Po skuriq me lakra të egra?

[Pellazgu]

Në Shqipërinë e Mesme është një lloj ushqimi tradicional. Quhet skuriq. Ja si përgatitet. Mblidhen lakra të egra si: Hithra apo hiskull (nga ai që po të fshikësh bythët me atë, o le le, të djeg keq) , labot, mullagë, lypjetë ( vëre sa bukur tingëllon shqip: Lyp-jetë) dhe po të doni, edhe spinaq apo ndonjë lakër tjetër të gjelbërt sipas parapëlqimit apo mundësisë që keni në vendin ku banoni. Marrim bukën e misrit dhe e thërmojmë. Nuk del mirë sikur të përdornim miell misri. Duhet bukë e thërmuar. E lyejmë tepsinë me vaj (ulliri po patët). Shpërndajmë një shtresë me bukën e misrit të thërmuar në tepsi. Pastaj hedhim lakrat , edhe këto të përziera me bukën e thërmuar, por jo shumë. Kjo, për t'a mbajtur të shkrifët masën. Pastaj edhe sipër i hedhim një shtresë tjetër me bukë të thërmuar. Me kujdes, hedhim ujë të vakët derisa të mbulohet masa me lakra e bukë misri. Në furrën e paranxehur fusim tepsinë për t'a pjekur. Ashtu, të pa kavërdisura, lakrat ziejnë e bubërrojnë derisa uji është shterrur. Pasi dergjet për rreth 15-20 minuta në furrë, e nxjerrim tepsinë, dhe skuriqi i sapombaruar serviret. Shijon shumë mirë po t'i hedhim kos sipër. Provojeni dhe nuk do doni gjë tjetër veç skuriqit! Kjo nuk ka të bëjë me mallin për nënën që aq të shijshme i dilnin gjellët e mes tyre, veçanërisht, skuriqi!