Itali, kërkohet ndryshimi i ligjit Bosi-Fini!!

[Shpirt Njeriu]

Ligji për emigracionin në Itali përçan qeverinë e Silvio Berluskonit. Ministri i Brendshëm, Pizanu dhe ai i Çështjeve Europiane, Butilione, kanë rritur presionet për ndryshimin e ligjit, ndërsa ministrat e tjerë këmbëngulin në zbatimin e plotë të tij.



ROME

Rikthehen polemikat për emigracionin në qeverinë italiane. Ministri i Brendshëm Xhuzepe Pizanu dhe ai i Çështjeve Europiane, Roko Butilione, kanë kritikuar dje ligjin e quajtur Bosi-Fini dhe kanë kërkuar ndryshimin e tij. Sipas Ministrit të Brendshëm, "është pikërisht koha për të ndryshuar ligjin që përcakton kuota shumë të ulëta për emigrimin në vend". Sipas tij, ligji i ri nuk është konsideruar kurrë përfundimtar dhe tashmë ka ardhur koha të modifikohet. Pizanu ka theksuar se është e rëndësishme që kuotat e emigracionit në Itali të përcaktohen nga punëdhënësit. Sipas tij, ata e dinë më mirë se sa emigrantë duhet të hyjnë në vendin me numër më të ulët lindjesh në Europë dhe një popullsi që po shkon gjithnjë e më shumë drejt plakjes.

Ligji
Pizanu ka vlerësuar gjithashtu se ligji ka lejuar që gjatë vitit të fundit të rregullohet fluksi i rreth 700 mijë emigrantëve që mësyjnë brigjet italiane, gjë që nuk është arritur nga asnjë vend europian. Por, ashtu si edhe komisioneri i ardhëm europian, Butilione, Pizanu ka theksuar se lidhja e ligjit me kërkesat e ekonomisë italiane do të ndihmojë në menaxhimin më të mirë të fluksit të emigrantëve. "Ideja e rishikimit të kritereve për përcaktimin e statusit të propozuar është një nismë e rëndësishme politiko-kulturore", ka deklaruar ai.

Reagimi
Deklaratat e dy ministrave të qeverisë Berluskoni për ligjin e emigracionit kanë nxitur reagimin e Ministrit të Reformave, Kalderoli. "Ligji nuk është zbatuar plotësisht, sidomos lidhur me pikën e kthimit të refugjatëve", ka theksuar Kalderoli. "Ndaj një herë duhet ta zbatojmë e më pas duhet të flasim për modifikime brenda tij". Përballë kërkesës për ndryshimin e ligjit, Kalderoli ka kërkuar dorëheqjen e ministrit Pizanu, si moszbatues të ligjit në fjalë. Edhe kryeministri italian, Silvio Berluskoni, është shprehur i palëkundur lidhur me zbatimin e ligjit Bosi-Fini duke mos rënë dakord për ndryshimin e tij. Ligji i miratuar së fundmi parashikon kuota shumë të ulëta për emigracionin dhe kthimin e të gjithë refugjatëve në vendet e tyre të origjinës.

[good devil]

ne nuk marrim dot vesh politiken shqiptare te marrim ate italianen.