Intervistë me Thomas Bremer, profesor teologjie në Mynster
DW: Zoti Bremer, përse disa kisha të krishtera i festojnë me vonesë krishtlindjet?
Bremer: Krishtlindjet festohen në datën 25 nga të gjithë të krishterët në botë. Disa kisha ortodokse, që kanë një kalendar tjetër, gjithashtu thonë që krishtlindjet janë më 25 dhjetor, por që kjo ditë është ajo, që ne e mbajmë për datën 6 janar. Këta janë serbët, rusët, ndërsa të tjerët si grekët, bullgarët dhe rumunët i festojnë gjithashtu më datën 25 dhjetor. Këta bënë në vitet 20/të një reformë për ndryshimin e kalendarit.
DW: Sot të gjithë flasin për ekumeni, pra për bashkimin e kishave të krishtere me njëra tjetrën. Cilat janë dallimet përmbajtësore ndërmjet tyre?
Bremer: Dallimi kryesor mes tyre është struktura kishtare. Tek katolikët është një person në majë, Papa, ndërsa kishat ortodokse janë të barabarta me njëra-tjetrën. Një ndryshim tjetër ka të bëjë me atë, që traditat perëndimore interesohen për mënyrën se si jetojnë njerzit jashtë fesë, pra në bashkësi. Ato kanë hartuar përfytyrimet e tyre se si për shembull duhet të jetë krijuar një shtet, një ndërmjarrje, etj. Kjo është bërë edhe për shkak të baraspeshës ndaj kapitalizmit. Ndërsa kishat ortodokse janë më shumë të interesauar për aspektin fetar. si mund të shpëtohet njeriu, cila është lidhja e tij me zotin e kështu me radhë.
DW: Mendoni se fetë në Ballkan kanë karakteristika të veçanta në dallim nga vendet e tjera?
Bremer: Në Ballkan është përkatësia fetare e lidhur me atë nacionale, kështu që në atë moment, kur dalin në pah konflikte ndërmjet kombeve, krijohen edhe konflikte ndërmjet feve. Kjo ka ndodhur në Ish-Jugosllavi. Nuk kanë qenë probleme fetare, që i kanë nxitur luftrat, por problemet fetare kanë ardhur më vonë.
DW: A ka feja ndonjë funksion të caktuar në shoqëri?
Bremer: Funksioni i parë është fetar. Ka njerëz që janë fetarë, që besojnë, se përveç ekzistencës sonë ka edhe një tjetër, që ata e quajnë Zot dhe ata besojnë se është mirë, në se ke një lidhje me zotin. Bashkësitë fetare kanë role të ndryshme. Por në Ballkan, meqë në shumicën e rasteve, përkatësia fetare është e njëjtë me atë etnike - përjashtim këtu bën Shqipëria - fetë luajnë rol homogjenizues. Kjo gjë vihet re edhe jashtë Ballkanit, për shembull në Irlandën e Veriut ose Poloni. Polakët e kanë mbajtur njëri-tjetrin përmes katolicizmit, edhe në kohën kur nuk kishin krijuar ende shtetin e tyre.
DW: Çfarë roli mund të luajnë fetë atëherë konkretisht në politikë?
Bremer: Roli politik i feve varet gjithmonë nga shoqëria përkatëse. Në se kemi të bëjmë me një shoqëri, kur shumë njerëz janë fetarë atëherë feja është një faktor i rëndësishëm për politikën. Prandaj edhe veçanërisht mbas fundit të komunizmit, fetë kanë fituar mjaft peshë në Ballkan.
DW: Atëherë fetë në Ballkan kanë edhe më shumë përgjegjësi për shoqërinë. Si mendoni se janë duke e bërë këtë detyrë?
Bremer: Bashkësitë fetare kanë gjetur mënyra të ndryshme ndaj pyetjes, se si duhet të sillen me përgjegjësitë e tyre politiko-shoqërore. Kjo varet edhe nga përfytyrimi i tyre për shtetin. Kisha serbe ka filluar tani të hyjë në një proces, që nuk është aspak i thjeshtë për të, ku i duhet të mësojë se duhet t‘i artikulojë interesat e saj por që nuk mund të flasë në të njëjtën kohë për të gjithë shtetin, ose për të gjithë banorët e Serbisë. Disa përparime mund të vihen re që tani. Një temë që ka qenë problematike gjatë këtyre 15 vjetësh, ishte mësimi i fesë nëpër shkolla. Tani kanë filluar të merren vesh të tre fetë e mëdha në Serbi, pra kisha ortodokse serbe, katolike dhe ajo myslimane. Gjatë kohës së luftës sidomos por edhe më pas ishte e pamundur të flitej për këtë temë.
DW: Atëherë në qoftë se shikoni zhvillimin e ekumenisë në Ballkan, keni shkak për optimizëm apo pesimizem.
Bremer: Jam optimist i rezervuar sa i përket fesë, por jam pesimist sa i përket politikës në Ballkan. Aty janë bërë shumë gabime, që do ta mbajnë rajonin të destabilizuar edhe në të ardhmen. Por për këtë nuk e kanë fajin fetë dhe për fat të keq ato nuk janë të forta për ta ndryshuar.
Anila Shuka
Krijoni Kontakt