Që do të shkruante diçka në historinë e Ligës së Kampioneve, ishte e parashikueshme lehtë, teksa Raul Gonzales debutonte në këtë veprimtari në moshën 18-vjeçare, me fanellën e Realit të Madridit. Ishte 10 tetori i vitit 1995, kur në takimin Real Madrid - Ferencvarosh 6-2, Raul do të habiste të gjithë me një tripletë, ende historike në "Santiago Bernabeu". Gjithsesi, talenti spanjoll nuk e kishte menduar kurrë, se pas dhjetë vitesh do të shënonte golin e 50-të në Champions, duke kaluar Alfredo di Stefanon dhe duke u bërë futbollisti që ka shënuar më shumë në këtë veprimtari. Ndodhi gjithçka shumë thjesht, të paktën në dukje.
Devid Bekham ka dhënë një kros të telekomenduar dhe ai, Raul Gonzales Blanko, ka kërcyer si duhet, duke shënuar me kokë. Kaq mjafton, topi kalon shpinën e portierit të Olimpiakosit dhe spanjolli mund të festojë rekordin. Rekordi i Di Stefanos, me 49 gola, ishte vënë në vitin 1949. Ndoshta dikush do të thotë se në Ligën e Kampioneve të dikurshme nuk luhej kaq shpesh. Por, nga ana tjetër, në kohët moderne është më e vështirë të shënosh. Sidomos ashtu siç ka bërë Rauli, 50 gola në 99 ndeshje. Duket qartë që Europa i jep stimuj kapitenit të Realit dhe kombëtares spanjolle, por edhe në Primera Divizion nuk bën shaka. Rauli deri tani ka luajtur 391 ndeshje të kampionatin spanjoll dhe ka shënuar 178 gola, në Kupën e Mbretit ka shënuar 15 gola në 32 ndeshje, ndërsa me kombëtaren spanjolle në 88 takime ka gjetur 42 herë rrugën e golit.
Por e veçanta është se këtë futbollist shpeshherë e mbulojnë kritikat dhe vihet në diskutim, por ai si gjithmonë nuk flet, por përgjigjet me gola. Eshtë e vështirë të Spanja të gjejë një shënues me cilësitë e tij. Raulin e krahasojnë me Del Pieron te Juventusi. Karakteristika të ngjashme si në fushën e lojës, ashtu edhe jashtë saj. Janë kapitenë të kritikuar që dinë të pranojnë edhe stolin pa polemizuar. Rauli është tre vjet më i vogël se "Pinturikio" dhe ka shënuar më shumë se ai, por nuk ka vuajtur aq dëmtime se italiani. Por kjo është një histori tjetër. E tashmja e sheh Raulin të luajë mes "galaktikëve" Ronaldo, Bekham, Baptista dhe Robinjo.
Dhe të mendosh që përpara fillimit të sezonit, një e përditshme e famshme në Spanjë shkruante për kapitenin e Realit: "Edhe pse ka shënuar 250 gola me "merengesët", duhet të luftojë për një vend titullari." Ndoshta kishin harruar që Rauli ka fituar tri herë Ligën e Kampioneve, dy herë Kupën Interkontinentale, katër herë titullin kampion, tri herë Superkupën e Europës dhe tri herë Kupën e Mbretit." Në këtë sezon ka shënuar tre gola në pesë ndeshje të luajtura në Primera Divizion dhe një gol në Ligën e Kampioneve. Goli ndaj Olimpiakosit ishte shumë i rëndësishëm për të, sepse golin e fundit në Europë e kishte shënuar rreth një vit më parë, në Leverkusen më 23 nëntor.
Pasi ka kaluar Di Stefanon, dy duken kundërshtarët më të rrezikshëm për Raulin në objektivin e tij për të qenë shënuesi numër 1 i Championsit. I parë quhet Andrij Shevçenko me 46 gola, ndërsa i dyti është Van Nistëlroi. Ky i fundit ka një mesatare shënimi në Ligën e Kampioneve, thjesht të frikshme. Sulmuesi holandez i Mançesterit, në 58 ndeshje të luajtura, ka shënuar plot 47 gola, vetëm tre larg Raulit. Sfida është e hapur, sepse ka ende ndeshje për t'u luajtur në këtë edicion të Ligës së Kampioneve dhe skuadrat e Raulit, Shevës dhe Van Nistëlroit synojnë ta fitojnë këtë veprimtari. Kësisoj, kanë nevojë për golat e sulmuesve të tyre. Janë të tre në formë, të tre kanë eksperiencën e duhur dhe famën e sulmuesve më të rrezikshëm të planetit. Për momentin, Raul është i pari dhe ka thyer mitin Di Stefano. Beteja vazhdon...
Foto: Raul pranon nje top me te gjithe nenshkrimet e lojtareve te Realit![]()
Krijoni Kontakt