Lushnje 6 viktima per nje tender

[Marsel]

LUSHNJE (25 Prill) - Tenderi i pastrimit të qytetit të Lushnjes, me vlerën e 60 milionë lekëve shkakton edhe një tjetër viktimë. Një tjetër person ka mbetur i vrarë në Lushnje, i cili ka qenë i lidhur me këtë çështje. Sipas policisë, rreth orës 22.00 të mbrëmjes të së martës, ka mbetur i vrarë nga një armë me silenciator, 25-vjeçari Alfred Pirra.
Shefi i Komisariatit të Lushnjes, Daut Braçe, konfirmoi për Gazetën Shqiptare, se kjo vrasje, ajo e Ilir Boriçit në muajin shkurt, si dhe plagosjet e Judmir Trifkës, Artur Shehut dhe Bernard Linatopit, kanë të njëjtin motiv, si dhe janë kryer në të njëjtën mënyrë, nga armë me silenciator. "Por, nëse ka qenë e njëjta armë apo jo, këtë do ta vërtetojë ekspertiza", ka theksuar Braçe. Para disa ditësh në qytetin e Lushnjes është arrestuar Rexhë Gina, i akuzuar për vrasjen e Boriçit dhe plagosjen e Trifkës. Ndërsa për të tjerët, policia ende nuk ka mësuar gjë, megjithëse ka shoqëruar disa të dyshuar.

Vrasja
Ka qenë ora 22.00, kur një telefonatë ka lajmëruar sallën operative. Në vendin e ngjarjes kanë mbërritur menjëherë uniformat blu, të cilat kanë gjetur në gjendje të rëndë, pranë "Red Hotel", në lagjen "Skënder Libohova" Pirrën, i cili ka vdekur sapo ka shkuar në spital. Sipas policisë, ai ishte qëlluar me tre plumba në trup dhe plagët e shkaktuara nga hemoragjia kanë qenë të papërballueshme për të. Uniformat blu, kanë mësuar nga dëshmitë e të pranishmëve në vendin e ngjarjes, se zjarri ka dalë nga një "Benz" pa targa, i cili është larguar menjëherë drejt veriut të qytetit. Megjithëse policia është vënë menjëherë në ndjekje të tij, deri dje në orët e mbrëmjes, nuk është bërë i mundur identifikimi dhe as arrestimi i autorëve të krimit. Viktima, pronar i një dyqani "Eurolloto", pasi e ka mbyllur dyqanin, udhëtonte me biçikletë drejt shtëpisë së tij.

Motivet
"Të gjitha ngjarjet e fundit, lidhen me një tender për pastrimin e qytetit të Lushnjes, me vlerën e 60 milionë lekëve. Siç kemi mësuar nga dokumentacioni i Bashkisë, bëhet fjalë për firmën 'Kondor 2' me bashkëpronarë Roland Shytin dhe viktimën e mbrëmshme Alfred Pirra, dhe një firmë tjetër, të cilat pretendojnë se janë fitueset e tenderit. Sipas dokumentacionit të Bashkisë, asnjëra nuk ka fituar, por ato këmbëngulin në të tyren. Ky është edhe shkaku i 2 vrasjeve dhe 3 plagosjeve të fundit. Kështu ka thënë komisari i Lushnjes, Daut Braçe, i cili ka bërë edhe lidhjen mes personave. Sipas tij, Ilir Boriçi, i vrarë në shkurt, ka qenë miku më i ngushtë i Roland Shytit. Madje, vëllai i tij është shoferi i kryebashkiakut të Lushnjes, Ylli Myftiut. "Po ashtu, të gjithë kanë qenë miq, shokë e të afërm të drejtuesve të firmës 'Kondor 2'", ka theksuar Braçe. Ndërsa për autorët e vrasjes dhe të plagosjeve, ai ka bërë të ditur, se "dyshimet kryesore janë mbi drejtuesit e firmës tjetër(emri i së cilës nuk bëhet i njohur), por deri tani nuk kemi arritur të zbulojmë ndonjërin. Por, ata po survejohen nga policia dhe mbahen gjithë kohës nën kontroll".
Seriali i vrasjeve dhe plagosjeve në qytetin e Lushnjes për çështjen e tenderit 60 milionësh, ka nisur në muajin shkurt, kur u ekzekutua Ilir Boriçi dhe u plagos Ilir Trifka. Disa ditë më vonë, në një lokal të Lushnjes është plagosur rëndë, Artur Shehu, nga Orikumi i Vlorës, i cili sipas policisë, është shok i Boriçit. Para pak ditësh, po në qytetin myzeqar, një tjetër flakë arme rrezikoi jetën e djalit të kryetarit të degës lokale të PS-së, Bernard Linatopi, shofer pranë degës së Tatim-Taksave të Lushnjes. Kështu, 60 milionë lekë të akorduara nga Qeveria për pastrimin e qytetit të Lushnjes, jo vetëm që nuk po e pastrojnë, por po i shtojnë atij numrin e viktimave dhe të të plagosurve.