Vetëhelmimi me pasojë vdekjen e 17-vjeçares Genta Feimi ka shkaktuar tragjedinë e radhës në familjen e saj.
Gjatë tetë viteve të fundit asaj i ishte vetëvrarë motra dhe nëna, ndërsa mbrëmjen e 3 shkurtit ajo është vetëhelmuar, duke shënuar viktimën e tretë. Psikoza e vetëvrasjes tashmë kishte lëshuar rrënjë në këtë familje, duke i marrë jetën tri femrave.
Vdekja e gjimnazistes ka tronditur jo vetëm bashkëfshatarët e saj, por të gjithë Gramshin. Shkolla ku ajo ndiqte vitin e tretë e ka shpallur të premten ditë zie dhe shokët e mësuesit kanë marrë pjesë në përcjelljen e saj drejt banesës së fundit.
Vetëhelmimi i paralajmëruar
Kishte mëse një javë që gjimnazistja e vitit të tretë të shkollës “Shefqet Guzi” të Gramshit, kishte shfaqur sjellje të pazakonta. Këtë dukuri tek ajo e kishin konstatuar si shokët e saj, ashtu dhe mësuesit. Në fakt, askush nuk kishte menduar të merrte vesh se çfarë e shqetësonte 17-vjeçaren Feimi. Ajo, së bashku me disa nxënës të tjerë i ndiqte mësimet vajtje-ardhje, nga fshati Kushovë në qytet, për çdo ditë. Shokët e saj tregojnë se ajo asnjëherë nuk e linte mësimin dhe përpiqej të kishte rezultate, por jo në çdo lëndë ia arrinte kësaj. Në semestrin e parë të këtij viti, nuk ka qenë shumë e suksesshme, por nuk ishte e vetmja në klasë me rezultate të dobëta.
Tri tragjedi në familje
Vdekja e Gentës ka rikthyer tragjedinë në familjen Feimi. Tetë vite më parë, pikërisht pas trazirave të vitit 1997, motra e madhe e Gentës merr vendimin për t’u vetëvrarë. Ajo qëllon veten me armë zjarri, duke mbetur e vdekur në vend, në rrethana misterioze. Pas 3 vitesh nga kjo vdekje, e ëma e gjimnazistes i jep fund jetës nga hidhërimi dhe depresioni, duke u vetëhelmuar. Genta mbetet e vetme me të atin, pasi dhe tre vëllezërit e saj jetojnë prej disa vitesh në emigrim. Të dy, baba e bijë, mundohen të mbajnë me kurajo njëri-tjetrin, por natën e 3 shkurtit mbërrin tragjedia e radhës. Si çdo ditë, edhe pasditen e së mërkurës, së bashku me nxënësit e tjerë, Genta është kthyer në shtëpinë e saj në Kushovë. Në mbrëmje ajo mësohet se ka qenë shumë e shqetësuar dhe ka qarë para të atit, por pa i dhënë shpjegime atij. Pasi kanë darkuar, ata kanë rënë për të fjetur. Rreth orës 20.30, Genta i dërgon një mesazh shoqes së saj të ngushtë, duke i shkruar se nuk do të shiheshin më për së gjalli. Shoqja, e tmerruar për këtë mesazh, ka lajmëruar familjarët e saj, të cilët kanë vënë në dijeni babain e vajzës. Por, Genta e kishte realizuar planin dhe është gjetur e helmuar me një sasi të konsiderueshme fostoksine. Atë e kanë dërguar me urgjencë në spitalin e qytetit, por pas një ore ajo ka ndërruar jetë, pasi helmi i fortë kishte arritur të vepronte shumë shpejt.
Mesazhi
“Mos u mërzit se unë po pi helm. Nuk do të takohemi më për së gjalli”. Ky ishte mesazhi që Genta Feimi kishte shkruar në celular për shoqen e saj të ngushtë. Pas këtij mesazhi ajo e kishte fikur telefonin dhe kishte pirë helmin vdekjeprurës.
Krijoni Kontakt