Tifozët e FC Real Madridit...#5

[Davius]

Inter: Morati në Madrid për Ronaldon

Ditën e sotme, padroni i Interit, Masimo Morati, do të fluturojë drejt Madridit për të takuar presidentin e Realit të Madridit, Florentino Perez. Sipas asaj që deklarojnë burime madrilene, në tavolinë do të jetë një operacion i hatashëm merkatoje: Morati do të kërkojë të sjellë Ronaldon dhe Samuelin në Milano dhe si shkëmbim Adriano do të shkojë te merenguesit. Në këtë tratativë mund të hyjë edhe shkëmbimi kokë më kokë i Edgar Davidsit dhe Luis Figos.
E pabesueshme? Mbase. Ose mbase një manovër (e disata) shqetësimi që vjen nga Spanja për të detyruar Masimo Moratin për të lëshuar pe mbi çështjen "Adriano", lojtar për të cilin puna nga ana e madrilenëve ka disa muaj që vazhdon. Fakti është se udhëtimi në Spanjë i padronit zikaltër bëhet i ditur nga burime pranë presidencës së Realit, diçka më shumë sesa një takim për të zgjidhur çështjet e Samuelit dhe të Figos.

Skuadra e Luksemburgos është aktualisht në turne, por Florentino Perez ka qëndruar në kryeqytet.
Dëshira e Ronaldos për t'u rikthyer në Milano tashmë është fare e qartë. Të shumta sinjalizimet në këtë sens dhe deklaratat e Solarit në ditët e mëparshme ("Roni më ka rrëfyer se ëndërron të rikthehet") kanë qenë vetëm qershia mbi tortë. Ky operacion parashikon lëshimin e Ronit dhe të Samuelit në këmbim të Perandorit. Mund të ketë edhe ndonjë grusht parash në favor të Interit. Por pazari mund të shtrihet edhe më tej, duke bërë të mundur një tjetër shkëmbim, ose e thënë më hapur ai mes Luis Figos dhe Edgar Davidsit, të dy lojtarë që mezi presin të ndryshojnë ambient.

Sigurisht, rikthimi i Fenomenit te Interi mund të sjellë edhe probleme të shumta, sidomos nga këndvështrimi interist: shumë tifozë nuk e kanë harruar kurrë tradhëtinë e tre viteve më parë dhe do ta prisnin me dhëmbë të shtrënguar këtë rikthim. Pastaj Adriano është për momentin qëndërsulmuesi më i fortë i botës dhe është më i ri sesa Roni. Epo atëherë? Atëherë Interi mund të luajë gjithçka tek e tashmja për të fituar menjëherë: operacioni, i parë në planin afatgjatë është i pavlefshëm, në atë afatshkurtër mund të mos jetë i pavlefshëm, me një Roni që është ende në gjëndje për të bërë diferencën dhe një Samuel për të vënë në vijë mbrojtjen. Fantazi futbolli? Mbase...

[Davius]

Samuel, krenaria ajo që e pengon

Mosmarrëveshjet ekonomike mes Interit dhe Realit të Madridit nuk janë nyja e vetme për t'u zgjidhur për kalimin e Valter Samuelit në klubin e Moratit. Në bazë të ngadalësimit të lëvizjes qenka edhe një "motiv krenarie". Mbrojtësi argjentinas, në sezonin e shkuar, ka refuzuar një ofertë të mirë nga Çelsi për të qëndruar në Spanjë dhe nuk kërkon të largohet as tani, pas një sezoni zhgënjyes.

Populli argjentinas dallohet për një krenari kombëtare dhe Valter Samuel nuk bën përjashtim nga kjo gjë. Kalimi te Reali në verën e shkuar, për 25 milionë euro, ka përfaqësuar për mbrojtësin një pikë të lartë në karrierën e tij, duke qenë "kurorëzimi" i ëndrrës për të luajtur në klubin më të mirë të botës. Për t'u lidhur me "merengesët", lojtari kishte refuzuar një ofertë të mirë nga Çelsi i Abramoviçit.

Por në fushë gjërat nuk shkuan sipas parashikimit për të. Ish-romanisti ka paguar më shumë nga të gjithë sezonin negativ të skuadrës së tij, duke mos qenë thuajse asnjëherë protagonist para publikut dhe trajnerit Luksemburgo. Tifozët e Realit kanë mundur të shohin vetëm fotokopjen e shëmtuar të argjentinasit kur luante te Roma, me të cilën fitoi edhe një titull nën drejtimin e Fabio Kapelos. Pikërisht për këtë motiv nuk kërkon të largohet nga Madridi, për të mos u kujtuar nga tifozët si një "blof" i madh që kushtoi miliona euro. Krenari, që nuk ka të bëjë aspak me famën dhe paratë.

Megjithatë, Reali duket se ka bërë zgjedhje të tjera, duke pasur gati një superofertë për 20-vjeçarin e Seviljes, Serxhio Ramos. Nëse do ta blinte këtë të fundit, pa dyshim Samueli do të zbarkonte në Milano, ku nuk do ta kishte problem të përshtatej, duke parë komunitetin argjentinas në skuadër (Zaneti, Solari, Kambiaso, Kruz, Veron e Kili Gonzales). Mjedisi zikaltër do të ishte rasti për t'u rinisur dhe treguar skeptikëve që "Muri" është gjithnjë në këmbë dhe më i blinduar se asnjëherë. Përsa i përket Figos, besohet se lëvizja e portugezit mund të mbyllet maksimumi nesër, me një kontratë 2-vjeçare.

[Davius]

Helgera: Reali duhet të investojë edhe te spanjollët

Ekipi i Realit të Madridit dallohet për cilësinë e lojtarëve që ka në ekip. Por shumica e tyre janë të huaj. Kjo tregon se klubi ka investuar më shumë te lojtarët me kombësi tjetër, sesa te lojtarët vendës. Ivan Helgera e ka komentuar këtë situatë të klubit të tij. "Është e vërtetë që klubi i Realit ka shumë lojtarë të huaj. Kjo nuk do të thotë se Spanja nuk nxjerr lojtarë të zotë, por klubi madrilen ka mbledhur yje të shteteve të ndryshme. Jam shumë i lumtur që jam lojtar i këtij ekipi, por gjithashtu është edhe e vështirë," - tha ai. Spanjolli është një nga të paktët lojtar vendës në ekip dhe mendon se kjo gjë i vë shumë nën presion lojtarët spanjollë te Reali. Ai gjendet me ekipin e tij në SHBA dhe mendon se klubi po arrin shumë sukses në Amerikë. "Jam shumë i kënaqur nga mikpritja që kemi gjetur këtu. Kjo tregon se lojtarët e Realit gëzojnë shumë popullaritet në botë," - tha ai.

Bashkë me Helgerën, vetëm katër ishin spanjollët në formacionin e parë që u përball me Çivasin në Çikago. "Unë e përmenda dhe më parë që nuk ka shumë spanjollë në formacionin e ekipit. Por të luash me Realin, fiton kombëtaren e Spanjës. Të jesh në 11-shen e parë të ekipit, do të thotë se je lojtar me shumë cilësi. Gjithsesi, mendoj se ekipi duhet të investojë edhe te lojtarët vendës. Kjo gjë e rrit edhe më shumë harmoninë në grup," - tha spanjolli. Helgera, i cili ka luajtur më parë si mesfushor, është përdorur si mbrojtës në sezonin e kaluar. "Unë mund të luaj edhe mbrojtës. Nuk e kam problem, mjafton që unë të luaj me Realin," - përfundoi ai.

[Davius]

Butragenjo: Reali është gati për të fituar

Zv.presidenti i Realit të Madridit, Emilio Butragenjo, është i kënaqur nga ekipi i tij. "Reali është një ekip me karakter dhe po gëzon një formë të mirë. Pasi pashë ndeshjen me Çivasin, vura re se lojtarët janë të motivuar për të fituar në sezonin e ri," - tha ai. Ekipi spanjoll nuk ka bërë shumë blerje këtë sezon, por Butragenjo mendon se dy lojtarët e rinj janë të përshtatshëm për lojën e ekipit.

"Pablo Garsia dhe Karlos Diogo janë përshtatur menjëherë me lojën e ekipit. Janë lojtarë me shumë cilësi dhe do të japin shumë për Realin," - vazhdoi ai. Zv.presidenti madrilen mendon se Reali është gati për të qenë pretendent në të gjitha kompeticionet e sezonit të ri. "Lojtarët janë gati për të fituar. Janë të gjithë profesionistë dhe lojtarë me shumë cilësi. Ata kanë rënë dakord me synimet që ka klubi dhe janë gati për të fituar," - tha ai.

[Davius]

Bekham: Ouen, mos ik nga Reali

Devid Bekham ka deklaruar se dëshiron që Oueni të qëndrojë akoma në Madrid. Sulmuesi anglez është shprehur se do të largohej nga Reali, nëse nuk do të luante rregullisht, por mesfushori anglez mendon se bashkatdhetari i tij ndihet mirë në Madrid. "Oueni është një lojtar i madh dhe ndihet i lumtur këtu. Dëshiroj që të mos largohet nga Madridi, pasi është një sulmues i shkëlqyer dhe një shok shumë i mirë," - tha Bekhami. Klube si Mançesteri apo Arsenali kanë shfaqur interes për lojtarin.


Santosi rihap bisedimet për Robinjon

Telenovela Robinjo vazhdon. Presidenti i Santosit duket se ka filluar sërish bisedimet me drejtuesit e Realit, duke qenë se dhe marrëdheniet e klubit me lojtarin po vijnë duke u përkeqësuar. Klubi brazilian kërkon 27 milionë euro për lojtarin (30 milionë dollarë), ndërsa klubi madrilen është i gatshëm të ofrojë deri në 25 milionë euro.

[Davius]

Morati: Këmbimi Adriano-Ronaldo, fantazi

Nga burime pranë presidencës së Real Madridit thuhej se dje do të kishte qenë në program një takim mes kreut të "merengesëve", Florentino Perez, dhe atij të Interit, Masimo Morati. Dy numrat një të dy klubeve mendohet se do të takohen për të konkretizuar një transferim të bujshëm: Adriano te Reali, Ronaldo dhe Samueli tek Interi. Por vetë pronari zikaltër përgënjeshtroi gjithçka. "Unë në Madrid? S'ma merr mendja se do të shkoj. Këmbimi Adriano Ronaldo është vetëm një fantazi merkatoje".

[Davius]

Saki: Reali do t'i arrijë synimet

Arrigo Saki ka marrë përsipër blerjet e Realit të Madridit dhe mendon se ekipi do të arrijë të fitojë trofe në sezonin e ri. "Përshtypja që kam, është shumë e mirë. Klubi është fantastik, kampionati është fantastik dhe emri që ka Reali i Madridit mendoj se është fantastik. Në krahasim me Milanin, Reali është klubi më i rëndësishëm dhe më i famshëm në botë," - tha ai.

- Si është klubi në këndvështrimin tuaj?
- Për disa gjëra jemi më të mirët në botë, ndërsa në disa të tjera duhet të përmirësohemi akoma.

- Jeni i kënaqur në klubin madrilen?
- Po, kam një marrëdhënie të shkëlqyer me të gjithë botën. Për mua është shumë i rëndësishëm besimi i presidentit.

- E keni fituar besimin e Florentino Perezit?
- Kudo që kam shkuar, kam pasur marrëdhënie të mira me presidentët. Edhe te Reali po ndodh e njëjta gjë.

- Thuhet se është e vështirë të punosh me Perezin.
- Ai është një person me shumë personalitet, si gjithë njerëzit me influencë. E mira është që ai e njeh autokritikën. Jam shumë i lumtur që punoj me njerëz të tillë.

- Si ju duket ekipi aktual?
- Shumë i mirë. Sekreti i skuadrës sonë është se lojtarët duhet të luajnë në pozicionin e tyre ideal, në mënyrë që të japin maksimumin në fushë. Ky vit është tepër i rëndësishëm për klubin, duke qenë se Reali nuk ka fituar asgjë në dy vitet e fundit.

- Keni besim te lojtarët?
- Po, kam shumë besim. Janë lojtarë profesionistë dhe kam vënë re që ata i kanë premtuar vetes se duhet të fitojnë trofe patjetër këtë vit. Besimi te lojtarët është shumë i rëndësishëm.

- Çfarë mund të na thoni për çështjen "Robinjo"?
- Ai është një lojtar me shumë talent. Është e vërtetë që jemi interesuar për të, por asgjë nuk ka ndodhur deri tani. Të shohim në të ardhmen.

- Trajneri i ka vënë një detyrë të vështirë Zidanes. Si mendoni?
- Në fushën e lojës, Zidane nuk ka asnjë vështirësi. Ai do të luajë në pozicionin ideal dhe së bashku me të tjerët do ta çojë Realin drejt suksesit.

- Ç'mund të na thoni për protestën e Gutit?
- Guti është një lojtar shumë i mirë. Ai kërkon të luajë. Pozicioni i tij ideal është pas dy sulmuesve, por aty mund të luajë Zidane dhe ndonjëherë Raul. Në sulm janë lojtarë si Ronaldo dhe Ouen. Për të nuk ka shumë vend në formacion, por klubi ka shumë nevojë për ndihmën e tij. Gjithsesi, ne do ta shikojmë më me vëmendje situatën e tij.

- Do ta rinovoni kontratën me Kasiljasin dhe Helgerën?
- Ne kemi një ide dhe mendoj se nuk është problem për ta realizuar.
Arrigo Saki, i mistershëm si gjithmonë, ka deklaruar se Reali është në një formë të mirë për sezonin tjetër dhe me ndonjë blerje të re (Robinjo), skuadra do të kompletohej

[Davius]

Ronaldo: Nuk do të kundërshtoj nëse më shesin

Ronaldo ka komentuar zërat e merkatos që e lidhin me disa klube europiane. Madje edhe për disa oferta të Realit, ku përfshihej edhe ai. "Unë nuk kam asgjë për të vendosur. Jam një lojtar i Realit të Madridit dhe jam shumë mirë dhe i lumtur. Nëse klubi vendos të më shesë apo të më ndërrojë, unë nuk do të kundërshtoj. Më pret një kampionat spektakolar.

Dua të arrij maksimumin tim fizik dhe jam shumë i motivuar," - ka thënë braziliani. Me këto deklarata, lojtari kërkon të fshehë disa synime shumë të qarta. Disa zëra merkatoje deklaruan se Reali kishte ofruar 50 milionë euro plus Ronaldon, për Adrianon e Interit, dhe kjo gjë nuk i erdhi mirë brazilianit. Gjithsesi, presidenti i klubit italian, Masiomo Morati, e përgënjeshtroi një gjë të tillë.

Gjithsesi, ai nuk e ka fshehur asnjëherë që i pëlqejnë cilësitë e Ronaldos. Madje edhe vetë Ronaldo do të kthehej me dëshirë tek Interi. Klubi i vetëm që është interesuar zyrtarisht për lojtarin, ka qenë Milani. Por ekipi italian nuk ka më atë interesin e mëparshëm, duke qenë se e ka të mbipopulluar sulmin, pas ardhjes së Vierit dhe Xhilardinos. Gjithsesi, merkatoja është e paparashikueshme. Edhe presidenti Florentino Perez e komentoi çështjen e Ronaldos:

"Braziliani është një nga sulmuesit më të mirë në botë. Ai hyn në planet e klubit dhe do të jetë i rëndësishëm në arritjen e synimeve të Realit." Kjo do të thotë që ai i përgënjeshtron zërat e merkatos për momentin. Gjithsesi, Ronaldo do të pranonte një largim nga klubi, edhe pse ndihet mirë aty. Nëse presidenti i Realit, Florentino Perez, ka treguar interes për disa lojtarë, ai ka thënë për Ronaldon: "Të jap 50 milionë euro dhe Ronaldon për Adrianon? Ronaldon nuk do ta ndërroja me asgjë në botë."

[Davius]

Futbollistet e Real MADRIDIT arijne ne Kine. Dhe ne kete menyre priten nga kinezet.

[Davius]

Zizu.............