosova tashmë është një shtet i vonuar nga viti 1999, dhe se bisedimet nuk janë duke u bërë për të drejtat e shqiptarëve por për shtetin e Kosovës. Limaj, tha se për herë të parë në histori, shqiptarët e Kosovës nga njerëzit që deri dje kërkonin të plotësoheshin kërkesat, tashmë janë faktor që negociohet me ta për plotësuar kërkesat të tjerëve.

Argumenti i luftës së UÇK-së, është argumenti fundamental, dhe bashkë me argumentet e tjera të dala nga lufta e 1999, janë argumente fundamentale për shtetin e Kosovës, tha Fatmir Limaj, nënkryetar i parë i PDK-së, i cili u cilësua në tubim si gjenerali i zemrave. Limaj, tha se për herë të parë në histori, shqiptarët e Kosovës nga njerëzit që deri dje kërkonin të plotësoheshin kërkesat, tashmë janë faktor që negociohet me ta për plotësuar kërkesat të tjerëve.
“Asgjë në Ballkan nuk mund të vendoset pa pëlqimin e kombit shqiptar, shumë çka varet nga ne”, ka porositu Limaj. Edhe Jakup Krasniqi ne fjalën e tij ka provuar të heq dilemat dhe shqetësimet e qytetarëve të tubuar rreth decentralizimit.

“Kosova do të bëhet shtet dhe brenda saj nuk do të ketë shtete por do të ketë komuna”, tha Krasniqi, ndërkaq lidhur me vonesat për statusin, Krasniqi tha se “me rendësi është substanca e jo koha e pavarësisë”.

/Xhevat Latifi/

Postuar më: sb blue sky & radio kosova staff me Dec 04, 06 | 12:01 pm

[Llapi]

Nënkryetari Limaj shpreh besimin se procesi politik po shkon në drejtimin e duhur

07.12.2006
Nënkryetari për çështje politike o Partisë Demokratike të Kosovës z. Fatmir Limaj priti sot një delegacion të lartë të Ministrise së Punëve të Jashtme të Austrisë, të kryesuar nga drejtori i Departamerntit për Evropën Juglindore, z.Hannes Porias, i cili shoqërohej edhe nga z.Aleksander Bell, shef i Misionit të Austrisë në Kosovë.
Nënkryetari i PDK-së z.Fatmir Limaj theksoi rëndësinë e thellimit të partneritetit me komunitetin ndërkombëtar, gjithnjë në funksion të ndërtimit të shtetit stabil dhe demokratik të Kosovës, të integruar në strukturat euroatlantike.

Në këtë takim u diskutua për çështjet aktuale politike, nëpër të cilat po kalon Kosova, procesin negociator, si dhe mbi zhvillimet politike ne rajon. Me këtë rast, z.Limaj shprehi besimin se rrjedhat politike dhe procesi drejtë pavarësisë së Kosovës do të shkojnë në drejtim të duhur, në përputhje me vullnetin e qytetarëve të Kosovës.

Në takim u bisedua edhe për zhvillimin ekonomik të vendit, për problemet e përditshme sociale të cilat kërkojnë zgjidhje të përhershme dhe për sfidat e Kosovës së pas statusit.
Ishte konstatim i përbashkët që se edhe në të ardhmen pas zgjidhjes së statusit të Kosovës nevojitet një përkushtim edhe më i madh në drejtim të një krijimit të rrethanave për një jetë më të mirë për qytetarët e Kosovës, në një vend të zhvilluar me një ekonomi prosperuese.

Po ashtu nënkryetari i PDK-së z.Fatmir Limaj theksoi edhe kësaj radhe rëndësinë e thellimit të partneritetit me komunitetin ndërkombëtar, gjithnjë në funksion të ndërtimit të shtetit stabil dhe demokratik të Kosovës, të integruar në strukturat euroatlantike.

[Llapi]

Fatmir Limaj

Nënkryetari Fatmir Limaj fton anëtarët dhe simpatizantë e PDK-së për pjekuri politike dhe kulturë integruese

16.12.2006
Nënkryetari i Partisë Demokratike të Kosovës z.Fatmir Limaj, anëtari i Kryesisë z.Basri Musmurati dhe kryetari i Degës së PDK-së në Gjilan z.Qemail Mustafa, u takuan sot me qytetarë të fshatrave Malishevë, Uglarë dhe Pograxhë të komunës së Gjilanit.
Duke folur në debatin me qytetarë të këtij regjioni, nënkryetari i PDK-së z.Fatmir Limaj ka ftuar qytetarët, anëtarët dhe simpatizantët e PDK-së për pjekuri politike dhe kulturë integruese, në këto momente vendimtare kur është i domosdoshëm bashkimi kundër të keqes, që e ka kapluar qeverisjen e vendit.



Në fillim të takimit fjalën e mori kryetari i Degës së PDK-së në Gjilan z.Qemajl Mustafa, i cili fillimisht i përshëndeti të pranishmit e shumtë që ishin bashkuar këtij tubimi qytetar, organizuar nga Dega e PDK-së n Gjilan.

“Kosova nuk është më sikur ishte para vitit 1999. Si rezultat i luftës dhe sakrificës së UÇK-së, Kosova tashmë i ka të gjitha institucionet e veta, përkundër asaj këto institucione janë të brishta dhe përkundër asaj që këto dy parti në pushtet i kanë kthyer në institucione jofunksionale” tha mes tjerash kryetari i demokratëve gjilanas z.Qemajl Mustafa.

Fjala e nënkryetarit të PDK-së z.Fatmir Limaj është pritur me ovacione të shumta të pranishmëve në këtë tubim qytetar.
“Jemi në një proces shumë të rëndësishëm, proces ky që është i vendimtar për vendin, proces i cili po e çon Kosovën drejt zyrtarizimit të pavarësisë së saj. Kosova është e pavarur që nga viti 1999, sepse argumentet për shtetin i kemi ndërtuar me luftën e lavdishme të UÇK-së” - tha z.Limaj.

“Vota e qytetarit të Kosovës është dhunuar. Zhvillimet e fundit politike në Kosovë dhe qeverisja e keqe, e kanë dëmtuar shumë rëndë procesin nëpër të cilin po kalon Kosova. Të gjitha këto zhvillime të këqija që po ndodhin në Kosovë duhet të mënjanohen, e për këtë ka vetëm një rrugë, e ajo rrugë është vota e qytetarit të Kosovës” – theksoi nënkryetari për çështje politike i PDK-së.

“PDK ju fton juve si qytetarë, si anëtarë dhe simpatizantë të PDK-së për pjekuri politike dhe kulturë integruese. Ne i fitojmë të gjithë qytetarët që të na bashkohen kundër së keqes, që e ka kapluar vendin” – u shpreh nënkryetari i PDK-së z.Fatmir Limaj.

[Llapi]

Nënkryetari Fatmir Limaj: Nuk mund të jemi pjesë e frymës që mbulon dështimet, që legjitimon keqmenaxhimin dhe keqpërdorimet

21.12.2006
Ndihma për vendin bëhet në mënyra të ndryshme, punohet për vendin për aq sa mund të punohet, por nganjëherë kur punët nuk shkojnë mirë, shërbim i bëhet vendit edhe duke u larguar, duke thënë që nuk po mundem mëtutje, nuk kam kushte dhe mundësi, nuk ka atmosferë. Mendoj se kryeministrit Çeku i ka ardhur pikërisht kjo gjendje. Unë z.Çeku këtë ia them si mik i tij dhe si opozitë. Ndihmën më të madhe ai mund t’ia japë Kosovës duke hapur rrugë, duke thënë që kështu i minuar nga të gjitha anët nuk mund ta drejtojë qeverinë, nuk mund ta drejtojë qeverinë në të cilën ministrat e tij janë të korruptuar dhe të komprometuar në sytë e gjithë opinionit kosovar. Është parë qe 6 muaj rresht se nuk qeveriset nga dita në ditë, nuk jetohet nga ditë në ditë, pa pasur objektiva të qarta.
- është shprehur nënkryetari i PDK-së z.Fatmir Limaj në konferencën e sotme me gazetarë.



Fillimisht nënkryetari i PDK-së për çështje politike theksoi se “zhvillimet aktuale politike në tërësi në Kosovë, me cilat ne sot po ballafaqohemi nuk janë njëditëshe, nuk kanë rrjedhur nga dje apo nga sot, janë zhvillime të cilat janë paraprirë dhe janë ushqyer një kohë të gjatë”.

“Partia Demokratike e Kosovës vazhdimisht ka potencuar dhe ka tërhequr vëmendjen se në qoftë se vazhdohet ashtu siç ka shkuar deri më tani, ne do të ballafaqohemi me situata të cilat do të jenë jo të mirëseardhura, jo të lakmueshme për vendin” tha z.Limaj

“Në momentet aktuale në të cilat gjendet vendi ynë, në kohën kur elita politike e Kosovës duhet të fokusohet në drejtim të menaxhimit të situatave parapërgatitore për statusin final, në kohën kur institucionet e vendit duhet të angazhohen në tërësi për të treguar para komunitetit ndërkombëtar se elita politike kosovare dhe institucionet e saj janë të përgatitura për të marrë kompetencat për të qeverisur shtetin e pavarur të Kosovës, në kohën kur ne të gjithë ka qenë dashtë të fokusohemi në fazën e transicionit të bartjes së kompetencave dhe të involvohemi në tërësi e gjithë elita kosovare, me qëllim që Kosova e passtatusit të jetë një Kosovë shtet i pavarur, me një mbikëqyrje të lehtë ndërkombëtare, ashtu siç po theksohet nga ne në opinion, fatkeqësisht zhvillimet politike po shkojnë në drejtime jo të mira dhe shqetësuese” – u shpreh nënkryetari i PDK-së.

“Në mungesë të një pjekurie politike, në mungesë të të kuptuarit të rrethanave në të cilat gjendet vendi, mungesa e përgjegjësisë dhe ndjenjës për qenë të përgjegjshëm para qytetarëve, për të qenë të përgjegjshëm para vendit, për të qenë të përgjegjshëm para proceseve, para se të jenë të dhënë para interesave individuale, në vend që të shpallet fituese Kosova përballë proceseve që po vijnë, tendenca për të shpallur fitues mes nesh është shumë e rrezikshme, sepse humbim të gjithë. Kosova dhe udhëheqja e saj politike sot këtë duhet ta ketë primare dhe betejë kryesore. Për ta ruajtur stabilitetin politik, qëndrueshmërinë politike, seriozitetin e ndërtimit të kapaciteteve shtetërore për t’u ballafaquar me të gjitha sfidat që sot dhe në të ardhmen na presin” – potencoi z.Fatmir Limaj.

“Tre muajt e ardhshëm do të jenë përcaktues për të ardhmen e vendit tonë. Tre muajt e ardhshëm do të përcaktojnë se si do të jetojnë qytetarët e Kosovës, se si do të jetojnë fëmijët tanë, në çfarë vendi dhe si do të ndërtohet ai vend. Tre muajt e ardhshëm do të jenë bazat kryesore të ndërtimit të krijesës së re të quajtur Kosovë e pavarur” tha nënkryetari demokrat dhe shtroi dilemën se “a jemi në ballë të kësaj përgjegjësie, a jemi të vetëdijshëm se çfarë përgjegjësi na presin?”.

“Angazhimet dhe zhvillimet e fundit politike të një pjese të elitës politike fatkeqësisht absolutisht nuk janë të fokusuara në këtë drejtim. Ata në agjendën e vet ditore dhe përkushtim të vetin kanë paraqitur interesat e tyre individuale, pozicionimet politike, duke shkuar nganjëherë edhe jashtë çdo norme morale, duke rrezikuar edhe stabilitetin politik të vendit” – rikujtoi z.Limaj.

Duke folur për komunikimin e qeverisë me qytetarët në këto momente vendimtare për vendi, nënkryetari i PDK-së theksoi:
“Në vend që ky koalicion qeverisës të dalë të flasë me qytetarin, t’i shpreh shqetësimet, t’i qartësojë dilemat e ngritura kohëve të fundit rreth të ardhmes së vendit tonë, të bashkëbisedojë me qytetarin, t’i marrë shqetësimet e qytetarit dhe t’i ofrojë alternativa qytetarit, t’i tregojë qytetarit se nuk mund të bëjë më tepër, pse jemi këtu ku jemi, cilat janë angazhimet tona. Tek ne në Kosovë ndodh e kundërta, koalicioni qeverisës mbetet i mbyllur në kancelaritë e tyre, bëjnë projekte dhe plane se si ta shtyjnë qeverisjen edhe më tutje dhe në anën tjetër opozita del e merr përgjegjësinë e pozitës për të komunikuar me qytetarët. Ne anë e kënd Kosovës jemi pothuajse çdo ditë në komunikim me qytetarët tanë, duke bashkëbiseduar me ta në tribuna të hapura, ku shprehim opinionin tonë, madje duke marrë edhe përgjegjësinë që realisht nuk na takon në nivelin që ne e marrim”.

Nënkryetari Fatmir Limaj ka folur edhe për zhvillimet e fundit politike në vend.
“Gjendja që është krijuar kohëve të fundit është si pasojë e zgjidhjeve jo të natyrshme, jo të logjikshme, që kanë ndodhur në të kaluarën. Edhe te ndërtimi i qeverisë, edhe te puna e qeverisë, edhe te ndryshimet qeveritare, gjithë ajo që ka ndodh në këtë proces kanë qenë procese të njohura për herë të parë në shkencën politike në vendin tonë. Madje, një nga këto ka qenë edhe zhvillimi i fundit në Kuvendin e Kosovës, ku koalicioni qeverisës nuk e bën asnjë përpjekje më të vogël për të ruajtur shumicën e saj që i duhet domosdoshmërisht për të miratuar projektbuxhetin dhe në anën tjetër fajëson opozitën pse nuk e jep shumicën për të miratuar këtë projektbuxhet. Ata bëjnë çdo gjë natë e ditë për të prishur këtë shumicë, për ta destabilizuar vendin dhe në anën tjetër kërkojnë nga opozita që ne t’ia japim këtë shumicë për të qeverisur rehatshëm dhe mirë”.

“Megjithë vërejtjet tona, megjithë angazhimet dhe përpjekjet tona për ta ruajtur këtë unitet, kam përshtypjen se dikush e ka keqkuptuar rolin dhe gatishmërinë tonë për ta ruajtur unitetin. Ne jemi të gatshëm ta ruajmë unitetin, ne do të vazhdojmë ta ruajmë unitetin, ne do ta mbështesim çdo iniciativë që është në shërbim të qytetarëve, qoftë edhe nga koalicioni qeveritar, qoftë nga ministrat veç e veç. Por, ne nuk mund të heshtim dhe nuk mund të mbështesim njerëz të papërgjegjshëm, të cilët e dinë mirë se çka janë duke bërë me vendin, por kërkojnë të vazhdojnë këtë gjendje, që mbretëron sot në Kosovë, duke e legjitimuar këtë në parlamentin e Kosovës” është shprehur z.Limaj.

Duke vazhduar fjalën e tij para gazetarëve nënkryetari i partisë më të madhe opozitare ka thënë se “në kohën kur ne flasim për projektbuxhetin e Kosovës, që është një nga ligjet fundamentale të funksionimit të institucioneve të vendit, koalicioni qeverisës nuk ka bërë asnjë përpjekje për të siguruar shumicën e saj. Përkundër kësaj një pjesë e madhe e qeveritarëve të involvuar në keqmenaxhim, keqpërdorim dhe korruptim, me gjithë faktin se të gjitha mediat janë të mbushura me këto skandale që po ndodhin në vend, ata vazhdojnë pa asnjë hezitim të lavdërojnë projektbuxhetin e tyre, por edhe punën veç e veç të ministrive përkatëse”.

“Opozita kosovare, Partia Demokratike e Kosovës e ka misionin e saj për të bërë shtetin e Kosovës dhe në këtë drejtim ka dhënë dhe do të vazhdojë të japë kontributin e saj të pandërprerë, më gjitha kapacitetin që ka. Mirëpo, kushdo që ka keqkuptuar se mund ta përdorë opozitën, në këtë rast PDK-në për t’i zgjatur jetën dikujt tjetër, për të mbuluar dështimet, për të legjitimuar keqmenaxhimin dhe keqpërdorimin që bëhet në vendin tonë ka gabuar, sepse ne nuk mund të jemi nuk mund të jemi pjesë e kësaj elite politike, e kësaj fryme, që po mbretëron në vendin tonë” është shprehur i prerë z.Fatmir Limaj.

Duke folur rreth deklaratës së fundit të kryeministrit Çeku rreth projektbuxhetit 2007, ku mes tjerash thotë se që nëse nuk shkohet sipas procedurave parlamentare, do të ruajmë funksionalitetin e institucioneve, sepse kryeadministratori Ryker do ta shfrytëzojë të drejtën e tij, nënkryetari Limaj, është deklaruar me sa vijon:
“Qeveria e Kosovës tashmë është komprometuar dhe komprometimin e saj ajo e ka marrë dy ditët e fundit, sidomos ditën e djeshme. Aq më tepër ne jemi jashtëzakonisht të shqetësuar se me sa aq lehtësi njerëzit udhëheqës të vendit i tejkalojnë institucionet e tyre, me sa lehtësi janë të gatshëm të shkelin mbi institucionet e tyre vetëm e vetëm për t’ia zgjatur jetën qeverisjes së vet. Kur nga kryeministri me aq lehtësi thuhet që nëse nuk shkohet sipas procedurave parlamentare, do të ruajmë funksionalitetin e institucioneve, sepse kryeadministratori Ryker do ta shfrytëzojë të drejtën e tij. Unë i bëj një pyetje kryeministrit, në qoftë se nesër në statusin e Kosovës do të na ofrohet diçka që nuk iu konvenon qytetarëve të Kosovës, do t’ia japim z.Ryker të na nënshkruajë, ta pranojmë ne çdo gjë që do të vijë”.

“Në çdo vend normal, qeveria dje do të duhet të jepte dorëheqje për të hapur rrugë. Ndihma për vendin bëhet në mënyra të ndryshme, punohet për vendin për aq sa mund të punohet, por nganjëherë kur punët nuk shkojnë mirë, shërbim i bëhet vendit edhe duke u larguar, duke thënë që nuk po mundem mëtutje, nuk kam kushte dhe mundësi, nuk ka atmosferë. Mendoj se z.Çeku i ka ardhur pikërisht kjo gjendje. Unë z.Çeku këtë ia them si mik i tij dhe si opozitë. Ndihmën më të madh z.Çeku mund t’ia japë Kosovës duke hapur rrugë, duke thënë që kështu i minuar nga të gjitha anët nuk mund ta drejtojë qeverinë, nuk mund ta drejtojë qeverinë në të cilën ministrat e tij janë të korruptuar dhe të komprometuar në sytë e gjithë opinionit kosovar. Është mirë që z.Çeku të hapë rrugë, të ftojë njerëz, të diskutojë dhe t’i thotë koalicionit qeverisës se kështu më nuk shkohet, nuk shkohet mëtutje kur çdo ditë ka minime në aktivitetet qeveritare, kur çdo ditë ka skandale dhe mbi të gjitha nuk shkohet kështu sepse kjo qeveri më nuk mund të funksionojë pa program. Ne kemi tërhequr vëmendjen edhe më herët që qeveria e Kosovës udhëhiqet pa asnjë program politik. Kjo po shihet edhe sot, është parë qe 6 muaj rresht që nuk qeveriset vendi nga dita në ditë, nuk jetohet nga dita në ditë, pa pasur objektiva të qarta” - tha në vazhdim nënkryetari i PDK-së.

“Në momentet në të cilat jemi, duhet të tregojmë pjekuri politike, kulturë integruese, që nënkupton gjetjen e solucionit për t’i tejkaluar këto zhvillime që janë jashtëzakonisht të vështira, zhvillime që jo tani, por unë dyshoj që mund të na dalin më të vështira në të ardhmen, në këta 3-4 muajt e ardhshëm që do të vijë dhe që do të mund të krijojnë pasoja të rënda për vendin. Prandaj, është përgjegjësi e atyre që mund të ofrojnë zgjidhje, është përgjegjësi e atyre që mund të ofrojnë alternativa, me qëllim të stabilizimit, me qëllim të ruajtjes së stabilitetit politik dhe me qëllim të fokusimit në çështjen që është parësore për vendin, në zgjidhjen e statusit politik të Kosovës” – theksoi nënkryetari demokrat.

“Me deklaratën e fundit kryeministri i Kosovës, me gjithë dëshirën dhe vullnetin, ka treguar që nuk është i aftë ta drejtojë qeverinë, nuk është i aftë ta drejtojë vendin, sepse zgjedhja ka qene jo e logjikshme. Në Kosovë jo gjithkush mund ta udhëheq vendin, në Kosovë jo gjithkush që është në parti politike mund të jetë deputet dhe ministër. Një parti që i ka 200 mijë votues, që arrin që t’i ketë 2-3 kandidatë për kryeministër, ajo është sukses për atë parti, por jo secili të bëhet kryeministër apo ministër, dhe aq më tepër nuk rrezikohet vendi për teket, inatet apo dëshirat e një ministri, në asnjë mënyrë. Nëse ne bëhemi peng i ambicieve personale të individëve të caktuar në qeveri, atëherë dëshmohet se ky vend nuk qeveriset në mënyrë institucionale, ashtu siç qeverisen shtetet” – tha nënkryetari i PDK-së.

“Partia Demokratike e Kosovës nuk është e obliguar me asnjë rregull që t’ia sigurojë shumicën qeverisë për të qeverisur. PDK-ja e ka vetëm një obligim para qytetarëve të Kosovës: të punojë në statusin final dhe njëkohësisht të korrigjojë gabimet që i bën pozita dhe të ftojë pozitën për të ndryshuar qasjen e qeverisjes, të ftojë pozitën që të mos jetë inatçore, kryeneçe, por të pranojë faktet, për të cilat sot të gjithë jemi të vetëdijshëm. Pranimi i gabimeve, pranimi i dështimeve nuk është ligështi, ajo është një pjesë e vlerës njerëzore, ngase hapë rrugë. Kam përshtypjen që qeveria e Kosovës nëse çdo gjë ndodh në këtë vend, ata nuk e kanë ndërmend t’i pranojnë gabimet dhe dështimet e tyre. Kjo e çon vendin drejt një kaosi politik dhe qeverisës, sepse ajo ka treguar se kapacitetet qeverisëse të kësaj qeverie janë shterrur qysh moti dhe ajo më nuk ka as kapacitet qeverisës, por fatkeqësisht që dje e ka humbur edhe legjitimitetin, edhe legalitetin për të drejtuar vendin. Çdo vazhdim i qëndrim më tepër të këtij koalicioni është një degjenerim i brendshëm, që do t’i kushtojë vendit dhe proceseve politike” – tha z.Fatmir Limaj.

“Orientimet e PDK-së janë integruese dhe në këtë kuadër, Presidenti i vendit duhet ta kuptojë situatën në të cilën gjendet vendi. Presidenti i vendit nuk duhet t’i injorojë zhvillimet aktuale politike, nuk duhet të bëhet sikur nuk po ndodh asgjë në vend. Ai duhet të ftojë elitën politike kosovare, këndo që ai mendon, njerëz me të cilët mund të krijojë dhe të ndërtojë stabilitet politik për të kaluar situata të tilla” – u shpreh z.Limaj.

“A do t’i përdorim ne mekanizmat tonë demokratikë është një akt i fund që ndoshta mund ta bëjmë. Momenti aktual kërkon ndërgjegjësimin politik të forcave politike të cilat po e drejtojnë vendin, që të shohin se në çfarë situate gjendet vendi dhe si dilet nga situata. Në qoftë se ata vazhdojnë të injorojnë, ne iu kemi treguar qartë dje që në cilën gjendje gjendet vendit dhe koalicioni qeverisës. Në qoftë se ata vazhdojnë të injorojnë dhe dikush me çdo kusht dëshiron ta mbajë këtë koalicion qeverisës, atëherë përgjegjësinë e kanë ata vetë. Ne do t’i shfrytëzojmë mekanizmat tonë legjitimë për të ruajtur stabilitetin politik, për të mos lejuar degjenerimin politik të vendit tonë” – tha nënkryetari për çështje politike i PDK-së.

“Në këtë vend duhet të fillojë që secili ta luajë rolin e vet. Presidenti i Kosovës e ka rolin e vet në këtë situatë, për të hapur rrugë. Ne kërkojmë që presidenti i vendit të reflektojë dhe të ruajë stabilitetin politik të vendit dhe nëse presidenti ka oferta të ndryshme, atëherë ai mund t’i diskutojë me të gjitha grupacionet politike. Edhe PDK është e gatshme për të diskutuar ofertat që mund të vijnë nga presidenti” përfundoi z.Limaj.

[Llapi]

Nënkryetari Limaj i përgjigjet kryeministrit serb: Në çdo milimetër të saj, Kosova do të jetë shtet i pavarur në vitin 2007

04.01.2007
Nënkryetari i PDK-së z.Fatmir Limaj ka deklaruar sot se pasi nuk ka reagime as nga kryetari, as nga kryeministri i Kosovës, i cili është më i gatshëm të reagojë kur flet opozita, sesa kur udhëheqësit serb vizitojnë Kosovën, atëherë unë në emër të PDK-së ia përcjelli një përgjigje kryeministrit serb se në çdo milimetër të Kosovës, pikërisht në çdo milimetër të Kosovës, Kosova do të jetë shtet i pavarur në vitin 2007.
“Njëkohësisht, ftojmë institucionet tona të jenë më aktive dhe të mos bëjnë që s’po ndodh asgjë në vendin tonë, të reagojnë në kohën e duhur për zhvillimet politike të cilat në mënyrë të drejtpërdrejtë ndikojnë në proceset dhe në zhvillimet politike në vendin tonë” – ka thënë nënkryetari Limaj.


Nënkryetari i PDK-së z.Fatmir Limaj

“Kemi pritur për 4 ditë institucionet qendrore të Kosovës, nga presidenti, nga kryeministri i vendit të deklarohen, të reagojnë dhe të informojnë opinionin rreth vizitës së kryeministrit serb Koshtunica në Kosovë. Ka qenë detyrë e institucioneve të Kosovës për të informuar opinionin për vizitën e kryeministrit serb pikërisht më 31 dhjetor dhe për të reaguar për vizitën e tij. Por, fatkeqësisht deri më sot nuk kemi pasur as reagimin, dhe në të njëjtën kohë nuk kemi pasur në kohën e duhur, as informacionin e duhur se kryeministri i Serbisë do të ketë vizitë në pjesën veriore të Kosovës” – ka thënë nënkryetari i PDK-së.

Më tej z.Limaj ka shtuar se as Ekipi i Unitetit nuk është informuar rreth vizitës së kryeministrit të Serbisë në Kosovë, as anëtari ynë në Ekipin e Unitetit, kryetari i partisë sonë, nuk ka qenë i informuar rreth kësaj vizite.

Duke thënë se e kemi ftuar këtë konferencë për media për t’i bërë pyetje kryetarit dhe kryeministrit të Kosovës se a kanë ditur ata për vizitën e kryeministrit serb më 31 dhjetor, në natën e Vitit të Ri në Kosovë, nënkryetari Limaj ka thënë se “nga ajo që kemi marrë informacione nga shtypi, zëdhënësi i UNMIK-ut ka thënë se kryeministri i Kosovës ka ditur për vizitën e Koshtunicës dhe ai nuk e ka informuar as opinionin dhe nuk ka pasur asnjë reagim nga zyra e tij”.

“Në të njëjtën kohë shtrohet pyetja se a e ka ditur këtë gjë edhe kryetari i Kosovës, nëse nuk e ka ditur, pse nuk e ka ditur, dhe nëse e ka ditur pse kryetari i vendit nuk e ka informuar opinionin dhe nuk ka reaguar ndaj vizitës së kryeministrit serb pikërisht me 31 dhjetor” – ka pyetur z.Limaj.

Duke folur rreth kësaj vizite të kryeministrit serb në veriun e Kosovës, nënkryetari i PDK-së z.Fatmir Limaj ka thëns se “mesazhet e kryeministrit serb janë mesazhe që destabilizojnë dhe ndikojnë në sigurinë e vendit, si dhe në procesin politik. Në këtë kuadër, ka një reagim të natyrshëm të qytetarëve të vendit për mesazhet e kryeministrit serb që ka drejtuar nga veriu i Kosovës”.

“Anakronia më e madhe për ne është se në kohën kur kryeministri i vendit ka ditur për një vizitë të kryeministrit serb në natën e Vitit të Ri në pjesën veriore të Kosovës, në pjesën më të ndjeshme dhe më problematike të vendit, kryeministri ynë para Teatrit të Kosovës këngën e Destan Begut. Thuajse asgjë nuk ka ndodhur në Kosovë, duke u bërë sikur që nuk ka ditur se çka po ndodh rreth tij. Ka kaluar koha kur zhvillimet e caktuara, të cilat ndodhin në vend dhe përreth vendit duhet të heshten” – theksoi nënkryetari demokrat.

“Qytetarët e Kosovës e kanë parë kur para Teatrit të Kosovës këndohet kënga e Destan Begut, ndërsa Koshtunica në pjesën veriore të Kosovës çon mesazhe për përpjekjet e tij, për angazhimet e tij dhe për vendosmërinë e tij për ta mbajtur Kosovën pjesë të pandashme të Serbisë. Ku është serioziteti i institucioneve tona?” – tha z.Limaj
“Kryeministrit Çeku iu ka ndalur sahati” – tha z.Limaj

Duke thënë se sipas informacioneve që posedon PDK-ja, kryeministri serb është përcjellë edhe nga Shërbimi Policor i Kosovës, që nënkupton që ministri i rendit ka qenë i informuar për vizitën e kryeministrit serb në Kosovë, nënkryetari i partisë më të madhe opozitare në vend është shprehur se “gjithë këtë, si duket institucionet e vendit kanë dashur ta kalojnë në heshtje, gjoja në emër të sigurisë”.
“Nuk ruhet siguria duke heshtur, nuk ruhet siguria duke u bërë sikur nuk po ndodh asgjë. Siguria ruhet dhe menaxhohet vetëm në qoftë se merren masa preventive dhe paralajmërohet se veprimet dhe aktet e tilla mund të ndikojnë drejtpërdrejtë në çështjet e sigurisë” ka potencuar z.Limaj.

“Vizita e kryeministrit serb në Kosovë ka qenë vizitë provokative, e cila dëmton angazhimet tona, dëmton sigurinë e vendit, dhe njëkohësisht dëmton përpjekjet e institucioneve vendore dhe qytetarëve të Kosovës, të cilët po bëjnë përpjekje për integrimin e gjithë shoqërisë kosovare për të jetuar në një shoqëri demokratike. Kjo dëmton edhe vetë përpjekjet e serbëve lokalë, të cilët po bëjnë përpjekje të inkorporohen në kuadër të institucioneve të vendit. Kjo vështirëson angazhimet që kanë shumë liderë serb këtu, që kanë shprehur vullnetin që të punojnë së bashku me shumicën shqiptare për ta ndërtuar shoqërinë demokratike në Kosovë” – është shprehur nënkryetari për çështje politike i PDK-së.

Në fund, nënkryetari i PDK-së z.Fatmir Limaj ka deklaruar se pasi nuk kemi reagime as nga kryetari, as nga kryeministri i Kosovës, i cili është më i gatshëm të reagojë kur flet opozita, sesa kur udhëheqësit serb vizitojnë Kosovën, atëherë “unë në emër të Partisë Demokratike të Kosovës ia përcjelli një përgjigje kryeministrit serb se në çdo milimetër të Kosovës, pikërisht në çdo milimetër të Kosovës, Kosova do të jetë shtet i pavarur në vitin 2007”.

“Jo kryeministri i Serbisë, por askush nuk mund ta ndalojë këtë realitet. Kjo është përgjigjja që ne ia dërgojnë si opozitë kryeministrit të Serbisë, dhe njëkohësisht ftojmë institucionet tona të jenë më aktive dhe të mos bëjnë që s’po ndodh asgjë në vendin tonë, të reagojnë në kohën e duhur për zhvillimet politike të cilat në mënyrë të drejtpërdrejtë ndikojnë në proceset dhe në zhvillimet politike në vendin tonë” – ka përfunduar nënkryetari i Partisë Demokratike të Kosovës z.Fatmir Limaj.

[Llapi]

Nënkryetari Fatmir Limaj: Është koha e pjekurisë politike, e investimit në politika unifikuese dhe integruese

09.01.2007
Ka ardhur koha që politika kosovare të jetë shumë më e pjekur, më efikase, më konkrete dhe e gatshme në kryerjen e detyrave, që ajo mund t’i kryejë vetë. Prandaj, mund t’iu duket e veçantë iniciativa e kryetarit Thaçi, ngase institucionet tona janë mësuar të bëjnë politikë ad-hoc. Ka ardhur koha që të bëjmë politikë më të pjekur dhe të investojmë në politika unifikuese dhe integruese, të cilat e lehtësojnë procesin e transicionit të shtetit të ardhshëm të Kosovës. Në këtë frymë duhet të shihet edhe nisma e fundit e kryetarit Thaçi, për të ndërtuar konsensus për Kushtetutën e Kosovës, për simbolet e Kosovës, për sistemin zgjedhor, për për kohën e zgjedhjeve dhe për politikat e jashtme.
- tha mes tjerash nënkryetari i PDK-së, njëri nga politikanët më prominentë të Kosovës z.Fatmir Limaj në një intervistë ekskluzive dhënë RTK-së.



“Në qoftë se sot pjesa veriore e Kosovës nuk kontrollohet nga institucionet e Kosovës dhe nga UNMIK-u, nuk do të thotë që ajo pjesë nesër nuk do të jetë në kuadër të shtetit të pavarur të Kosovës. Heshtja e institucioneve të Kosovës para mesazheve dhe vizitave të tilla, si ajo e kryeministrit serb Koshtunica, injorimi total se gjoja nuk po ndodh asgjë, nuk është mënyrë e duhur, sipas të cilës duhet të sillen institucionet dhe liderët tanë. Ata e dinë që megjithatë pjesa veriore është pjesa më komplekse e zgjidhjes së çështjes së Kosovës dhe do të ketë një ndër ballafaqimet më të vështira për të ardhmen” – tha nënkryetari Limaj, duke vazhduar se “reagimet e institucioneve kosovare duhet të jenë në drejtim që Kosova në muajt e ardhshëm do ta fitojë sovranitetin e saj dhe ajo pjesë veriore do të kontrollohet nga institucionet tona. Angazhimet tona duhet të shkojnë në drejtim të integrimit të asaj pjese në kuadër të institucioneve të Kosovës, por jo, në asnjë mënyrë, udhëheqja e vendit ta sheh atë si një pjesë që kontrollohet nga serbët dhe nuk kemi çka të reagojmë lidhur me vizitat që vijnë nga liderët e vendeve fqinjë. Me këtë ne po prejudikojmë se cila do te jetë e ardhmja e pjesës veriore të Kosovës”.

Duke folur për nismën e kryetarit Thaçi për një marrëveshje politike për çështjet koncensuale të Kosovës së pas statusit, nënkryetari Limaj theksoi:
“Kryetari i Partisë Demokratike të Kosovës z.Hashim Thaçi ka propozuar që të ndërtohen disa pika që investojnë në unitet. Këto pika që ka ngritur kryetari ynë janë pikërisht për ruajtjen e unitetit të vazhdueshëm në disa çështje kryesore që kërkojnë konsensusin e përgjithshëm, që nuk mund të bëhen as me shumicë të thjeshtë, që nuk janë punë të qeverisë, por mund të bëhen me marrëveshje politike të cilat ndihmojnë në unitet, në krijimin e stabilitetit politik dhe mbi të gjitha përshpejtojnë procesin e transicionit të Kosovës drejt zgjedhjeve të ardhshme të lira”.

“Ka ardhur koha që politika kosovare të jetë shumë më e pjekur, më efikase dhe e gatshme dhe sa më konkrete në kryerjen e detyrave, që ajo mund t’i kryejë vetë. Prandaj, mund t’iu duket e veçantë iniciativa e kryetarit Thaçi, ngase institucionet tona janë mësuar të bëjnë politikë ad-hoc. Mendoj që ka ardhur koha që të bëjmë politikë më të pjekur dhe të investojmë në politika unifikuese dhe integruese, të cilat e lehtësojnë procesin e transicionit të shtetit të ardhshëm të Kosovës. Koncensusi duhet të ndërtohet për Kushtetutën e Kosovës, për simbolet e Kosovës, për kohën e zgjedhjeve dhe konsensusi duhet të ndërtohet për sistemin zgjedhor dhe për politikat e jashtme” – u shpreh z.Limaj.

“Partia Demokratike e Kosovës angazhohet që të jetë forca e parë politike në vend në zgjedhjet e ardhshme dhe të merr drejtimin e qeverisë së Kosovës dhe në këtë mënyrë të jetë e hapur edhe për koalicione me forcat tjera politike” – u shpreh i bindur nënkryetari për çështje politike i PDK-së.

“PDK do të futet në koalicion me forcat tjera politike mbi bazën e një programi të qartë, nuk do të futet në koalicion për të siguruar votë, por për të ndërtuar një program të fortë qeveritar. Ajo forcë politike me të cilën mund ta ndërtojmë një program të qartë të përbashkët, një program që siguron efikasitet qeverisës, një qeverisje stabile, që garanton sukses qeverisës, ne do të bëjmë koalicion me atë forcë politike” – potencoi z.Fatmir Limaj.

“Unë një gjë mund t’ju siguroj juve dhe gjithë qytetarëve të Kosovës, që Partia Demokratike e Kosovës nuk do të ndërtojë koalicione restorantesh, nëpër kafene dhe me individë. Partia Demokratike e Kosovës do të ndërtojë koalicion mbi bazën e një programi të qartë dhe ai program do t’i afrohet qytetarit të Kosovës para se të ndërtohet qeveria, do të ketë mandatar dhe qeveri me program dhe ajo qeveri, kryeministri i ardhshëm do t’i jep përgjegjësi qytetarëve dhe partive politike që e përbëjnë koalicionin, për realizimin ose jo të programit qeveritar. Pra, nuk do të ketë më qeveria pa program, siç ka pasur deri më tani Kosova. Për këtë mund t’i siguroj qytetarët e Kosovës” – tha nënkryetari demokrat i vendit.

“Tre muajt e ardhshëm do të jetë tre muajt më të vështirë për Kosovën, tre muajt e ardhshëm do të vendosin si do të jetojnë fëmijët tanë, cila do të jetë krijesa në të cilën do të jetojnë fëmijët tanë. Kjo kërkon edhe përgjegjësi, edhe angazhim dhe ne të gjithë duhet të jemi në nivel të detyrës” – u shpreh mes tjerash nënkryetari Limaj.