Altin Dauti fshihej në Londër, nis procesi gjyqësor për ta
ekstraduar në Bruksel
Angli, kapet anëtari i bandës së Selitës
Miku i Çim Xhabaftit kërkohej për vrasje në Belgjikë
Nga Londra, Muhamed Veliu
Një eksponent i njohur i krimit shqiptar, i kërkuar nga drejtësia
belge, është prangosur në Londër. Pas disa muaj fshehje në
kryeqytetin britanik, Altin Dauti, ish-pjestar i bandës së Shkëlqim
(Çim) Xhabaftit në Tiranë, është arrestuar të martën nga skuadra e
ekstradimeve pranë policisë kriminale "Scotland Yard", për llogari
të homologëve belg, që e kishte shpallur person në kërkim
ndërkombëtar. Sipas prokurorisë së Brukselit, 30-vjeçari Dauti
kërkohej për një vrasje të ndodhur në vitin 1999. Nuk dihen ende
motivet e saj, por nga dosja e mbërritur në Londër mësohet se Dauti
është përfshirë në vrasjen e një shqiptari. Arrestimi i tij shënon
rastin e tretë në një periudhë kohore disa mujore, që një "wanted"
shqiptar prangoset dhe nisin proceset e ekstradimit.
Fshehja
Sikurse shumë "kolegë" të tij "wanted" të botës së krimit që fshihen
në Londër edhe Altin Dauti mendonte se me ardhjen në këtë kryeqytet
do t'i shpëtonte një mandanti ndërkombëtar arresti. Por, një
informacion i saktë për vendndodhjen e tij, marrë nga Belgjika, ka
vënë në lëvizje policinë londineze, e cila ka bërë ndalimin dhe më
pas identifikimin e Dautit si një person me llogari të hapura me
drejtësinë belge. Sipas të dhënave të para që dalin nga skuadra e
ekstradimeve në Londër, mësohet se Dauti kishte kohë që jetonte në
Londër ilegalisht, i ndihmuar nga pjesëtarë të një bande kriminale
në Tiranë gjatë viteve `90-`97, e cila drejtohej nga disa vëllezër
me mbiemrin Xhabafti. Pjesëtarët e kësaj bande, të cilët janë
përgjegjës për disa vrasje në kryeqytet, ka vite që jetojnë në
Londër si azilantë, nën identitete të rreme, për t'i shpëtuar
arrestimeve. "E gjithë banda e Tiranës në emigrim, sikurse grupe të
tjera kriminale janë tashmë të identifikuar për policinë kriminale
Scotland Yard", shprehen burime pranë pallatit të qeltë shumë
katësh, selia e antikrimit londinez.
Ekstradimi
Nga të dhënat që përmban dosja e ekstradimit thuhet se, Dauti ka
qënë i arrestuar me akuzat për vrasje edhe dy herë të tjera në
Belgjikë. Në të dyja rastet, për mungesë dëshmitarësh e provash, ai
ka dalë i lirë nga salla e gjyqit, duke iu pushuar çështjet.
Ndërkohë mandati i arrestimit ndërkombëtarë është lëshuar për
vrasjen e vitit 1999. Altin Dauti është ulur dje po në të njëjtën
gjykatë, "Bow Street Magistrate Court", në të cilën janë ulur edhe
Leonardo Metani i kërkuar për t'u ekstraduar nga drejtësia italiane
për 15 akuza, sëbashku me Gëzim Çalën i kërkuar nga drejtësia
shqiptare për vrasje dhe tentativë vrasje, për të cilat është dënuar
me 25 vjet burg në mungesë. Dauti e çon në tre numrin e shqiptarëve
që priten të ekstradohen nga Anglia muajt e ardhshëm. Procesi i
ekstradimit ka kushtuar disa mijëra paund, pasi vetë shteti anglez
duhet të paguajë shpenzimet e avokatëve të të kapurve shqiptarë,
pasi ata nuk kanë mundësi financiare.
Si u vra Xhabafti për një makinë
I forti i Selitës (lagje e Tiranës), Shkëlqim Xhabafti është vrarë
në fillim të vitit 1998, nga rivalët e tij të bandës së Yzberishtit
dhe konkretisht nga krerët e saj, vëllezrit Avdillari. Këta i kishin
grabitur makinën një biznesmeni grek dhe ky i fundit i kërkon ndihmë
Xhabaftit. Kapoja i Selitës, sëbashku me një inspektor rendi ka
shkuar te rivalët, për të biseduar se si mund t'ia kthenin makinën
grekut. Por, në bisedë e sipër, gjakrat janë nxehur me vëllezrit
Nazmi e Ilir Avdillari. Këta të fundit, janë akuzuar se, më 27
janar '98 kanë vrarë biznesmenin italian Stefano Rossi, pronari i
fabrikës "Niki Shoe". Rossi sapo kishte tërhequr 30 milionë lireta
nga Banka Italo Shqiptare dhe është ekzekutuar 100 metër larg
fabrikës.
Përgjigju Duke Cituar
)
Pfffff
Krijoni Kontakt