Korupsioni ne Shqiperi

[iliria e para]

Mendimi im eshte se ka shume dhe se korupsioni eshte nje plage per kombin.
Kesi shembujsh si kete te gazetes (Panorama) mendoj qe ka shume por nuk zbardhen as 1% i tyre...



Letra akuzë: Do shpëtosh bir, paguam prokurorin




Policia, Prokuroria dhe Gjykata u përfshinë në një skandal të dyshuar lidhjesh kriminale dhe korrupsioni, pas arrestimit të rojës së paraburgimit në komisariatin e Elbasanit.

Oficeri i policisë është arrestuar në flagrancë, duke mbajtur në xhep disa letra që do t’i dorëzoheshin një të arrestuari për trafik droge. Njëri prej dorëshkrimeve hedh dyshime rreth korrupsionit të prokurorit dhe gjyqtarëve të çështjes në ngarkim të personit të akuzuar për trafik. Zëdhënësi i Ministrisë së Brendshme njoftoi dje se, punonjësit e Shërbimit të Kontrollit të Brendshëm kanë arrestuar mbrëmjen e së enjtes, më 12 dhjetor, rreth orës 21:30, efektivin e policisë Fadil Ismaili, 44 vjeç, me detyrë rojë i brendshëm në dhomat e paraburgimit në komisariatin e Policisë së Elbasanit. Sipas burimeve zyrtare, punonjësi i policisë është arrestuar në flagrancë nga efektivat e SHKB-së. Në momentin e prangosjes, punonjësit të policisë i janë gjetur pesë letra, të cilat i përkisnin të paraburgosurit Dritan Cani. “Ky i fundit akuzohet për trafik lëndësh narkotike, ndërsa është në proces gjykimi për këto akuza”, thanë burimet zyrtare. Sipas tyre, Shërbimi i Kontrollit të Brendshëm ka njoftuar menjëherë Prokurorinë e Përgjithshme, pasi letrat që mbante në xhep efektivi i policisë që është arrestuar, bënin fjalë për veprime korruptive të prokurorit, që hetonte çështjen e të arrestuarit për trafik droge. “Më konkretisht, në dorëshkrimet e sekuestruara thuhej se, prokurorit të çështjes, për ta favorizuar të pandehurin gjatë gjykimit, i ishin dhënë aq para sa kishte kërkuar vetë ai”, thanë burimet zyrtare nga Ministria e Brendshme. Sipas tyre, dorëshkrimet e gjetura në xhepat e policit hedhin dyshime të forta për veprime korruptive edhe nga ana e gjyqtarëve të çështjes.

Arrestimi i policit
Dyshimet e para për veprimtarinë e paligjshme të efektivit të policisë që shërbente si roje në paraburgimin e Elbasanit kanë lindur pas arrestimit të shtetasit Dritan Cani, me akuzën e trafikut të drogës. “Punonjësit e SHKB-së kanë pasur informacione operative rreth veprimeve të policit dhe ai, teksa kryente detyrën, është ndaluar në korridorin e paraburgimit, ku kryente shërbimin, për një kontroll personal”, pohuan burimet zyrtare. Efektivi Fadil Ismaili është kontrolluar me imtësi nga kolegët e tij, të cilët i kanë gjetur pesë letra ku i paraburgosuri për trafikim të lëndëve narkotike komunikonte me familjen e tij. Menjëherë sapo janë zbuluar përmasat e ngjarjes, drejt qytetit të Elbasanit janë nisur zyrtarë të lartë të Policisë së Shtetit. Ndërkaq, punonjësit e Shërbimit të Kontrollit të Brendshëm kanë dokumentuar ngjarjen sipas procedurave ligjore dhe më pas kanë filluar verifikimin e përmbajtjes së letrave. Në njërën prej tyre, e cila dyshohet të jetë shkruar nga nëna e të arrestuarit për trafik droge, thuhej se prokurori i çështjes kishte marrë aq para sa kishte kërkuar dhe se çështja kishte marrë rrugën e zgjidhjes. Gjatë kësaj kohe, hetuesit e policisë kanë administruar deklarimet e efektivit të policisë që kryente detyrën e “korrierit” të personit të arrestuar për trafik të lëndëve narkotike.

Hetimet
Mëngjesin e djeshëm, Ministria e Brendshme dhe Drejtoria e Përgjithshme e Policisë së Shtetit kanë njoftuar Prokurorinë e Përgjithshme për ngjarjen që kishte ndodhur në Elbasan. Dy hetues të Drejtorisë së Inspektimit janë nisur drejt këtij qyteti, ndërsa me urdhër të Prokurorisë së Përgjithshme, dosja penale për ngjarjen është vendosur të hetohet nga seksioni i Prokurorisë Ushtarake në qytetin e Korçës. Kjo me qëllimin që prokurori, gjyqtari dhe efektivat e policisë që akuzohen, të mos kenë mundësinë e ndërhyrjes në rezultatet e hetimit ndaj tyre. Burimet zyrtare nga Prokuroria e Përgjithshme pohuan për gazetën “Panorama” se, me urdhër të prokurorit të Përgjithshëm, një grup hetuesit dhe prokurorësh kanë shkuar në Elbasan dhe po hetojnë lidhjet e efektivit të policisë që është arrestuar me personat e veçantë të dyshuar.

Letra
Mes pesë letrave që mbante në xhep efektivi i policisë, njëra prej tyre hedh dyshime për veprime që përbëjnë mitmarrje, korrupsion dhe abuzime me detyrën nga ana e prokurorit të çështjes së shtetasit Dritan Cani, akuzuar për trafik droge. “Mos u bëj merak, e kemi mbaruar punën. Prokurorit i dhamë aq sa deshi dhe do ta bëjë punën dhe do të të ndihmojë”. Ky është teksti i letrës që është gjetur ne xhepin e efektivit të policisë së Elbasanit. Ai dyshohet se, gjatë kohës që kryente detyrën, me pretekstin e një kontrolli në dhomën ku mbahej i arrestuari për trafik droge, do të hynte aty dhe do t’ia dorëzonte letrën të paraburgosurit. Sipas verifikimeve paraprake, ajo rezulton se është shkruar pak ditë më parë nga nëna e personit të arrestuar për trafik droge, i cili ishte në pritje të procesit gjyqësor. Ditën e djeshme, ndaj efektivit të policisë që kryente korrierin e trafikantit është ngritur akuza e “shkeljes së rregullave të shërbimit të rojës në objekte të rëndësishme”, parashikuar nga neni 42 i Kodit Penal Ushtarak. Hetuesit e skandalit, gjatë mbrëmjes së djeshme, kanë marrë në pyetje të afërmit e të arrestuarit për trafik droge dhe pritet që familja e tij t’i nënshtrohet paraqitjes për njohje me prokurorin e dyshuar dhe tre gjyqtarët e çështjes. t.s



Prokurori dhe gjyqtarët e çështjes së trafikut

Burime zyrtare nga Prokuroria e Elbasanit kanë pohuar dje se, Binas Nina është prokurori që ka hetuar çështjen penale për trafik droge në ngarkim të shtetasit Dritan Cani. Ndërkaq, burimet nga Gjykata e rrethit Elbasan pohuan se, çështja gjykohej nga një trup gjykues me tre gjyqtarë, të gjithë magjistratë. Sipas burimeve, trupi gjykues i çështjes përbëhej nga gjyqtarët Artur Kalaja, Albana Boksi dhe Zihni Shau. Ata gjykonin çështjen në të cilën shtetasi Dritan Cani akuzohet bashkë me disa persona të tjerë, të dyshuar për prodhim dhe shitje të lëndëve narkotike. Cani është ndaluar më 13 korrik të vitit të kaluar pas një kontrolli të ushtruar në banesën ku ai qëndronte me qira. l.m



Teksti akuzë i letrës

Mos u bëj merak se e kemi mbaruar punën. Prokurorit i dhamë aq sa deshi dhe do ta bëjë punën dhe do të ndihmojë.

Nëna e Dritan Canit