Politikani dhe ndergjegja

[Dita]

Politikani dhe ndërgjegja


Bëjmë sot sikur marrim erë të gjithë nga politika. Lodhim mendjet duke tentuar të analizojmë, analiza boshe, kur nuk kemi asgjë në dorë. Megjithatë politikanë në njëfarë mënyre jemi të gjithë, duke nisur nga fëmija që me përplasje këmbësh apo me klithma thërret sisën e nënës e deri tek babagjyshët që me tekat pafund presin përkujdesjen e fëmijve. Politikanë e politikane ka plot kjo jeta jonë, shkolla për to nuk ka qenë e nevojshme për ta flakur tej ndërgjegjen e për t’ia nisur me mashtrimet, qoftë me ato të bardhat e kjo që me rënien e dhëmbit të parë, me hedhjen e tij në çati e me shprehjen e dëshirës së parë të fshehtë.
Kështu e ka shprehur një dëshirë të kahershme dhe një njeri që prej tre muajsh ka mbushur tridhjetë vjeç. Fytyrën e ka të lëmuar e të parfumosur pas rruajtjes së kujdesshme mëngjezore. Flokët i ka të prerë tip, sikurse dhe gjithë miqtë moshatarë që sot mbushin me prezencën e tyre zyrat e administratës shqiptare, kostumet i mban gri si të gjithë ata e këpucët sipas rastit, por një palë llustrafine i mban si të gjithë ata në dispozicion të mbrëmjeve të shumta që i organizojnë me paratë e siguruara veresie. Ky njeri prej dymbëdhjetë vjetësh vesh fytyrën me buzëqeshje false apo të vërtetë, këtë ka edhe ai kohë që nuk e dallon më, as para pasqyrës ku shpenzon me orë të tëra për t’u zbukuruar e për t’u bërë i pranueshëm në ambientin e mbizotëruar nga femrat brenda administratës shtetërore. Eshtë akoma beqar, ka dymbëdhjetë vjet që punon, me qëllim venien e vetes në qendër të vëmendjes të atyre që e rrethojnë, posaçërisht femrave. Babai kish thënë qëkur ai ish fare i vogël: “Grua, ky djalë do të bëhet politikan”.
Për të mirën e vet, apo për të mirën e popullit, sidoqoftë për të mirën e dikujt, për ndërgjegjen e papërlyer apo tërësisht të ngjyer me poshtërsi, ai punon si politikan. Shkollën e ka mbaruar, një specializim, sigurisht me bursë shtetërore e ka bërë. Me meritë ose jo ai ka pesë vjet që ka ndërruar mjaft zyra brenda godinave në Bulevardin Deshmorët e Kombit. E çuditshmja është se ai gjatë këtyre viteve “u vërtetua” si ekspert mbrojtjeje, forcash speciale, strategjish të sigurimit të shtetit, ekspert finance e ekonomie, madje edhe postin e kreut të kulturës shqiptare nuk mbeti pa e provuar. Sot ai qëndron ulur në më të lartin post të ndërtimit shqiptar, pa marrë pjesë qoftë edhe në një projekt rrugësh apo hekurudhash, vetëm sepse mban flokët njësoj me shokët e vet tridhjetëvjeçarë. Po një gjë e ka arritur. Disa muaj pas mbushjes të tridhjetave ka gjetur një vajzë perri të bukur, në fakt qe ajo që e gjeti, politikane vajza, më e zonja se ai. Mbathur të dy me veshje “firmato” shijojnë mbrëmjet në restorantet luksoze, nuk janë të paktë ata në Tiranë.

Ministrinë ka vendosur ta restaurojë. Eshtë i treti ministër radhaz që po restauron dhe përmbajtjen intelektuale të kësaj godine; po e zhvesh përsëri nga truri, po e mbush me ca fëmijë që janë politikanë, bij politikanësh, ekspertë të politikës së pallateve, hoteleve bregdetare, të liçensave për ndërtimin e rrugëve e autostradave, ekspertë të udhëtimeve jashtë shtetit, nëpër ishujt e vapshëm të detit Jon. Paturp shijon ai atë çka fituar me mundin 12-vjeçar, njërin nga “qiellgërvishtësit” e shumtë të Tiranës që sigurisht mban emrin e dikujt tjetër, ndërtuar mbi tokën e vjedhur një ish-pronari që vazhdon të endet me lutje mes dyerve të Bashkisë dhe poshtërsive të gjyqeve civile. E ç’t’i qahet Bashkisë që është zymtuar e ka humbur pamjen e një institucioni kryesor të kryeqytetit. Në kompensim ngjyrat i kanë kaluar rrugëve kryesore të Tiranës, ish-pronarit që endet pa shpresë, përveç të tjerave, i duhet të durojë dhe një ngjyrë lejla në ballkonin e vet dhe një të kuqe kombinuar me jeshile dhe të verdhë në pallatin përbri. Qyteti qan, ish-pronari vazhdon të ankohet, po si mund të preokupohet një tridhjetëvjeçar i veshur “firmato” për këtë plak të mjerë?! U mundua dymbëdhjetë vjet ai që të vijë e të punojë për populli. A thamë se populli është politikan? Pra dhe Ai do të vepronte në të njëjtën mënyrë. Pastaj nuk duhet të harrojmë se ministri nuk është as kryeqytetas. Pse duhet ta brejë ndërgjegja? Ai fundja-fundit nuk ka ndërgjegje fare. E hodhi tutje që kur bënte përpjekje që mes katër fëmijve, ai si një i parëndësishëm që erdhi në jetë vetëm i treti, të tërhiqte vëmendjen e prindërve.
Tani ai mban veshur këpucë llustrafine, në krah një politikane të bukur syzezë dhe ëmbëltuar nga suksesi shijon ushqimin e bollshëm diku i fshehur në një prej restoranteve. Rrugët presin, fondet nuk janë miratuar, tenderat dihet se kush është caktuar t’i fitojë, ai s’ka pse shqetësohet për diçka në të cilën ai nuk është ekspert. Ç’faj ka ai se u lind politikan e jo ndërtimtar? Ndërtimtarët kanë vend tjetër, mes llaçit e tullave, ai dhe shokët e vet tridhjetëvjeçarë, të pagdhendurit më të mëdhenj të kreqytetit, jo; për merita të larta ata mbajnë detyra në poste nderuese, le të krenohen politikanet e bukura që i rëndojnë mbi krahë; populli i pandërgjegjshëm politkan që i mban e ia ngroh me indiferentizëm kolltuqet le të vuajë prapambetjen në shek XXI.
Populli pret nga politikanët që ta integrojnë Shqipërinë në Evropë, politikanët presin nga Evropa që t’i miratojë fonde të reja që ata të mund t’i përvetësojnë, Evropa pret njerëz për të qenë me të cilët të bashkëpunojnë e në mungesë të tyre të tallet me kërcënimet për marrëveshjet e asociimit, njerëzit thërrasin tani PA zë: Europë, Europë, e njëherazi qeshin me politikanët që tani janë bërë një trup i vetëm e i buzëqeshin paturpshëm Europës.
Mjerë populli politikan! Sipas kokës festen i thonë, po a është kjo koka jonë?






Shenim:Ky shkrim nuk i drejtohet ndonjë politikani të veçantë. Specifikimet në të nuk kanë të bëjnë me asnjë person konkret. E veçantë në të është e përgjithshmja, mbizotëruesja brenda politikës së sotshme shqiptare.

[dikeafajtore]

Ke te drejte, s'ka nevoje per emra te vecante, mjafton te kujtosh sesa gjyhnaqare duken kur hipin ne fron dhe sa shpejt majmen, duke vrare mendjen me shume se ku te bejne shoping-un e rrobave te tyre sesa per pergjegjesite qe kane. Thone qe kur njeriu mbush te tridhjetat, nuk ka me ideale, por vetem interesa. Ky tipi me lart me sa shoh eshte vertetimi me i mire i kesaj.

Dita, je shume e forte ne zhanrin e pamfletit. Vazhdoje

P.s I lexova poezite dhe prozen tende ne faqen e pare te albasoulit. Urimet me te ngrohta nga Dikea

[denku]

E nesermja nuk dihet!
Do behet me mire!
Ishallah nuk eshte kohe e keqe!
Ropatja eshte zanati im!
A nuk bej mire te mos vras mendjen?
Me keq nuk ka ku vete!
Atje ku ka muzike dhe kercehet!
?
Nuk e di po sot po i lexoj vargjet vertikalisht nga siper poshte.

Pikes i ke rene Dita.Emrat jane vecse targa te nje makine rrangalle qe si per cudine e te gjitheve vazhdon te eci.
Pershendetje!!!!!!

[Dita]

Leximi vertikal i poezise tende Denku me shtyu te vijezoja dicka te re.

http://www.forumishqiptar.com/showth...&threadid=5846

Pershendetje!
Dita