Lidhur me polemiken per kullen ne qendren e Tiranes

[Postmodern]

Lidhur me polemiken per kullen ne qendren e Tiranes)

Korrieri, 11 Shkurt 2005

Zoti Llonçari,

Lexova në Korrieri shkrimin tuaj lidhur me polemikën për kullën në
qendër të Tiranës dhe më së pari desha t'ju falenderoj si për
mbështetjen profesionale që i keni dhënë disa mendimeve të mija ashtu
dhe për aktin intelektual të daljes me mendimet dhe shqetësimet tuaja
në skenën tonë tmerrësisht të vështirë publike. Shkrimi juaj më
kujtoi thënien e vjetër: "E vërteta hollohet, por nuk këputet". Me
zë "të holluar", por jo të këputur, ju falenderoj dhe një herë.
Por desha megjithatë t'u sqaroj disa gjëra, aq më tepër që kohët e
fundit në këtë nahinë tonë, që disa e quajnë "shqiptarofolëse", ka
lindur edhe grindja se cili fshat është më i qytetëruar Tirana apo
Prishtina. E në këto kontekst shkrimi juaj për disa është shenjë se
ju andej nga Prishtina jeni më superiorë se ne këtej e për disa të
tjerë se jeni shumë shumë më inferiorë e se bash shkrimi juaj është
shenja më flagrante e kësaj prapambetjeje të madhe.
Duke qenë se unë jam me idetë e shkrimit tuaj, por nga ana tjetër
duhet të bëj tifo për fshatin tim, lejomëni të bëj, pra, disa sqarime:
Zoti Llonçari,
Mos mendoni se edhe këtu në Tiranë nuk ka njerëz të ditur që mendojnë
kështu si ju. Edhe Maks Velo me të cilin ju polemizoni ka pasur më
parë këto ide – aq sa ka bërë thirrje publike për shembjen e dy
kullave në bulevardin e Tiranës, madje në veshin tim kanë arritur
edhe fjalë kolegësh të tij se ai pretendon se idetë e mija unë i
kam "të huazuara" prej tij. Poende, shumë nga idetë që theksoni kur
thoni se ngritja e një rrokaqielli të tillë nuk sfidon tjetër
gjë "përveç vlerave të sheshit dhe qytetarët" apo kur thoni se e
drejta e pamjes, qoftë edhe "në ose nga hapësirat publike" është "e
drejtë e patjetërsueshme e njeriut" dhe paraqet në vetvete një ndër
kualitetet më të qëndrueshme të një indi urban "për më tepër të një
fokusi urbanistik siç është sheshi Skëndërbej." janë ide që i ka
pasur edhe kryebashkiaku Edi Rama në një kohë kur nuk ishte në këtë
post, e kur, siç e përmendni edhe ju, u hodh ideja e parë e ngritjes
së një kulle në atë shesh. Asokohe unë dhe ish piktori Edi Rama u
hidhëruam shumë se mos na zihej pamja e malit të Dajtit dhe bëmë çmos
ta prishnim planin e atij që donte të na e zinte.
Pra, nëse mendoni se ju andej nga Prishtina jeni superiorë në ide e
dije e keni gabim. Problemi i tjetërsimit të këtyre njerëzve e të
shumë të tjerëve si ata, zoti Llonçari, nuk ka të bëjë me njohjen,
por me atë konstatimin tuaj se objektet e tilla si rrokaqiellat në
qendër "janë po aq produkt i sëmundjeve sociopatologjike sa edhe
ndërtimet e egra në periferi të Tiranës." Pa pretenduar t'i hyj kësaj
teme e ta trajtoj në tërë seriozitetin që meriton në kontekstin e
idesë tjetër që shprehni në shkrimin tuaj se "arkitektura ka ndikim
të madh në formësimin e mendësisë së njerëzve" desha t'ju ve në dukje
se fakti që tani këta njerëz dalin me tezën se meqënëse Tiranën e
prishën komunistët, e prishën edhe bashkiakët në kohën e Berishës
tani ta prishim edhe ne nuk është tjetër veçse shprehje e
përkeqësimit të kësaj sëmundjeje dhe jo e paditurisë së elitës sonë,
largqoftë. Vetë fakti që kjo sëmundje ka kapur edhe M. Velon i cili
grahmën e fundit të protestës, përpara se ta kapte kjo sëmundja, e
lëshoi, me sa mbaj mend, kur u prish kinemaja më e vjetër në Tiranën
historike për t'i lënë vendin një kompleksi monstruoz mega-ndërtesash
është shenjë se virusi i kësaj flame po ecën. Pra duhet të na
kuptoni, kemi të bëjmë me një flamë që na ka rënë, nuk jemi këta që
jemi. E kjo flamë e ky përkeqësim i saj ka një shpjegim shumë banal,
që është "banaliteti i së keqes" që e bën të pamundur dhe të
pavlefshëm jo vetëm kompetencën tuaj profesionale apo përpjekjen time
intelektuale, por edhe debatin se cila elitë është më superore ajo e
Prishtinës apo ajo e Tiranës. Prandaj, ju lutem, çështjen e
superioritetit apo inferioritetit lëreni në atë se cili e flet dhe e
shkruan më mirë shqipen standarte, mos e ngatërroni me arkitekturën e
muzikën e më the të thashë.
Që të shpjegohem pak më shkoqur:
Ju e dini se ç'është "flama e arit" – sikundër do ta quante Çaplini, -
ajo e çon njeriun deri në atë kondicion që t'i duket tjetri si pulë
që mund ta hajë (besoj ta kujtoni filmin e famshëm). Kjo flamë e ka
fajin, zoti Llonçari; ajo ka zënë një pjesë të mirë të elitës sonë
politiko – biznesore, i ka bërë tu duken të shëmtuara shtëpitë e
vjetra të Tiranës, orientalet apo vilat dykatëshe italiane, por edhe
çdo oborr ku mund të ketë mbetur pak bar. Kështu që i hedhin përtokë
për të ngritur në vend të tyre mega-godina betoni. Jo vetëm, por
kështu thonë po shkojmë drejt Evropës. Ju e quani këtë "sëmundje
sociopatologjike". Por mos kujtoni se mund të mburreni se jeni i pari
që e ka thënë këtë ide. Edhe këtë e ka thënë M. Velo i pari. Kurse
dikush nga elita jonë e ka thënë në një gjuhë figurative popullore
duke e quajtur Tiranën e katandisur kësisoj "pre qensh". Përfytyroni
kufomën e një kafshe të vrarë që e shqyejnë nga të mundin një lukuni
qensh – ja kjo është pjesa e mbetur e Tiranës historike e lagjeve me
shtëpi orientale apo e atyre me vila të ndërtuara në kohën midis dy
luftrave. Janë qen të tërbuar, zoti Llançari, që shqyejnë dhe
kafshojnë nga të mundin, pa asnjë projekt; kafshojnë njëri tjetrin e
tërbohen e harbohen gjithnjë e më shumë - një pjesë e mirë pa e
kuptuar fare tërbimin e tyre. Aq sa ajo shprehja e njohur
arabe "qentë le të lehin karvani shkon përpara" këtu është
zëvendësuar me shprehjen: "njerëzit le të lehin karvani i qenve të
tërbuar shkon përpara". E në këto kushte, ju e kuptoni, nuk mund të
presësh që të mënçurit të dalin të luftojnë me qentë e tërbuar. A nuk
e kemi ne atë shprehjen "të marrit lëshoi rrugën". Shyqyr që është
Tirana historike që ta hanë dhe të qetësohen e të mos na hanë ne. Por
prap, ta dini mirë, ne jemi superior, se edhe ai më i tërbuari syresh
shqipen standart e flet më mirë se akademikët tuaj.

Unë nuk e mohoj se në këtë "sëmundje sociopatologjike" apo "tërbim"
ka shumë injorancë, dhe se në këtë injorancë hyn edhe një koncept i
ngushtë i shqiptarëve të kësaj nahisë sonë për atë që rëndom
quhet "cilësi e jetës" e cila për ne, gjithnjë e më shumë do të thotë
jetë ose në shtëpi ose në kafe-restorante e mund të na përmendni edhe
ju WC-të alla frënga që i vumë pas rënies së komunizmit. Ndoshta mund
të na përmendni se në tërë këtë mori ndërtimesh që e ka bërë Tiranën
të pesëfishuar si numër banorësh nuk ju figuron asnjë kinema e re,
por vetëm 2 të vjetra. Ju mund të na thoni se nuk kemi ngritur asnjë
muzeum të ri e se edhe ata ekzistuesit janë pakësuar dhe po pakësohen
dita ditës për tua lënë vendin mega-godinave të banimit, se nuk ju
figuron asnjë shkollë e re publike, asnjë rrugë e re, asnjë teatër i
ri, për të mos folur për fushat sportive ku edhe ato të paktat
ekzistuese ia kanë lënë vendin mega-godinave. Por unë prap, në
mbrojtje të fshatit tim, do t'ju them se kjo është punë e flamës se
edhe në kohën më të zezë atë të Hoxhës Tirana kishte 7 kinema kur
ishte vetëm 150000 banorë, kishte më shumë muzeume, shkolla, kopshte,
çerdhe parqe fusha sporti e të tjera gjëra nga ato që e kthejnë një
tufë individësh në komunitet.
.
Ju prap do të ngulmoni e do të më thoni se nuk ju duken ashtu edhe
aq "të tërbuar" ndërtuesit tanë madje se mund t'ju ketë qëlluar duke
folur me ta për rrokaqiellat me të cilat po mbushet Tirana, e t'ju
kenë thënë të njëjtin mendim që keni edhe ju se ato konsiderohen sot
në botë si një e "keqë e domosdoshme", apo mund të më sillni shembull
se kur vjen puna për të ndërtuar shtëpitë e tyre ata dinë mirë se si
i ngrënë, se ku i ngrenë apo se ku i blejnë - madje se një pjesë i
blejnë jashtë shtetit në mes të gjelbërimit.
Këtu më zutë ngushtë, por po ju them se ka edhe një arësye tjetër,
madhore, pse po ndodh kjo që shihni: puna e vështirë, por e lavdishme
për ndërtimin e kapitalizmit zoti Llonçari. Sakrifica për ndërtimin e
Shqipërisë kapitaliste e kërkon një çmim dhe Tirana historike hyn në
pjesën që duhet sakrifikuar. Problemi është se ne na duhet të
krijojmë elitën kapitaliste, zoti Llonçari. A nuk mendoni ju se ia
vlen të shkatërrosh ca shtëpi të vjetra për të krijuar elitën tonë të
re? A e keni parasysh se sa fëmijë nga të biznesmenëve e politikanëve
që po ndërtojnë sot po shkollohen nëpër shkollat më të mira
perëndimore vetëm e vetëm në sajë të kësaj Tirane historike? Si do të
mund të arrijmë ne të bëhemi kompetitivë në tregun e lirë pa krijimin
e kësaj elite?
Jo vetëm, por baballarët e kësaj elite të re që po lind kanë edhe një
mision të madh: emancipimin e popullit shqiptar. A e dini ju se
shumica e atyre që ndërtojnë nuk i hedhin tërë lekët që fitojnë vetëm
për fëmijët e tyre, por sakrifikojnë edhe për fëmijët e gjithë
Shqipërisë. Besoj ta keni dëgjuar se 80% e pronarëve të televizioneve
tona private janë edhe ndërtues. A mund të mbahen tërë ato
televizione moderne, tërë ai staf e më the të thashë, që po emancipon
Shqipërinë, pa ato para zoti Llonçari? Ju mund të fërkoni sytë nga
këto që ju them e të më sillni si shembull katandisjen që i kishte
bërë gazeta më e madhe e vendit, Shekulli i datës 4 Shkurt, shkrimit
tuaj profesional. Kurse unë po ju them: Mos kujtoni kurrsesi se
Shekulli ka një staf ashtu dhe aq injorant sa për të mos kuptuar se
shkrimi i një ligjëruesi të arkitekturës në Fakultetin e Prishtinës,
qoftë edhe si replikë, meritonte të botohej në një vend me atë Velos
e jo të katandisej në shtatë reshta tek letrat e lexuesve. Me sa di
unë, madje, pronari i Shekullit është goxha kompetent në arkitekturë
se merret edhe me ndërtime, plus që e ka mik për kokë Kryetarin e
Bashkisë, që, siç mund ta dini, u shpall këtë vit në internet si
kryetari më i mirë i botës. (Meqë ra fjala: A mund të ëndërroni ju që
kryetari i bashkisë së Prishtinës të arrijë këto maja. Dhe mendoni,
në kushtet kur Tirana nuk ka plan urbanistik dhe ka ajrin dhjetë herë
më të ndotur se tërë qytetet evropiane? Po sikur të kishim plan
urbanistik dhe ajrin të pastër si Gjeneva, ku do të arrinim?)
Absolutisht mos t'ju shkojë mendja të talleni me nivelin e medias
sonë dhe aq më pak për cenzurim për shkak lidhjesh korruptive midis
biznesit dhe politikës. Sipas meje shkrimin mund të mos jua kenë
botuar se, po ta vesh re, ju prekni atje aleatin tonë të madh SHBA.
Seç keni një paragraf ku aludoni se Kullat Binjake e meritonin të
rrëzoheshin sepse kishin shkaktuar frustrime tek njerëzit duke u bërë
shkak i lindjes së fondamentalizmit. E me këtë, përveç të tjerash,
keni treguar mosmirënjohjen më të madhe për ndihmën që dha SHBA për
çlirimin e Kosovës. Prandaj për të mirën tuaj e kanë bërë, për t'ju
mbrojtur nga zëmërimi i bashkatdhetarëve tanë të ndershëm dhe
liridashës.
Ju prap mund të më thoni: mirë televizionet private që duhen mbajtur
me paratë e ndërtimeve po pse publiku - ngase mund të keni lexuar se
drejtori i TVSH seç ka blerë një vilë në qendër me ndihmën e Nanos
dhe me ndihmën e Ramës kërkon të ngrerë një mega-godinë atje, por
këto, ju siguroj, janë vetëm thashetheme keqdashësish. Ne kemi planin
francez tani për qendrën, që është ligj dhe nuk guxon kush ta prekë.
Përsëri ju do të thoni se para tre vjetësh kishim një ligj tjetër,
atë të shpalljes monument kulture të qendrës.
Nuk ka rëndësi kjo.
Rëndësi ka që revolucionin e Tiranës ne do ta shpërndajmë në të
gjithë botën, zoti Llonçari, ne kemi edhe shumë shokë në të gjithë
vendet e botës që do të bëhen përçuesit në Francë, Gjermani, Itali,
Angli të këtij revolucioni. Kemi edhe inteligjencien popullore që
krah për krah me njerëzit e punës ndërton Tiranën e re. Kam frikë se
vetëm kur ta shihni Romën, Parisin, Vjenën, të lyer si Tirana, e me
grataçiela në oborret e shkollave e në vendet mes pallateve katër
katëshe ku tani kanë lulishte e parqe ku luajnë fëmijët do të bindeni
për këtë. Por atëhere do të jetë vonë, prandaj, për të tejkaluar
prapambetjen tuaj, do të bënit mirë të merrnit edhe studentët tuaj të
Prishtinës dhe të vini këtej.
Të mirupafshim sa më parë në Tiranën heroike.


Me respekt
Fatos Lubonja

P.S

Llonçari eshte ligjerues ne Fakultetin e Ndertimataris dhe Arkitektures ne Prishtine.

[Postmodern]

A eshte e mundur qe dikush nga ju te sjell shkrimin e Lonçarit ne forum, te botuar me date 4 Shkurt ne gazeten Shekulli?

Falmnderit

[Brari]

ndoshta ka email ky Loncari e shkruaji e ftoje ketu ne diskutimet per arkitekturen..

tek tema Tos Lubonja ke dicka per kto probleme..

[Postmodern]

Tirana dhe debati per arkitekturen!
E Merkure, 09 Shkurt 2005
Nga Xhelal LLONCARI*

Pasi lexova shkrimin e Maks Velos, edhe pse me heret e kisha lexuar shkrimin e Fatos Lubonjes, "Intelektualet dhe pushteti" por vetem tani nuk munda t'i beja balle heshtjes sime. Duke mos dashur te merrem me raportet e tyre individuale, te cilat gjithesesei, nuk mbesin pa ndikim tek lexuesi, do te ndalem ne ate qe me shtyu te shkruaj, projekti i qendres se Tiranes.

Por parasegjithash disa fjale per qendrimet parimore te Maks Velos ndaj kritikave mbi nje objekt arkitektonik ose ansambel urbanistik. Velo thote: "Lubonja nuk eshte as urbanist dhe as arkitekt", nga kjo del se ne shoqerine shqiptare askush nuk na paska te drejte te kritikoje e as te shfaqe nje mendim per urbanistiken ose arkitekturen, a thua se qytetet ngrihen per te kenaqur vetem arkitektet dhe urbanistet ? Kurse harron ate qe shkruan ne fillim te artikullit mbi historine; nga ketu del se Velo qenka edhe historian (me diplome, mbasi ate e ka kriter per vleresimin e drejtuesit te kritikes).

Ne vazhdim te artikullit Velo shpalos qendrimet e tij rreth urbanistikes se Tiranes, me cka pajtohem plotesisht. Flet per kaosin e krijuar me koshience, gje qe nuk mohohet. E pershkruan shume bukur ate gjendje dhe flet haptas per legalizimet dhe pasurimin e pushtetit si dhe per kulmimin e tyre asokohe me PIRAMIDAT.

Duke marre parasysh profesionin e Maks Velos me padurim prisja shpjegimet profesionale mbi ate rrokaqiell te perfolur. Por ja se Maks Velo gjithnje i mbahet nje kursi abstrakt dhe me pak shpjegues dhe teresishte te paargumentuar, se shkrimi i Lubonjes, qe ne fakt kujtoi se nuk mori dot pergjegjje.

Pas fyerjeve qe i ben Lubonjes, njeriu mbrohet me to kur i mungojne argumentet, Velo provon te argumentoje mbytjen e Sheshit "Skenderbej". Argumentet i gjen duke justifikuar shkaterrimet e mehershme te indit urbanistik te Tiranes, nga ana e arkitekteve italiane dhe me vone nga pushteti komunist. (sdo te merrem me ceshtje hipotetike se a ka kontribuar prishja e Pazarit ne ngritjen e shkalles se qytetrimit?).

Argumentin tjeter qe shfaq Maks Velo konsiston ne ate se "lartesia eshte sfida e vazhdueshme e njeriut (ketu nuk e kam te qarte pse Velo nuk thote e arkitekteve- pasi qe njerezit qe nuk kane diploma te arkitektit ose urbanistit, nuk merren me keso gjerash?!) dhe merr dy shembuj nga historia e arkitektures: Kullen e Babilonit dhe Qendres Boterore te Tregetise se Nju Jorkut. Cuditerisht keto kulla nuk ekzistojne me. Pare nga prizmi i zhvillimit historik te njerezimit, dolen si te paqendrueshme.

E para, mbase edhe nuk perfundoi kurre se ndertuari, kurse e dyta nuk i beri balle vetemashtrimit. Ketu me duhet te spjegoj se nuk e miratoj kurresesi aktin barbar te shembjes se dy kullave binjake te Qendres Boterore te Tregtesise, por dua te them se arkitektura ka ndikim te madh ne formesimin e mendesise se njerezve, ku bejne pjese edhe arkitektet. Vrapimi i arkitekteve, ne menyre frustrative dhe ngazelluese pas arritjeve teknologjike, qe jo gjithmone paraqesin vlera, inicon te njerezit ide po aq frustrative dhe morbide cfare i kemi pare me 11 shtator te 2001 ne Nju Jork.

Eshte e vertete se lartesia eshte dhe ka qene sfide per njeriun. Nese i hedhim nje veshtrim te shkurter historik mbi veprat qe synojne lartesite, do te shohim se ato parasegjithash jane rezultat i besimit te njerezve tek Zoti; synimi qe tempujt te afrohen sa me shume prane Tij, dhe tek objektet inxhinjerike me vlere utilitare me rendesi jetike si viaduktet, akuaduktet, urat etj, kurse sot ato jane prezente ne trajten e te keqes se domosdoshme. Deri vone ne qytete eshte ruajtur dhe respektuar hierarkia e lartesive, as pallatet mbreterore nuk kane qene me te larta se pirgjet e kishave dhe tani, kjo varet nga vete respekti dhe aftesia e valorizimit te se kaluares. (sa per ilustrim ju kujtoi diskutimet e vrullshme per ngritjen e nje xhamie ne Rome, ku pushteti nuk ka lejuar qe maja e minares te jete me e larte se pika me kulmore e Vatikanit- pra njerezit kujdesen per kultivimin dhe respektimin e vlerave historike qofshin ato materiale ose psikohistorike).

Sikurse qe me duken te paqendrueshme veprimet ne shesh nga periudha italijane ose komuniste- por qe tashme kane fituar nje legjitimitet historik nga te cilat duhet nxjerre mesim.

Kujtoi se ngritja e nje rrokaqielli, sic e quan butesisht Fatos Lubonja qikllop, eshte teresishte i papranueshem dhe tersishte anakronik.

Sepse sheshet njesoi si objektet arkitektonike bejne pjese ne indin urbanistik qe duhet trajtuar, kultivuar dhe ruajtur si vlere.

Sepse vlerat kinestetike te pajsazhit urbanistik jane me rendesi te posacme ne aspektin e perceptimit dhe perjetimit te nje qyteti.

Sepse vizurat ose e drejta ne shikim, qofshin ato edhe ne ose nga hapesirat publike jane e drejte e patjetersueshme e njeriut dhe ne vehte paraqesin nje nder kualitetet me te qendrueshme te nje indi per me teper te nje fokusi urbanistik sic eshte Sheshi "Skenderbej".

Sepse njerezit raportin e madhesive te hapesirave i masin me madhesin e vet dhe me syrin e tyre, ky raport me ngritjen e rrokaqiellit mu ne shesh do te disbalanconte teresishte harmonine e raporteve ekzistuese ne aspektin e minimizimit te vlerave te tij.

Sepse ngritja e nje rrokaqielli 22 katesh nuk paraqet kurrfare sfide, tekniko- teknoligjike, e edhe me pak te arritur ne lemin e arkitektures e as te urbanizmit.

Sepse ngritja e nje rrokaqielli te tille e sfidon vetem vlerat e sheshit dhe qytetaret.

Sepse mendesija e te berit metropole me rrokaqiej te ngritur mu ne zemer te qytetit, eshte lathitje.

Sepse objektet e tilla jane po aq produkt i semundjeve sociopatologjike sa edhe ndertimet e egra ne periferi te Tiranes.

Sepse rrokaqielli i tille nuk e cliron shoqerine shqiptare nga kulti i personaliteti te quajtur Enver, me nguljen i nje objekti mu mbi "koken" ku qendronte ai e as me tejkalimin e lartesise se hotelit 15 katesh te ngritur ne kohen e tij.

Sepse eshte falso "shkelqimi" i nje objekti ne vitrinen e nje qyteti kur ne magazinat e po te njejtes kemi ate qe e din mire Maks Velo dhe te gjithe ne, meqe ra fjala e din edhe autoret e huaj te projektit te rrokaqiellit dhe se frika e Maks Velos se cka do te mendonin ata per ne, po te perkthehej shkrimi i Lubonjes, jam i sigurte se do ta ngrisnin per shume shkalle me larte mendimin per ne, se ai te cilin e kane tash, edhe pasi e kane fituar konkursin.

Sepse ligjshmeria e nje pushteti, qe pretendon te jete demokratik, nuk reflekton vetem me nje cope leter te quajtur LEJE PER NDERTIM.

Sepse ...

Ne fund a s'eshte ideja e ngritjes se nje rrokaqielli me ate lartesi dhe mu ne ate vend nga koha e PIRAMIDAVE? Si ngushellim z Velo, per Ju, per mua dhe per te gjithe ne le te jete premisa se arkitektet punojne gjithmone vetem aq sa iu lejone pushteti. E di, pothuajse jam i sigurte, se me 28 Nentor te vitit 2012 (njeqinde vjetori i pavaresise, qofte edhe si produkt i shkermoqjes se Perandorise- sic e konsideroni Ju), nen stojat e Teatrit te Operas dhe Baletit, ose gjetke, mund te jem duke pire kafe dhe duke kujtuar endrren time per ngritjen e nje objekti ose kompleksi kulturor te quajtur SHEKULLI.

* Arkitekt, Prishtine

[angeldust]

Lidhur me polemiken per kullen ne qendren e Tiranes)

Korrieri, 11 Shkurt 2005

Zoti Llonçari,
.................................................. ...................................
Ju prap do të ngulmoni e do të më thoni se nuk ju duken ashtu edhe
aq "të tërbuar" ndërtuesit tanë madje se mund t'ju ketë qëlluar duke
folur me ta për rrokaqiellat me të cilat po mbushet Tirana, e t'ju
kenë thënë të njëjtin mendim që keni edhe ju se ato konsiderohen sot
në botë si një e "keqë e domosdoshme", apo mund të më sillni shembull
se kur vjen puna për të ndërtuar shtëpitë e tyre ata dinë mirë se si
i ngrënë, se ku i ngrenë apo se ku i blejnë - madje se një pjesë i
blejnë jashtë shtetit në mes të gjelbërimit...............

Eshte mese e vertete.
Fatos Nano dhe Edi Rama aktualisht po ndertojne shtepi karakteristike me gure mes gjelberimit dhe klimes malore te fshatit Dardhe.

Nga polemikat qe lexova ketu edhe une besoj se ndertimi i nje rrokaqielli 22-katesh eshte thjesht nje projekt disposable i tipit e ngre sot mund t'i vesh minen neser, per te ndertuar dicka me moderne sipas ndryshimit te modave kalimtare.

Perparesore per Tiranen duhet te jene projektet kulturore, hapesira e qarkullimit te njerezve dhe makinave, gjelberimi dhe pastrimi i ajrit (si dhe uji dhe dritat qe s'ka nevoje t'i permendim). Keto jane gjera vlera e vertete e te cilave tejkalon shumefish cdo shpenzim material qe mund t'ju kerkoje tregu i lire.

Ndertimi i ketij rrokaqielli nuk eshte nje e keqe "e domosdoshme". Per mendimin tim eshte thjesht nje investim i pavlere, e pare kjo ne prizmin e vlerave te cilat eshte mire t'i fitoje kryeqyteti yne ne te ardhmen.

[RTP]

Kam pas goxha respekt per shkrimet e z.Lubonja,deri me sot.
Mirepo,si gjithhere,njeriu bindet pak me vonese e kupton se nuk duhet shpejtuar me bindjet/gjykime.



Lexova kritiken e ti dhe nuk verejta asgje te jashtzakonshme e frustruse qe te nxiste z.Lubonjen te nxjerr flake.
Nga ky artikull te arkitektit nga Prishtina,Xhelall Llonqarit,une kuptova nje gje:
Nje arkitekt SHQITAR nxjerr ne pahj mendimin e ti rreth urbanizmit .
Z.Llonqari dha mendimin e ti(shume profesional)rreth kulles se ngritur ne sheshin `Skenderbe`.
Ka dicka te keqe ketu?

A nuk jane kritikat profesionale me vlere dhe te mirseardhuna per cdo lami e hap qe nderrmiret ne boten virituale?

Pse gjithe ky tym te ngritet?

Ndoshta juve `u preku` pse zoteri Llonqari `"u doli krah"prane Velos!?
Andaj u ndiet shume i vogel,i vogel,ivogel..................dhe pyetet vehten:Pse t`me dal krah nje arkitekt i Prishtines?!
Kjo ju dhemb shume.se ju e ndieni vetem shume te madhe,te bukur,shume te menqun...dhe superior!
Ju,lartmadhni,,nuk keni nevoj tu del dikush krah...
Askuuuuuuuuuuush!
hmmm.si duket ia qellova.
Ketu qendron problemi!

(Kjo `rremuje`e Lubonjes sikur me bind me shume e me shume ne multi kompleket e moderuara.
Besoj, zoteria ka nevoje per ndihme.)

-------------------------------------------



Zoteri Lubonja


Merni pak syzet dhe nje gote uje me dy kokrra sheqer
e lexoni se cfar keni thene,
e mandej...skuquni e skuquni...


Nga replika e bere nga z.Llonqari une nuk verejta se:

-.Ai beri te pakten nje shembull krahasimi se cili " fshat eshte me i qyteteruar,ai i Prishtines apo i Tiranes"
-.Ai nuk preki sedren tuaj askund,vetem sa iu doli krah ne mendime qe kishit dhene ju duke i ngrit ato ne nivel edhe me te larte!

-.Pse ju z.Lubonja kapeni dhe i ofendoni kosovaret se nuk e flasin gjuhen bukur?
Me habit si shkeputeni prej kulles 22 -kateshe e zbritni te doreshkrimi shqip-shqip,se kush flet me bukur,kosovari apo shqiptari i Shqiperis?!
Une nuk gjej nje te vetmin kuptimin ketu.
Dhe,mos te harroj e tua them edhe nje gje:Sikur ti z.Lubonje te shkolloheshe ne gjuhen serbokroate,e ta kishe si gjuhe zyrtare po kete gjuhe,ateher do deshiroja te te ndegjoja se si zoteria juaj do shkelqente neper repertuarin e alfabetit shqiptar!
Po,nejse.
Vazhdoj:
-.Si merrni guxim,j
ku e merrni kete guxim ,zoteri Lubonja t`a akuzoni z.Llonqarin se `paska shpreh gezim per shkaterrimin e binjakeve ne NY"?
Ju, z.Lubonja, keni vertet probleme,o ne te lexuar o ne te kuptuar.

Ju sugjeroj,para se te rrehni gjyks se ju dhe gazeta `Shekulli`paskeni shpetuar nderin e nje kosovari para SHBA-s,me pare te merrni (si detyre shtepije)e ta lexoni 55 here repliken e z.Llonqarit para dhe pas buke.deri sa te merrni hovin tjeter me shkretu dicka.

5.Si keni te drejte ta akuzoni,ta perulni,ta perqeshni dhe ofendoni nje shqiptar (nga cfardo vendi cofte)pse jep nje kritike lidhur me urbanizmin e kryeqytetit te shqiptareve te gjithe botes???
Kush jeni ju,Fatos Lubonja te flisni ne emer te Tiranes???
Ju nuk jeni as arkitekt,as urbanist ....ju nuk keni njohuni ti ktheheni replikes se z.Llonqarit me fakte,anda edhe i ktheheni me shqelma.

6.Ju shkoni deri ne at pike sa enderroni se do vie dita Viena e Roma ta kopijojne qytetin e Tiranes me ngjyrat e Edi Rames!!!
WOW!
Kjo eshte e forta e keti viti 2005.
;)


7.Fatos Lubonja thot:" Me sa di unë, madje, pronari i Shekullit është goxha kompetent në arkitekturë se merret edhe me ndërtime, plus që e ka mik për kokë Kryetarin e
Bashkisë, ......"!!
Ku merr inteligjencen nje INTELEKTUAL si ju, ta arsyetoj mos botimin e artikullit tuj thane:"pronari ka MIK kryetarin e bashkis"! ! !

-Kjo miqesi sipas jush,po ia rritka reputacionin keti pronari gazetash?
-Kjo "miqesi"po i beka nder Tiranes dhe urbanizmit te saj?
-Kjo fjale flet shume o z.Lubonja ,flet e tregon se ne cfar kategorie ka mbulu `flama`intelektin tuej dhe te gazetes Shekulli.

Turp te lexosh te tilla banalitete nga nje intelektual !

Ma merr mendja se z.Llonqari nuk ka nevoj tu kthej me replike
Besoj se ai qe e ka lexuar repliken tuaj o me i madhi Lobonje,
ai e ka kuptuar kush jeni.

[FЯODO]

Ndertimi i ketij rrokaqielli nuk eshte nje e keqe "e domosdoshme". Per mendimin tim eshte thjesht nje investim i pavlere, e pare kjo ne prizmin e vlerave te cilat eshte mire t'i fitoje kryeqyteti yne ne te ardhmen.

Objektivi i realizimit te ketij projekti perkon nje spekter me te gjere sesa nje ndertese e vetme shumekateshe.
Ky projekt hedh themelet e ndryshimit te qendres se kryeqytetit e cila per momentin ndodhet ne nje gjendje katastrofike.

[RTP]

Une plotesishte pajtohem me mendimin e z.Llonqari!Vertet ajo kulle do e shemtoj pamjen e kryeqytetit te Tiranes!
Shpresoja gjithhere se ky qytet do kete mundesin ta merr pamjen e nje qyteti me modern ne Evrope!Shpresoja se ishte ne buzen e ngritjes ,ringjalljes,lulezimit,rilindjes....

Ama me pamjen qe solli Josti-i,vertet e kuptova dhembjen qe shprehu z.Llonqari!


Me vie shuuume keq!
Ajo pamje e asaj kulle eshte nje arkitekture e shemtueme!Duket si burg!

Mos te thot dikush nga ju se e relakson kjo pamja e kulles,
se e mahnit dhe shtyn ta ndalesh hapin per ta shijuar nje pamje si kjo-pamje burgu!?
Ah mjerim.........

[FЯODO]

Ne rradhe te pare dua te them se artikulli i Fatos Lubonjes eshte teper absurd dhe u befasova kur e lexova.
Me keqardhje e them se Lubonja eshte nje analist shume i konfuzuar, kerkon te duket i vecante nga te tjeret por del shume kontradiktor.

Ti rikthehemi nderteses "Syte e Tiranes", nuk mendoj se eshte arkitekture e shemtuar pekundrazi eshte nje krijim i arrire bashkekohor qe i pershtatet asaj qe kerkohet per Tiranen.

[RTP]

O Jost-i


Me vie keq,po nqs kjo kulle konsiderohet si "Syte e Tiranes"
ateher me bind edhe me shume se ketu DIKUSH ka
probleme me sy dhe i duhet ndihma e opticientit!

[Postmodern]

O Jost-i


Me vie keq,po nqs kjo kulle konsiderohet si "Syte e Tiranes"
ateher me bind edhe me shume se ketu DIKUSH ka
probleme me sy dhe i duhet ndihma e opticientit!

Edhe une pajtohem, RTP.

[FЯODO]

O Jost-i


Me vie keq,po nqs kjo kulle konsiderohet si "Syte e Tiranes"
ateher me bind edhe me shume se ketu DIKUSH ka
probleme me sy dhe i duhet ndihma e opticientit!

Syte e Tiranes eshte nofka per ndertesen me kuptimin se shikon te gjithe Tiranen (Dajtin, Qytetin dhe qiellin lart) pra nuk nenkupton nje ndertese me 2 sy.