Policia pranë identifikimit. UMNIK-u merr të dhënat, pritet përgjigjia pas verifikimeve
"Grabitësit e bankës, kosovarë"
Roja i Bankës Amerikane i njohu nga dialekti
--------------------------------------------------------------------------------
Gerti Xhaja
TIRANE
Mbërrijnë në Kosovë hetimet për gjetjen e autorëve të grabitjes së 50 mijë dollarëve në filialin e Bankës Amerikane, pranë stacionit të trenit në Tiranë, mesditën e së shtunës. Pesë ditë pas ngjarjes, hetuesit kanë arritur në përfundimin që dy prej personave të maskuar me syze dhe kapele që hynë në bankë vetëm 13 minuta para se të mbyllej, janë kosovarë, profesionistë të grabitjeve. Hetuesit kanë kërkuar informacione nga Pikat e Kalimit Kufitar, për listat e shtetasve kosovarë dhe maqedonas që kanë hyrë, apo dalë nga Shqipëria këto ditë. Listat do të verifikohen edhe nga policia e UMNIK-ut për të identifikuar personat që dyshohen si kontigjentë ngjarjesh të tilla.
Dyshimet
E ngritur fillimisht vetëm si një hipotezë, pista e autorëve të ardhur nga Kosova, duket se është më e besueshmja për grupin e punës për zbardhjen e ngjarjes. Gjuha e komunikimit prej grabitësve, është një nga elementët që mbajnë këtë hipotezë. Punonjësi i sigurisë, me origjinë nga Tropoja, duket se nuk e ka patur të vështirë të perceptojë të folurën e tyre, të njëjtë me atë të kosovarëve, apo shqiptarëve të Maqedonisë. Vetëm pak ditë më parë, tabelat me gjurmët e gjetura u dërguan në laboratorët e kriminalistikës në Kosovë dhe Maqedoni, për krahasim. Në bazë të pamjeve në kasetat e sigurisë, investiguesit kanë realizuar identikitin e personave që hynë në bankë. Ndërkohë vazhdon këqyrja e kasetave që kanë regjistruar hyrjet e ditëve të fundit në ambientet e filialit. Grupi i hetimit i ka kërkuar Bankës Amerikane edhe listat e klientëve që kanë kryer transferta individuale, apo edhe kompani nga Kosova për në Shqipëri, ose anasjelltas. Banka ka një marrëveshje për realizimin e këtyre veprimeve me Bankën Ekonomike Sh. A. Prishtinë dhe mendohet se autorët e kanë shfrytëzuar këtë fakt, duke ardhur fillimisht si klientë.
Bashkëpunëtorët
Hetuesit kanë vazhduar edhe gjatë ditës së djeshme të kryejnë verifikimet për punonjëset e filialit të bankës. Sipas burimeve, saktësia në veprimet e autorëve dhe njohuritë e sakta për vendet sekrete, kanë implikuar edhe punonjëset si bashkëpunëtore në grabitje. Autorët kanë ditur edhe termat dhe kodet që përdoren vetëm nga Banka Amerikane. Çelësi "vault" (volt), është emri i koduar i çelësit të thesarit, i cili ka emër të ndryshëm në secilën bankë. Veç kësaj, autorët kanë qenë të saktë në veprimet e tyre, duke bllokuar fillimisht punonjësin e sigurisë, të cilit i njihnin pajisjet dhe sendet që kishte me vete, në rast se sulmonte. Duke ditur edhe vendet e butonave të sigurisë, ata kanë bllokuar punonjëset t'i aktivizojnë, ndërsa për të dalë, kanë përdorur derën sekrete të bankës.
Krijoni Kontakt