Historia e Popullit Shqiptar

[baobabi]

www.shekulli.com.al shkruan

Përgatitur nga Instituti i Historisë në Akademinë e Shkencave, libri është botim i shtëpisë botuese "Toena"

Së shpejti në qarkullim "Historia e popullit shqiptar"

Shtëpia Botuese "Toena" do të hedhë së shpejti në qarkullim vëllimin e parë dhe të dytë të veprës "Historia e popullit shqiptar", në katër vëllime, që është përgatitur nga Instituti i Historisë i Akademisë së Shkencave në kuadrin e "Programit për Kërkim e Zhvillim"- Studime Albanologjike (1998-2001). Realizimi i kësaj vepre është bërë nën kujdesin e Akademisë së Shkencave dhe është udhëhequr nga një grup drejtues, i përbërë nga Prof.dr. Kristaq Prifti (Kryetar), Prof.dr.Muzafer Korkuti, Prof. dr. Gazmend Shpuza dhe Prof. dr. Xhelal Gjeçovi. Për hartimin e "Historisë së popullit shqiptar" janë angazhuar rreth 50 autorë, forcat më të mira shkencore të Institutit të Historisë të Akademisë së Shkencave të Shqipërisë, të Universitetit të Tiranës, si dhe bashkëpunëtorë të jashtëm të Akademisë së Shkencave. Për hartimin e historisë së sotme të Kosovës (për vëllimet 3 dhe 4) janë angazhuar gjithashtu punonjësit shkencorë të Institutit të Historisë së Prishtinës, të Institutit Albanologjik të Prishtinës dhe të Universitetit të Prishtinës. Vëllimi i parë, që del së shpejti nga shtypi, përbëhet nga tri pjesë: "Ilirët", "Mesjeta" dhe "Shqipëria nën perandorinë osmane në shek XVI-1820". Autorë të këtij vëllimi janë: Prof.dr. Muzafer Korkuti, Prof. Selim Islami, Prof.dr. Skënder Anamali, Prof.dr. Frano Prendi (për pjesën e parë); As/prof.dr. Pëllumb Xhufi dhe As./prof.dr. Kasem Biçoku (për pjesën e dytë); Prof.dr. Selami Pulaha, As./prof.dr Ferid Duka dhe Dr. Stavri Naçi (për pjesën e tretë). Vëllimi i dytë që do të jetë së shpejti në qarkullim së bashku me vëllimin e parë, i kushtohet Rilindjes Kombëtare Shqiptare (vitet 1830-1912) është përgatitur nën redaktimin shkencor të Prof.dr. Kristaq Priftit dhe ka si autorë Prof. Aleks Budën, prof.dr.Petrika Thëngjillin, Prof. dr. Kristo Frashërin, Prof.dr. Hysni Myzyrin, Prof. dr. Kristaq Priftin, prof. Stefanaq Pollon dhe prof.dr. Gazmend Shpuzën. Për kapitujt që u kushtohen kulturës në vëllimin e parë e të dytë, përveç autorëve të përmendur më lart, kanë punuar edhe Prof. Shaban Demiraj, Prof. Andromaqi Gjergji, Prof. Dhimitër Shuteriqi, Prof. dr. Jorgo Bulo, As.prof.dr. Shaban Sinani, Prof. dr. Gjerak Karahiskaj, Dr. Mustafa Arapi etj. Vëllimi tretë i kushtohet "Historisë së popullit shqiptar gjatë viteve 1913- 1939. Vëllimi katërt përfshin "Historinë e popullit shqiptar gjatë Luftës së Dytë Botërore dhe pas saj (1939-1990). (Vëllimi i tretë dhe i katërt janë në përfundim të procesit të hartimit, redaktimit dhe korrektimit letrar). Vepra "Historia e popullit shqiptar", në katër vëllime, vëllimi parë dhe i dytë i së cilës do të vihet së shpejti në qarkullim, përbën një botim të ri, për shkak se nga koha e publikimit të botimit të parë të "Historisë së Shqipërisë" ka kaluar një periudhë e gjatë, rreth 40 vjet qysh kur doli vëllimi I (më 1959), që i kushtohej lashtësisë, mesjetës e shekujve XVI-XVIII dhe 18 vjet që kur u botuan vëllimet II, III dhe IV, më 1984. Gjatë kësaj periudhe janë bërë përparime në fushën e kërkimeve historiografike shqiptare, është rritur fondi i dokumentacionit arkivor dhe, ndërkohë, kanë ndodhur ndryshime rrënjësore në rrugën e demokratizimit të shoqërisë shqiptare e janë krijuar kushte të favorshme për zhvillimin e lirë të shkencës historike. Botimi i tanishëm i "Historisë së popullit shqiptar" (Vëllimi i dhe II) pasqyron nivelin e sotëm të shkencës historike shqiptare dhe u përgjigjet kërkesave të një vepre shkencore bashkëkohore. Ai është fryt i punës shumëvjeçare të studiuesve shqiptarë, rezultat i një hulumtimi të gjerë të dokumenteve historike vendase dhe të huaja. Këto vëllime përfaqësojnë një sintezë të arritjeve të shkencës shqiptare në fushën e arkeologjisë, të medjevistikës, të turkologjisë e përgjithësisht të historiografisë shqiptare e të huaj gjatë dhjetëvjeçarëve të fundit. Vëllimet e përgatitura si nga shkalla e përgjithësimeve ashtu edhe nga informacioni dhe të dhënat më të fundit shkencore që sjellin, shënojnë një etapë më të lartë në krahasim me botimet pararendëse në zhvillimin e mendimit shkencor historik shqiptar.
"Historia e popullit shqiptar" është një botim shkencor, akademik. Por ai do të shërbejë, njëherazi si një manual bazë dhe nga më themelorët për studentët e universiteteve shqiptare.
A.Peçi