Nje shqiptar puntor tek kryetari i mafies Greke''17 nentori''

[Kallmeti]

Mendonte se i shërbente një mësuesi të zënë me punë e kurrsesi një krimineli ndër më mëdhenjtë e shtetit fqinj
Një shqiptar, dëshmon për "17 nëntorin"

Emigranti punonte për Kufodinën, personin e akuzuar për 11 vrasjet e organizatës

Ramadan Bigza / Athinë
Ai nuk kishte bërë ndonjë kontratë, megjithatë siç thotë populli, kur të vjen e keqja nuk ke se çfarë i bën, hapi deren. Kështu i ndodhi emigrantit shqiptar S.Mazeli. Ai punonte pikërisht si argat tek njeriu më i kërkuar nga policia greke. Shqiptari 46- vjeçar punonte në punishten e përpunimit të mjaltit, që kishte për pronar Kufodinën, personin e akuzuar për rreth 11 vrasje në emër të organizatës terroriste "17 Nëntori". Ai ishte personi i vetëm që e kishte takuar atë pikërisht ditën e fundit të qershorit kur njerit prej drejtuesve të "17 Nëntorit" i plasi bomba në dorë teksa kryente një atentat në portin e njohur të Pireut. Ai tregoi se ishte njohur me Kufodinën kur ky kërkonte të ndërronte një shtëpi dhe kishte vazhduar të punonte me të, duke kujtuar se i shërbente një mësuesi të zënë me punë e kurrsesi një krimineli ndër më mëdhenjtë e shtetit fqinj. Përveç Mazelit policia ka marrë në pyetje edhe emigrantë të tjerë që banonin në atë zonë dhe që kishin njohje me "shqiptarin" e Kufodinës. Gjithsesi ata janë lënë të lirë.Telashet e emigrantëve nuk kanë fund.
Ka më se dy muaj , që emri i 44-vjeçarit Dhimitri Kufodinas është kryefjala e informacioneve të medias vendase. Ai ishte ndër personat më të kërkuar pas kapjes së 15 vetëve, që përbënin organizatën e tmerrshme terroriste "17 Nëntori". Ndërsa të gjithë të tjerët ishin izoluar brenda mureve të burgut të Koridalosë në Athinë, bletërritësi, që e mbante vehten si mësues matematike, u bë personi më i kërkuar në Greqi. Dhe kur të gjithë e kërkonin si të thuash në qiell, ai u bë i gjallë në tokë. Në pasditen e djeshme, ai i nxori dorën një taksie që drejtohej nga qytetari grek Stavros Janiotis. Nga Pireu ai i kërkoi atij ta çonte në drejtorinë e policisë së madhe në Leoforos Aleksandras. Tek ecte i qetë në timon, shoferit kurrsesi nuk i shkonte ndërmend se ai kishte pranë personin më të kërkuar, që akuzohej të paktën për 11 vrasje personash. Ai nuk do ta besonte edhe kur vrapoi për t'i kthyer reston nga 100 euro që i la pasagjeri i tij i jashtëzakonshëm. Mirë shoferi, por para njeriut që u prezantua se ishte Kufodina u shtang edhe polici i shërbimit. Brenda pak minutash gjithçka u bë e qartë. Njeriu i qethur dhe i rruar, pa atë mjekrën karakteristike, fotografia e të cilit, jepej në çdo emision të lajmeve, ishte vërtet ai, Dhimtris Kufodinas.
Emigranti Mazeli nuk ishte i vetmi shqiptar emri i të cilit është shfaqur në buletinet e lajmeve greke këto ditë. Në një buletin lajmesh mësohet se ka humbur jetën 44-vjeçari Rakip Hoti. Shqiptari punonte në Hania të Kretës. Teksa punonte për zhguljen e një kolone elektrike, nuk e kuptoi se maja e saj preku tensionin e lartë 20 mijë volt, gjë që solli vdekjen e menjëhershme të emigrantit nga Shqipëria. Në spital veçse konstatuan vdekjen e tij. Kështu e mbylli jetën një emigrant, një djalë, një prind, që ëndërronte për një jetë më të mirë.