Gazeta Express
Ndaj të fortit të Durrësit këtë herë është përdorur një armë e sofistikuar, por sërish pa rezultat.
“Jetëgjati nuk bëhet jetëshkurtër”. Pas atentatit të së dielës në mbrëmje, kjo frazë tashmë i shkon shumë për shtat Lulëzim Berishës, të fortit të njohur të qytetit të Durrësit, i cili njihet edhe si biznesmen në fushën e ndërtimeve. Burime të rezervuara të policisë pohojnë se kundërshtarët e Lul Berishës këtë radhë e kanë patur shumë seriozisht për ta nxjerrë nga loja.
Nuk ka qenë tritol, as granatë apo bombë dhe as antitank, mjeti i përdorur për eleminimin e tij, por diçka tjetër edhe më e frikshme e përdorur për herë të parë në historinë e kriminalitetit shqiptar. Të njëjtat burime pohojnë se ndaj Berishës në shtëpinë e tij është lëshuar një raketë tokë-ajër e llojit Strela 2M, e njëjtë me ato që u kapën një vit më parë nga policia shqiptare në afërsi të Rinasit.
Sipas policisë Berisha 37 vjeçar, së bashku me kunatin e vet, Plarent Dervishi, rreth orës 21:20 të së dielës ishin duke mbyllur makinën Benz të blinduar të Lulit në parkingun e shtëpisë së tij që gjendet në në lagjen 17, pranë aksit rrugor stacioni i trenit - Ura e Dajlanit në Durrës, kur ka ndodhur ngjarja. Pra makina ishte futur në brendësi të shtëpisë, porta e jashtme prej hekuri të punuar trashë ishte mbyllur dhe të paktën Lul Berisha kishte zbritur dhe ishte më larg mjetit se sa kunati i tij, në momentin kur ka ndodhur shpërthimi. Predha e raketës tokë-ajër ka shpërthyer derën e jashme prej hekuri dhe është përplasur me bagazhin e Benz-it të blinuar duke plagosur vetëm Dervishin. Sipas të gjitha përllogaritjeve të policisë, të dy kanë shpëtuar për mrekulli, pasi predha kishte shpërthyer në derën e jashtme, pra i kishte humbur fuqia kur i ishte afruar makinës. Po sipas policisë mendohet se atentatori ka qenë pranë banesës, mbase në një largësi 50-100 metra dhe në këmbë, pra jo brenda në makinë. Pasi raketa Strela 2M ka veti të lëshojë zjarr nga pas dhe është e rrezikshme të lëshohet në një ambient të mbyllur. Që ka qenë një raketë tokë-ajër, ekspertët janë bindur pasi kanë bërë analizat e copërave të saj, madje kanë konkluduar se ishte e prodhimit jugosllav.
I lindur me këmishë
Por ky është të paktën rasti i dytë kur Berisha i shpëton një atentati me armë të sofistikuara. I vënë në shënjestër të shumë kundërshtarëve, Berisha mund të konsiderohet një njeri me fat. Dhe ky fat i ka filluar të paktën në vitin 1999. Më 28 qershor 1999 për ti bërë gropën Lul Berishës dërgohet në Durrës killeri famëkeq i Vlorës, Gaxhai, apo Gazmend Brraka. Ishte koha kur në Durrës kishte një konflikt të madh mes tij dhe një tjetër personazhi të njohur të zonës, të quajtur Marsel Sotiri. Atentatet në të dyja palët do ti merrnin jetën shumë njerëzve, përfshirë edhe dy doganierëve të pafajshëm. Dhe pikërisht në mes të kësaj beteje, duket gjendet Gaxhai të qëronte hesapet me Lul Berishën. Nuk është çudi që në atë kohë krimi kishte tendencë të ndahej në mbështetës të së majtës dhe të së djathtës. Gaxhai e realizon goditjen e tij në afërsi të Spitalit të Vjetër më 28 qershor 1999. Në fokus të breshërive të arëmve automatike dhe të një predhe antitank vihet një furgon jeshil i markës “Citroen” me targa të huaja, me të cilin Gaxhai kishte informacion se lëvizte pikërisht Lul Berisha. Porse ai nuk ndodhej në furgon dhe viktima të sulmit ishin dy të tjerë, Arben Paja dhe Xhevahir Xhunga, që humbin jetën. I ndjekur nga policia Gaxhai kapet bashkë me shokun e vet Viktor Ymeri dhe mbetet në burg sot e kësaj dite.
Konflikti i ri
Pasi del fitimtar në konfliktin me Sotirin, i cili vritet në brendësi të makinës së tij të blinduar pas një rrengu të studjuar mirë, Lul Berisha largohet në Itali, porse me të vënë këmbët aty arrestohet. U tha se “spiunimi” ishte bërë nga ata që e “donin fort” nga Shqipëria. Gjithsesi aty reth vitit 2002 ai rishfaqet në Durrës. Por kësaj radhe nuk kishte më sherre. Ato mbyllen si me magji. Për tu rihapur vetëm pak muaj më parë, kur në autostradën Durrës - Tiranë vritet Klodian Saliaj, një nga miqtë e Lul Berishës. Duket në këtë moment ekuilibrat prishen. Menjëherë më pas armët ngrihën ndaj Lul Berishës. Ai qëllohet me armë pranë vendit të quajtur “Fermentimi” në Durrës, saktësisht parbëllë lokalit “C’era una volta” por, si edhe herë të tjera, shpëton i plagosur lehtë.
Ndersa Gazeta Shqiptare shkruan:
Durrës, lufta mes bandave nga silenciatori te antitanku.
Mëria ndaj Lul Berishës nuk ka fund. E kanë qëlluar përpara shtatë muajsh më parë me një armë me silenciator përpara lokalit të tij, por ka shpëtuar mrekullisht. Të dielën në mbrëmje, kundërshtarët e tij janë rikthyer sërish. Por nga armët e lehta, ata kanë zgjedhur antitankun. Por edhe kësaj rradhe, fati ka qenë me Lul Berishën. Atentatorët e tij nuk arritën ta çojnë deri në fund planin e përgatitur qysh më parë për ekzekutimin e Berishës. Ata kanë qëlluar vetëm me njërën nga armët kundërtanke, ndërsa kundërtanku i dytë u gjet me predhë në gojë, pa arritur të përdorej prej tyre. Një nga biznesmenët më të njohur të qytetit të Durrësit, Lulëzim Berisha, i shpëtoi vdekjes vetëm për shkak të mungesës së profesionalizmit të atentatorëve, të cilët nuk kanë ditur të përdornin armët e frikshme që patën në dispozicion. Të dhënat e para të siguruara nga policia e Durrësit dhe deklarimet e dëshmitarëve të ngjarjes, tregojnë se autorët e këtij atentati e kishin përgatitur gjithçka qysh më parë, por nuk kanë mundur ta zbatojnë pikë për pikë planin e tyre. Ngjarja e ndodhur mbrëmjen e së dielës në qytetin numër dy të vendit, ka dëshmuar dhe një herë se në çfarë stadi ka arritur krimi në Shqipëri. Banorët e lagjes ku ndodhet vila luksoze e Lul Berishës janë përfshirë nga paniku e tmerri pas shpërthimit të zhurmshëm të kundërtankut. Ndërsa disa prej familjeve që banojnë në pallatin pas vilës së Berishës janë detyruar të zëvendësojnë xhamat e thyer dhe të meremetojnë vetratat e dritareve të dëmtuara nga fuqia e shpërthimit.
Atentati
Rreth orës 21.20, në mbrëmjen e së dielës, 37 vjeçari, Lul Berisha ka qenë duke hyrë në oborrin e vilës së tij në lagjen nr.17, të Durrësit, ku banon me gruan, dy fëmijët dhe motrën. Ai udhëtonte me një autoveturë tip Benz, e blinduar me ngjyrë të errët. Berisha ka ndaluar një moment para derës së blinduar të vilës, që hapet me telekomandë. Sapo dera është hapur Benzi i blinduar i Berishës është futur në oborr, por papritmas një shpërthim i fuqishëm ka çarë terrin e natës. Një predhë kundërtanke është lëshuar pas tij nga një distancë afro 100 metra, duke shpërthyer brënda oborrit të vilës. Si rezultat i shpërthimit është plagosur kunati i Berishës, Plarent Dervishi 33-vjeç, ndërsa objektivi i sulmit ka shpëtuar pa pësuar asnjë dëmtim, pasi nuk kishte dalë ende nga vetura e blinduar. Autorët e këtij sulmi nuk kanë arritur të realizojnë goditjen e dytë, madje në ikje e sipër kanë lënë dhe dy armët kundërtanke në vendngjarje. Për momentin Berisha është përpjekur t’i shpëtojë një goditje të dytë dhe pasi është siguruar se nuk ka problem, ka nxituar të çojë drejt spitalit kunatin e tij, për të marë ndihmën e parë mjekësorë.
Autorët
Për shkak të orës së vonë, në vendngjarje nuk ka patur kalimtarë të rastit që mund të ndihmojnë në identifikimin e autorëve të këtij krimi. Policia ka shoqëruar disa persona në cilësinë e dëshmitarit që ka njohuri mbi rrethana të ngjarjes por ende nuk jepet ndonjë njoftim në lidhje me deklarimet e tyre. Autorët e krimit kanë patur frikë t’i afrohen më afër vilës, pasi ajo është e paisur me një sistem telekamerash vëzhgimi, një sistem prozhektorësh të fuqishëm që ndriçojnë ambjentin përreth, si dhe një sistem tjetër me sensorë alarmi në murin e jashtëm rrethues. Vila ndodhet pothuaj në anë të rrugës Durrës-Plepa, vetëm 30 metra larg saj. Ajo është e vështirë të goditet nga rruga për shkak se përballë saj ndodhet një pikë karburanti që ia mbulon pamjen. Policia shpreson që të ndihmoet në hetimin e saj nga filmimet e kamerave të sigurisë së vilës, nëse Berisha do t’ia vërë në dispozicion si dhe nga gjurmët që mund të kenë lënë autorët mbi armët kundërtanke. Për momentin janë shoqëruar 15 persona të dyshuar për këtë ngjarje, por ende nuk është lokalizuar ndonjë pistë e besueshme që do të çonte në zbulimin e autorëve të këtij krimi.
Vila Bunker
Lulëzim Berisha është pronari i një vile luksoze në krahun e majtë të rrugës që lidh stacionin e trenit me Urën e Dajlanit, disa metra pas një pike karburanti të kompanisë “Kastrati”. Vila është katërkatëshe, me një arkitekturë bashkëkohore dhe moderne. Në sy bie sistemi i saj i sigurisë, qw përbëhet nga një rrjet i tërë kamerash vëzhgimi që kontrollojnë gjithçka rrotull saj. Muri rrethues, afro tre metra i lartë, është i siguruar me një sistem të sofistikuar alarmi, që lajmëron çdo tentativë për t’iu afruar vilës.
I plagosuri
Kunati i Berishës Plarent Dervishi është çuar në kirurgjinë e spitalit të Durrësit dhe u fut menjëherë në sallën e operacionit. Sipas mjekëve, i plagosuri ndodhet jashtë rrezikut për jetën, pasi ka dëmtime vetëm në këmbën e majtë.
Biznesmeni
Lulëzim Berisha është një nga emrat e njohur të botës së biznesit në qytetin bregdetar të Durrësit. Ai ka aktivitet në disa fusha, si në bar-restorante, ndërtim, si dhe ka privatizuar me ankand të hapur objekte shtetërore. Familja e Berishës është me origjinë nga Kosova, por ai është lindur dhe rritur në qytetin bregdetar të Durrësit. Ai është pronar i picerisë së njohur me emrin “C’era una Volta”, në rrugën “Skënderbej”. Disa muaj më parë ai është bërë pronar i gjithë godinës masive, në katin e parë të së cilës ndodhet piceria duke e privatizuar për shumën 1.2 milionë dollarë.
E arrestuan në Rimini për t’i shpëtuar jetën.
Italianët në maj 2000 e ndaloi Berishën para se të ekzekutohej nga rivalët.
Pesë vjet më parë, biznesmeni i njohur durrsak, Lulzim Berisha i ka shpëtuar në momentin e fundit një atentati të përgatitur me kujdes nga kundërshtarët e tij. Ngjarja ka qenë e planifikuar për të ndodhur në anën tjetër të detit, në Itali. U desh ndërhyrja e policisë italiane në kohën e duhur që u shmang realizim i këtij atentati. Sipas medias italiane në atë kohë, thuhet se “Shënjestra” e atentatorëve u ndalua në një restorant ku ai ndodhej në shoqërinë e një vajze ruse. Shërbimet inteligjente dhe strukturat e specializuara policore të shtetit fqinj i kishin mbajtur të dy klanet kundërshtare në survejim për një kohë të gjatë. Pikërisht në saj të këtij survejimi u bë e mundur që skuadrat mobile të policisë italiane të ndërhynin në kohë për të mos lejuar ekzekutimin e Berishës.
Arrestimi
Mediat italiane i kushtuan një vend të rëndësishëm arrestimit të një shtetësi shqiptar të quajtur Lulëzim Berisha nga skuadrat mobile në Rimini. Ai u ndalua mbrëmjen e të hënës së 21 majit 2000, në një restorant përgjatë bregut të Riciones në Rimini, pas një hetimi që zgjati më shumë se 8 muaj nga Skuadra Mobile e Ravenës në bashkëpunim me DDA e Barit. Berisha ishte vënë prej kohësh në shënjestër të rivalëve të tij në Ravena dhe të dhënat e fundit tregonin se ai ndodhej në Rimini. Policia italiane deklaroi se arrestimi në kohën e duhur evitoi realizimin e një atentati kundër tij që po organizohej nga një klan rival. Mediat italiane shkruanin se “Klani i interesuar për eleminimin e Berishës ishte një tjetër familje e njohur shqiptare, që kishte një rol të rëndësishëm në botën e krimit jo vetëm në Shqipëri por dhe në tregun evropian”. Mediat italiane pretendonin se nga rivaliteti midis dy klaneve ka patur shumë viktima, sidomos në radhët e kundërshtarëve të Berishës. Por nuk jepeshin shifra apo emra viktimash të vrarë.
Atentati
Në 19 shkurt të vitit 2000 u arrestua në Ravena një shtetas shqiptar i quajtur Erion Hoxha, i kërkuar nga prokuroria e antimafies së Barit për trafik droge. Policia italiane pretendonte se “kishte motive bindëse që ai(Hoxha) ndodhej në Ravena pikërisht për të organizuar vrasjen e Berishës”. Të hënën e 21 majit agjentët e policisë kishin individualizuar një autoveturë të tipit BMV, që dihej se ishte në dispozicion të Berishës, e parkuar para një lokali të njohur dhe luksoz në Ricione. Agjentët e policisë hynë brenda dhe u ulën në një tavolinë për të porositur darkën. Kur Berisha dhe vajza ruse që e shoqëronte ishin duke porositur pjatën dytë, ata ndërhynë menjëherë duke i ndaluar. Berisha u tregua i qetë duke nxjerrë dokumentat e identifikimit me gjeneralitete të rreme. Ai ishte i sigurt se do t’ia hidhte siç kishte bërë edhe herë të tjera, por agjentët nga Ravena kishin shtënë në duar një element më shumë, të cilin ai nuk e dinte, foton e tij. a.h
Fotografia
Fotografia e Berishës ishte marrë nga një dokument identiteti slloven i gjetur në një apartament në qendrën historike të Ravenës, gjatë një kontrolli të ushtruar më 21 mars 2000. Në këtë apartament jetonte një vajzë shqiptare, prostitutë e cila e kishte ndihmuar atë disa herë t’i shpëtontë policisë.
E kaluara
Lul Berisha u lirua nga gjykata Italiane pasi nuk u provua fajësia e tij në lidhje me disa akuza që i bëheshin nga prokuroria e shtetit fqinj. Policia e Durrësit njoftoi dje se Berisha është dënuar më parë për krime kundër personit.
“Na ishte një herë”, Lul Berisha.
Berisha dhe dy të tjerë u plagosën në një atentat 7 muaj më parë. Një person e qëlloi me pistoletë para picerisë së tij.
Një djalosh i ri, që sapo ka zbritur nga një autoveturë me ngjyrë të errët, është drejtuar në trotuarin e djathtë të rrugës “Skënderbej” të qytetit të Durrësit dhe ka qëlluar me pistoletë drejt tre personave që ndodheshin pranë Piceri “C’ERA UNA VOLTA”, duke i lënë të plagosur. Njëri prej viktimave ka qenë biznesmeni i njohur durrsak me origjinë kosovare, Lulëzim Berisha, i cili për fat të mirë është goditur vetëm në krah. Dy personat e tjerë që e shoqëronin kanë qenë Isuf Morina, kushëri i Berishës dhe Kujtim Haxhiaj, i njohur i tij. Ngjarja ka ndodhur paraditen e 5 majit 2005, rreth orës 10.30 në një nga rrugët kryesore të qytetit të Durrësit. Atentatori është larguar me vrap në drejtim të vendit ku e priste autovetura me ngjyrë të errët, e cila më pas është larguar me shpejtësi në drejtim të Portit Detar. Ndërsa tre të plagosurit janë transportuar me mjete të rastit në drejtim të Urgjencës së Spitalit të Durrësit, ku kanë marrë ndihmën e parë mjekësore. Ngjarja e ndodhur në një nga rrugët kryesore të Durrësit duke ka shkaktuar një tjetër precedent, që cënon jetën dhe sigurinë e qytetarëve dhe biznesmenëve në qytetin e dytë më të madh në vend. Policia e Durrësit ka preferuar të heshtë në lidhje me këtë ngjarje, duke mos dhënë asnjë njoftim për median, si për autorët e krimit ashtu dhe për motivin e tij. Biznesmeni i njohur durrsak Lulëzim Berisha ka qenë në shoqërinë e kushëririt të tij Isuf Morina dhe të Kujtim Haxhiajt pranë vendit të quajtur “Fermentimi”. Në katin e parë të godinës disakatëshe që ka shërbyer për tharjen dhe fermentimin e duhanit për dekada me radhë, Berisha ka ndërtuar një Piceri me emrin “C’era una Volta”(Na ishte një herë). Sipas burimeve të policisë që u referohen dëshmitarëve okularë, thuhet se atentatori ka shkëmbyer disa fjalë me Berishën dhe menjëherë ka nxjerrë një pistoletë duke qëlluar drejt tij dhe dy personave të tjerë që e shoqëronin. Pasi ka qëlluar të gjithë karikatorin e pistoletës, atentatori është larguar me vrap drejt autoveturës që e priste aty pranë dhe ka marrë drejtimin për nga porti i qytetit. Kalimtarë të rastit kanë marrë menjëherë tre të plagosurit dhe i kanë çuar në Urgjencën e Spitalit të Durrësit brënda pak minutash. Pavarsisht se kanë kaluar 7 muaj policia nuk ka arritur të zbulojë motivet e kësaj ngjarje dhe të arrestojë autorët e krimit.
Krijoni Kontakt