Liga Qytetare Shqiptare sponsorizon rezoluten per pavaresine e Kosoves

[PLaku-i-Detit]

pavarësia e Kosovës

fushata


Liga Qytetare Shqiptaro-Amerikane nis fushatën për të bindur administratën amerikane

Firma shqiptare për pavarësinë e Kosovës

Hyde dhe Lantos, dy hartuesit e Rezolutës drejtuar Bush




Tiranë ---- 06 Gusht 2004

Liga Qytetare Shqiptaro-Amerikane, e drejtuar nga kongresmeni Jozef DioGuardi, ka marrë përsipër mbledhjen e firmave në favor të rezolutës së dy kongresmenëve amerikanë për pavarësinë e Kosovës.

Të rinj nga Maqedonia, Kosova, Mali i Zi dhe Shqipëria, të cilët përfshihen në “Gjeneratën e re të shqiptarëve”, një shoqatë me qendër në SHBA, janë përfshirë prej disa ditësh në projektin për plotësimin e firmave të nevojshme, në mbështetje të Rezolutës 28 të Kongresit Amerikan, të bashkëmbështetur nga kongresmenët Henry Hyde, kryetar i Komitetit për Marrëdhënie Ndërkombëtare të Kongresit Amerikan, dhe Tom Lantos, anëtari më i lartë demokrat në këtë Komitet, për kërkesën e drejtpërdrejtë për pavarësinë e Kosovës. Iniciativa e Ligës Qytetare Shqiptaro-Amerikane, përveçse është mbështetur fillimisht nga kongresmenët, tashëm synon të kalojë në të gjitha tryezat e rëndësishme politike mbarëbotërore. Fillimisht, fushata synon një mbështetje sa më të madhe për Rezolutën, nga të gjithë shqiptarët anekënd botës, për ta bindur Administratën Amerikane që të mbështesë në mënyrë të hapur pavarësinë e Kosovës dhe fillimin e projektit për ndërtimin e një shteti demokratik, i cili do ta kthente paqen e vërtetë në Ballkan. “Ne kërkojmë që Rezoluta të ketë një mbështetje sa më të gjerë. Kjo do të ishte në favor të arritjes sa më të shpejtë të mbështetjes”, thotë Xhelil Bajrami, një nga drejtuesit e degëve të shoqatës “Gjenerata e re e shqiptarëve”.

Historia e Rezolutës
Disa muaj më parë, gjatë një deklarate të përbashkët të Ligës Qytetare Shqiptaro-Amerikane dhe dy kongresmenëve, u hartua Rezoluta 28, e cila u lexua në Kongresin Amerikan, duke i bërë thirrje Shteteve të Bashkuara që të deklarojnë përkrahjen për pavarësinë e Kosovës, një përkrahje e 435 anëtarëve të Dhomës së Përfaqësuesve të Shteteve të Bashkuara. Rezoluta pritet gjithashtu t´i drejtohet Administratës Amerikane dhe presidentit të SHBA-së, për të përshpejtuar shpalljen e pavarësisë së Kosovës. “Ne i bëjmë thirrje gjithë shqiptarëve, kudo në Ballkan, dhe të gjithë njerëzve të interesuar për drejtësi dhe paqe afatgjatë në Evropën Juglindore, që t´i përkrahin hapat kaq të rendësishëm që kanë ndërmarrë Hyde dhe Lantos, liderë të politikës së jashtme në Dhomën e Përfaqësuesve të SHBA-së, për t’u siguruar që Kosova dhe Ballkani të jenë të lirë, të sigurt, demokratikë dhe përparimtarë”, thuhet në kërkesën e Ligës Qytetare Shqiptaro-Amerikane, e cila tashmë, në këtë fushatë të hapur, pritet të përfshijë të gjitha shoqatat shqiptare, të lidhura me këtë Ligë.

Si mund të përkrahet Rezoluta
Formularët e shpërndarë në të gjithë vendet ku jetojnë shqiptaret, si dhe një adresë e posaçme në Internet, është menduar si forma e mbështetjes që kërkohet për Rezolutën. Duke qenë se viti 2005 është llogaritur si viti kyç për statusin e Kosovës, Liga, me mbështetjen e kongresmenëve, shpreson ta kthejë këtë thirrje në një problem kyç të axhendës së organizmave ndërkombëtare që merren me përcaktimin e këtij statusit, natyrisht, duke u nisur nga mbështetja kyçe e Kongresit Amerikan.



Pikat e Rezolutës, drejtuar Administratës Amerikane

Të mbështesin publikisht pavarësinë e Kosovës dhe vendosjen e Kosovës si një shtet sovran dhe demokratik, në të cilin respektohen të drejtat e njeriut, duke përfshirë edhe të drejtat e minoriteteve etnike dhe fetare, si mënyrën e vetme për arritjen e paqes së qëndrueshme në vendet e Ballkanit
Të njohë rrezikun që përmban vonesa e vendosjes së statusit përfundimtar të Kosovës, për ecurinë ekonomike dhe politike të saj dhe të Evropës Juglindore
Të bashkëpunojë me Kombet e Bashkuara, NATO-n dhe organizatat e tjera multilaterale, për të thjeshtuar një tranzicion, rrjedhojë e pavarsisë në Kosovë
Të sigurojë pjesën e saj të asistencës, tregtisë, dhe të programeve të tjera, për të mbështetur qeverinë e një Kosove të pavarur dhe për të inkurajuar zhvillimin e mëtejshëm të demokracisë dhe të sistemit të ekonomisë së tregut të lirë.


Priten mbi 500 mijë firma, nga të gjithë shqiptarët

Numri i firmave që pritet të mblidhen nga trojet ku banojnë shqiptarë, pritet ta kalojë shifrën e 500 mijëve. Sipas drejtuesve të shoqatës “Gjenerate e re e shqiptarëve”, vetëm nga shqiptarët në Maqedoni pritet të mblidhen mbi 100 mijë firma. Ndërkohë, nga shqiptarët e Kosovës, padyshim që numri do të jetë disa herë më i madh. Në të katër shtetet pritet të ketë peticione publike, në kërkim të firmave, si dhe kërkesa të shumta institucionesh që do t´i kërkojnë Administratës Amerikane që ta mbështesë Rezolutën 28 të Kongresit Amerikan, e cila është bashkëmbështetur nga dy kongresmenët, Henry Hyde dhe Tom Lantos. Formularët për plotësim pritet të përhapen publikisht në qendrat më të banuara të katër vendeve, ndërkohë që iniciatorët e kësaj ideje, përfaqësuesit e Shoqatës Qytetare Shqiptaro-Amerikane, shpresojnë që kjo fushatë do të mbyllet në një kohë rekord. “Ka disa mënyra komunikimi. Një është edhe ajo përmes adresës së Internetit, ku është përshkruar gjithçka”, kanë shpjeguar organizatorët e këtij projekti.

[StormAngel]

Partitë politike shqiptare në Luginën e Preshevës

Përshëndetet mbajtja e zgjedhjeve lokale

Partitë opozitare në Luginë të Preshevës, PDSH, LPD dhe BDL, kanë përshëndetur shpalljen e zgjedhjeve lokale në komunën e Preshevës që do të mbahen më 19 shtator.

Lideri i PDSH-s Ragmi Mustafa ka konfirmuar pjesëmarrjen në këto zgjedhje dhe në anën tjetër ka kritikuar vendimet shtetërore se pse këto zgjedhje nuk organizohen edhe në Bujanoc dhe në Medvegjë.Ndërkaq Orhan Rexhepi i LPD-s, përveç se ka paralajmëruar pjesëmarrje në zgjedhje, ka deklaruar se pas këtyre zgjedhjeve do të bëhen ndryshime rrënjësore në komunën e Preshevës.

Edhe lideri i BDL-së Skënder Destani është shprehur pro zgjedhjeve. Njëkohësisht këto subjekte politike kanë filluar edhe përgatitjet për fushatën parazgjedhore, respektivisht kanë përpiluar listat zgjedhore prej 38 kandidatëve për këshilltarë në asamblenë e ardhshme komunale.