Kështu na grabit AMC.

[Xhuxhumaku]

Kështu na grabit AMC

AMC, kompania me normë fitimi nga më të lartat në Europë. Krahasimi i një fature shqiptare me një amerikane. Megjithëse shumë herë më të varfër se amerikanët, ne detyrohemi të paguajmë shumëfish më tepër për të komunikuar me celular

Rudina Seseri

Të thuash që telefonat celularë janë bërë tashmë ndër miqtë më të afërt të konsumatorëve, nuk është ekzagjerim. Ata na ndjekin kudo, nëpër bare e kafene, në shtëpi e zyra, në udhëtime pune dhe argëtimi. Ne i duam ata, madje krenohemi me modelin më të fundit që kemi shtënë në dorë, por në të njëjtën kohë edhe i urrejmë për posesivitetin dhe kontrollin që kanë ndaj nesh. Me revoltë i mbyllim dhe i flakim mënjanë të lodhur nga thirrjet dhe kostoja e tyre, vetëm për t’i rimarrë disa minuta më vonë, duke pranuar se janë mjete të domosdoshëm. Vërtetë, si mundnim të funksiononim 5 ose 10 vjet më parë, kur fjalori ynë nuk e përfshinte shprehje si “dërgomë sms”, “më bëj zile në cel” apo “a ke numër me 20”?!


Celulari, më lirë në SHBA se në Shqipëri

Kjo marrëdhënie virtuale përfaqëson një eksperiencë të shtrejntë për konsumatorin shqiptar, diçka për të cilën dëgjoj shpesh ankesa, ndoshta dhe trillime. Për të parë nëse kanë ndonjë bazë ankesat mbi koston, mund të bëjmë një krahasim të thjeshtë dhe të limitizuar nga gjerësia statistikore, por domethënës në vlerën krahasuese. Për t’ju përgjigjur pyetjes nëse tarifat në Shqipëri janë më të ekzagjeruara se në vende të tjera, krahasojmë dy fatura telefoni: njëra nga Shqipëria dhe tjetra nga Shtetet e Bashkuara të Amerikës (skema më poshtë). Të dy faturat i përkasin telefonave për përdorim individual dhe kanë një konsum të lartë minutash. Të dy faturat reflektojnë vetëm thirrjet kombëtare, pa roaming (thirrje të marra apo të bëra jashtë territorit kombëtar të kompanisë mobile). Fatura shqiptare i përket njërës prej dy kompanive telefonike në Shqipëri dhe reflekton koston e një numri me “20”, që është relativisht më i lirë për minutë sesa telefonat e parapaguara (me kartë). Megjithëse plani telefonik me kompanitë në SHBA kërkon një kontratë një ose dy vjeçare, kostoja telefonike është shumë më e ulët se në Shqipëri (bisedat individuale me celular në Shqipëri janë 4-5 herë më të madha së ato në SHBA. Kjo llogaritje nuk përfshin minutat pa limit të fundjavave dhe të mbrëmjeve (pas orës 21:00), të cilat janë falas në Amerikë). Ky fakt e rrit shtrenjtësinë krahasuese në Shqipëri rreth 25 për qind më shumë. Për më tepër, kompanitë amerikane të shërbimeve celulare si T-Mobile, Sprint apo Verizon Wireless, ofrojnë aparate celularë të modeleve të fundit, si pjesë e kontratave, me një skonto prej 50 për qind deri në falas.


Sa arkëtojnë kompanitë nga shqiptarët

Kjo shtrenjtësi e tregut shqiptar celular është jashtë çdo llogjike tregu, sidomos për një vend në zhvillim, ku fuqia blerëse është shumë më e vogël se ajo në Perëndim. Ndoshta këto çmime janë të larta pasi janë bërë investime të mëdha dhe kostoja e operimit mund të jetë e lartë, me fitime të tkurura. Është e vërtetë që AMC dhe Vodafone kanë bërë investime të larta për të krijuar rrjetet e tyre telefonike. Konsortiumi i kompanisë norvegjeze, Telenor, dhe asaj greke, Cosmote, fituan kontratën për AMC-në në Shqipëri, me një shumë prej 85.6 milionë dollarë për 85 për qind të interesit në vitin 2000. Për më tepër, Cosmote, që sot është pronari kryesor i AMC-së me 97 për qind të interesit aksionar, parashikoi që investimet totale të AMC-së në Shqipëri do të arrinin shumën 120 milionë dollarë. Në një mënyrë të ngjashme, Vodafone, pas investimeve fillestare për marrjen e liçensës në shumën 38 milionë dollarë, mori një financim prej 85 milionë euro për zgjerimin e mëtejshëm të rrjetit të saj. Sot, në formë kumulative, rrjetet e të dy kompanive mbulojnë më shumë se 80 për qind të Shqipërisë. Nëqoftëse përdorim të dhënat publike të AMC-së (sipas raporteve financiare të kompanisë prindërore, Cosmote, në fund të 2004) si proksi për të dy kompanitë, çdo vit Vodafone dhe AMC shpenzojnë rreth 2 miliardë lekë për aparatet dhe mjetet e mëtejshme të rrjeteve telefonike. Në pamje të parë, këto sasi investimesh mund të justifikojnë çmimet e larta të shërbimeve telefonike. Por, këto janë investime afatgjata: jetëgjatësia e stacioneve bazë, sasive të madhe dhe kullave telefonike shtrihet në dhjetëra vite. Kështu që periudha për të rekuperuar investimin është mëse e mjaftueshme. Dhe për ju të apasionuarit pas financës, ju kujtojmë që jetëgjatësia e amortizimit të rrjeteve të telekomunikacionit që sapo përmendëm është më shumë një mjet financiar, disi fiktiv, për llogaritjen e taksave dhe tatimeve, dhe jo një reflektim i saktë i jetës së rrjeteve funksionuese që është akoma dhe më e gjatë. Për më tepër, të mos harrojmë se as Vodafone dhe as AMC nuk kanë kontribuar në rrjetet tokësore telefonike, të cilat përdoren në transferimin e telefonatave mes celularëve; të dy kompanitë përdorin rrjetin tokësor të Albtelekomit.


AMC, fitim më shumë se “prindi” Cosmote

Ndoshta lexuesit do të thonë se Shqipëria është një treg i vogël me 3.4 milionë banorë, pa patur volumin e domosdoshëm për të mbuluar koston e aktivitetit. Raportet financiare të AMC-së, si operatori telefonik më i madh në Shqipëri, me 60 për qind të tregut, flasin për një realitet krejt ndryshe. Për vitin kalendarik 2004, AMC-ja raportoi 15.5 miliardë lekë si të ardhurat para shpenzimeve, ndërkohë që fitimi pas heqjes së kostos së aktivitetit, marketingut etj, por para pagesës së taksave dhe amortizimit, është 8.9 miliardë lekë. E thënë ndryshe, fitimi në kesh i AMC-së është 57.6 për qind i të ardhuarave fillestare, duke ia kaluar edhe “prindit” të saj, Grupit Cosmote, i cili me gjithë kontribuimin e AMC-së, e ka fitimin 43 për qind të të ardhurave. Akoma më e thjeshtuar, në koston e çdo minuti që ju konsumoni, gati 58 për qind është fitim për AMC-në. Dhe në qoftë se ky fakt në vetvete akoma nuk ju ka shokuar, më lejoni t’ju informojmë që AMC-ja është një ndër tre kompanitë telefonike me fitimet më të larta në të gjithë Europën. Përpara se të nxitojmë dhe t’i kthejmë AMC dhe Vodafone në kuçedra të zeza që abuzojnë konsumatorin, duhet të kemi parasysh se këto janë çmime që këtyre kompanive iu mundësohen nga vetë struktura e tregut shqiptar telefonik. Në fund të ditës, këto korporata i kanë aktivitetet e tyre me qëllime fitimi financiar dhe nëse qeveria shqiptare dhe trupat rregullator të telekomit nuk e liberalizojnë tregun, duke ju shitur liçensa firmave të tjera, rezultati mbi konsumatorët do të vazhdojë të jetë një kosto e lartë, i vetmi rezultat i mundshëm nën rrethanat e një duopoli.


Zgjidhja, liberalizimi i tregut

Një liberalizim më i madh është i nevojshëm jo vetëm për adoptimin e mëtejshëm të telefonave celuarë, sot vetëm rreth 1,2 milionë shqiptarë i përdorin telefonët celularë, por edhe për mundësimin e hyrjes së teknologjive të reja telefonike në Shqipëri. Në një kohë kur në Perëndim telefoni celuar po shkrihet në një me kompjuterat, duke u përdorur si mjet primar për dërgimin e e-maileve dhe kërkimeve në internet, tregu shqiptar vazhdon të jetë i limitizuar vetëm tek komunikimi celular i zërit dhe sms, pa asnjë lloj diskutimi për transferimin e të dhënave mes konsumatorëve apo hyrje të teknologjive superiore si Ëi-MAX etj. Prandaj për ju konsumatorë që frustoheni nga marrëdhënia dashuri-urrejtje që keni me celularin tuaj, sidomos kur shihni faturën në fund të muajit, ju këshillojmë të insistoni në alternativa të reja konkurence për tregun shqiptar. Vetëm kështu do të mund të kemi shërbime më të larta me kosto më të ulët dhe teknologji më të zhvilluar.



BOX

Biografia

Cila është autorja


Rudina Seseri është Menaxhere në Microsoft Corp. Ajo është përgjegjëse për investimet si dhe blerjet e shkrirjet e kompanive të softëare-t për Microsoft. Përpara Microsoft-it, Seseri ishte bankiere investitore për CSFB dhe Goldman Sachs, përgjegjëse për krijimin dhe hedhjen në bursë të aksioneve për kompanitë e teknologjisë, me specializim në gjysëmpërcjellsa dhe mjetet e telekomunikacionit. Seseri i përfundoi studimet e saj të larta me medalje të artë në Wellesley College, ku studioi dy degë, Ekonomi dhe Marrëdhënie Ndërkombëtare. Ajo i kreu studimet pasuniversitare dhe masterin në Harvard Business School, ku u specializua për financë dhe strategjitë në biznes.

http://www.abc.com.al/

[Xhuxhumaku]

AMC fiton 20 milionë euro neto për 6 muaj

Kompania shqiptare e telefgonisë celulare, pronë e Cosmote e Greqisë, raporton të ardhurat e gjashtë mujorit në 64.1 milionë euro. Fitimi rritet me 25 për qind

Kompania e telefonisë celulare AMC ka publikuar të dhënat financiare të gjysmës së parë të vitit 2005 ku rezulton se ardhurat u rritën me 15,6 %, duke arritur në 64,1 milionë euro. Numri i klientëve u rrit në 730 mijë veta nga 639 mijë që ishte në dhjetor të vitit të kaluar, pra me një rritje prej 14,2% vetëm në gjashtë muaj. Shpenzimet mesatare të klientëve shqiptarë të AMC-së në muaj qenë rreth 15 euro. AMC-ja ka njohur gjatë këtyre muajve një përmirësim të dukshëm të normës së fitimit neto. Fitimi neto u rrit në 31,2% nga 28,8% që ishte në gjashtëmujorin e parë 2004. Në përmirësim ishte edhe norma e fitimit para interesave, taksave, zhvlerësimit dhe amortizimit (EBITDA). Ky tregues arriti në 59,6% të të ardhurave. Edhe në gjashtëmujorin e parë të këtij viti rritja e të ardhurave të AMC-së u favorizua nga forcimi i lekut, ndonëse në masë më të ulët se në vitin 2004. Të ardhurat në lekë të AMC-së u rritën me 12,1%, por për shkak të forcimit të lekut kundrejt euros të ardhurat në euro u rritën me 15,6%. Të ardhurat e AMC-së ishin sa 8,1% e të ardhurave të Cosmote, ndërsa fitimi i saj neto ishte sa 12,6% e fitimit të Cosmote. Shqiptarët përbëjnë rreth 17% të klientëve të Cosmote. Norma e fitimit neto të AMC-së ishte shumë më e lartë se ajo e Cosmote apo e kompanive të tjera të kontrolluara nga Cosmote në Bullgari dhe Maqedoni. Norma e fitimit neto të Globul, kompanisë bullgare të telefonisë celulare, e kontrolluar nga Cosmote, gjatë gjashtëmujorit të parë ishte vetëm 5,5%, ndërsa Cosmote në Greqi fitimin neto e pati 20,4%. Gjatë gjashtëmujorit të parë AMC-ja pati shpenzime kapitale prej 4,2 milionë eurosh. Sipas të dhënave që raportoi Cosmote për faqen e internetit reporter.gr rezulton se AMC-ja ka vazhduar të njohë rritje të fortë në kohën telefonike të përdorur, si dhe në të ardhurat mujore nga klientët. Të ardhurat për klient u rritën me 19,8 për qind gjatë kësaj periudhe, ndërkohë që penetrimi në treg po i afrohet kulmit, dhe përdorimi po rritet. Edhe eficenca e kostove-bazë në AMC po përmirësohet. Gjatë gjysmës së parë të këtij viti shpenzimet-bazë u rritën me 6,9%, por në tremujorin e dytë u rrit me vetëm 0,5%”.

REPORTER.GR

[Albo]

E Shtune, 24 Shkurt 2007

"Albania Mobile Comunication" realizoi nje fitim neto prej 49.9 milione eurosh per vitin 2006. Rezultatin financiar te vitit qe shkoi e bene te ditur dje per mediat burimet zyrtare te kompanise. Nje vit me pare ky fitim ishte 41.5 milione euro. Sipas ketyre rezultateve, buxheti i shtetit duhet te arketoje shumen prej 7 milione eurosh, per shkak se eshte aksioner ne 14 per qind te aksioneve te AMC-se. Te ardhurat e AMC-se gjate vitit 2006 ishin 9.7 per qind me te larta se te nje viti me pare, pra 151 milione euro, si pasoje e nje rritjeje prej 26,7 per qind te numrit te abonenteve. Ne krahasim me vitin e kaluar, fitimi neto u rrit me 20.3 per qind. Fitimi neto arrin 33 per qind ne krahasim me 30.1 per qind te nje viti me pare, bene te ditur burimet e kompanise. Numri total i abonenteve arriti 990 279. Ndersa "AMOU" gjate kesaj periudhe arriti 60 minuta krahasuar, me 67 minuta te nje vitit me pare. Drejtori Ekzekutiv i AMC-Se, zoti Stefanos Oktapodas tha se, "produktet e reja dhe paketat gjitheperfshirese na cuan drejt suksesit te konsiderueshem ne vitin e kaluar, sic e vertetojne te dhenat financiare dhe shtimi i abonenteve". Ai tha se AMC-ja, permes hedhjes ne treg te produkteve e sherbimeve te reja dhe uljes se tarifave, ka mbajtur premtimet e saj, duke e bere telefonine celulare te prekshme gjithnje e me shume per qytetaret.

Korrieri

[Albo]

Klientet e AMC, 60 minuta bisede ne muaj

E Shtune, 24 Shkurt 2007

Shqiptaret kane nisur te limitojne kohen duke folur ne celular. Sipas te dhenave qe publikoi dje AMC-ja, mesatarja qe cdo klient i AMC-se ka folur ne telefon, eshte 60 minuta ne muaj, nga 67 minuta qe ishte ky tregues gjate vitit 2005. E ndersa koha bisedore eshte ulur, po keshtu edhe kompania ka ulur edhe tarifat, fitimi nga ana tjeter ka shenuar nje rritje prej 20 per qindesh. Gjithashtu, shpenzimet mujore per telefona arrijne ne 15 euro ne muaj.

Korrieri

[Qerim]

Kështu na grabit AMC

Gabim ! AMC-ja eshte kompania qe ka bere me shume dobi per ekonomine shqiptare.Ne ato momente kur investitoret e huaj nuk guxonin te hapnin as nje kioske ne Shqiperi ,AMC-ja kuturisi te hedhe ne tregun shqiptar miliona dollare, te marre ne dore nje kompani pothuajse te shkatarruar dhe inekzistente dhe ta sjelle ate ne standartet evropiane.Fitimi i pare i AMC-se arriti te ndjelle edhe kompanine e fuqishme universale engleze Vodafone ,qe te investoje ne Shiqeri.