Pas një shkëputjeje 5-mujore, kroati rikthehet të drejtojë blutë me objektiva të qarta për një vend në Europë 01-02-2006
Luka Bonaçiç rimerr frenat e DinamosAurel Celibashi
Rikthehet "diktatori" te Dinamo. Që nga dita e djeshme, Luka Bonaçiç është emëruar sërish trajner i skuadrës, duke zënë kështu vendin e lënë bosh pas shkarkimit të Ivan Kataliniçit. Ishte ora 15:10, kur kroati shkeli barin e kompleksit "Dinamo" i veshur sportiv dhe me një çantë të vogël, të hedhur në krahë. Menjëherë pas tij në klub mbërritën edhe zyrtarët e tjerë të lartë, duke filluar nga zëvendëspresidenti Avni Braçe, drejtori ekzekutiv Mehdi Bushati dhe drejtori teknik Mujo Targaj. Të gjithë së bashku për disa minuta u mblodhën në sallën kryesore të konferencave, pa praninë e gazetarëve, ku u bë edhe prezantimi i radhës. I pari që e mori fjalën ishte zëvendëspresidenti Avni Braçe, i cili përpara lojtarëve u shpreh: "Që sot (dje) Luka Bonaçiç është trajneri i ri i skuadrës, por që ju e njihni shumë mirë, pasi edhe më parë e ka drejtuar ekipin. Me këtë rikthim të tij, nga ana jonë si presidencë kemi besim të plotë se shumë shpejt do t'u riktheheni fitoreve. Besojmë shumë te puna e Bonaçiçit dhe për këtë i kemi thënë se do të ketë dorë të lirë në ekip, me qëllimin e vetëm arritjen e synimit për titullin kampion,"- mësohet të ketë bërë të ditur Braçe.
Nuk munguan as fjalët inkurajuese të kroatit Bonaçiç përpara lojtarëve, ku fillimisht ai u justifikua me faktin se ishin problemet familjare që e shkëputën për afro pesë muaj. "Djema, sot jam sërish pranë jush, për të vazhduar atë punë të ndërprerë që nisëm së bashku në muajt e verës. Për arsye familjare nuk pata mundësi të vazhdoja atëhere, teksa tani jam rikthyer sërish për ta çuar Dinamon sa më lart të jetë e mundur. Sigurisht, nuk duhet t'i presim shpresat për sa i takon titullit kampion, sepse në lojë janë ende dhe 45 pikë. Gjithsesi, nëse ky objektiv nuk realizohet, shpresat do të mbeten te vendi i dytë dhe njëkohësisht Kupa e Shqipërisë, të cilat na japin shansin të luajmë në Kupën UEFA. Për ta bërë një gjë të tillë realitet, nga ana juaj kërkoj mobilizim total në stërvitje dhe ndeshje, më pas do të jem unë ai që do të vlerësoj djersën e gjithsecilit,"- e përfundoi analizën përpara skuadrës trajneri i rikthyer në detyrë, Luka Bonaçiç.
Duke qenë se ishte i lodhur nga rruga, i mbiquajturi "diktatori" preferoi që vetëm ta vëzhgonte skuadrën në stërvitje. Sot, Bonaçiçi do të nisë rregullisht punën, teksa në orën 13:30 do të luhet një ndeshje miqësore me Kastriotin.
Policia rrugore, tri postblloqe kroatit
Sapo shkeli pikën kufitare të Hanit të Hotit dhe derisa mbërriti në Tiranë, policia rrugore i bëri tri postblloqe trajnerit Luka Bonaçiç. Kroati parapëlqen që gjithmonë të vijë me makinën e tij personale nga Kroacia në Shqipëri, ndryshe nga Ivan Kataliniçi, që udhëtonte vetëm me avion. Fakti që ishte me targa të huaja, por edhe tejkalimi i shpejtësisë, me qëllim që të vinte brenda orës 15:00 në klub, bënë që Bonaçiçi të ndalohej nga ana e policisë rrugore. Për gazetën, kroati i stolit blu tregon: "Më ndaloi tri herë policia rrugës, sepse në të vërtetë isha pak me shpejtësi. Megjithatë, sapo u thashë që jam trajner i Dinamos, të gjithë më respektuan, duke më bërë edhe një vërejtje të vogël, që të ecja më avash, sepse Dinamo do të më priste sidoqoftë,"- thotë me të qeshur kroati, që njihet për alegrinë e tij jashtë fushe me të gjithë njerëzit që e njohin.
Krijoni Kontakt