12 dosjet e qeverisë. Rama, Majko e Toska, nën akuzë
--------------------------------------------------------------------------------
Qamil XHANI
Ato akuza që u thanë publikisht për dy ditë me radhë në seancën e Parlamentit qeveria i ka dërguar zyrtarisht në Prokurori. Dje janë bërë gati 12 dosje, ku pasqyrohen shkelje të ndryshme dhe janë dërguar në Prokurorinë e Përgjithshme. Gazeta “Tirana Observer”, publikon emrat e politikanëve, për të cilët administrata e qeverisë “Berisha” mendon se kanë shkelur ligjin dhe mbi këtë bazë, sipas tyre, duhet të akuzohen zyrtarisht. Gjithsesi, do të jenë prokurorët ata që do të vlerësojnë nëse akuzat në denoncimet e depozituara në prokurori do të marrin formë ligjore. Një gjë e tillë pritet të bëhet pas studimit të materialeve.
Të akuzuarit
1. I pari në listë qëndron kryetari i Bashkisë së Tiranës dhe kreu i Partisë Socialiste, Edi Rama. Pothuaj në të gjitha deklaratat e demokratëve ai është akuzuar për shpërdorim të detyrës, duke abuzuar me lejet e ndërtimit. Dosja është përpiluar nga ministri i Transporteve, Lulzim Basha, dhe në të përfshihen shifra e dokumente. 2. I dyti në listën VIP renditet sekretari i PS-së, Pandeli Majko. Ai u akuza nga kundërshtarët politike për mosdeklarim të pasurisë. Sipas Bujar Nishanit, ekzistojnë llogari bankare të Majkos në shtete të tjera. 3. Ish-ministri i Rendit, Igli Toska, duket se ka dosjen më voluminoze. Për përgatitjen e saj ka menduar vetë pasardhësi i tij, Sokol Olldashi, i cili ia ka llogaritur shpenzimet deri në qindarkën e fundit. Abuzimet me tenderat dhe shpërdorim i detyrës në miliona dollarë, duket se do të jetë akuza për Toskën. 4. Akuzat për KESH-in dhe ish- drejtuesin e saj, Andis Harasani, janë një tjetër dosje që është nisur drejt zyrës së Sollakut. Vetë kryeministri Sali Berisha është përbetuar se shkaktarët e krizës energjetike që shpërdoruan miliona dollarë për makina luksoze do të ndëshkohen rreptësisht. 5. Abuzimet e bëra në dogana nga biznesmenët do të hetohen rreptësisht nga prokuroria. Ministri i Financave, Ritvan Bode, deklaroi se janë 731 raste ku u janë shmangur taksave, duke i shkaktuar shtetit një dëm prej 3,1 miliardë dollarë. 6. Ish- Ministri i Bujqësisë, Agron Duka, do të hetohet nga prokuroria për shmangie të evazionit fiskal dhe abuzimeve gjatë kohës në detyrë. 7. Një dosje e veçantë përmbledh dhe vetë ata që kanë përfaqësuar organin e akuzës gjatë viteve. Zëvendëskryeministri Ilir Rusmajli ka përmendur fakte për prokurorë që fshijnë provat apo shesin dosje. 8. E njëjta gjë duket se do të ndodhë edhe për disa gjykatës që kanë abuzuar me detyrën, duke shkelur rëndë ligjin. 9. Pas Fatos Tarifës, një tjetër ambasador do të hetohet për korrupsion. Bashkim Zeneli, ambasadori ynë në Athinë, është akuzuar nga Ministri i Brendshëm, Olldashi, për abuzime në disa tendera të Ministrisë së Rendit. 10. Deputeti socialist dhe biznesmeni gjirokastrit, Vangjel Tavo, do të hetohet për evazion fiskal në shuma që kapin shifrën 57,3 milionë dollarë. 11. 70 drejtues doganash do të denoncohen në prokurori për shkelje të detyrës. Sipas Ministrit Bode shkeljet e tyre janë penale dhe administrative. 12. Ata që mbyllin listën e dosjeve që duket se nuk do të jenë të vetmet janë pushtetarët që përdorën buxhetin e shtetit për blerjen e makinave luksoze me 640 mijë dollarë.
Rama: S’kam frikë nga dosjet
Kryetari i Partisë Socialiste, Edi Rama, mblodhi dje grupin parlamentar për të vendosur qëndrimin që do mbajë opozita në Parlament. Rama tha se nuk ka frikë nga dosjet e deklaruara ministri i Brendshëm, Sokol Olldashi. “Korrupsioni nuk luftohet me fyerje, rrugaçëri apo me reforma që kthejnë institucionet e imunizuara nga subjektivizmi i atyre që administrojnë”, tha Rama. Më tej, kreu i selisë rozë theksoi se nga ana e diskutantëve socialistë nuk ka pasur asnjë thyerje apo sharje. Sipas Ramës, ky është niveli etik i PS-së që ka premtuar dhe pavarësisht nga niveli i kundërshtarit, socialistët do e mbajnë.
Dosja Edi Rama
Është akuzuar nga ministri Lulzim Basha dhe Sokol Olldashi për shpërdorim të detyrës. Sipas tij, sheshet e ndërtimit janë dhënë në mënyrë abuzive, duke shkatërruar biznesin.
Dosja Pandeli Majko
Sekretari i përgjithshëm i Partisë Socialiste është akuzuar për mosdeklarim të pasurisë. Deputeti i PD-së, Bujar Nishani, ka thënë se Majko ka llogari bankare të depozituar jashtë shtetit.
Dosja Igli Toska
Ministri i Brendshëm, Sokol Olldashi, e ka akuzuar për abuzime me tenderat dhe shpërdorim të fondeve të ministrisë. Sipas Olldashit, për mobilimin e zyrës së ministrit janë harxhuar mbi 255 milionë lekë.
KESH (Andis Harasani)
Është akuzuar nga kryeministri Sali Berisha për abuzime me tenderat e energjisë. Sipas Berishës, ish-drejtuesi i KESH-it është përgjegjës për situatën energjetike, pasi boshatisi arkën e KESH-it.
Dosja Doganat
Përfshinë abuzimet e bërë në dogana ku janë përfshirë biznesmenë të afërt me Partinë Socialiste. Ministri i Financave, Ritvan Bode, ka deklaruar shkeljet e konstatuara që kapin shifrën 3,1 miliardë dollarë.
Dosja Agron Duka
Ish-ministri i Bujqësisë është akuzuar në seancë për shmangie të detyrimeve doganore në shuma të mëdha dhe për shpërdorim të detyrës, pasi ishte importuesi më i madh i mallrave ushqimore.
Dosja Prokuroria
Në bankën e të akuzuarve do të përfundojnë dhe prokurorë që kanë shkelur ligjin. Zëvendëskryeministri Ilir Rusmajli, ka folur në seancë për fshehje provash dhe shitje dosjesh nga akuza.
Dosja Gjykata
Për fshehje provash dhe shitje dosjesh janë akuzuar dhe organet e gjyqësorit. Deputeti i PD-së, Astrit Patozi, tha se në disa raste gjykatësit janë më të korruptuar se ata që gjykojnë.
Dosja Bashkim Zeneli
“Më rezulton që për një tender për blerje makinash, kërkesa për ofertë blerje makinash për Ministrinë e Rendit Publik vjen nga ambasadori i Shqipërisë në Athinë, Bashkim Zeneli”, ka thënë Olldashi.
Dosja Vangjel Tavo
Sipas ministrit Bode, firma e biznesmenit Tavo “International Albania Oil” ka shitur mallra të deklaruara dhe nuk ka paguar detyrimet doganore me një shumë prej 57,3 milionë dollarë.
Dosja Makinat luksoze
Tenderat që janë bërë për blerjen e makinave të administratës shtetërore janë bërë në kundërshtim me ligjin. Sipas kryeministrit, janë shpenzuar me miliona dollarë nga buxheti i shtetit për blerjen e tyre.
Dosja 70 doganierëve
Ministri i Financave, Bode, ka thënë se nga kontrolli i bërë në dogana janë hasur shkelje prej 70 drejtuesve dhe ish-drejtuesve të doganave. Këta të fundit rrezikojnë ndjekje penale dhe administrative.
--------------------------------------------------------------------------------
Krijoni Kontakt