Anëtari i Kryesisë shprehet se mandati i kreut të PS duhet kufizuar në jo më shumë se dy
Rama-Malaj, gara për kreun e PS
“Më shumë sesa një kandidim personal, do të prezantoj një platformë që thellon modernizimin e PS-së”
A. Rama
TIRANË - Gara për kreun e Partisë Socialiste përfshin një tjetër kandidat. Arben Malaj, deputet dhe anëtër i kryesisë së PS-së, ka shfaqur dje publikisht për mediat ambicjen e tij për të konkuruar për postin e kryetarit të partisë. Pas kryetarit të Bashkisë së Tiranës, Edi Rama, Malaj është i dyti ndër socialistët që pretendon të hyjë në garë për të marrë drejtimin e selisë rozë. Malaj, një prej figurave më të të vjetra të PS-së, është shprehur dje se më shumë sesa kandidim personal, kishte synim për të prezantuar në kongresin e tetorit një platformë që thellon modernizimin e partisë. Sipas tij, ndër çështjet kryesore të kësaj platforme do të lidhen me zvogëlimin e kompetencave të kryetarit si dhe me limitimin e mandateve të njëpasnjëshme që mund të marrë një kryetar. “Sinqerisht deklaroj se më shumë sesa një kandidim personal, do të isha totalisht i obliguar për kongresin e tetorit, pikërisht për të prezantuar një platformë që thellon modernizimin e PS-së. Në platformën time do të propozoj që mandati i kryetarit të kushtëzohet në mënyrë të drejtpërdrejtë me rezultatet e ballafaqimeve elektorale parlamentare. Momenti i dytë ka të bëjë me impaktin pozitiv që duhet të sjellë kufizimi i mandateve të kryetarit të partisë. Duke limituar mandatet në mënyrë që kryetarët e suksesshëm të qeverisin në jo më shumë se dy mandate, ne japim një impakt pozitiv që suportuesit e këtyre përfaqësuesve politikë të jenë realisht njerëzit socialistë dhe progresistë dhe jo njerëz me interesa të ngushta, të cilët tentojnë të krijojnë lidera afatgjatë me mandate të palimituara”, - tha Malaj. Duke u ndalur te gara zgjedhore që do të përfshijë strukturat e PS-së për zgjedhjen e drejtuesve në nivel lokal dhe qendror, çdo nivel, tha se kjo forcë politike ka kapacitete të mjaftueshme konkuruese. Por ai ka vërejtur se nëse rritja e konkurencës keqkuptohet nga kandidatët e ndryshëm, kjo do të ketë pasoja negative për vetë PS-në. “Unë besoj se Partia Socialiste ka kapacitete konkuruese. Rritja e personaliteteve të partisë që bëhen pjesë e konkurimit duhen mirëkuptuar edhe nga ata që vrapojnë për t’u vetëdeklaruar. Nëse rritja e konkurencës keqkuptohet dhe kthehet në një marrëdhënie jokorrekte mes kandidatëve, unë do të mendoja se kjo do të kishte një impakt negativ për të ardhmen e PS-së”, - vijoi ish-ministri i Financave, Malaj. Nga ana tjetër ai ka vlerësuar se mandati i kryetarit të PS-së duhet të kushtëzohet nga rezultatet që kjo parti arrin në ballafaqimet elektorale parlamentare. Nga ana tjetër ia ka vlerësuar se të gjitha propozimet që do të hidhen lidhur me ngushtimin e kompetencave të kryetarit, do të varen nga qëndrimi që do të mbajë kongresi i tetorit. Dy ditë më parë kryesia e PS-së vendosi që t’i propozojë Komitetit të Përgjithshëm Drejtues që të miratojë thirrjen e kongresit të jashtëzakonshëm në tetor, ku do të administrohen emrat e kandidatëve për postin e kryetarit dhe platformat e tyre. Ndërkohë për 40 ditë do të zhvillohet fushata zgjedhore brenda dhe në fund do të votohet për postin e kreut të PS-së, dhe për drejtuesit në të gjitha nivelet e strukturave të partisë në të njëjtën ditë. Anëtari i kryesisë së PS-së, Malaj, është i mendimit se gara për këtë post duhet mirëkuptuar prej të gjithë kandidatëve dhe se konkurrenca nuk duhet të keqkuptohet.
15/09/2005
Krijoni Kontakt