Menekini: Duhet zemër, në derbi më shumë.
Trajneri i bardhebluve kërkon në derbi kundër Partizanit atë Tiranë që pa në pjesën e dytë ndaj Apolonisë.
Nëse lojtarët luajnë me gjithë zemër, japin gjithçka në fushë, fitorja dhe rezultati i duhur arrihen më lehtë. Në këtë përfundim ka dalë dje pas ndeshjes së kthimit për kupë trajneri italian i Tiranës, Leonardo Menekini, i cili kërkon nga ekipi i tij që në të gjitha ndeshjet, më kryesorja në derbin e së shtunës, të jetë i tillë. "Ne në kupë, në pjesën e dytë, ishim krejt ndryshe nga pjesa e parë e ndeshjes. Luajtëm më me dëshirë, krijuam shumë raste dhe shënuam jo pak gola. Ishim kërkues dhe këtë duhet të tregojmë në çdo ndeshje. Që të fitosh duhet këmbëngulje dhe zemër në fushë. U pa te Tirana në pjesën e dytë kjo gjë dhe duhet të na karakterizojë në çdo ndeshje në të ardhmen," - thotë Menekini.
Tirana, të shtunën do të luajë kundër Partizanit në një derbi që s'kërkon shumë koment. Kampionët janë për momentin në një pozicion të pafavorshëm në klasifikimin e përgjithshëm, kështu që kërkohet vetëm fitorja në atë sfidë. Italiani i stolit bardheblu gjithmonë ka nxjerrë justifikimin e tij se mungesat kanë ndikuar shumë si në lojë ashtu edhe në rezultatin përfundimtar, çka e kanë lënë për momentin skuadrën pretendente për tiull disa pikë poshtë vendit të parë. Por dje, në pjesën e dytë të ndeshjes së kthimit për kupë, kur bardheblutë luajtën kundër Apolonisë së Fierit, u dha një leksion i qartë që Menekini e përkthen si një dëshirë të madhe për fitore. "Këtë kërkoj nga lojtarët dhe mendoj se derbi fitohet vetëm kështu, siç u paraqitëm në pjesën e dytë për kupë. Partizani është një kundërshtar i fortë, ndaj e kemi përqendruar vëmendjen nga takimi i së shtunës," - shprehet trajneri italian i Tiranës, pas fitores së djeshme, që në pjesën e parë u vu në dyshim nga loja jo shumë e kënaqshme e Tiranës.
Kur fazës së parë të këtij edicioni i ka mbetur vetëm një ndeshje, Tirana ndodhet 5 pikë larg nga kryesuesit. Kjo javë rezervon ndeshjen më interesante të kampionatit tonë, atë mes Tiranës e Partizanit. Një derbi që njihet dhe pritet me shumë dëshirë nga të gjithë tifozët. Bardheblutë, këtë herë nuk do të kenë luksin që në rast të një humbjeje të mendojnë për ballafaqimet e ardhshme, sepse u kërkohet vetëm fitorja për të mbetur padronë të këtij edicioni. Humbja mund t'i lërë shumë më larg nga kreu dhe më kryesorja tifozët nuk do ta durojnë një rezultat të pafavorshëm ndaj një kundërshtari si Partizani, që nga rritja që ka treguar në ndeshjet e fundit pritet t'i japë akoma më interes ndeshjes së madhe derbi të ditës së shtunë.
Fjodor Xhafa, rikthim me 2 gola
Sulmuesi Fjodor Xhafa është rikthyer zyrtarisht dje paradite, teksa ka rënë dakord me drejtuesit e Tiranës. Në pjesën e dytë të ndeshjes së kthimit për kupë, ai ka luajtur me ngjyrat bardheblu. Dhe për të treguar se mbetet një sulmues që e nuhat në mënyrë të tmerrshme golin, Xhafa ka realizuar një dopietë ndaj Apolonisë. "Jam i gëzuar që u riktheva te Tirana me një dygolësh dhe më kryesorja për fitoren e kualifikimin që siguruam në turin tjetër. Kam rënë dakord paradite me drejtuesit dhe zyrtarisht jam lojtar i Tiranës. E njoh mirë këtë ambient dhe besoj se do të vazhdoj rrugën e sukseseve, ashtu sikurse ka ndodhur 3 vitet e fundit, ku kam luajtur dhe kam fituar," - shprehet sulmuesi vlonjat i Tiranës, Fjodor Xhafa, që është huazuar dhe regjistruar dje brenda ditës në protokollin që mban listën me emrat e Tiranës.
Bardheblutë, stërvitja bëhet paradite
Bardheblutë do të stërviten edhe sot, si çdo ditë të javës, paradite. Kështu ka urdhëruar dje trajneri italian, Leonardo Menekini, që gjatë javës ka drejtuar vetëm seanca stërvitore që janë zhvilluar para drekës. Që pas humbjes me Elbasanin, Tirana ka zhvilluar pasdite vetëm ndeshjen e kupës përballë Apolonisë. Sot, në orën 10.00, lojtarët do të zbresin në "Skënder Halili", të ndarë në dy grupe. Vetëm një ditë para ndeshjes pritet një seancë pasdite në orarin që do të luhet supersfida Tirana-Partizani. Tirana ndaj Partizanit ka ende në pikëpyetje mbrojtësin Dabulla, kurse mbetet i skualifikuar Sina. Të tjerët do të jenë në dispozicion të italianit Menekini, që kërkon të kthejë në derbi imazhin e një Tirane me fytyrë fituesi.
Krijoni Kontakt