Tifozët e FC Real Madridit...#7

[Davius]

Kapiteni i Realit: Në futboll nuk ka gjëra të pamundura 21-03-2006

Raul, shpresa vdes e fundit


Kapiteni i Realit të Madridit, Raul, u shpreh i trishtuar, por jo i dorëzuar, pas barazimit të radhës të "merengesve" në kampionat, 0-0 ndaj Betisit. Barazim ky që e lë skuadrën e Lopez Karos plot 11 pikë larg Barcelonës kryesuese. "Situata në kampionat është shumë e vështirë, - tha Rauli. - Ne duhet të vazhdojmë të shpresojmë për titullin, pasi matematikisht Barcelona është ende e arritshme. Nuk ka gjëra të pamundura në futboll. Ndaj Betisit ishte ndeshja e tretë radhazi pa gol, por shpresoj që bashkë me golat të rikthehen edhe fitoret."

Sulmuesi i kombëtares spanjolle po synon një aktivizim të rregullt me Realin, në mënyrë që të ketë formën e duhur për në finalet e Kupës së Botës. "Po i afrohem formës optimimale dhe fatmirësisht dëmtimi nuk më shqetëson më, - tha kapiteni i kombëtares spanjolle. - Mendoj se në Gjermani do të jem në maksimumin tim." Më pas, sulmuesi i Realit pranon se ndryshimi i shpeshtë i trajnerëve ka pasur ndikimin e tij negativ te "galaktikët". Në 11 vitet e tij te Reali, Rauli ka punuar me 13 trajnerë të ndryshëm.

"Nuk është normale të ndryshosh trajnerin siç ka bërë Reali në kohët e fundit. Kanë ardhur më shumë trajnerë në këto tri vitet e fundit, sesa gjatë viteve '90-të. Kjo nuk është një shenjë e mirë, pasi skuadra ka nevojë për vazhdimësi. Tani na duhet të mendojmë për një trajner që të ketë ide të qarta dhe të punojmë me projektet e tij. Gjithsesi, nuk duhet të nxitohemi, pasi zgjidhja nuk është e lehtë. Nuk fitojmë tituj që kur në krye të skuadrës ishte Visente del Boske."

[Davius]

Braziliani vlerëson si vendimtare dy ndeshjet e radhës 21-03-2006

Sisinjo: Nuk jam dorëzuar

Ka qenë një nga më të mirët te Reali në muajin e fundit, por kriza e skuadrës "merengese" nuk e ka lënë të shfaqë të gjithë potencialin e tij. Sisinjo nuk e pranon diçka të tillë dhe dëshiron të flasë për një kampionat ende të hapur dhe për ndeshjen e radhës ndaj Saragozës...

- Keni barazuar me Betisin dhe tani gjithçka është komplikuar...

- Ne duhet të vazhdojmë të luajmë për të fituar të gjitha ndeshjet. Ashtu bëmë edhe ndaj Betisit, por kundërshtari luajti një takim shembullor dhe nuk arritëm të shënonim.

- Kampionati është i mbyllur?

- Nuk mendoj. Ne do të luajmë në çdo ndeshje me besimin dhe dëshirën për të fituar. Na presin sfidat ndaj Saragozës dhe Deportivos. Vetëm duke fituar këto dy ndeshje, mund të shpresojmë në një hap fals të Barcelonës.

- Ka ardhur koha për të menduar për botërorin?

- Unë jam i përqendruar 100% te Reali i Madridit. Ka ende ndeshje për të luajtur në këtë sezon dhe nuk jemi dorëzuar.

- Si ndiheni më mirë, mbrojtës apo mesfushor?

- Në Spanjë është më ndryshe se në Brazil. Më pëlqen të luaj anësor dhe rolin e saktë ia lë në dorë trajnerit. Mesfushori i djathtë te Reali është Bekham, ndërsa mbrojtës, Salgado. Dy futbollistë të mëdhenj që më japin shtysë për të dhënë më shumë.

- Tifozëve të Realit u ka mbetur vetëm revanshi ndaj Barçës në ndeshjen e kthimit...

- Do të jetë një ndeshje e veçantë dhe e vështirë, të cilën duam ta fitojmë me çdo kusht, por është shumë shpejt për të menduar për atë takim.

-----------------------

L.Karo: Nuk i jap llogari askujt

Trajneri i Realit të Madridit, Lopez Karo, në ndeshjen e barazuar 0-0 ndaj Betisit, la në stol brazilianin Ronaldo dhe mesfushorin Devid Bekham. Pas takimit ai tha: "Nuk kam përse të jap shpjegime për zgjidhjet e mia. Unë jam trajneri dhe s'i jap llogari askujt. Bekhami është një futbollist i madh, por ne kemi edhe të tjerë të aftë te Reali. Sisinjo luajti një ndeshje të mirë. S'kemi shënuar në tri ndeshjet e fundit dhe mendova të rrezikoja me një skuadër më ofensive ndaj Betisit."

[Davius]

Merengesve" nuk u falet një tjetër hap fals ndaj Saragozës 22-03-2006

Real, fitorja alternativa e vetme

Lopez Karo mendon për ndeshjen e radhës ndaj Saragozës, pasi ka barazuar 0-0 me Betisin në sfidën e së dielës, duke iu larguar gjithnjë e më shumë Barcelonës kryesuese. Gjithsesi, trajneri i Realit shpreson ende te titulli kampion, pavarësisht nga 11 pikët e disavantazhit. "Fitimi i titullit është shumë i vështirë, por ka ende shumë pikë në lojë. Duhet të jemi ambiciozë, për sa kohë na e lejon matematika. Gjithsesi, më duhet të pranoj se nuk na falen më hapa fals." Udhëtimi për në Saragozë sjell kujtime të hidhura për Realin.

Në ndeshjen e fundit që "merengesit" luajtën në "La Romareda" u mundën 6-1, për gjysmëfinalen e Kupës së Mbretit. Reali u eliminua nga kjo veprimtari, pavarësisht nga fitorja 4-0 në ndeshjen e kthimit. Kanë mbetur edhe dhjetë ndeshje nga fundi i kampionatit dhe titulli në Spanjë është mundësia e vetme e "galaktikëve" për të mos e mbyllur sezonin e tretë radhazi pa trofe. Të eliminuar nga Liga e Kampioneve dhe Kupa e Mbretit, madrilenët nuk kanë shënuar në tri ndeshjet e fundit. Në dy takimet e fundit, Karo ka lënë në stol Bekhamin dhe Ronaldon, ashtu si Gravesenin dhe Baptistën. Për transfertën e sotme, trajneri spanjoll nuk do të ketë në dispozicion Gutin, Udgejtin dhe Raul Bravon.

Nga ana tjetër, Saragoza që renditet në vendin e dhjetë të kampionatit spanjoll, ka arritur finalen e Kupës së Mbretit dhe ka fituar vetëm dy nga pesë ndeshjet e fundit. Ndaj Realit do të rikthehen si titullarë mbrojtësit Alvaro dhe Gabriel Milito, ndërsa edhe një herë të gjitha shpresat do të jenë bazuar te forma e shkëlqyer e dyshes sulmuese Everton-Milito. "Jam i bindur se Reali do të vijë në kërkim të revanshit, - tha Evertoni. - Por edhe do të kërkojmë hakmarrjen për humbjen 4-0 në ndeshjen e fundit. Gjithsesi, do të jetë një ndeshje ndryshe nga ajo e kupës. Rëndësi kanë vetëm tri pikët."

[inter_forever]

ZARAGOZA - REAL MADRID 1 - 1


Nje gol ne minuten e fundit nga RONALDO , shpeton Realin nga humbja .



Goli :


http://www.yourfilehost.com/media.ph..._1_Ronaldo.zip

[Davius]

Dikur "ajka" e futbollit botëror, tani një skuadër në krizë identiteti. Madrilenët "vuajnë" për një trajner... 23-03-2006

Reali, mbyllet epoka e "ëndrrave"

Nuk ka kaluar shumë nga koha kur Reali i Madridit përbënte "ëndrrën" e çdo futbollisti dhe kur trajnerët më të mirë të planetit ishin gati të bënin gjithçka për të drejtuar në "Santiago Bernabeu". Por pas tri sezonesh pa asnjë trofe, dështimi i turpshëm i projektit "galaktik" të ideuar nga Florentino Perez, Reali ka humbur shumë nga prestigji i tij në arenën e futbollit botëror. Nëntë herë kampionët e Europës janë duke u përballur me një situatë deri diku të rrallë, teksa po ndeshin në refuzimet e njëpasnjëshme të disa prej trajnerëve, me të cilët madrilenët kërkojnë të "rilindin".

Trajneri aktual, Lopez Karo, i ka nxjerrë "merengesit" jashtë Ligës së Kampioneve dhe Kupës së Mbretit. Trajneri i Milanit, Karlo Ançeloti, ishte i fundit që refuzoi ofertën e Realit, duke rinovuar deri në vitin 2008 kontratën e tij me kuqezinjtë. Rinovimi erdhi vetëm pak orë pasi e përditshmja spanjolle "Marca" e kishte vlerësuar italianin si pretendentin kryesor për stolin e Realit.

Trajneri i Liverpulit, Rafael Benitez, i cili e ka filluar karrierën duke drejtuar skuadrën e dytë të Realit (vend të cilin vetëm gjashtë muaj më parë e mbante Lopez Karo), dhe trajneri i Arsenalit, Arsen Venger, fans i deklaruar i Realit, kanë bërë planet e tyre për të ardhmen. Plane që nuk i shohin në drejtimin e skuadrës madrilene. Teorikisht, të drejtosh Realin e Madridit, mbetet një kënaqësi dhe dëshirë për çdo trajner, por gjithashtu është stoli më i paqëndrueshëm dhe me rrezikshmëri më të lartë. Perezi, i cili muajin e kaluar dha dorëheqjen nga posti i presidentit, ndryshoi gjashtë trajnerë në dy vjet e gjysmë, por pa arritur asnjë rezultat. Ai emëroi si drejtor teknik Benito Floron. Ky i fundit zuri vendin e Arrigo Sakit. Italiani e ndjeu "krizën" që po afronte dhe dha dorëheqjen në muajin dhjetor. Por me sa duket, presidenti i ri, Fernando Martin, nuk ka besim tek aftësitë e Floros.

Zv.presidenti Emilio Butragenjo është një tjetër drejtues "merenges", që rrezikon të humbasë vendin e punës pas "reformës". "Eshtë me siguri një vend pune tërheqës, por vetëm për ata që nuk kanë punë, - tha Vengeri në dhjetorin e kaluar, kur përgënjeshtroi kalimin e tij te Reali. - Më duket një klub ku nuk ka qëndrueshmëri. Rotacionet janë të shpeshta dhe kjo do të thotë që trajneri e ka të vështirë të gjejë qetësinë për të punuar." Martini po shqyrton mundësinë e rikthimit në bordin drejtues të figurave të tilla si Visente Del Boske, Hoze Antonio Kamaço apo Fernando Hierro. Këta të tre kanë pasur relata të vështira me Perezin. Ai largoi nga skuadra kapitenin Hierro dhe trajnerin Del Boske, vetëm një ditë pasi Reali fitoi kampionatin në vitin 2003. Flitet për trofeun e fundit që kanë fituar "merengesit". Kamaço, i cili ishte trajneri i parë i "galaktikëve", u shkarkua pas vetëm tri ndeshjesh. Ish-trajneri i kombëtares spanjolle mendon rikthimin si drejtor teknik.

Rikthimi i këtyre emrave do të shënonte një reformë totale, pasi nga Reali do të largohen të gjithë ata që kishin mbështetur presidentin Perez. Nga kandidatët jashtë Spanjës mbetet favorit Fabio Kapelo. Po t'i jepej mundësia, Reali do ta merrte me kënaqësinë më të madhe trajnerin që i dha kampionatin në vitin 1997, por është italiani ai që heziton. Kapelo do të presë vendimin e drejtuesve të Juventusit. Nëse Moxhi, Xhiraudo dhe Betega do të rinovojnë me klubin bardhezi, atëherë "Don Fabio" (epitet i vënë nga tifozët e Realit) do të qëndrojë në Torino. Përndryshe do të mendonte për Realin. Por "ish-galaktikët" nuk kanë shumë kohë...
Trajneri i Anglisë, Sven Goran Erikson, do të jetë jashtë çdo lidhjeje kontratuale pas "Gjermani 2006".

Suedezi është i aftë, i dashur nga futbollistët dhe ka marrëdhënie të shkëlqyera me Devid Bekhamin. Ndoshta do të dëshirojë të pushojë pas botërorit, por fakti që Bekhami është pranë rinovimit, mund të jetë një shenjë. Kandidati i fundit është ndoshta edhe më i mundshmi. Trajneri i Getafes, Bernd Shuster, e ka shprehur disa herë dëshirën e tij për t'u rikthyer si trajner në "Bernabeu". Gjermani, që si futbollist ka veshur fanellën e Atletikos, Realit dhe Barcelonës, ka shanset e tij, edhe pse nuk është një emër i afirmuar në futbollin botëror. Martini ka bërë të ditur se e ka zgjedhur emrin e ri, por në verë duhet të përballet me një tjetër "stuhi", zgjedhjet presidenciale.

[Davius]

Presidenti i Realit: Emrin do ta bëj të ditur vetëm në qershor 23-03-2006

Martin: E kam zgjdhur trajnerin!

Presidenti i Realit, Fernando Martin, ka bërë të ditur se e ka zgjedhur rajnerin e "merengesve" për sezonin e ardhshëm. Por ai nuk ka dashur të bëjë të ditur emrin e zëvendësuesit të Lopez Karos. "Unë e di se cili do të jetë trajneri i ri i Realit, por nuk dua të përmend emra," - tha Fernando Martin në një intervistë për shtypin spanjoll. Martini, i cili ka marrë drejtimin e Realit pas dorëheqjes së Florentino Perezit, ka thënë se trajneri i ri do të jetë në gjendje ta ngrejë skuadrën në nivelet që pretendon. "Kam shqyrtuar një varg me alternativa dhe kandidatë, dhe kam zgjedhur trajnerin e ri. Do të jetë një njeri me fuqi në skuadër dhe vendimet e tij do të jenë thelbësore, - vazhdoi Martini.

- Do të evitohen ato raste kur trajneri punon në një drejtim dhe klubi në drejtim tjetër." Martini tha se trajneri aktual i Realit, Huan Ramon Lopez Karo, do ta drejtojë skuadrën deri në fund të sezonit dhe shprehu dëshirën që ai të vazhdojë punën te "merengesit" në një funksion tjetër. "Ai është një trajner i madh, por ka nevojë për eksperiencë. Lopez Karo ka bërë gjithçka që ka pasur në mundësitë e tij dhe jam i bindur se do të arrijë ta rendisë skuadrën në vendin e dytë. Jam duke shqyrtuar seriozisht mundësinë që ai të punojë në klubin tonë edhe në sezonin e ardhshëm." Më pas Martini refuzoi zërat, sipas të cilëve ai po vazhdonte projektin "galaktik" të Perezit dhe se ish-presidenti i Realit vazhdonte të kishte një ndikim thelbësor në klub. "Njerëzit mund të thonë atë që duan, - tha presidenti aktual i Realit.

- Unë jam presidenti, sepse Perezi vendosi ta zëvendësoja. E falënderoj për këtë, por ju siguroj se jam i lirë të marr çdo vendim për skuadrën. Unë gjithmonë marr këshilla prej tij, por ato nuk mund të ngatërrohen me lirinë. I kam dhënë këshilla Perezit gjatë kohës që isha ndihmësi i tij, por vendimet i ka marrë gjithmonë ai. Ashtu si tani, të gjitha vendimet i marr unë dhe bordi drejtues." Martini ka përsëritur edhe një herë se nuk do të kishte vështirësi në largimin nga skuadra të futbollistëve që nuk japin maksimumin e tyre. Kushdo qofshin ata. "Skuadra ka nevojë të zhvillohet dhe të rinohet. Ne do të ndërhyjmë në merkato për të marrë futbollistë të talentuar, të cilët ndihmojnë në progreset e një skuadre. Ndërkohë, stafi drejtues do të shqyrtojë situatën e secilit prej futbollistëve aktualë."

"Jo" Realit
Karlo Ançeloti. Italiani rinovoi të martën me Milanin deri në vitin 2008.
Rafa Benitez. Spanjolli i ka shprehur besnikëri Liverpulit dhe pret rinovimin.
Arsen Venger. Francezi është shumë i lidhur me projektet e Arsenalit.

Në dilemë
Fabio Kapelo. Italiani është i lidhur me të ardhmen e Moxhit dhe Xhiraudos te Juvja.
Hoze Kamaço. Spanjolli synon të rikthehet te "merengesit" si drejtor teknik.

Kandidatët
Visente Del Boske. Spanjolli është shprehur gati për t'u rikthyer.
Sven Goran Erikson. Suedezi do të jetë i papunë pas kampionatit botëror.
Bernd Shuster. Gjermani, aktualisht te Getafe, konsiderohet si favorit.

[bavarezi5]

Jane mesuar keto te Realit,me fat te arrijne rezultat,por nuk shkon cdo here.

[Davius]

Sulmuesi brazilian: Golat më ndihmojnë. Dua vetëm të mirën e Realit 24-03-2006

Ronaldo: Gjithçka drejt përmirësimit

Sulmuesi brazilian i Realit të Madridit, Ronaldo, shënoi golin që i dha barazimin skuadrës së tij në ndeshjen kundër Saragozës. Në fakt, ai ka folur dhe ka deklaruar se golat po bëjnë që situata e vështirë të kalojë.


- Në ndeshjen ndaj Saragozës, goli juaj e shpëtoi nga humbja Realin e Madridit.
- Ekipi dha maksimumin në fushën e lojës. Unë jam sulmues dhe duhet ta pranoj që kam më shumë përgjegjësi gjatë ndeshjes. Nuk ishte rezultat i mirë, gjithsesi duhet të jemi shumë të përqendruar për ndeshjen tjetër. Unë jam shumë i qetë dhe jam gati për të dhënë maksimumin tim.

- Barazimi nuk ishte ai që prisnit.
- E rëndësishme është që luajtëm një lojë të mirë dhe dhamë maksimumin në fushën e lojës. Kjo ka rëndësi, pasi nënkupton që ekipi po përmirësohet ndjeshëm. Në ndeshjet e ardhshme do të duket akoma më qartë forca jonë.

- Gjithsesi, goli juaj tregoi se keni rëndësi në skuadër.
- Me thënë të drejtën, ishte nga të paktët gola që kam shënuar në një ndeshje të mirë. Goli im na dha një pikë, gjithsesi ka ardhur koha të mendojmë vetëm për tri pikë. Nuk duhet të bëjmë asnjë hap fals. Jemi ekip i fortë dhe nuk na falen rezultate të tilla.

- Çfarë shpresoni të ndodhë në të ardhmen?
- Në fakt, unë dua të vazhdoj të shënoj gola. Jam i kënaqur që deri tani nuk jam paraqitur keq. Pak nga pak gjërat po ndryshojnë dhe situata e vështirë që po kaloja, tani duket se ka përfunduar, madje po ndodh e kundërta. Jam shumë i përqendruar te forma ime dhe dua që skuadra të paraqitet sa më mirë.

- Me një ecuri të tillë, mendoni se keni shanse për titullin kampion në Spanjë?
- Ne do të vazhdojmë të këmbëngulim deri në fund të kampionatit. E di që me kalimin e kohës, Barcelona i afrohet më shumë titullit. Por kjo gjë nuk është e gjitha në dorën tonë. Në të gjitha ndeshjet e ardhshme, ne jemi të vendosur të arrijmë maksimumin, por edhe Barça duhet të bëjë hapa flas. Nëse nuk ndodh kjo, atëherë ne nuk kemi shanse që ta arrijmë.

Parreira: Ronaldo, lideri i Brazilit!

Trajneri i Brazilit, Karlos Alberto Parreira, ka deklaruar se Ronaldo duhet të jetë në një formë të mirë dhe me një moral të shkëlqyer para botërorit, duke qenë se do të jetë lideri i kombëtares. "Ronaldo duhet ta kalojë sa më shpejt situatën e vështirë. Ai ka një rol drejtues në skuadrën time, ndaj duhet të jetë shumë mirë në të gjitha aspektet. Kam besim se ai do të dijë të zgjidhë gjithçka dhe është futbollisti i duhur për të udhëhequr në fushën e lojës një skuadër si Brazili. Për më tepër, ai është një kampion bote dhe është mësuar me kompeticione të rëndësishme," - ka thënë Parreira.

[Davius]

"Merengesit" shkatërrojnë 4-0 Deportivon. Valencia bie në minutën e fundit ndaj Seviljas. Fundoset Sociedadi 27-03-2006

Reali, rikthehen mbrëmjet "galaktike"

Ronaldo: Jam në formë!

Futbollisti i Realit të Madridit, gjatë një interviste të dhënë për shtypin spanjoll, tha: "Do të kthehem ai i mëparshmi. E ndiej se forma po përmirësohet. Kam gjetur golat, të cilët për mua kanë qenë gjithmonë frymëzim. Sigurisht, forma ime lidhet ngushtë me atë të ekipit. Kur Reali luan bukur dhe fiton, edhe unë paraqitem mirë. E ndiej që po punoj ashtu si duhet dhe jam optimist."

Reali i Madridit ka arritur si rrallëherë në këtë sezon të dalë me durtrokitjet e "Santigo Bernabeut". "Merengesit" shënuan dy herë në secilën pjesë, duke mposhtur thellësisht Deportivon.

Skuadra nga La Korunja e pa veten në disavantazh që në minutën e nëntë, pas autogolit të Hektorit. Ky gabim do t'u kushtonte miqve, sepse avantazhi i dha Realit mundësinë të paraqiste një nga ndeshjet më të mira të sezonit. Skuadra e Lopez Karos u lirua nga presioni i rezultateve negative të arritura në këtë sezon dhe shënoi në ndeshjen e djeshme katër gola, aq sa kishte shënuar në të gjashta ndeshjet e mëparshme.

Në fundin e pjesës së parë fillon shfaqja e Ronaldos. 20 minutat magjike të "Fenomenit", të kurorëzuara me një gol në të 37-tën, i japin mundësinë Realit të shkojë i qetë në pushim. Në 45 minutat e para, por edhe më tej, te vendësit spikat loja e talentit Robinjo. 20-vjeçari ishte iniciator i aksioneve më të rrezikshme. Nga këmbët e tij lindi edhe goli i Ronaldos. Në pjesën e dytë, Reali pati kontrollin e takimit dhe Serxho Ramos shënoi golin e tretë. Mbrojtësi shfrytëzoi edhe një herë aftësitë e tij në lojën në ajër. "Show" i Realit u mbyll me golin e Baptistës.

Braziliani justifikoi besimin e Lopez Karos, duke shënuar golin e katërt në këtë kampionat në fund të një paraqitjeje mjaft të mirë. Kështu, më në fund Reali i Madridit ka treguar se çfarë është në gjendje të bëjë. Tifozët nostalgjikë panë në fushë "galaktikët" e dikurshëm, por tani është shumë vonë...

[Davius]

Një deklaratë e klubit ka përgënjeshtruar fjalët e presidentit Martin 28-03-2006

Reali: Nuk e kemi zgjedhur trajnerin

Real Madridi ka deklaruar se tani për tani nuk ka asnjë emër të ri për stolin e madrilenëve. Në një deklaratë zyrtare, klubi deklaron se pavarësisht nga emrat e dhënë nga mediat spanjolle dhe europiane, klubi nuk ka arritur të vendosë se kush do të jetë trajneri i ardhshëm në drejtimin e "merenguesve". Klubi nuk ka ndonjë lloj marrëveshjeje ose kontratë me asnjë trajner.

Javën e shkuar, Martini, i cili zëvendësoi Florentino Perezin në shkurt, u intervistua nga gazeta spanjolle "El Mundo", ku tha: "Unë e di se kush do të jetë trajneri i ri, por nuk do të jap asnjë emër. Martini e ka bërë të qartë se ai është në kërkim të një zëvendësuesi për Lopez Karon, për të cilin mendon se i mungon eksperienca në nivelet e larta, pasi ka ardhur te madrilenët nga një ekip i kategorisë së dytë.

Lopez Karo zuri vendin e Vanderlei Luksemburgos në dhjetor. Media spanjolle vazhdon të përmendë emrin e Karlo Ançelotit si favorit për drejtimin e klubit, por ai ka nënshkruar përsëri për milanezët, me një afat deri në 2008-n. "Kam vendosur të qëndroj me Milanin, i cili ka qenë përherë klubi im, - tha Ançeloti - Ata janë zgjedhja ime e parë." Vendimi është definitiv, por gjithçka mundet të ndodhë në futboll. Arsen Venger, Rafa Benitez dhe Fabio Kapelo e kanë distancuar veten nga ky stol në javët e fundit.

Të tjerë si Ançeloti, ish-trajneri Vinsente del Boske, Bernd Shuster, Hugo Sançez dhe Sven Goran Erikson shihen si objektivët me kryesorë. Gjithashtu, vendimi i Gus Hidinkut për t'u larguar nga Eindhoveni e ka vënë atë në listë për një rikthim të mundshëm. Reali renditet i dyti në Primera Divizion, 11 pikë larg Barcelonës, me të cilën do të ndeshet të shtunën, 8 tetë ndeshje nga fundi i kampionatit.