Close
Duke shfaqur rezultatin -19 deri 0 prej 11
  1. #1
    i/e regjistruar Maska e Brari
    Anëtarësuar
    23-04-2002
    Postime
    18,826

    Atentati i Avni Rustemit ndaj Esat Pashë Toptanit në Paris dhe hakëmarrja ndaj tij

    Polemika

    Shkrimtari dhe komentatori i njohur sportiv, shkruan rreth disa shtrembërimeve të figurës së atentatorit të Esat Pashës në librin “Kujtime” të Eqrem bej Vlorës

    "Përse ka gabuar beu i Vlorës, kur e quan Avni Rustemin karagjoz dhe kriminel"


    Skifter Këlliçi

    Botimi i librit “Kujtime”, në dy vëllime (1885-1912 dhe 1912-1925), shkruar nga Eqrem bej Vlora, “pinjolli i një prej familjeve më të mëdha të Shqipërisë e të Perandorisë Otomane, kushëri i afërt i Ismail Qemalit, dëshmitar-protagonist i disa dekadave tepër të rëndësishme të historisë së Shqipërisë, një nga njerëzit më të kulturuar të kohës”, siç shkruan në një pasthënie të shkurtër publicisti i njohur Pirro Misha, ka ngjallur interesim të madh te lexuesi. Fakte, personazhe, ngjarje të përjetuara nga vetë autori, të shoqëruara dhe me dokumentime arkivore për një periudhë kaq të gjatë, mbushin boshësi që nuk i gjen në libra historike, çka ia rrisin edhe me shumë vlerat kësaj vepre. Pa i vënë qëllim vetes të rendis më tej vlerat e këtij libri voluminoz dhe interesant, e shoh të arsyeshme të ndalem në disa pasaktësi dhe intepretime krejt subjektive dhe tendencioze të Eqrem bej Vlorës, lidhur me figurën e atdhetarit të madh Avni Rustemi, të cilat nuk kanë, për më tepër, asnjë bazë historike.

    Vrasja e Esat Pash Toptanit në Paris

    I shtyrë nga një mllef vetjak, autori në fjalë hedh baltë mbi figurën e Avni Rustemit e sidomos mbi aktin e tij historik, atentatin kundër tradhtarit me damkë Esat Pashë Toptanit (13 qershor 1920). “Që Esat pasha në çdo vend të qytetëruar do ta kishte hak trekëmbëshin, kjo nuk diskutohet, shkruan ai në libër. Po që ai u eliminua në këtë mënyrë të padenjë, kjo nuk i nderon aspak anëtarët e asaj qeverie. Vrasja e cilitdoqoftë motivi shtytës politik mbetet vrasje”. (faqe 166). Megjithatë, nga argumentimet që do të sjellim më poshtë, të nxjerra nga po ky libër, do të dëshmohet që eliminimi fizik i Esat pashës ishte nevojë e domosdoshme për fatet e Shqipërisë. Në faqen 162-163 të librit të tij, Eqrem bej Vlora shkruan: “Menjëherë pas formimit të qeverisë së re të Tiranës, të gjitha krahinat shqiptare e njohën autoritetin e saj (20 shkurt 1920). Sidoqoftë, zona të gjera të vendit mbeteshin ende nën pushtimin e huaj: Shkodra (qyteti), Korça, Pogradeci nën francezët, viset në veri të Drinit nën sundimin serb. Vlora dhe disa pikëmbështetje të tjera, siç u tha, nën varësinë italiane” (faqe 163). Më poshtë, autori vazhdon: “Ndërkaq, Esat Pashë Toptani, me banin në Paris, u dha urdhër njerëzve të tij në Shqipërinë e Mesme që të mblidheshin dhe kur të vinte rasti, të rrëzonin qeverinë. Përballë këtij rreziku të ri, qeveria u përpoq t’i bindte me të mirë esatistët se përmbysja me dhunë e qeverisë do t’i rizgjonte dëshirat dhe nepset e fqinjëve për të rrëmbyer troje shqiptare dhe kjo mund të ishte rrezik i madh për ekzistencën e Shqipërisë së lirë (po aty). Më pas, Eqrem bej Vlora shkruan se qeveria dërgoi në Paris një delegacion, të kryesuar nga Faut bej Toptani, për të biseduar me Esat pashën, ndërkohë që esatistët “zgjeruan lëvizjen e tyre në të gjithë Shqipërinë e Mesme (nga Rrogozhina deri në lumin e Matit), duke e vënë në mes Tiranën”. (faqe 163). Nuk mjafton vetëm kjo, por esatistët filluan befas të ndërmarrin veprime të dhunshme. Ato prenë linja telegrafike dhe telefonike, vendosën njerëz të armatosur në ura dhe qafa dhe, kur qeveria nisi të marrë masa të rrepta, ata, nën komandën e Osman Balit, rrethuan madje edhe Tiranën. Osman Bali ishte një nga larot më të rëndësishëm të Esatit, ai që kishte organizuar vrasjen në Shkodër të gjeneralit turk, Hasan Riza pasha. Edhe një herë tjetër qeveria shqiptare u përpoq të mirrej vesh me rebelët. Ndërkohë problemi u zgjidh vetiu nga vrasja e Esat Pashë Toptanit para hotelit “Kontinental”, më 13 qershor 1920". (faqe 166). Siç e pohon edhe vetë Eqrem bej Vlora në këto faqe të librit të tij, rrezikshmëria që e kërcënonte Shqipërinë e re nga Esat Pashë Toptani dhe bandat e tij, ishte skajësisht e madhe, aq sa e mbyste atë që në djep. Të mos harrojmë se Esat pasha ishte dhe aleat i Francës. I dëbuar nga Shqipëria pas kryengritjeve fshatare dhe urrejtjes së thellë popullore, ai u shtrëngua të hidhej në Itali, ku u prit me madhështi e që atje, me disa qindra banditë të rekrutuar nga Osman Bali, me një miratim të ministrit francez të Luftës, gjeneralit Fosh, iu bashkangjit me 1916 Armatës së Lindjes me qendër në Selanik, të komanduar nga gjenerali Sarai, që luftonte gjatë Luftës së Parë Botërore kundër ushtrive austro-hungareze. Pas përfundimit të kësaj lufte, siç dihet me fitoren e Antantës, pra, dhe të Francës, Esat pasha shkroi në Paris dhe u bë vegël e ambicieve të qeverisë franceze, e cila synonte që ta vendoste atë në krye të shtetit shqiptar që kështu, pasi kishte shtrirë ndikimin e vet mbi Jugosllavinë, duke vënë në krye aleatin e vet, Kryeministrin Pashiç, të bënte të njëjtën gjë dhe në Shqipëri. Madje, i ndihur nga qeveritarët francezë, Esat pasha paraqiti në Konferencën e Paqës në Versajë një memorandum ku pretendonte se ai ishte kryetar i ligjshëm i qeverisë shqiptare. Ja pra, përse Esat Pashë Toptani duhej të merrte dënimin e merituar. Dhe, përderisa ai nuk lëvizte nga Parisi, ky dënim nuk mund t’i jepej atij veçse atje. Dhe, doemos, veçse me një atentat. Dhe këtë atentat e kreu me një guxim të pashembullt atdhetar, djaloshi 25-vjeçar, Avni Rustemi.

    Eqrem bej Vlora kundër Avni Rustemit
    Mirëpo Eqrem Vlora, nuk bie aspak në ujdi me këtë akt të lartë të Avni Rustemit, ndaj në librin e tij shkruan kështu për të: “Një djalosh i quajtur Avni Rustemi, një nga studentët më të pasuksesshëm, të cilët tentojnë të shfryjnë me heroizma politike dëshirën e tyre për hakmarrje, lindur në Libohovë, i biri i një qehajai të derës së Libohovë-Asllan pashës, me anë të një vrasjeje të pabesë, i dha një fund të beftë jetës aventurore të Esatit. Ky djalosh, që me këtë vrasje donte të bënte emër në Shqipëri, nuk ishte veçse një vegël në duart e kundërshtarëve të Esat Pashës. Ata i dhanë mjetet e nevojshme për këtë vrasje dhe morën njëherësh përsipër mbrojtjen e tij para gjykatës franceze. Se kush ishin këta kundërshtarë, sot vështirë ta thuash. Me siguri mund të thuhet vetëm se pothuaj të gjithë nacionalistët, madje edhe disa bejlerë (mjerisht edhe të tillë që kishin përfituar nga Esati), miratuan vrasësin dhe vrasjen. Midis tyre në radhën e parë ishte edhe Ahmet bej Zogolli” (faqe 166). Ky pohim ka disa prirje sa të mbrapshta, aq edhe të pasakta, për shumë arsye. Avni Rustemi nuk ishte student i pasuksesshëm, po të marrim parasysh se kishte mbaruar shkëlqyeshëm gjimnazin italo-arbëresh të San Demetrio Koronës në Kalabri dhe kishte nisur studimet e larta për pedagogji në Romë, të cilat ai nuk arriti t’i përfundonte sepse u lidh me lëvizjen atdhetare. E dyta, vrasja e tij nuk ishte e pabesë. Përkundrazi, një vrasje tepër e guximshme, që e diktuan rrethanat për fatet e Shqipërisë. Pashai i kishte sjellë aq tersllëqe vendit sa shthurja po sillte shpërbërjen. Esati kishte vrarë plot pas shpine, jo vetëm mbrojtësin e Shkodrës, Riza Pashën, viktimat dhe kurthet e tij, kërcënonin të ardhmen e vendit, ndërkohë që bashkëpunimi me serbët, grekët ishin moto e taktikës së tij antishqiptare. Avniu nuk e vrau Esat pashën për hakmarrje, pas shpine, i fshehur diku, por i doli përpara në hyrje të hotelit “Kontinental”, nga ku Esat pasha po dilte, e qëlloi dy herë në gjoks, dhe nuk e qëlloi dot më shumë, sepse arma nuk shkrepi, qëndroi pa lëvizur dhe e hodhi armën përdhe; sipas një plani të studiuar deri në hollësitë më të vogla. Avniu kishte mundësi ta vriste atë edhe në mbrëmje para këtij hoteli ose diku gjetkë, i fshehur, te shëtiste në rrugën “kastilione”, para hotelit “Kontinental”, e sidomos nga policët që e rrahën rëndë, duke e pandehur për kriminel ordiner. Dhe kjo sepse ai, gjatë procesit hetimor dhe gjyqësor, do të përmbahej me një aftësi të shkëlqyer plot gjakftohtësi tezës se ai nuk kishte ardhur në Paris për të vrarë Esat pashën, por për të studiuar. Mirëpo, i ndodhur befasisht para këtij tradhtari, kur priste sekretarin e tij, u trondit, iu bë se lexoi në ballin e tij mizoritë që ai i kishte sjellë Shqipërisë” dhe në kushtet e kësaj tronditjeje, nuk u përmbajt, e qëlloi me armën që e mbante për vetëmbrojtje. Ky ishte plani, për të cilin ishte përgatitur Avniu, të cilin e vuri në jetë deri në fund. Akti i Avniut ishte i rrallë, sepse aktakuza e prokurorit Blosh Larok “për vrasje me paramendim”, e cila sipas neneve përkatëse të Kodit Penal francez kërkonte dënimin me vdekje, i qëndroi atij mbi kokë nga 9 shtator deri më 4 dhjetor të vitit 1920, kur përfundoi procesi gjyqësor me lirimin e tij, kur dihej që ai edhe mund të dënohej me kokën e prerë në gijotinë. Eqrem bej Vlorës nuk i intereson fare qëndrimi i Avniut dhe e anashkalon atë sikur të mos kishte asnjë vlerë.

    Kush e mbrojti dhe liroi Avni Rustemin
    E treta, nuk ishin “kundërshtarët” që morën përsipër mbrojtjen e Avni Rustemit para gjykatës franceze. Ishin shqiptarët e mërguar në Amerikë, ata që nga kursimet e tyre mblodhën 5000 dollarë, shumë tepër e madhe për atë kohë, kur dollari kishte shumë vlerë, për t’ia dhënë avokatit francez De Monzi, që mori përsipër mbrojtjen e Avniut gjatë procesit gjyqësor. Eqrem bej Vlora ka të drejtë vetëm në një pikë kur thotë: “Se kush ishin këtu kundërshtarë, sot vështirë ta thuash”. Vërtet, ashtu është. Kanë kaluar më shumë se 80 vjet nga ajo ditë dhe askush nuk e di se cilët qenë ata që e dërguan Avni Rustemin për të vrarë Esat pashën në Paris, sepse në asnjë arkivë nuk gjendet as edhe një dokument, së paku nuk janë publikuar në shtyp. Qoftë gjatë procesit gjyqësor, qoftë dhe kur u lirua nga burgu dhe u kthye në Shqipëri, Avniu nuk i rrëfeu kujt asgjë lidhur me aktin e tij atdhetar. Ai, me gjithë këmbënguljen e gjyqtarëve, e quajti atë thjesht vetjak, për të mos implikuar qeverinë e re të Tiranës, sepse një pohim i tillë, pra, se ai në të vërtetë ishte dërguar prej saj, do të kishte pasoja të rënda ndërshtetërore. Kështu, ata që e dërguan, mund të ishin ata të cilët Eqrem bej Vlora i quan nacionalistë, pra, ata që luftonin për Shqipërinë e jo ta shisnin atë si Esat pasha. Duke lexuar librin “Kujtime” të Eqrem bej Vlorës, të habit edhe një tjetër pohim i ulët dhe absurd kur ai shpreh çudinë se si “drejtësia franceze, me një manipulim të habitshëm të ligjit, e nxori të pafajshëm Avni Rustemin dhe që qeveria shqiptare e shpalli hero dhe e bëri deputet, kur ky vrasës i pabesë, pra, kapardisej nëpër Tiranë dhe brohoritej ngado si ndonjë shpëtimtar i atdheut. Ky shembull u tregonte gjithë djemve shqiptarë se si me anë të një plumbi të shkrepur nga prapa shpinës si burracakët, mund të bëhesh njeri i madh” (faqe 215).

    Përse drejtësia franceze e liroi vrasësin e Esat Pashës

    Një njeri i kënduar si Eqrem bej Vlora nuk duhej t’ia lejonte vetes një gabim kaq trashanik, kur nënvizon fjalën manipulim të ligjit nga drejtësia franceze. Ai duhet ta dinte se akuzën për dënimin me vdekje e dha prokurori Blosh Larok, dhe se vendimin si në çdo rast tjetër e dha juria, e cila përbëhej nga njerëz të profesioneve të ndryshme, dhe që e gjykuan aktin e Avni Rustemit si shprehje të drejtësisë së popullit shqiptar pë të zhdukur një përbindësh, që kërkonte, me ndihmën e të huajve, të mbyste Shqipërinë. Këta anëtarë të thjeshtë të kësaj jurie, me sa duket, njohën faktin që në adresë të Prokurorisë dhe Gjykatores së Jenës në Paris dhe gazetave franceze, nga Shqipëria dhe nga vende të tjera si Bullgaria, Rumania, Amerika, në emër të shqiptarëve të mërguar, kishin ardhur me dhjetëra telegrame ku kërkohej lirimi i Avni Rustemit dhe se pas këtij akti të madh heroik, shqiptarët kudo bënin festë. Të mos harrojmë se në mbrojtje të Avni Rustemit u ngritëm dhe personalitete të mëdha franceze, midis të cilëve Rene Pio, Zhysten Goda dhe aktori i madh shqiptar me famë botërore, Aleksandër Moisiu etj. Nga të gjitha këto telegrame që iu dërguan organeve gjyqësore franceze, unë po rendis vetëm një, atë që populli i Vlorës, pra, i vendlindjes së autorit, për ironi të fatit, i dërgoi gjykatës së Parisit: “Populli i Vlorës, në një miting madhështor të mbajtur sot, vendosi t’i bëjë thirrje ndërgjegjes së lartë të Gjykatës së Parisit. Ai tani pret që të mirret parasysh drejtësia e flaktë e popullit shqiptar që të lerë të lirë studentin tonë, Avni Rrustemi, i cili bëri një vepër patriotike duke qëlluar Esat Toptanin e duke çliruar atdheun tonë nga një e keqe shkatërrimtare”. Sidoqoftë, mund të hamendësohet edhe ndonjë ndërhyrje e drejtësisë franceze në çastin e fundit. Dhe kjo nisur nga një qëndrim i papërkulur i Avniut gjatë procesit gjyqësor, ku ai e demaskoi Esat pashën në planin politik e moral, ashtu siç e kishte demaskuar dhe zëri i fuqishëm i shqiptarëve në Shqipëri e kudo ku ata ishin. Kur në dhjetor të vitit 1920 tërë të huajt ishin dëbuar nga Shqipëria, Franca zyrtare pa të arsyeshme që të mos vriste Avni Rustemin, jo sepse e smpatizonte, por sepse donte të paraqitej tashmë para botës si vend që zbaton parime të larta demokratike. Nuk ia vlen të ndalesh te shprehjet banale për Avni Rustemin “vrasës i pabesë”, “plumb i shkrehur prapa shpine si burracakët”, të cilat janë sa të pavërteta, madje të neveritshme, gjynah që kanë dalë nga pena e Eqrem bej Vlorës në librin e tij “Kujtime”.

    Rustemi ideator i atentatit ndaj Zogut në 23 gusht 1923

    Po të shkojmë më tutje: Me 23 shkurt 1923, Ahmet Zogut iu bë atentat në parlament, nga i cili ai doli i plagosur lehtë. Atentatori ishte Beqir Valteri, që sipas pohimeve që autori i paska thënë më pas vetë ai, ishte vënë nga Avni Rustemi për të eliminuar Zogun. Lidhur me këtë ngjarje Eqrem bej Vlora vazhdon të rrëfejë kujtimet e tij: “Ahmet Zogu e dinte kush ishin organizatorët. Ai pajtoi një njeri në Tiranë , që kishte marrë prej vitesh me qira dy mulli bloje nga Esat pasha (njëherësh edhe vetë esatist i njohur), i cili qëlloi me revolver dhe plagosi rëndë Avni Rrustemin, vrasësin e Esat pashë Toptanit dhe nxitësin kryesor të atentatit kundër Zogut. I plagosuri vdiq dy ditë më vonë në spitalin e Tiranës. Ky ishte një akt i shkëlqyer hakmarrjeje që jo vetëm përputhej me rregullat e kodit të vendetës shqiptare, por bënte dhe një shërbim tjetër; pajtonte dy rryma politike, esatizmin dhe ahmetizmin, deri atëherë të ndara.” (faqe 214). Për fat të keq në këto radhë Eqrem bej Vlora tregohet kontradiktor edhe cinik në tifozllëkun, ku merr anën e vrasësit. Kontradiktor, sepse në faqen 166, siç e pamë, shkruan për vrasjen e Esat pashës: “Vrasja,-cilado qoftë motivi shtytës politik mbetet vrasje”. (faqe 166) Kurse për vrasjen e Avni Rrustemit, dora vrasëse nuk qenka kështu. Cinik, sepse këtë vrasje e quan një hakmarrje të shkëlqyer (?)dhe, për më tepër, që bashkoka esatizmin me ahmetizmin. Në këtë rast, ai nuk i bën aspak nder Ahmet Zogut, i cili, falë së vërtetës, pasi u bë mbret përpos disa vrasjeve politike, midis të cilave, veç atentatit kundër Avni Rustemit (1924), kundër Luigj Gurakuqit (1925) dhe Hasan Prishtinës (1933), është shumë larg figurës së urryer të xhelatit Esat Pashë Toptani. Vazhdojmë më tutje: “Por vrasja e Avni Rustemit ishte njëherësh edhe shkëndija që ndezi flakadan zjarrin, deri atëherë të mbushur të urrejtjes së vjetër disavjeçare midis krahut demokratik dhe atij aristokratik. Urrejtja, si udhëkryq, ndante Shqipërinë osmano-feudalo-myslimane nga ajo nacionalo-socialisto-demokratike. E në rrethanat ekzistuese ky zhvillim do të çonte pashmangësisht në vendosjen e një diktature që do të zgjaste 15 vjet” (faqe 214).

    Me këtë rast, pavarësisht se në faqet e librit ai flet me përçmim për nacionalo-socialisto-demokratët, që ishin Fan Noli, Luigj Gurakuqi, Stavro Vinjau, vetë Avni Rustemi, Jashar Erebara, Agjah Libohova e plot të tjerë, ai kishte të drejtë, aq më tepër se tërë këto figura ishin për ndërtimin e një Shqipërie të re larg obskurantizmit anadollak. “Një komedi - vazhdon më poshtë Eqrem bej Vlora - ishte dhe ceremonia e nderimit para arkivolit të hapur të Avni Rustemit në spitalin e Tiranës. Të gjithë ata që e quanin veten “popull” dhe “demokrat”, kaluan para arkivolit të këtij karagjozi kriminel, të cilin donin medoemos, ta ngrinin në piedestalin e heroit kombëtar dhe të martirit”.

    Rustemi “karagjoz politik” dhe “kriminel”?
    Urrejtja patologjike ndaj vrasësit të Esat Pashë Toptanit dhe një ndër figurave më të mëdha për një Shqipëri antifeudale e bejlero-agallare, e ka shpënë Eqrem bej Vlorën deri në atë pikë sa të quajë Avni Rustemin “karagjoz politik” (?!). Dhe është i pari dhe i vetmi deri tani që nxin figurën e tij. Më tutje autori vazhdon: “Me radhë udhëheqësit e partisë demokratike ngjiteshin pranë arkivolit dhe zbraznin rrëketë e fjalëve të tyre, pa dashur t’ia dinë se për popullin këto poza janë krejt të huaja, sepse ato shkelin zakonet dhe kuptimin e tij për dinjitetin njerëzor. Kjo shfaqje u zhvillua për një javë të tërë në Tiranë dhe pastaj në Vlorë për gazin e gjithë kalamajve. Në këtë vazhdë befas partia demokratike vendosi të transportojë të vdekurin në Vlorë (Po aty). Këtu urrejtja e Eqrem bej Vlorës për Avni Rustemin dhe pastaj edhe për partinë demokratike shfaqet në përmasat më të mbrapshta. Nuk mund t’i lejohet kurrë një eruditi, siç ishte në të vërtetë ai, ta quajë Avni Rustemin, sado kundërshtar ta kishte, karagjoz, kriminel, kur pranë tij e kishin për nder të rrinin Fan Noli e Luigj Gurakuqi, të cilët kishin më shumë kulturë se beu i Vlorës dhe, për më tepër, ishin edhe shkrimtarë, edhe studiues, me shumë vepra, dhe se atë e respektonte një popull i tërë. Mjafton të shohësh fotografi të botuara në shtypin e kohës, veç plot e plot artikujve, për t’u bindur se ishin me mijëra ata qytetarë tiranas që u mblodhën në shesh, sot të quajtur “Skënderbej”, për të përcjellë arkivolin e Avni Rustemit nga Tirana në Durrës e nga Durrësi me anije në Vlorë, ku me mijëra të tjerë, të ardhur nga të katër anët e Shqipërisë, me dhembje të thellë morën pjesë në ceremoninë e varrimit të birit të tyre të shtrenjtë. Avni Rustemi ishte bir i Shqipërisë, ishte dhe bir i Kosovës së martirizuar nga shovinistët serbo-malazezë, që i kishte demaskuar në sa e sa fjalime në Parlament, të cilat Eqrem Vlora, duke qenë deputet, i ka dëgjuar, por për këto kujtime e bënë veshin të shurdhër. Ndaj edhe Kosova, pjesë e Shqipërisë, e shkëputur nga përçudnitë e historisë, e vajtoi Avniun që e kishte edhe deputetin e vet dhe e nderon atë me respektin më të madh. Duke përfunduar, pa mohuar vlerat historike që sjell Eqrem bej Vlora në librin e tij “Kujtime”, jemi të detyruar të pohojmë se thëniet që cituam më sipër, lidhur me figurën e atdhetarit të mençur Avni Rustemi, janë shumë larg së vërtetës historike, të mveshura me mëri e subjektivizëm që nuk e nderojnë autorin.

    Ky ishte Isuf Reçi, i cili e qëlloi Avniun pas shpine dhe humbi gjurmët. U vra nga partizanët me 1944.


    Panorama
    Ndryshuar për herë të fundit nga Albo : 14-10-2007 më 23:07

  2. #2
    Kalorës i Lirisë Maska e BlueBaron
    Anëtarësuar
    29-04-2002
    Vendndodhja
    Në Tironën e Ondrrave
    Postime
    5,046

    Atentati i Avni Rustemit ndaj Esat pashë Toptanit në Paris ...

    Vrasja e Esat pashës para hotelit “Continental”.


    Prolog

    Paris, 13 qershor i vitit 1920 …
    Para hotelit “Kontinental” në rrugën “Kastilone”, një djalosh nxjerr revolverin që mbante nën xhaketë dhe me dy të shtëna rrëzon përtokë atë që ndodhej përballë tij. Orvatet të qëllojë përsëri, por revolveri nuk i shkrep. Atëherë e flak atë mbi viktimën e qëndron pa lëvizur pranë tij. Kalimtarët mbeten të llahtarisur, duke u përpjekur t’ia mbathin a të fshihen pas kolonave të hyrjes së hotelit. Por disa syresh, kur shohin djaloshin të vetëçarmatosur, i sulen dhe e qëllojnë si të munden duke britur: ”Kriminel, vrasës!...”. ”Nuk jam kriminel, - shpjegon djaloshi.- Jam student shqiptar. E vrava atë sepse lexova në ballin e tij mizoritë që ai ka kryer në Shqipëri”. Vrasësi ishte Avni Rustemi, kurse i vrari Esat pashë Toptani.


    Esat Pasha
    Esat pasha ndodhej prej dy vjetësh në Paris, vërtet i mbrojtur nga qeveria franceze, por, në dukje, pa rrezikshmëri ndaj vendit tonë që tashmë kishte një qeveri të veten, të dalë nga Kongresi i Lushnjës. Por ende ndihej rreziku i ricopëtimit të Shqipërisë. Dhe ky rrezik vinte jo vetëm nga Konferenca e Paqes që po mbahej prej dy vjetësh në Versajë, por për fat të keq, edhe nga “delegacione” të tilla si delegacioni i qeverisë se Durrësit, madje edhe i princit të Mirditës që pretendonin se përfaqësonin Shqipërinë. Atyre u shtohej edhe delegacioni që kryesohej nga Esat pashë Toptani, i përbërë vetëm nga një ministër, ai i Punëve të Jashtme. Që në muajt e parë të vitit 1920 ky delegacion nisi t’i kundërvihej delegacionit të kryesuar nga Mehmet Konica, i cili përfaqësonte qeverinë e ligjshme të Tiranës, me kryeministër Sulejman Delvinën.
    Pas Esat pashës qëndronte Franca, e cila e çmonte atë për ndihmesën që ai kishte dhënë me 600 ushtarë që ishin bashkërenditur në Frontin e Lindjes me qendër në Selanik, ku ushtria franceze, aleate e Antantës, së bashku me Anglinë dhe Italinë luftonte kundër forcave austro-hungareze dhe aleatëve të saj që përbënin Bllokun Qendror. Dhe në fakt, që nga fillimi i punimeve të Konferencës së Versajës e deri në mars të vitit 1920, atje u hartuan disa projekte për Shqipërinë. ”Në to u parashikua copëtimi i shtetit shqiptar dhe zhdukja e tij nga harta politike e Evropës si shtet i pavarur dhe sovran”, (Fjalori Enciklopedik Shqiptar, faqe 505). Esat pashë Toptani nuk ishte kundër pretendimeve që po të realizoheshin, do të shënonin gjymtimin e mëtejshëm të trojeve shqiptare. Për të, së fundi, ishte e mjaftueshme edhe sikur të kishte nën sundimin e tij vetëm Shqipërinë e Mesme. Ky konsiderohet si kulmi i tradhtisë së pashait që e kishte nisur këtë rrugë menjëherë pas shpalljes së Pavarësisë. Në janar të vitit 1913 ai kishte vrarë Hasan Riza pashën, komandantin turk të garnizonit të Shkodrës që të bëhej kështu vetë komandant, por jo për të mbrojtur këtë qytet, por për për t’ia dorëzuar kral Nikollës. Më pas, në marrëveshje antikombëtare me shtetet fqinje ngriti në Shqipërinë e Mesme “Pleqësinë”, pushtet që bëri ç’ishte e mundur që të pengonte veprimtarinë e qeverisë kombëtare të Ismail Qemalit në Vlorë. Më 1914, si ministër i Luftës dhe i Punëve të Brendshme të qeverisë së Princ Vidit, pengoi me të gjitha mënyrat qendresën e popullore për çlirimin e Shqipërisë së Jugut nga sulmet greke. Një vit më pas, më 1915 nënshkroi një marrëveshje me qeverinë serbe që dëmtonte pavarësinë politike dhe tokësore shqiptare. Dhe ja tani, duke pretenduar se ishte kryeministër i shtetit shqiptar, ndodhej në Paris për të vazhduar rrugën e një tradhtari.
    Madje paraqiste edhe një memorandum ku shpjegonte arsyet se përse e meritonte këtë ofiq të lartë. Kam pasur rast ta lexoj këtë memorandum, një kopje e të cilit ndodhet në Bibliotekën Kombëtare në Tiranë, shkruar më frëngjisht, gjuhë të cilën ai e flistë çalë-çalë e natyrisht që nuk dinte kurrsesi ta shkruante. Sipas tij, me të filluar Lufta e Madhe, (kështu quhej atëherë Lufta e Parë Botërore), duke qenë aleat i Serbisë, ai u bashkua me Antantën kundër Austro-Hungarisë dhe Gjermanisë. Kur Turqia u fut në luftë për krah Gjermanisë dhe Austro-Hungarisë, u dënua prej saj me vdekje në mungesë. Më tutje, gjatë Luftës së Madhe u shtrëngua të largohej nga Shqipëria së bashku me qeverinë dhe u vendos së pari, në Korfuz e pastaj në Selanik, i shoqëruar nga 600 ushtarë besnikë që u reshtuan me urdhër të ministrit të Luftës të Francës krahas forcave franceze në Frontin e Lindjes. Atje, për merita të veçanta, kryekomandanti i forcave franceze, gjenerali Sarraj e dekoroi me yllin e Legjonit të Nderit. Lufta tani ka mbaruar. Forcat e Antantës janë fituese ndaj forcave të Bllokut Qendror. Shqipëria radhitet me shtetet fituese e si pasojë, edhe ai, si aleat e Antantës, ka të drejtë të jetë kryetar i qeverisë shqiptare...


    Vendimi për vrasjen e Esat pashës, ende enigmë.
    Po kush e mori vendimin për të vrarë Esat pashën e kush e caktoi Avniun për të kryer këtë akt të lartë mëmëdhetar? Kanë kaluar 85 vjet nga dita e atentatit dhe ende nuk është zbuluar ndonjë dokument që të hedhë dritë mbi këtë vendim. Vite më parë qarkullonte fjala se Avniut iu caktua kjo detyrë pas një shorti… Po kush ishin kandidatët e tjerë të mundshëm për të kryer këtë atentat? Ku u mblodhën ata? Kush i mblodhi? Dhe në qoftë se është zhvilluar një mbledhje e tillë, a ka pasur dijeni për të qeveria e Tiranës, me fjalë të tjera, kryeministri Sulejman Delvina, ministri i Jashtëm, Mehmet Konica, që aso kohe kryesonte delegacionin tonë në Konferencën e Paqes në Versajë? Të gjitha këto hamendësime janë të mundshme. Qeveria e Tiranës, edhe sikur të mos kishte propozuar që të kryhej ky atentat, duhej ta kishte miratuar në heshtje që ai të bëhëj, kur rrezikohej fati i Shqipërisë. Por rëndësi ka vetëm fakti se me miratimin ose jo të qeverisë së Tiranës, atdhetarët shqiptarë kishin vendosur që Esat pasha të vritej me çdo kusht. Dhe për këtë qëllim caktohej ose vetëcaktohej Avni Rustemi.
    Mund të shkëpusësh Çunat nga TIRONA, por kurrë nuk mund të shkëpusësh TIRONËN nga zemra e Çunave !!!

  3. #3
    Kalorës i Lirisë Maska e BlueBaron
    Anëtarësuar
    29-04-2002
    Vendndodhja
    Në Tironën e Ondrrave
    Postime
    5,046
    Prita e Avni Rustemit ndaj Esat pashës në Paris.


    Avni Rustemi, duke pasur me vete një shumë prej rreth 10 mijë frangash, u përgatit të nisej për në Paris. Natyrisht, askush, duke përfshirë këtu edhe shokët më të ngushtë, nuk dinin gjë për këtë udhëtim. Hollësitë e tij i mësojmë nga deponimet që Avni Rustemi jep gjëtë procesit hetimor në burgun “Sante” në Paris pas atentatit. Sipas këtyre dëshmive, ai më 5 maj të vitit 1920 lë Vlorën dhe shkon në Durrës, ku zgjat vizën e pasaportës edhe për një vit. Që nga kjo datë e deri më 21 maj, siç pranon ai, ndodhet në Tiranë për çështje të tij vetjake, ku me siguri ose ka marrë pjesë në një mbledhje për çështjen e atentatit, ose ka biseduar me pjesëtarët e kësaj mbledhjeje për hollësi të mëtejshme të tij (Arkivi Qendror i Shtetit, Fondi Avni Rustemi, Dosja 2, faqe 85).
    Nga Tirana Avniu niset për në Romë. Atje prefektura e policisë i jep vizën për të shkuar në Francë nga qyteti i Modanës. Pasi kalon nga pika kufitare e këtij qyteti, më 30 maj, siç tregon viza, më 31 maj Avniu arrin në Paris. “Nga studimi i materialeve hetimore e gjyqësore që kemi pasur mundësi të konsultojmë,- shkruan juristi dhe historiani i njohur Jusuf Alibali në studimin e tij, ”Avni Rustemi para organeve hetimore” (faqe 211, buletini i shkencave historike nr. 2, 1964),- del një sinkronizim i përpiktë dhe, sipas mendimit tonë, aspak i rastit, midis veprimeve të Avniut nga 31 maji deri tek atantati i tij i bujshëm më 13 qershor”.


    Duke ndjekur Esat pashën.
    Le të përpiqemi të ndërtojmë sipas dëshmive të tij në hetuesinë franceze si mundi ai gjatë dy javëve t’ia arrijë këtij qëllimi me një saktësi të mahnitshme. Me të arritur në Paris, ai shkon në hotelin madhështor “Princ Albert” në rrugën “Sen Jasen”, ku nuk e pranojnë, me sa duket duke u nisur nga veshja e tij tepër e varfër, siç dëshmon në hetuesi edhe pronari i këtij hoteli. Kësisoj, detyrohet të shkojë në një hotel tjetër, po në atë rrugë, me emrin “De Tuilëri”. Në këtë hotel qëndron për disa ditë, duke paguar 35 franga në ditë me gjithë ushqimin. “Dë Tuilëri” nuk ndodhet veçse disa minuta larg hotelit “Kontinental”, ku është vendosur prej kohësh Esat pasha. Tani e ka më të lehtë që ta ndjekë atë hap pas hapi. Natyrisht tani i duhet një veshje e pëlqyeshme. Kësisoj, me ndihmën e Aibarit, portierit të hotelit, porosit një kostum në një rrobaqepësi, për të cilin paguan 375 franga. “Gjatë qëndrimit të tij në hotel “Dë Tuilëri”, sipas raportit të policisë të datës 28 qershor 1920, (AQSH, dosja Avni Rustemi), Rustemi nuk ka pasur asnjë vizitë dhe asnjë korrespondencë. Ai hante vëtëm në një tryezë të veçuar në restorantin e hotelit, nuk ka zhvilluar bisedime me asnjë nga udhëtarët e tjerë që hanin në të njëjtën sallë. Rustemi dilte për ditë vetëm dhe dy ose tri herë i shoqëruar nga zoti Aibar, me taksi, për të vizituar Parisin. Aibari ka deponuar në polici se Avniu, ndërkohë e kishte pyetur për adresën e ndonjë shkolle ku të stërvitej në qitjen me armë”. (Po aty).
    Avniu qëndron në hotelin “Dë Tuilëri” vetëm disa ditë për t’u vendosur në një hotel tjetër, “Foburg Monmatrë” 32, ku merr me qira një dhomë, duke parapaguar njëherësh 210 franga për muajin e parë. Jo pa qëllim, ai kërkon të japë përshtypjen se i duhet një dhomë e lirë për xhepin e tij prej studenti, kurse parapagimi do t’i shërbëjë si mjet i fortë për të mohuar akuzën e krimit të kryer me paramendim. Dhe është mjet i logjikshëm, sepse çdo lloj hetuesi do të mund të kuptonte se një njeri që kishte ardhur për të ikur sa më shpejt që të ishte e mundur, nuk kishte pse të parapaguante për një muaj, kur mund ta bënte këtë çdo ditë.

    Nxiton për të zbatuar planin.
    Më 2 qershor, sipas dëshmive të Avniut, (AQSH, fondi A. Rustemi, dosje nr. 2, faqe 46), ai merr takim me delegacionin e qeverisë shqiptare që kishte zënë vend në hotelin “Kempbell’ në rrugën “Frindland”.
    ”U paraqita për të njoftuar ardhjen time në Paris, - thotë Avniu, - por pa kërkuar gjë të veçantë”. Në hotel dëgjon se të nesërmen do të hapej një ekspozitë shqiptare. Atëherë gjykon se atje mund të takojë edhe njerëz që mund të dinë më shumë për Esat pashën. Nuk gabon. Por nuk është e lehtë të ndodhesh pranë Esatit. Deri tani Avniu di vetëm që Esati vazhdon të jetojë në hotelin “Kontinental” dhe se më pas do të vendoset në vilën “Said” që sapo e ka blerë dhe që po pajiset më së miri. Si për një pasha!...
    Avniu e kupton se gjithçka duhet të kryhet para se Esati të lërë “Kontinentalin” për në këtë vilë. Dhe ja, në ekspozitën shqiptare Avniu arrin të takohet me Gjergj Gogën, që kryen funksionet e sekretarit të pashait. Njohja me të bëhet gjoja rastësisht. Dhe po kështu… rastësisht, pas disa ditësh Avniu e takon në rrugë, ku i kërkon ta ndihmojë të gjejë adresën e ndonjë shkolle në të cilën ai të kishte mundësi “të familjarizohet me praktikën e gjuhës frënge”. Por Gjergji, meqë nuk është në gjendje ta ndihmojë, i rekomandon të shkojë të takojë Zef Ashikun nga Shkodra.
    Gjatë procesit hetimor, Gjegj Goga, i thirrur për të deponuar për Avniun, thotë se ai “më është dukur një njeri i sjellshëm dhe qëndrimi i tij ishte tepër korrekt”. Avni Rustemi e kuptonte se nuk kishte çfarë të priste më gjatë. Në gati dy javë nga dita kur kishte arritur në Paris, kishte mësuar shumë të reja. Njihte sekretarin e Esatit, kishte njohur lëvizjet e tij, kohën kur hante, kur dilte, i kishte kërkuar një takim tjetër Gjergj Gogës, gjithnjë me dëshirën që ai ta ndihmonte që të gjente një shkollë ku të mësonte me mirë frëngjishten dhe të merrte leksione pedagogjie. Pra, mund ta takonte edhe një herë kur ai të ishte duke dalë nga hoteli pranë Esat pashës. Dhe kështu do të gjente rastin më të mirë që ta qëllonte.
    Fotografitë e Bashkëngjitura Fotografitë e Bashkëngjitura  
    Mund të shkëpusësh Çunat nga TIRONA, por kurrë nuk mund të shkëpusësh TIRONËN nga zemra e Çunave !!!

  4. #4
    Kalorës i Lirisë Maska e BlueBaron
    Anëtarësuar
    29-04-2002
    Vendndodhja
    Në Tironën e Ondrrave
    Postime
    5,046
    ATENTATI.


    E diel, 13 qershor 1920 …

    Zakonisht Avni Rustemi shkonte për të ngrënë drekë në restorantin e hotelit “Dë Tuileri”, rreth orës 1300. Por jo sot. Ai shkon më herët se zakonisht në restorant dhe kërkon që drekën t’ia shërbejnë sa më parë. I shpjegon kamerierit, me të cilin besohet të jetë miqësuar gjatë atyre ditëve, se ka një takim të ngutshëm, ndaj nuk duhet të vonohet. (Të gjitha këto ngjarje e të tjera, ai i shpjegon pastaj në procesin hetimor). Nga restoranti largohet në orën 1230. Që të arrijë në hotelin “Kontinental” ku banon Esat pasha, nuk duhen veçse disa minuta. Në hetuesi shpjegon se vajti te “Kontinetali” që të takonte Gjergj Gogën, i cili në atë orë zakonisht dilte që të bënte shëtitje përgjate rrugës “Kastilione”. Ja si shprehet vetë Avniu në hetuesi: ”Kalova nja dy herë para portës së hotelit në rrugën “Kastilione”, kur pashë se po dilte Esat pasha… Esat pasha po ecte ngadalë dhe tërë krenari. Me ta parë atë, e tërë historia e Shqipërisë m’u ngjall në shpirtin tim. Një turbullirë e madhe më pushtoi. Atëherë rrëmbeva nga xhepi i djathtë revolen me gjashtë fishekë që mbaja me vete dhe qëllova shumë, pa ditur sa herë, mbi Esat pashën që ishte dy metra larg meje. Esat pasha ra menjëherë dhe unë hodha armën time në tokë. Unë pohoj se veprimi im ka qenë krejt spontan dhe nuk e kam paramenduar”. (AQSH, Dosja Avni Rustemi, faqe 73).
    Që nga ky çast Avniu nuk lëviz nga vendi i kësaj ngjarjeje tronditëse. Qytetarët që kalojnë aty pari mbeten për disa çaste të tmerruar. Por kur shohin Avniun, tashmë pa armë, marrin zemër e disa prej tyre nisin dhe e godasin si të mundin, duke bërtitur: ”Kriminel, vrasës!”. Vetëm ndërhyrja e një polici arrin ta shpëtojë nga plagë të tjera të rënda, sidomos në fytyrë, siç dëshmojnë edhe fotot. ”Nuk jam vrasës, jam student shqiptar dhe vrava një tradhtar të atdheut tim, - arrin të shqiptojë Avniu, kur policë të tjerë e kapin dhe e nisin drejt e në burgun “Sante”, nga më të tmerrshmit e Parisit…


    Në të gjitha gazetat ndërkombëtare.
    Ngjarja bën bujë të jashtëzakonshme, jo vetëm në Francë, por në të gjithë botën. Të nesërmen për të shkruajnë të tërë gazetat franceze, midis të cilave “Figaro”, ”Le petit parisien”, ”Ekselsior”, Të Tan”, ”Paris Midi” etj. Madje edhe shtypi botëror nuk mbetet pas, duke filluar nga gazetat angleze, italiane, gjermane, madje edhe ato amerikane, braziliane e argjentinase. Lajmi ishte: Është vrarë kryeministri i shtetit shqiptar, sipas versionit të qarqeve zyrtare franceze. Ja pse gazeta “Ekselsior” e datës 14 qershor, një ditë pas atentatit të Avniut, që në titullin e faqes së parë, siç shihet në foto, shkruan: ”Esat pasha, kryetari i shtetit të Shqipërisë, u vra dje, këtu në Paris”, duke botuar në të majtë një foto të fundit të Esat pashës, me dekoratën e kalorësit të Legjionit të Nderit, një nga dekoratat më të larta të Francës, foton e makinës që e priste Esat pashën pranë hotelit, mbi të të skicuar siluetën e Avniut dhe të Esatit, të hamendësuar në çastin e atentatit dhe foton e Avniut marrë nga pasaporta e tij dhe një foto tjetër me fytyrë të gjymtuar nga goditjet e kalimtarëve pas atentatit.
    E vërteta është se Parisi dhë Franca zyrtare u trondit nga ky atentat. Një student shqiptar, mu në zemër të kryeqytetit të vendit më demokratik të Evropës së deriatëhershme, me gjakftohtësi qëllon për vdekje me dy të shtëna një figurë të madhe politike shqiptare, një gjeneral legjendar që ka luftuar gjatë Luftës së Madhe përkrah forcave franceze, një mik të vyer të Francës që pretendonte në Konferencën e Paqes në Versajë të kthehej sa më parë kryeministër në atdheun e vet.


    Duke kërkuar arsyen ...
    Pas atentatit, kryeministri i Jugosllavisë, Pashiç, që ishte në të njëjtën kohë edhe kryetari i delegacionit të vendit të tij në Konferencën e Paqes në Versajë, shprehu keqardhjen e tij të thellë për vrasjen e Esat pashës me këto fjalë: ”Kjo zhdukje është për të ardhur keq. Së pari, sepse ishte mik i Serbisë dhe gjithshtu mik i francezëve.” (“Lë Tan’”, 16 qeshor 1920). I pyetur nga gazetari që e intervistonte se cilat mund të ishin shkaqet që e shtynë studentin shqiptar, Rustemi, të vriste Esat pashën, Pashiçi vazhdon: ”Ai është një shqiptar fanatik nga krahinat jugore të Shqipërisë. Një proverb shqiptar thotë se hakmarrja është e shenjtë. “Shqiptarët e këtyre krahinave të Jugut që janë të armatosur, e konsiderojnë si detyrë vrasjen e Esatit. Krahina të tjera nuk i ishin nënshtruar autoritetit të tij. Ato nxirrnin si shkaqe dallimet fetare, megjithë përpjekjet e tij për të sheshuar këto dallime. Vrasësi, nga sa dëgjova, është me origjinë nga Libohova dhe, ndonëse nuk di gjë të saktë, kam bindjen se është katolik, si shumica e banorëve të asaj krahine”.
    Është e tepërt të komentohet injoranca e kryeministrit jugollav kur thotë se banorët e Libohovës qenkeshin katolikë dhe se Avniu e paska vrarë mikun e serbëve dhe francezëve për motive fetare. ”Kjo vrasje, - vazhdon më tej Pashiçi, - do të sjellë si përfundim që në Shqipëri të ketë mjaft turbullira, gjë që nuk do t’u pëlqejë fqinjëve të tjerë të Ballkanit e si rrjedhim, edhe neve” (Po aty).
    Por faktet dëshmuan se pas vrasjes së Esat pashës, jo vetëm nuk pati turbullira, por shteti shqiptar nisi të konsolidohej, duke përjashtuar Lëvizjen e Qershorit të viti 1924 pas vrasjes së Avni Rustemit.
    Po të rikthehemi te jehona e atentatit në qarqet diplomatike franceze dhe në shtyp. Shefi i kabinetit të Këshillit Ministror të Francës, Vinjon, në emër të kryeministrit Mileran, shprehu keqardhejn e tij të madhe për këtë akt të shëmtuar. Kështu u shpreh edhe personaliteti i shquar i Ministrisë së Jashtme të Francës, Graje, edhe në emër të ministrit të Jashtëm. Kryeministri grek, Venizellos, që ishte nisur ato ditë nga Athina për në Londër, duke u ndalur në Paris, bëri një vizitë në vilën “Said”, ku priteshin vizitat e rastit, së bashku me ambasadorin e Greqisë në Francë, Romanos, dhe shprehu edhe ai keqardhjen për këtë vrasje kriminale.


    Hetimet e para të shtypit për ngjarjen.
    Duke mos njohur realitetin shqiptar të asaj kohe, në përgjithësi shumë gazeta, jo vetëm franceze, të vendeve të tjera të Evropës, por edhe gazeta amerikane, madje edhe “Nju Jork Tajmsi”, e konsideronin Esat pashën kryetar të shtetit shqiptar dhe Anvi Rustemin vrasës kriminel. Por pati edhe gazetarë që zbuluan menjëherë të dhëna për Esat pashën. I tillë qe gazetari i “Lë pëti Parizienit”, Gaston Rishar, i cili një ditë pas atentatit shkruante në këtë gazetë: ”Esat pasha ishte një kalorës mesjetar, një personazh i një epoke pë po zhduket. Në një vilë të Selanikut, në rrugën mbretëresha “Olga”, ku jetonte gjatë luftës, ruhej nga roje të shumta e qen të mëdhenj dhe ëndërronte që të bëhej, falë Francës dhe Serbisë, mbret i Shqipërisë. I rrethuar nga tri femra që ishin gëzimi dhe drita e haremit të tij… Ishte një njeri që nga qytetërimi njihte karabinën automatike, rumin dhe kumarin, lojë me të cilën u zhvaste shuma tepër të mëdha ushtarakëve francezë, aq sa gjenerali Sarraj nisi t’i ndalonte ata të vizitonin kumarhanen e pashait shqiptar”.
    Në një gazetë tjetër franceze, “Lë Cri dë Pari”, vihej në dukje se Esat pasha vërtet i kishte sjellë shumë shërbime Francës dhe aleates së saj, Serbisë, sidomos gjatë tërheqjes së dhimbshme të trupave serbe nëpërmjet tokave shqiptare deri në Korfuz, të cilat pa këtë ndihmë do të kishin pësuar katastrofë të plotë, por kjo ndihmë ishte kthyer në tregti të ndyrë. Dhe kjo, sepse pas luftës, Esati kishte kërkuar që kreditë e dhëna me këtë rast të pagueshin me kursin e ri të dinarit, që ishte ngritur shumë, një allishverish për të cilin serbët kishin mbyllur një sy, për ta pasur atë veglën e tyre të bindur.
    Duke përmendur ushtarët e Esatit, gazeta të tjera franceze theksonin se ata ishin kusarë që u shkaktonin shumë telashe komandantëve francezë, sepse kudo që shkelnin, bënin kusarira. Në fillim, duke e ditur se cili ishte Esat pasha, gjenerali Sarraj, që ishte kryekomandanti i forcave franceze në Frontin e Lindjes me qendër në Selanik, kur Esati erdhi me 600 mercenarët e tij, mendoi ta kapte për zverku e ta dëbonte se nuk kishte nevojë për të, por u detyrua ta priste me nderimet e një gjenerali armate, kur u urdhërua nga Ministria e Luftës në Paris.
    Nuk mungonin dhe gazeta te tjera evropiane nga të cilat po citojmë gazetën italiane “Mesaxhero”, që pas atentatit të 13 qershorit shprehej kështu për Esat pashën dhe aleatët e tij serbë: ”Atdhetarët e vërtetë shqiptarë, ata që nuk kanë harruar të kaluarën plot dhembje, për shkak të serbëve, pjesa më e shëndoshë e shqiptarëve, ka kërkuar të luftojë intrigat e Esat pashës, të këtij njeriu të dhunshëm, ambicioz dhe të shtirur. Prova më e qartë është atentati i djeshëm. Esat pasha ra viktimë e padrejtësive të rënda që i kishte shkaktuar Shqipërisë”.
    Ndaj këtij akti nuk mund të qëndronte kurrsesi indiferente dhe qeveria e Tiranës, që nëpërmjet delegacionit të saj në Konferencën e Paqes në Paris dha për shtyp këtë deklaratë: ”Zyra e shtypit shqiptar është e autorizuar të deklarojë se Esat pasha nuk kishte asnjë funksion zyrtar, për më tepër kurrë nuk ka qenë kryetar i shtetit shqiptar ose kryetar i delegacionit shqiptar në Konferencën e Paqes, siç e kanë quajtur shumë gazeta franceze. Të drejtat e popullit shqiptar i mbron delegacioni i qeverisë së ligjshme, i zgjedhur nga Kongresi i Lushnjës, që ndodhet prej kohësh në Paris” (“Humanite”, 20 qershor 1920).
    Mund të shkëpusësh Çunat nga TIRONA, por kurrë nuk mund të shkëpusësh TIRONËN nga zemra e Çunave !!!

  5. #5
    Kalorës i Lirisë Maska e BlueBaron
    Anëtarësuar
    29-04-2002
    Vendndodhja
    Në Tironën e Ondrrave
    Postime
    5,046
    Në gjyq, dëshmitarët e Esat Pashës.


    Deri tani, të gjithë dinamikën e veprimeve të matura të Avni Rustemit për të gjetur çastin e duhur e pastaj për të vrarë Esat pashën e kemi njohur nga dëshmitë e atij vetë në procesin hetimor. Por tani le t’i njohim edhe nga këndvështrimi i njerëzve që e rrethonin Esat Pashën deri në çastin e atentatit të 13 qeshorit të vitit 1920.

    Për hetuesit, e rëndësishme ishte të dihej se ç’bënte Esat pasha ato ditë e për më tepër ato çaste para atentatit. Të parët që u morën për këtë qëllim në pyetje ishin Xhemil bej Vlora, nipi i Esat pashës, që kishte ardhur në Paris disa ditë më parë nga Bordigera e Italisë ku jetonte, për të takuar dajën e tij, dhe Elizë Dyfuri, e mbiquajtur përkëdhelisht Lizetë, një vajzë 22-vjeçare që ishte e dashura e Esatit, i cili priste ato ditë t’i vinte nga Zvicra e shoqja, Azize Hanëmi që ndodhej atje për një operacion në sy. Esat pashën, siç pohon Lizeta në hetuesi, e kishte njohur në Danvil gjatë një balloje ku Esati i kishte propozuar të bëhej dashnorja e tij kundrejt një page mujore prej 100 mijë frangash, shumë që duhet thënë se ishte përrallore për atë kohë.

    Nga dëshmitë e tyre del se Esat pasha gjatë gjithë kohës së qëndrimit të tij në Paris, ruhej nga armiqtë e shumtë që mund t’i kërcënonin jetën. Këtë ia kishte thënë vetë Esatit edhe Gani Toptani, një kushëri i tij që kishte takuar më parë në Paris. Teksa ora po shkonte 1300, Esat pasha kishte ftuar Xhemil bej Vlorën dhe Lizetën të drekonin në restorantitn e njohur “Kërmilli i artë”. Dhe ashtu bënë. Por në çastin kur ata po dilnin nga hotel “Kontinental”, siç deponon Xhemil bej Vlora në hetuesi, Esati u kujtua për një porosi që do t’u jepte rojeve të tij, të cilët nuk i ndaheshin asnjë çast, ndërsa ai dhe Lizeta u futën në makinë në pritje të Esatit.
    “Pasi dëgjuam dy të shtëna, - thotë Lizeta në hetuesi, - ne shikuam nga xhami i pasmë i dritares së makinës dhe pamë një njeri që hidhte përtokë një revolver, njeri të cilin unë nuk e njoh. (AQSH, fondi A. Rustemi, dosje 2, faqe 29). Edhe Xhemil Vlora i përmbahet këtyre deponimeve dhe shton se në ato çaste i tha Lizetës të dilnin menjëherë nga makina, sepse mund të rrezikoheshin. (Po aty). Në fakt ashtu bënë. Me të lënë makinën, u futën nga një derë në oborrin e pasmë të hotelit. Pas pak morën vesh se Esat pasha ishte vrarë nga një student shqiptar.
    Gjatë procesit hetimor u mor në pyetje edhe Aibari, roja i hotelit “Monmartrë”, që e kishte shoqëruar Avniun gjatë ditëve të para të qëndrimit të tij në Paris. Aibari pohon se e ka përcjellë Avniun në magazinat e armëve në Grand Bulvar, në vitrinat e të cilave Avniu ka parë lloje të ndryshme armësh, por pa blerë gjë. (AQSH, fondi A. Rustemi, dosje. nr. 2, faqe 15). Kjo e vë në dyshim hetuesin Dei, i cili, më pas, i kërkon shpjegime Avniut lidhur me këtë problem. Dhe Avniu i përgjigjet qetësisht se ai kishte ndërmend të blinte një revolver më të vogël, pasi i veti ishte tepër i madh dhe se do të shkonte në Bois de Boulogne, një ndër parqet më të bukura të Parisit, për t’u stërvitur për qitje (Po aty).
    Por të kthehemi të dëshmitarët e tjerë. Janë të gjithë ata që Avniu ka takuar në Paris. Pas Aibarit, Mithat Frashëri, anëtari i delegacionit shqiptar në Konferencën e Paqes, me të cilin Avniu ka pasur takim në hotelin “Kempbell”, thjesht për të njoftuar se ka ardhur të ndjekë kurse speciale për gjuhën frënge dhe për padagogji. Gjergj Goga, siç e kemi parë, sekretari personal i Esat pashës, të cilit gjithashtu Avniu i ka kërkuar ndihmë për këtë qëllim. Dhe ata pohojnë të njëjtën gjë.

    Avniu kërkon të bindë hetuesin Dei se ai nuk kishte ardhur për të vrarë Esat pashën, i cili rastësisht i doli përpara para hotelit “Kontinental”, kur priste të takonte Gjergj Gogën. Është e qartë se Dei nuk bindet kaq shpejt, por argumentet deri tani janë në favor të Avniut, i cili, pas një plani, sigurisht të përgatitur me imtësi që në Shqipëri, do t’i përmbahet deri në fund të procesit hetimor, sipas të cilit, vrasja e Esat pashës është krejt e rastit, e shkatuar nga tronditja shpirtërore që solli ballafaqimi me këtë tradhtar të kombit shqiptar.
    Gjatë procesit hetimor Avniu i tregon hetuesit për jetën e tij. Ka lindur në Libohovë, ka studiuar në gjimnazin e Janinës, pastaj ka shkuar në Kostandinopojë, ka studiuar në një kolegj turk. Më pas ka studiuar në një kolegj pedagogjik në Gjenevë. Në fillim të vitit 1914 është kthyer në vendlindje, ku është bashkuar me forcat vullnetare shqiptare që luftonin kundër trupave pushtuese greke. Në kohën e shpërthimit të Luftës së Madhe Botërore kthehet ne Libohovë, i sëmurë e një vit më pas shkon sërishmi në Janinë, përsëri për studime. Pastaj Avniu shpjegon se, pasi merr në Vlorë një diplomë italiane si mësues, jep mësime në Tepelenë e pastaj në Vlorë, por detyrohet të largohet se italianët nuk dëshirojnë që ai të japë mësim ashtu siç do ai. Më pas shkon me studime në Shën Mitër Koronë, një fshat italo-arbëresh, ku ndodhet një gjimnaz me tradita, e pastaj ndjek në Universitetin e Romës Fakultetin e Pedagogjisë. Por meqë dëgjon se arsimi francez është shumë më i përparuar, vendos të shkojë në Paris. (AQSH, fondi Avni Rustemi, dosja 2).

    Është e kuptueshme, siç vëren edhe studiuesi Jusuf Alibali në artikullin e tij studimor, “Avni Rustemi para organeve hetimore franceze,, (“Studime historike”, nr. 1964), se kjo nuk është e tërë jeta e Avniut. Ai, me qëllim shmang tërë veprimtarinë e tij politike e atdhetare, për të treguar se është thjesht një i ri të cilit i pëlqen të studiojë për t’u bërë mësues. Dhe këtë bën për t’iu shmangur akuzës që i rëndonte si shpata e Damokleut mbi kokë, sipas së cilës, ai kërcënohej për vrasje me paramendim, dhe të përforcojë pozitat e tezës së mbrojtjes, e cila e ka mbështetur tërë dispozitivin e saj të luftës gjyqësore në figurën e krimit të kryer në kushtet e tronditjes së thellë shirtërore”. (Po aty).
    Më pas Avniu i tregon gjyqtarit hetues Dei se në Romë ai ishte anëtar i një shoqate që “merrej vetëm me letërsi”, dhe që “vetëm një herë u mor me politikë”, dhe pikërisht kur protestoi “kundër ambicjeve greke, italiane e serbe në Shqipëri. ”Ka qëlluar, - shton ai, - që në bisedat tona private të flasim për Esat pashën. Të gjithë ne pa përjashtim, e konsideronim si një armik të vendit tonë, por kurrë nuk ishte bërë fjalë për ta vrarë. As unë dhe asnjë nga shokët e mi nuk kishim parashikuar ndonjë mundësi të tillë. Ne të gjithë e dinim se Esat pasha jetonte në Paris, por emri i tij as që është përmendur gjatë bisedave para nisjes sime”. (AQSH, fondi A. Rustemi, dosja nr. 2).

    Pra, arsyeja kryesore e ardhjes së Avniut në Paris, sipas dëshmive të tij, është vazhdimi i studimeve pedagogjike dhe përkryerja e frëngjishtes. Hetuesi Dei pandeh se tashmë e ka zënë ngushtë, kur i kujton se ai ka ardhur në Paris kur shkollat tashmë përfundojnë dhe nuk fillojnë në qershor. Dhe ngul këmbë që ai të rrëfejë arsyet e vërteta që natyrish ai i lidh me vrasjen e Esat pashës. ”A nuk është edhe ky një fakt, - vazhdon hetuesi Dei, - se studimet janë vetëm një preteks për udhëtimin tuaj në Paris?”.

    Por Avniu përsëri tregohet shumë i matur: ”Kur erdha, nuk u regjistrova në asnjë fakultet, sepse dëshiroja të shihja Parisin e të shëtis për disa ditë. Nga ana tjetër kisha ndërmend të ndjek disa kurse publike, ku nuk është nevoja për regjistrim paraparak. Në Paris njeriu ka mundësi të përfitojë për kohën që kalon në çfarëdo stinë e vitit që të jetë”.

    Para këtyre arsyetimeve gjyqtari hetues Dei, nuk di ç’të thotë. Sidoqoftë, ai është shumë këmbëngulës, ndaj vazhdon sulmin me argumente të tjera për ta mposhtur Avniun. Ka në dorë një fakt kompromentues. Shumën e të hollave që iu gjet Avniut pas arrestimit. Nuk janë pak, duke marrë parasysh se edhe ka shpenzuar gjatë dy javëve të qëndrimit para atentatit, edhe pse ka blerë një kostum. Ka shpenzuar për të ngrënë në hotel e për shëtitjet nëpër Paris, por prapëseprapë atij i kanë tepruar goxha para. Ndaj hetuesi përpiqet që shumën e parave ta përdorë si element fajësie.

    Por edhe kësaj Avniu i del përpara me zgjuarsi. Ai para se të niset për në Paris, ka kërkuar nga qeveria e Tiranës që, duke u nisur nga vështirësitë e transportit dhe vonesat e postës, bursa t’i jepej për gjashtë muaj njëherësh dhe, kur sërishmi hetuesi Dei nuk bindet, Avniu shton një fakt që ishte shumë vështirë për t’u verifikuar: se një pjesë tjetër të të hollave ia kishte dhënë Fejzoja, i vëllai, i cili qe kthyer nga Amerika në mars të vitit 1920. Avniu ka vajtur në Napoli dhe atje ka takuar të vëllanë, i ka kërkuar ta ndihmojë dhe është e kuptueshme që i vëllai ia ka dhënë atë shumë.
    Mund të shkëpusësh Çunat nga TIRONA, por kurrë nuk mund të shkëpusësh TIRONËN nga zemra e Çunave !!!

  6. #6
    Kalorës i Lirisë Maska e BlueBaron
    Anëtarësuar
    29-04-2002
    Vendndodhja
    Në Tironën e Ondrrave
    Postime
    5,046
    Surpriza e drejtësisë franceze. Avni Rustemi i pafajshëm.


    Më 9 shtator të vitit 1920, pas tre muaj hetimesh, prokurori i përgjithshëm i Republikës, Beguin, pasi shqyrtoi dosjen e Avni Rustemit, të përgatitur nga gjyqtari hetues Dei, hartoi aktakuzën. Në këtë aktakuzë, midis të tjerash, theksohej se: “Me të ardhur në Paris, i pandehuri Rustemi studion me imtësi hyrje-daljet e Esat pashë Toptanit dhe më 13 qershor të vitit 1920, në mesditë, ai ndodhet pranë hotelit “Kontinental” në rrugën “Kastilione”. Ai thotë se priste zotin Gjergj Goga, i cili do ta ndihmonte të gjente ndonjë shkollë private… Por në fakt, ai kërkonte gjeneralin, sepse po të ishte se ai do të donte të takohej me zotin Gjergj Goga, nuk kishte kuptim që të ishte i armatosur me një revolver”.(AQSH, fondi A. Rustemi, dosja 2).

    Pra, edhe në aktakuzë shtjellohet versioni i vrasjes me paramendim. Ky version, siç e shpjegon edhe juristi Jusuf Alibali në studimin e tij “Avni Rustemi para organeve hetimore franceze”, (Studime historike, nr. 2, 1964) mbështetet në rrethana të tilla të çështjes që, sipas akuzës, janë elemente fajësie të rënda, megjithëse të tërthorta: kthimi nga Roma në Shqipëri në fillim të majit dhe largimi nga Shqipëria më 21 maj për në Itali (dhjetë ditë më vonë u gjend në Paris), shuma e madhe e të hollave që iu gjet në momentin e kryerjes së krimit, kujdesi për të gjetur një banesë në Paris në afërsi të hotelit “Kontinental”, ku qëndron Esat pasha, qëllimi i studimeve që nuk justifikon zgjedhjen e kohës (viti akademik është në mbarim), prandaj studimet mund të jenë vetëm një preteks), arma dhe interesimi i tij për një magazinë armësh e një fushë për qitje”.

    Aktakuza mbyllet me këto fjalë: ”Nga ky grumbullim rrethanash rezulton qartë prova se Rustemi e ka paramenduar krimin e tij për të kryer këtë akt. I pandehuri është shtyrë nga një parti politike në Shqipëri që është kundër qeverisë së Esat pashës apo nga një urrejtje e thellë personale? Të dhënat dhe faktet nuk na lejojnë t’i përgjigjemi kësaj pyetjeje. Prandaj i lartpërmenduri akuzohet për vrasje me dashje të Esat pashës në Paris më 13 qershor 1920, vrasje kjo e bërë me paramendim. Krimi parashikohet prej neneve 295, 296 e 302 të Kodit Penal. Sanksioni i parashikuar nga neni 302 i Kodit Penal francez është dënimi me vdekje për krimin e vrasjes me dashje”.

    Është e qartë që Avniu e parashikonte që sado që do të argumentonte gjatë procesit gjyqësor se nuk kishte ardhur në Paris të vriste me qëllim Esat pashën, tezë së cilës iu përmbajt deri në fund të procesit hetimor e gjyqësor, prapë se prapë ekspertët e drejtësisë franceze, duke e shqyrtuar këtë proces deri në detajet më të imëta, do të përfundonin se ai kishte kryer një vrasje me paramendim. Avniu, i këshilluar doemos edhe nga shokët që morën këtë vendim, kishte hartuar planin që, pasi ta vriste Esat pashën, të mos bënte as përpjekjen më të vogël për të ikur, që do të shkaktonte dyshime për vrasje me paramendim, por të qëndronte, të merrte parasysh se do të rrihej, madje edhe barbarisht, siç u rrah, të deklaronte se e vrau këtë tradhtar, kur e pa befas përballë e kur lexoi në ballin e tij mizoritë që i kishte sjellë për vite atdheut e kështu shtiu mbi të.
    Kështu pra, prokurori i përgjithshëm, Begin, në aktakuzën e tij kërkonte dënimin me vdekje të Avni Rustemit. Dhe Avniu në një qeli të burgut “Sante”, priste ditën e gjykimit që mund të sillte edhe vdekjen e tij.


    Në Shqipëri, me reputacionin e heroit.
    Deri tani jemi marrë me rrethanat që sollën atentatin dhe personat që e përjetuan atë, që ishin dëshmitarë gjatë atyre dy javëve të qëndrimit të Avniut në Paris deri në çastin e atentatit. Por ç’ndodhte në Shqipëri gjatë kësaj përiudhe? Lajmi i vrasjes së Esat pashës në Paris u përhap me shpejtësi rrufeje jo vetëm në Shqipëri, por edhe në të tërë vendet ku kishte mërgimtarë shqiptarë. Në gazetën “Mbrojtja Kombëtare”, që botohej në Vlorë, akti i Avniut krahasohej me aktin e Vilhelm Telit. Populli i thuri vargje të tilla si: ”O Avni Rustem Marina, /Shkove burra, shkove trima /Në Paris ia bëre prima /Qëllove si vetëtima /Si vetëtima qëllove /Esat pashën ç’e rrëzove /Shqipqrinë ç’e shpëtove!”.
    Për të mbrojtur Avni Rustemin, mërgimtarët shqiptarë në Amerikë mblodhën 5 000 dollarë që të përballonin shpenzimet gjyqësore. Mbrojtjen e Avniut gjatë procesit gjyqësor e mori përsipër avokati i njohur Dë Monzi, i cili në takimet me të gjatë qëndrimit në burgun “Sante“, njohu nga afër se cili ishte Avniu dhe ç’e kishte shtyrë që më dy të shtëna revolveri t’i jepte fund jetës së Esat pashë Toptanit.
    Nga ana tjetër, lajmi se Avniu, pas procesit hetimor do të paraqitej në Gjykatoren e Senës me aktakuzën që e kërcënonte më vdekje, ngjalli një indinjatë të thellë në trojet shqiptare, por edhe jashtë kufijve të Shqipërisë, sidomos në Kosovë, të drejtat e popullsisë së të cilës Avniu i kishte mbrojtur me ngulm në debatet e Parlamentit shqiptar. Ja përse në këtë periudhë drejt Parisit vërshuan me qindra telegrame proteste, në të cilat kërkohej që Avni Rustemi të lihej i lirë pas aktit të tij që konsiderohej akt atdhetar.
    “Djali ynë në Paris u ndodh para një shushunje të madhe që s’është ngopur kurrë me gjakun e popullit, - shkruanin prindërit e Avniut në telegramin e tyre drejtuar Prokurorisë së Përgjithshme të Francës. - Ja përse e goditi për vdekje Esat pashën. Këtë ju duhet ta kuptoni fare qartë, ndaj ne si prindër e mbajmë kokën lart. Ai nuk ka kryer asnjë krim, përkundrazi, ka kryer një vepër atdhetare. Ne presim krahëhapur djalin tonë, ndërsa Shqipëria pret patriotin e guximshëm”. (“Dokumente e materiale historike”, Tiranë 1959).
    Kurse në telegramin e ardhur nga populli i Vlorës, ku Avniu kishte kaluar pjesën më të madhe të jetës së tij, thuhej: ”Populli i Vlorës në një miting madhështor të mbajtur sot, vendosi t’i bëjë thirrje ndërgjegjes së lartë të Gjykatës së Parisit. Ai pret që të merret parasysh dëshira e flaktë e popullit shqiptar që të lërë të lirë studentin tonë, Avni Rustemi, i cili bëri një vepër patriotike, duke qëlluar Esat Toptanin e duke çliruar atdheun tonë nga një e keqe shkatërrimtare”. (Po aty). Në mbrojtje të Avni Rustemit u ngritën edhe personalitete të mëdha franceze të kohës, si Rene Pino, Zhysten Godar, aktori i madh shqiptar, Aleksandër Moisiu e të tjerë. Pas tërë atyre telegrameve, letrave që vërshuan nga Shqipëria dhe diaspora shqiptare sidomos në Amerikë, në mbrojtje të Avni Rustemit, është e kuptueshme se procesi gjyqësor që nisi më 30 nëntor të vitit 1920 nuk do të zhvillohej pa tension dramatik. Do të ndalemi në momentet kulmore të këtij procesi.


    Momentet kulmore të procesit gjyqësor.

    “Ju ndërkaq viheni në lidhje me sekretarin e Esat pashës, zotin Gjergj Goga dhe akuza pretendon se prania juaj në Paris nuk ka pasur qëllim tjetër veçse të gjejë një çast të favorshëm për të vrarë atë që ju e konsideroni si autorin e të këqijave të atdheut tuaj”, - thotë kryetari i trupit gjykues, Drio.
    “Në asnjë mënyrë, - përgjigjet Avniu. Ishte që unë të kërkoja një njeri që të më përkrahte. Përveç kasaj, unë e kam takuar zotin Goga krejt rastësisht”.
    ”Vërtet rastësisht, - pyet jo pa dyshim kryetari.
    Dhe Avniu ia kthen jo pa ironi: ”Sigurisht që po. Rasti është mbreti i botës”.
    ”Pra, padyshim rasti ishte ai që ju shpuri gjithashtu te një armëtar për të blerë një revolver me të cilin të godisnit viktimën?”
    Avniu përsëri gjakftohtë përgjigjet: ”Kisha nevojë për një armë që të mbrohem”.
    “Por ajo ishte kaq e madhe. Nuk u bezdiste?”
    “Në Paris ka nga ata që e mbajnë më të madhe , - përgjigjet sërish Avniu dhe vazhdon: Unë kam ardhur në Paris që të kryej studimet, të perfeksionoj frëngjishten dhe të vizitoj Parisin”.
    ”Muaji i majit nuk është larg kohës së pushimeve. Kjo nuk është kohë e zgjedhur mirë për të filluar studimet. Përveç kësaj, ju e flisni mirë frëngjishten”.
    ”Oh, kam pasur kohë ta mësoj në burgun ‘Sante’, - përgjigjet Avniu (marrë nga “Gazet dë Tribuno”, 12 dhjetor 1920, Paris).

    “Unë nuk kam kërkuar të takohem me Esatin, - vazhdon ai. - I ndodh njeriut të dojë të sodisë një lule pranvere, por i ndodh edhe të ikë tutje nga një send i neveritshëm. Vetëm rasti deshi që sapo të ndodhesha ballë për ballë me Esatin, atë tradhtar, zemra ime prej patrioti të çohej peshë. Unë shtjeva mbi të. Ky ishte një gjest instiktiv, duhen kuptuar ndjenjat e një zemre shqiptari… Unë deklaroj se krahu im është ngritur nga një ndjenjë e lartë”. (po aty).

    Po dhe mbrojtja e avokatit Dë Monzi ishte e shkëlqyer. Kur kryetari i trupit gjykues, Drio, dhe prokurori Blosh Larok vazhdojnë të ngulin këmbë në tezën e vrasjes me paramendim, si një veprim plot mllef e pasion të Avni Rustemit, avokati Dë Monzi ngrihet e thotë:
    - Krim pasional? Sigurisht. Se nuk ka pasion më të madh se dashuria ndaj atdheut!

    Për fat të keq, veç disa kronikave të botuara në shtypin e atyre ditëve të procesit gjyqësor që zgjati tri ditë, mungojnë hollësi të tjera më të plota të këtij procesi që pati bërë bujë në Paris. Veç të tjerash, në Arkivin Qendror Shtetëror edhe sot e kësaj dite mungon dosja e plotë e këtij procesi. Sipas ligjeve franceze, kjo dosje do të tërhiqet vetëm pas 100 vjetësh.


    Vendimi i befasishëm për pafajësi.

    Gjenerali Sarraj, duke mbrojtur personalitetin e Esatit, ka deklaruar në gjyq: “Duhet të lesh mënjanë legjendën, sepse Esati ka pasur një legjendë. Unë nuk mundem veçse ta lëvdoj si njërin nga bashkëpunëtorët e mi. Unë i dhashë atij vetëm një gjë që ishte nën pushtetin tim “Kryqin e Legjionit të Nderit”.
    Gjenerali Guro nuk u paraqit si dëshmitar, por i dërgoi trupit gjykues një letër, ku edhe ai ngrinte lart Esat pashën, si aleat i denjë i ushtrisë franceze.
    Pati dhe ushtarakë që dëshmuan në këtë proces gjyqësor kundër Esat pashës si Anselmi Lamoku. ”Kam dëgjuar, - tha ky i fundit në sallën e gjyqit, - se Esati nuk gëzonte popullaritet në vendin e tij, mbase i kishte dhënë shumë toka Jugosllavisë”.

    Juria, pasi dëgjoi dëshmitarët e të dyja palëve, u tërhoq dhe pas jo më shumë se gjysmë ore dha vendimin e pafajësisë për Avni Rustemin. Ishte një vendim shumë i drejtë, i frymëzuar jo vetëm nga ndjenja e lartë e drejtësisë, por edhe kryesisht nga fakorë të konjukturës politike të kohës, - shpjegoi juristi Jusuf Alibali, (“Avni Rustemi para... Studime historike nr. 2, 1964).


    Ende nuk është hapur dosja e procesit gjyqësor.

    Të gjitha ato që kanë mbetur pa u zbuluar rreth atentatit të Avni Rustemit.
    Kur po kthehej nga Parisi për në Shqipëri, Avni Rustemi u ndal në Romë dhe është e natyrshme që u takua me bashkëstudentë shqiptarë të universitetit të atjeshëm ku vazhdonte studimet. Por me asnjërin syresh nuk mësohet të ketë folur rreth atentatit. Në fakt, ne as edhe sot nuk dimë hollësi të tjera të domosdoshme që i dinte vetëm Avniu. Hollësi për gjashtë muajt e qëndrimit në burgun “Sante”, gjatë periudhës së hetuesisë, si u kurua nga plagët e rënda që mori nga goditjet e furishme të qytetarëve që e rrahën menjëherë pas atentatit, duke e pandehur kriminel; ç’qëndrim mbanin policët që e mbikëqyrnin gjatë burgimit; të dhëna për bisedat që bënte me avokatin e tij mbrojtës, Dë Monzi; a kishte shqiptarë që e vizituan në qeli dhe që qenë të pranishëm në procesin gjyqësor; u kthye vetëm për në Shqipëri apo me shokë shqiptarë… Nuk dimë të paktën emrin e njërit nga anëtarët e jurisë që brenda gjysmë ore, të ndikuar nga fjala e Avni Rustemit dhe e avokatit mbrojtës, Dë Monzi, kuptuan se Avniu kishte vrarë një tradhtar të çështjes kombëtare shqiptare dhe i dhanë pafajësinë. Nuk dimë nëse vendimi i jurisë ishte i njëzëshëm, apo kishte nga ata që mbështetën aktakuzën për dënimin e tij me vdekje. Nuk dimë se ç’mund të kenë thënë më pas gjyqtarët francezë që përgatitën dënimin e Avniut me vdekje, nuk dimë si reaguan në këto rrethana disa nga njerëzit e rrethit të Esatit. Nuk kemi, së fundi, siç e kemi theksuar, as dosjen e procesit gjyqësor që do të qartësontë shumë nga këto enigma.
    Mund të shkëpusësh Çunat nga TIRONA, por kurrë nuk mund të shkëpusësh TIRONËN nga zemra e Çunave !!!

  7. #7
    Kalorës i Lirisë Maska e BlueBaron
    Anëtarësuar
    29-04-2002
    Vendndodhja
    Në Tironën e Ondrrave
    Postime
    5,046
    Vrasës i pabesë, që kapardisej në Tiranë si shpëtimtari i atdheut.

    Eqrem bej Vlora, në kujtimet e tij shkruan se Avni Rustemi ishte një student i pasuksesshëm që kërkonte të bënte emër me vrasjen e Esat pashës dhe se ishte vetëm një vegël në duart e kundërshtarëve të Esat pashës.


    ”Që Esat pasha në çdo vend të qytetëruar do ta kishte hak trekëmbëshin, kjo nuk diskutohet. Por që ai u eliminua në këtë mënyrë të padenjë, kjo nuk i nderon aspak anëtarët e asaj qeverie” (faqe 166).

    Deri tani nga të vetmit studiues që hedh poshtë atentatin e Avni Rustemit, madje e ul figurën e vetë Avniut, duke e quajtur “karagjoz politik”, është personaliteti i njohur politik shqiptar, Eqrem bej Vlora.

    Në vëllimin e dytë të librit të tij ”Kujtime” (1912-1925), ai jep në këtë mënyrë një pasqyrë realiste të gjendjes në Shqipëri gjatë periudhës së parë të vitit 1920:
    “Menjëherë pas formimit të qeverisë së re të Tiranës, të gjitha krahinat e njohën autoritetin e saj (20 shkurt 1920). Sidoqoftë, zona të gjera të vendit mbeteshin ende nën pushtimin e huaj: Shkodra, Korça, Pogradeci nën francezët, viset në veri të Drinit nën sundimin serb, Vlora dhe disa pikëmbështetje të tjera nën varësinë italiane”. (faqe 163).

    Më poshtë vazhdon: ”Ndërkaq, Esat pasha me banim në Paris, u dha urdhër njerëzve të tij në Shqipërinë e Mesme që të mblidheshin dhe, kur të vinte rasti, të rrëzonin qeverinë. Përballë këtij rreziku, qeveria u përpoq t’i bindte me të mirë esatistët se përmbysja me dhunë e qeverisë do t’i rizgjonte dëshirat dhe nepset e fqinjëve për të rrëmbyer troje shqiptare dhe kjo mund të ishte rrezik i madh për ekzistencën e Shqipërisë së lirë. Pas kësaj paraqitjeje mjaft objektive të gjendjes së Shqiqërisë në atë periudhë, Eqerem bej Vlora fajëson drejtpërdrejt qeverinë e Tiranës, si nismëtare të atentatit: ”Që Esat pasha në çdo vend të qytetëruar do ta kishte hak trekëmbëshin, kjo nuk diskutohet. Por që ai u eliminua në këtë mënyrë të padenjë, kjo nuk i nderon aspak anëtarët e asaj qeverie”. (faqe 166).

    Pastaj Eqerem Vlora vazhdon: ”Esatistët filluan befas të ndërmarrin veprime të dhunshme. Ata prenë linja telegrafike dhe telefonike, vendosën njerëz të armatosur në ura dhe qafa dhe, kur qeveria nisi të marrë masa të rrepta, ata nën komandën e Osman Balit, rrethuan madje Tiranën... Edhe një herë qeveria u përpoq të mirrej vesh me rebelet… Ndërkohë problemi u zgjidh vetiu me vrasjen e Esat pashës…”.

    Ndërsa për Avni Rustemin shkruan: ”Një djalosh i quajtur Avni Rustemi, një nga studentët më të pasuksesshëm, që me këtë vrasje donte të bënte emër, nuk ishte veçse një vegël në duart e kundërshtarëve të Esat pashës. Ata i dhanë mjetet e nevojshme për këtë vrasje dhe morën njëherësh përsipër mbrojtjen e tij para gjykatës franceze. Se kush ishin, këtë sot vështirë ta thuash...

    Eqrem bej Vlora shpreh habinë e tij të madhe se si: ”Drejtësisa franceze, me një manipulim të habitshëm të ligjit, e nxori të pafajshëm Avni Rustemin dhe që qeveria shqiptare e shpalli hero dhe e bëri deputet, kur ky vrasës i pabesë, pra, kapardisej nëpër Tiranë si ndonjë shpëtimtar i atdheut”. (po aty)


    Atentatet më të famshme në historinë botërore.

    Më 14 prill 1865 vritet në teatrin “Ford” të Uashingtonit presidenti amerikan, Abraham Linkoln. Vrasësi, aktori Xhon Buth, pasi arrin të depërtojë pa u diktuar deri në lozhën presidentore, e qëllon Linkolnin me revolver dhe nga prapaskena arrin t’i hipë një kali që e priste jashtë teatrit. Arratia e tij zgjat deri më 26 prill, kur pikaset nga forcat e ushtrisë dhe zbulimit në një fermë në Virxhinia. Pas një luftimi gjendet i vdekur.

    Më 28 qershor 1914 studenti boshnjak, Gavrillo Princip, anëtar i organizatës terroriste “Dora e zezë;” vret për motive nacionaliste në Sarajevë, Franc Ferdinandin, princin trashëgimtar të Austro-Hungarisë. Përpiqet të ikë, por kapet. Dënohet dhe vdes katër vjet më pas nga tuberkolozi. Ky atentat, siç dihet, shërbeu si shkas për fillimin e Luftës së Parë Botërore.

    Më 30 gusht 1918, Fania Kapllan me origjinë çifute, anëtare e së ashtuquajturës Parti Social Revolucionare qëllon me revolver Leninin gjatë një mitingu në Petrograd, sepse ai nuk kishte urdhëruar t’i bëhej atentat Carit, kur ndodhej në Kiev më 1911. Kërkon të fshihet, por kapet dhe pushkatohet më 3 shtator të atij viti.

    Më 22 nëntor të vitit 1963, gjatë vizitës së tij në Dallas (Teksas), ndërsa udhëtonte me një makinë të hapur, vritet presidenti amerikan Xhon Kenedi. Pavarësisht se atentatori, Li Osvold, që humbi gjurmët, u kap pas disa ditësh, ende kanë mbetur mister shkaqet e vrasjes së Kenedit, sepse Osvoldi u vra teksa dilte nga zyra hetimore nga Xhak Rabini, me preteksin, siç u shpreh më pas ai, se nuk mund t’ia falte atij që “vrau presidentin tim”.

    Më 1981, vetëm disa muaj pasi ishte vendosur në Shtëpinë e Bardhë, presidenti amerikan, Ronald Regan, qëllohet me revolver nga Xhon Hinkli, një shkrimtar që merrej me skenare filmash. Më 1982 ekspertiza e nxori atentatorin me të meta mendore. Ai edhe sot vuan dënimin në një spital psikiatrik.

    Në tetor 1986 vritet krejt papritur kryeministri suedez, Olaf Palme. Ende edhe sot nuk dihet se cili është atentatori dhe cilat ishin shkaqet që e shtynë të bënte këtë vepër.

    Në vitin 1981, ndërsa merrte pjesë në një paradë ushtarake në Kairo me rastin e përvjetorit të rimarrjes së Kanalit të Suezit, ekzekutohet në tribunë presidenti egjiptian, Anvar Sadat. Atentatorët janë ushtarakë që zbresin nga një makinë, e cila merrte pjesë në këtë paradë. Shkaqet e vrasjes lidheshin me kundërshtimin e politikës së Sadatit për afrimin me Izraelin. Më pas del se disa nga autorët e atentatit ishin bashkëpunëtorë të Bin Ladenit, ndër të cilët dhe i famshmi Al Zavari.

    Në 1984 vritet kryeministrja e Indisë, Indira Gandi. Autorët e atentatit janë dy roje të gardës së saj personale nga fisi Sik që e vranë në shenjë hakmarrjeje ndaj Gandit, e cila kishte urdhëruar që trupat e ushtrisë indiane të futeshin në “Tempullin e Artë” të fisit Sik, i cili dyshohej se ishte kthyer në strehë terroristësh. Atentatorët që u orvatën të arratiseshin, kapen dhe dënohen me pushkatim.

    Në pranverë të vitit 1995, pas përfundimit të një mitingu, qëllohet për vdekje kryeministri izraelit, Itzhak Rabin. Atentatori është Zhigal Amir, student ortodoks izraelit, i lidhur me grupe ekstremiste. Bën përpjekje të ikë, por kapet dhe pohon se qëlloi mbi Rabinin se ishte kundër marrëveshjes së tij me presidentin palestinez Arafat. Dënohet më burgim të përjetshëm.

    Në mars 2003 vritet me atentat të kryer me pushkë me dylbi, kryeministri serb, Xhinxhiç. Autori Zvezdan Jovanovic kapet pas disa ditësh.

    Në shtator të vitit 2003 qëllohet me thikë dhe vdes ministrja e Jashtme e Suedisë, Ane Lind. Atentatori është serbi Mihajllo Mihajlloviç, që arrestohet pas disa javësh. Pohon se e kishte vrarë Lindin si shenjë proteste kundër përkrahjes që ajo u kishte dhënë trupave të NATOS-s për bombardimin e Serbisë. Dënohet me burgim të përjetshëm.


    Atentate nga historia e Shqipërisë.

    Mars i vitit 1906. Çerçiz Topulli me shokë të çetës së tij vrasin komandantin turk të Gjirokastrës dhe humbin gjurmët. Po të kapeshin, do të dënoheshin me vdekje.

    Mars i vitit 1913. Osman Bali, dora e dhjathtë e Esat pashës, vret natën Hasan Riza pashën, komandantin turk të garnizonit të Shkodrës, që Esati t’ia lërë të lirë këtë qytet malazezve. Osman Bali fshihet dhe humb gjurmët.

    Në shkurt të vitit 1923, Beqir Valteri i bën atentat Ahmet Zogut në sallën e Parlamentit në Tiranë, por vetëm e plagos lehtë dhe vetë fshihet në nevojtore.

    Në prill të vitit 1924, Zogu paguan një farë Isuf Reçi, i cili vret Avni Rustemin, kundërshtarin e tij me të rrezikshëm politik, prapa shpine. Vritet më 1944 nga forcat partizane, si bashkëpunëtor i pushtuesve gjermanë.

    Në mars të vitit 1925, sipas historisë së shkruar para regjimit, Zogu vë gjithashtu një agjent të tijin që parpara hotelit “Kavur” në Bari, t’i bëjë atentat Luigj Gurakuqit, i cili vdes pastaj në spital nga plagët. Vrasësi i mbrojtur edhe nga policia bareze, arrin të humbasë gjurmët.

    Në verë të vitit 1926, Myslim Peza, pas një atentati në Tiranë, qëron hesapet me kryebanditin Osman Bali dhe arrin t’u shpëtojë ndjekjeve.

    Më 1931, Aziz Cami me shokë i bëjnë atentat Zogut, kur po dilte nga Teatri i Operës së Vienës. Por vritet vetëm adjutani tij, Llesh Topallaj. Atentatorët përpiqen të shpëtojnë, por kapen dhe dënohen.

    Më 14 gusht të vitit 1933, njerëz të Zogut, sipas variantit të historisë së shkruar gjatë regjimit, i bëjnë atentat Hasan Prishtinës në Selanik dhe, pasi e vrasin, humbin gjurmët.

    Gjatë Luftës Nacional Çlirimtare, guerrilasi Myslim Keta kryen disa atentate kundër agjentëve të rëndësishëm fashistë dhe në të gjitha rastet shpëton.

    Shtator 1998. Azem Hajdari, një ndër themeluesit e Partisë Demokratike, vritet pas një atentati në Tiranë.
    Mund të shkëpusësh Çunat nga TIRONA, por kurrë nuk mund të shkëpusësh TIRONËN nga zemra e Çunave !!!

  8. #8
    Shpirt Shqiptari Maska e Albo
    Anëtarësuar
    16-04-2002
    Vendndodhja
    Philadelphia
    Postime
    30,122
    Postimet në Bllog
    17
    Vrasja e Avni Rustemit cilët ishin autorët e vërtetë


    Pas panikut që pasoi vrasjen e dy turistëve amerikanë, kur akuzat për autorësinë e Zogut arritën në kreshendo, pikërisht Ai ishte më i interesuari për të mos i faturuar ndonjë vrasje tjetër të bujshme, çka do t’ia rrëzonte përtokë reputacionin dhe do t’ia rrënonte me siguri karrierën.
    Megjithëse e dinte se Avni Rustemi ishte kryeideatori i atentatit, pasi u informua me siguri se esadistët donin të hakmerreshin ndaj Avniut duke shfrytëzuar anarkinë dhe kaosin, Zogu e njoftoi Avniun për vrasjen e planifikuar dhe i kërkoi të largohej me shpejtësi nga vendi. Avniu e kuptoi rrezikun dhe menjëherë depozitoi kërkesën për vizë në Ambasadën e SHBA-ve, por nuk arriti ta marrë atë.

    Avniu, i cili sikundër shkruan Eqerem bej Vlora, gjithë kohës fliste për eleminime fizike dhe i planifikonte ato, bëri gabim të rëndë që i nënvleftësoi njerëzit e Esatit, teksa vazhdonte sfidën e kalimit çdo ditë nën dritaret e sarajeve të tyre që ndodheshin bash në vendin ku u bë atentati. Vërtet Esat Pasha kish lënë vetëm dy vajza, por byrazeri dhe miku i tij Osman Bali, ishte betuar për t’ia marrë hakun dhe kërkonte vetëm rastin. Dhe për këtë vrasje pagoi Isuf Reçin, të cilit i premtoi edhe pronësinë e mullirit të famshëm të Toptanajve, në të cilin Reçi punonte si mullixhi.

    Mustafa Kruja ka shkruar në kujtimet e tij se Isuf Reçi, një vit para vrasjes së Avni Rustemit, kishte dashur të vriste Ahmet Zogun.
    Pas atentatit ndaj Avni Rustemit, policia mori deponimet e 28 dëshmitarëve okularë, nga të cilët vetëm 4 pohuan identitetin e atentatorit. Të tjerët, të trembur, bënë të paditurin, ndërsa të gjithë e morën vesh se kjo vrasje ishte një gjakmarrje e pastër sipas zakoneve shqiptare, madje mendjet e kthjellëta kurrë nuk dyshuan për Zogun, megjithëse edhe kësaj here Ai u kryqëzua nga akuzat për vrasjen e Avniut, dhe kjo nuk ishte tjetër veçse punë e kundërshtarëve të Tij, të cilëve preteksti për të bërë katrahurën, tashmë u ra nga qielli.


    Vdekja e Avni Rustemit më 22 prill 1924, në spitalin e Tiranës, ishte Bingoja që i ra opozitës për të marrë pushtetin, ndërkohë që vendi dhe rendin publik morën tatëpjetën dhe anarkia filloi të bëjë ligjin.
    Opozita politike u dha kushtrimin shqiptarëve për vrasjen e Avni Rustemit dhe me këtë rast nxiti kundërshtarët e qeverisë për ta shfrytëzuar këtë vrasje si trampolinë drejt pushtetit. Pasi gjeti “vrasësin”, që të nesërmen, akoma pa u varrosur i ndjeri, opozita organizoi një demostratë kundër qeverisë së Shefqet Bej Vërlacit dhe më pas demonstruesit e ndërkryer protestuan edhe para shtëpisë së Zogut duke e akuzuar se kish gisht në vrasje.
    Pa humbur kohë, opozita filloi organizimin e një lëvizjeje të armatosur kundër qeverisë për marrjen me çdo kusht të pushtetit.
    Në Vlorë filluan të mblidhen të gjithë kundërshtarët e qeverisë, që nxitën hapur marrjen e pushtetit me dhunë.
    “Opozita e shfrytëzoi deri në fund gjakun e Avniut. Të gjithë tok, opozitarët u nisën për në Vlonë, tue shpallë se në Tiranë s’kishte ma as siguri jete. Por shkaku e qëllimi i vërtetë ishin me përgatitun nji kryengritje kundra Zogut. Qeveria qe paralizue kryekëput. S’ishte ma e zonja me marrë asnji masë kundra tundulluesve”.
    (Mustafa Kruja “Anthologji historike”, faqe 306).

    Zogu i lidhi pension babait të Avni Rustemit


    Më 1 korrik 1930, prefekti i Gjirokastrës Kolë Rodhe, njofton Zyrën Sekrete:
    “Bashkëngjitun, kemi nderin t’ju paraqisim dëftesën mbi marrjen në dorëzim të 400 fr. ari, nga ati i të ndjerit Avni Rustemit, përcjellë prej kësaj prefekture me shkresën nr. 62. res., datë 23 qershor 1930 të N/prefekturës Libohovës”.
    (AQSH, F 152/13, V1930, D 252, fleta 2).

    Ministri i Financave Kolë Thaçi, më 11 korrik 1930, i dërgon këtë shkresë kryeministrisë:
    “Mbi shkresën nr. 1752, datë 2 korrik 1930, t’asaj P.T. Kryeministrie, kemi nderin t’ju njoftojmë se Naim Rustemi (babai i Avniut – shën. i A.K.)..., në themel të vendimit nr. 476 datë 10 nëntor 1927 të Këshillit Ministruer, të përmendunit iu lidh nji pagesë e përmujshme prej fr. ari 100, për t’u pague nga fondi i mësheftë i Ministrisë së Punëve të Mbrendshme.
    Lutemi prandej asaj P.T. Kryeministrisë, që për pagesën e rrogës së z.Naim Rustemit, t’intervenoni pranë Ministrisë së Punëve të Mbrendshme.
    (AQSH, F 152/13, V1930, D 252, fleta 3).

    Më 16 korrik 1930, kryeministri Pandeli Evangjeli i dërgon këtë shkresë Ministrisë së Punëve të Brendshme:
    “Këtu ngjit ju dërgohet kopja e shkresës nr. 93/82, datë 11 korrik 1930, e Ministrisë së Financavet, me lutje telegrafike të z.Neim Rustemit, me lutjen tonë që të paguhet shpërblimi i tij simbas vendimit nr. 476, datë 10 qershor 1927 të Kshillit Ministruer. Përfundimi të na njoftohet.
    Më 14 gusht 1930, Zyra Sekrete i dërgon këtë shkresë Prefekturës Gjirokastër:
    “Ngjitur ju dërgohen fr. ari 400, të cilat duhet t’ia paguani z.Naim Rustemit si kompetenca të tij për prill – maj – qershuer e korrik të këtij viti, dhe t’i dërgoni dëftesën e tij për rregullim.
    Më 23 gusht 1930, prefekti i Gjirokastrës njofton Zyrën Sekrete:
    “Për kompetencë, kemi nderin këtu ngjitur, t’ju paraqesim dëftesën e marrjes në dorëzim të shumës fr. ari 400 prej t’interesuemit, dhe e vërtetueme rregullisht”.

    Armand ZISO

    4 Shtator 2007
    Albania

  9. #9
    i/e regjistruar Maska e Bajraku
    Anëtarësuar
    29-02-2012
    Postime
    498
    "Marrëdhëniet e Esat Pashë Toptanit me qeverinë serbe"

    NGA: FATMIRA NIKOLLA


    TIRANE-Kush ishte Esat Pashë Toptani dhe cilat ishin marrëdhëniet e vërteta mes tij dhe qeverisë serbe?! Kush ishte njeriu që pretendoi të bëhej mbret i shqiptarëve, por përfundoi i varrosur mes ushtarëve serbë, në varrezat serbe të Parisit? Përgjigja na vjen nga këshilltari i ish-presidentit serb Tadiç. Botimet "IDK" kanë sjell]ë në shqip librin me titull "Qeveria serbe dhe Esat Pashë Toptani". Studimi i historianit serb Dusan T. Batakoviç është bazuar në dokumentet e Beogradit dhe dritë pikërisht mbi një sërë anësh të panjohura të marrëdhënieve mes Esat Pashë Toptanit dhe shtetit sllav, duke plotësuar kësisoj përfytyrimin tonë për pashain që për pothuaj një shekull është etiketuar si njollë e zezë në histori. Duke qenë një nga figurat qendrore të jetës e politikës shqiptare në vitet e trazuara kur u ngjiz shteti i pavarur shqiptar, i kudondodhuri Esat Pashë Toptani, ka mbetur në kujtesën kolektive të shqiptarëve si sinonim i tradhtarit. Së fundmi, me nismë të Kryeministrit Berisha, janë bërë përpjekje për ta rehabilituar figurën e pashait? Po a është kjo e mundur? Deri më sot, ai vijon të kujtohet si njeriu që për hir të interesave të veta për pushtet, qe gati të shiste interesat e popullit e vendit të vet. Botuesi i librit, Z. Pirro Misha, tha dje për "Gazeta Shqiptare" se libri i sipërpërmendur hedh dritë mbi marrëveshjet e fshehta që Esat Pasha ka bërë me qeverinë serbe, dhe janë disa e jo një e tillë. Sipas tij, autori është bazuar mbi arkivat e Beogradit. Sa iu përket atyre duhet shtuar se janë ende të padepërtueshme për shqiptarët.
    Libri
    Pirro Misha i "Botimeve IDK" sqaron përse e boton në shqip këtë portretizim serb të Esat Pashës. "E pamë të udhës e me interes ta sjellim në shqip këtë punim të historianit serb Dusan T. Batakoviç, me mendimin se botimi i saj në shqip do përbëjë një kontribut të padyshimtë për të plotësuar përfytyrimin tonë për një periudhë aq të rëndësishme të historisë së Shqipërisë, siç është ajo mes luftërave ballkanike dhe Konferencës së Parisit, me të cilën përmbyllet Lufta e Parë Botërore", thotë ai. Misha vëren se punimi i D.T.Batakoviçit paraqet pikëpamjen e mënyrën se si Serbia i shihte (dhe i sheh) zhvillimet që sollën lindjen e një shteti shqiptar në atë periudhë sa të turbullt aq dhe me rëndësi për historinë tonë, por pikërisht kjo, sipas tij, e bën këtë libër interesant. Por, arsyeja kryesore ka të bëjë në fakt me vetë titullin e studimit. Libri ka informacion të pasur për një prej figurave, padyshim qendrore të historisë së asaj periudhe, por njëkohësisht dhe ndër më famëkeqet e historisë së re të Shqipërisë. "Esat Pashë Toptanin, që siç dihet historia në përgjithësi e ka damkosur si tradhtar, kohët e fundit ka pasur një sërë përpjekjesh që drejtpërsëdrejti apo indirekt, janë përpjekur ta rehabilitojnë", -kujton Misha. Në fund, dhe së fundi, s'ka dyshim se nëpërmjet referencave të shumta që sjell, punimi Dusan T. Batakoviçit përbën një kontribut për të gjithë ata studiues që një ditë do vendosin të thellohen në njohjen e asaj që gjendet në arkivat e bibliotekat e Serbisë për sa i takon historisë së Shqipërisë dhe marrëdhënieve serbo-shqiptare.
    Autori
    Dusan T. Batakoviç, lindur në vitin 1957, është një diplomat dhe historian serb, i specializuar në historinë bashkëkohore të Serbisë dhe atë të Ballkanit. Aktualisht Batakoviç mban postin e As.Prof. në Universitetin e Beogradit, si dhe atë të zv.drejtorit në Institutin e Studimeve Ballkanike, në Akademinë e Shkencave dhe Arteve të Serbisë. Për disa vjet Dusan T. Batakoviç shërbeu si këshilltar i Presidentit Tadiç. Një pjesë e mirë e veprës së tij u kushtohet pikërisht marrëdhënieve shqiptaro-serbe.
    Studimi i marrëdhënieve serbo-shqiptare gjatë dekadave të para të shekullit të njëzetë s'është veçse thjesht një ndër kapitujt e një historie të gjatë të shënjuar nga konfliktet, të cilat, shpesh në pikat e tyre kulmore, kanë marrë tiparet e një konfrontimi politik afatgjatë dhe të një intolerance fetare, që me kalimin e shekujve kanë ardhur duke u thelluar. Këndej rrjedh detyrimi përse proceset që po studiohen duhet të shihen e përkufizohen në një perspektive historike. Figura e Esat Pashë Toptanit, të cilin e tërë historiografia shqiptare e ka dënuar si tradhtarin më të madh të popullit të vet (për shkak të bashkëpunimit me Serbinë), na shfaqet në një dritë tjetër, ideologjikisht të paanshme. Epoka që shkon nga fillimi i Luftërave Ballkanike deri në fundin e Konferencës së Paqes së Parisit, u shënjua nga një shpërthim i ri i konflikteve të vjetra mes serbëve dhe shqiptarëve. Portës iu parashtrua kërkesa për krijimin e një Shqipërie autonome, të përbërë nga vilajetet e Kosovës, Shkodrës, Manastirit (Bitolje) dhe Janinës - të gjitha këto zona etnikisht të përziera, ndaj të cilave kishin pretendime (për arsye të qenësishme) të gjitha shtetet fqinje ballkanike. Duke refuzuar bashkëpunimin që iu ofrua nga aleatët ballkanikë, kryesisht Serbia dhe Mali i Zi, udhëheqja e Lëvizjes Kombëtare Shqiptare vendosi që, duke mbrojtur Turqinë, t'i qëndronte idesë të një Shqipërie të madhe etnike.

    (d.b/GazetaShqiptare/BalkanWeb)

  10. #10
    Keto dite po shfletoj arkivat e gazetave hollandeze dhe nder to hasa faktin se Avni Rustemi ka vrare Esat Pashe Toptanin, si shenje hakmarrje ndaj eleminimit te Nedjeki beut (dyshohej se Esat Pasha kishte dore ne eleminimin e tij), qe ishte caktuar nga Porta e Larte per te drejtuar Shqiperine.

    Mirepo per permbajtjen e arkivave (gazetave) hollandeze per Shqiperine do te hapi nje teme te veçante sepse eshte me shume interes. Aty ka shkrime qe flasin per problematiken shqiptare qe nga shekulli i 19-te deri ne ditet e sotme.

    Tash duhet te gjejme se kush ishte Nedjeki beu?
    Fotografitë e Bashkëngjitura Fotografitë e Bashkëngjitura  
    Ndryshuar për herë të fundit nga DYDRINAS : 24-11-2012 më 09:16

  11. #11
    Permbajtja e artikullit:

    Slachtoffer van bloedwraak.
    Albaneezen, kort geleden te Weenen aangekomen, beweren dat Essad Pasja's dood te wijten is aan een bloedwraak. In November 1915 zou Essad Pasja een moordenaar hebben gelast minister Ned jekibey te vermoorden. De neef van den vermoorden nam naar oud gebruik de plicht van de bloedwraak op zich. De jonge man volgde Essad Pasja ruim vier jaar en doodde hem den 13en Juni 1.1. to Parijs.

    http://kranten.kb.nl/view/article/id/ddd%3A010493988%3Ampeg21%3Ap001%3Aa0009

    Perkthimi

    Viktime prej hakmarrjes.

    Shqiptare, qe para disa kohesh mberriten ne Vjene, rrefyen se vdekja e Esat Pashes kishte ardhur si rrjedhoje e hakmarrjes. Ne Nentor te vitit 1915 ia kishte nxitur vrasjen e ministrit Nedjeki beu (emri ndoshta nuk eshte paraqitur sakte nga shtypi i athershem hollandez) - shenimi im). Nipi i te ndjerit (Anvi Rustemi - shenimi im), sipas zakoneve te vjetra, mori persiper qe te marre hak. Ai e ndoqi Esat Pashen per 4 vite dhe e vrau ate me 16 Qershor ne Paris.
    Ndryshuar për herë të fundit nga DYDRINAS : 24-11-2012 më 09:24

Tema të Ngjashme

  1. Atentati ndaj Lul Berishës me raketë tokë-ajër.
    Nga BlueBaron në forumin Tema e shtypit të ditës
    Përgjigje: 27
    Postimi i Fundit: 26-11-2009, 20:47

Fjalët Kyçe për Temën

Regullat e Postimit

  • Ju nuk mund të hapni tema të reja.
  • Ju nuk mund të postoni në tema.
  • Ju nuk mund të bashkëngjitni skedarë.
  • Ju nuk mund të ndryshoni postimet tuaja.
  •