Në zonën 98 ku kandidon Peçi, posterat janë në dy gjuhë. Po kështu edhe kandidatët e zonës 100, Miço dhe Çipa
Spiro Peçi postera elektoralë në greqisht
Kandidatët për deputetë të partive politike në Jug të vendit i kanë shkruar sloganet e tyre në gjuhën greke. Kjo është vënë re në zonën e kandidatit të OMONIA-s, mbështetur nga PBDNJ-ja, Spiro Peçi, i cili vazhdon të jetë Avokat i Shtetit. Në Himarë dhe Delvinë, ku ai kandidon, bien në sy posterat e tij, me sloganin “Gjithnjë me ju, gjithnjë për ju”, të shkruar në gjuhën greke. Një gjë e tillë ndodh edhe në zonën nr. 100, ku kandidon edhe kandidati për deputet i PS-së, Stefan Çipa, dhe rivali i tij, po i mbështetur nga PBDNJ-ja, Thoma Miço, të cilët në posterat e tyre kanë shkruar mesazhe greqisht për elektoratin e zonës. Kjo, sipas kandidatëve, është bërë për faktin se banorët e këtyre zonave janë në shumicë minoritarë, gjë që në fakt nuk është shumë e pranueshme për pjesën tjetër të banorëve, të cilët janë me kombësi shqiptare. Një shembull i tillë është Himara, e cila në fakt, ka një popullsi heterogjene e gjithmonë ka qenë në qendër të vëmendjes në fushata zgjedhore për përdorimin e gjuhës greke si në fjalimet zgjedhore, por sidomos edhe në parrullat që shkruhen nëpër mure. Në një intervistë të disa ditëve më parë, kandidati Spiro Peçi që konkurron në Himarë e përshkroi popullsinë e kësaj zone si “realisht shumë heterogjene dhe me një shtrirje të gjerë, që nis me Bashkinë e Himarës, Komunën e Vergoit, Komunën e Finiqit dhe qytetin e Delvinës. Nga shtrirja gjeografike shihet që është një zonë e përhapur, por edhe shumë diverse në vështrim të karakteristikave dhe psikologjive, traditave dhe besimeve të ndryshme”. Ai ka thënë se “jam i kënaqur të vërej se edhe në labërinë e zonës së Rrëzomës kam qenë i mirëpritur dhe i mirëkuptuar njësoj si në minoritet apo në Delvinë, ku ndihem vendës. Për shkak të lidhjeve të forta e të sinqerta shoqërore e miqësore, të vjetra e të reja, që kam pasur e kam shtuar me njerëz nga të gjitha fshatrat dhe qytetet e kësaj zone, kudo jam pritur ngrohtë dhe zgjedhësit më kanë dhënë kënaqësinë e komunikimit dhe mundësinë e bashkëbisedimit me ta si me njeriun e tyre”. Duke parë larmishmërinë e zonës, Peçi ka parapëlqyer që të respektojë minoritarët e tij, duke komunikuar me ta në gjuhën greke. Vetë kryeministri Fatos Nano ka komunikuar dy ditë më parë me elektoratin në Dropull pak në gjuhën greke. Ndërsa nga ana tjetër, edhe PNUD-i ka shpërndarë fletëpalosje në të dy gjuhët; në shqip, dhe greqisht. Kohë më parë në nisje të fushatës elektorale, kryetari i PBDNJ-së, Vangjel Dule, kërkoi që edhe fletët e votimit për minoritarët të jenë në gjuhën greke, ashtu siç janë edhe në gjuhën shqipe, për të lehtësuar leximin e pjesës më të vjetër të këtyre minoritarëve, të cilët në disa raste nuk dinë të lexojnë shqip.
****
Krijoni Kontakt