Masat për debitorët pas urdhërit të Rulit. E pësojnë edhe paguesit. KESH: Po shkurtojmë 4 orë kufizimet
KESH u pret dritat 44.000 debitorëve
Aksioni i parë masiv kufizon edhe 1.960 biznese
--------------------------------------------------------------------------------
Genc Kondi
Policia elektrike ka kryer rreth 44 mijë ndërprerje të energjisë elektrike për debitorët e KESH gjatë tre ditëve të fundit. Pas paralajmërimit të ministrit Genc Ruli, KESH ka organizuar një aksion me ngritjen e 400 grupeve kontrolli në të gjithë vendin, të cilët kanë ndëshkuar debitorët, mes të cilëve edhe 1.960 biznese private. Ky ka qënë aksioni më i madh i ndërmarrë ndonjëherë nga punonjësit e KESH dhe policisë elektrike në të gjithë vendin. Sipas deklaratës zyrtare të KESH, këto masa do të shoqërohen edhe me reduktimin e kufizimeve të energjisë elektrike për biznesin. Këto ditë, pothuaj të gjitha bizneset e mëdha, që paguajnë 100% faturat e energjisë elektrike, furnizohen pa ndërprerje me energji. Kufizimet në fshatra vazhdojnë të jenë më të thella si rezultat i nivelit shumë të ulët të arkëtimeve. Ndërkohë, ditet e fundit, po eliminohen gradualisht kufizimet gjatë orëve të natës, për të mos influencuar prodhimin e furrave të bukës.
Aksioni
Pak ditë pas takimit që zhvilloi ministri i Ekonomisë dhe Energjitikës, Genc Ruli, me drejtuesit e KESH dhe të Policisë Elektrike, të cilëve iu kërkoi marjen e masave urgjente që me çdo mënyrë, të rriten arkëtimet dhe të përmirësohet situata energjitike në vend, Korporata Elektroenergjitike Shqiptare ka krijuar dhe hedhur në veprim 400 grupe pune, që kanë kontrolluar mbi 5.300 abonentë per gjendjen e aparateve dhe të sistemeve te matjes. Këto grupe, po gjatë këtyre tre ditëve, kanë bërë mbi 40 denoncime në organet e prokurorisë në zonën e Shkodrës, Elbasanit dhe Fierit për konsumatorët debitorë që e kane rilidhur vetë energjine ose kanë cënuar sistemet e matjes, duke përfshirë edhe kompani të fuqishme private. Ndërprerjet nuk kanë kursyer jo vetëm rreth 42 mijë familjet debitore, por edhe 1.960 bizneset private që ndodheshin në listën e borxhlijve apo kishin kryer lidhje ilegale.
I pyetur nga "Gazeta" lidhur me aksionin e ndërmarrë nga KESH dhe Policia Elektrike për ndërprerjet e lidhjeve për debitorët, ish-drejtori i përgjithshëm i Korporatës Elektroenergjitike, Andis Harasani, sot deputet i PS, deklaroi se "puna nuk bëhet me aksione. Ne kemi kryer ndërprerje, por jo të këtyre përmasave sepse orët e gjata të kufizimeve të KESH nuk mund të justifikohen me prerjen e dritave".
Kufizimet
Zëdhënësja e KESH njoftoi dje se, si rezultat i masave të marra, me përjashtim të disa qyteteve të zonës së Shkodrës dhe Sarandës, kufizimet e energjisë elektrike po aplikohen deri në 4 orë, nga 10-12 orë që arriti para 10 ditëve. KESH ka marrë masat që kufizimet të zgjasin nga ora 10-14.00, ndërkohë që pas komunikimit me Ujësjellësit është bërë e mundur që furnizimi me ujë i qyteteve të nisë në ora 14.00.
Sipas deklaratës zyrtare të KESH, këto masa do të shoqërohen edhe me reduktimin e kufizimeve të energjisë elektrike për biznesin. Këto ditë, pothuaj të gjitha bizneset e mëdha, që paguajnë 100% faturat e energjisë elektrike, furnizohen pa ndërprerje me energji. Ndërkohë kufizimet në fshatra vazhdojnë të jenë më të thella si rezultat i nivelit shumë të ulët të arkëtimeve.
KESH po njeh një situatë të vështirësuar edhe nga fakti se asaj i mungojnë 6 milionë kilovatorë në ditë nga mozrealizimi i tenderave të njëpasnjëshëm, që duhej të përcaktonin kompaninë furnizuese më energji nga importi. Në një prononcim për "Gazetën", drejtori i përgjithshëm i KESH, Fatmir Hoxha, kishte lëshuar përsëri alarmin e një dimri pa drita.
Viktimat
Aksioni i tre ditëve të fundit për ndërprerjen e energjisë ka shkaktuar edhe pakënaqësitë e para. Disa banorë të zonës së Saukut, mbi qytetin Studenti, si dhe të zonës së Shkozës janë ankuar në redaksinë e Gazetës se u mungonte energjia edhe pse kishin paguar rregullisht energjinë. Sipas interesimit tonë, ndërprerja e një fidri të furnizimit me energji ka lënë pa drita një lagje të tërë e cila ishte debitore. Ndërkohë pjesë e kësaj lidhjeje kanë qënë edhe disa familje që ishin pagues të rregullt. Në Shkozë, problemit të ndërprerjes i shtohet edhe ai i banesave të palegalizuara. Banorët ankohen se paguajnë afrofe çdo muaj, por megjithatë janë përfshirë në listën e familjeve të prekura nga aksioni.
Krijoni Kontakt