Pushohen nga detyra oficeret e policise se Rinasit

[Genti^Itali]

Komisar Arben Ibro dhe kryeinspektor Fadil Karreci janë përjashtuar nga policia me urdhër të ministrit Toska

Policia, flaken shefat e Rinasit


Ened Janina

TIRANË- Ministri i Rendit Publik, Igli Toska, përjashton nga policia e shtetit komisarin e Rinasit Arben Ibro si dhe kryeinspektorin Fadil Karreci. Përjashtimi i tyre nga radhët e policisë është kryer pas zbulimit se në Rinas ishin riaktivizuar rrugët e vjetra nga ku kalonin klandestinët. Motivacioni zyrtar për përjashtimin e Ibros dhe Karrecit nga radhët e policisë është për shkelje të betimit, mosnjohje dhe zbatim të akteve ligjore, për shkelje të normave të detyrës dhe për favorizim të trafiqeve të paligjshme. Ndërkohë, kreu i Policisë së Shtetit, Bajram Ibraj, në një takim me policinë e Rinasit, ka paralajmëruar lëvizje të tjera në aeroport. Ai dje ka prezantuar edhe punonjësit e rinj të policisë së Aeroportit “Nënë Tereza” të Rinasit. Lajmi është pohuar dje nga zëdhënësja e Policisë së Shtetit, Edlira Teferiçi. Sipas saj, policia do të ndërmarrë operacione për parandalimin e trafikut të qenieve njerëzore.
Përjashtimet
Dje kreu i Policisë së Shtetit, Bajram Ibraj, i shoqëruar nga disa drejtorë të Drejtorive Qendrore të Policisë së Shtetit, ka prezantuar efektivat e rinj të komisariatit të Rinasit si dhe ka komunikuar masat e marra për ish- krerët e policisë së aeroportit. Ibraj ka deklaruar dje se me urdhër të ministrit Toska janë përjashtuar nga radhët e policisë komisar Arben Ibro dhe kryeinspektor Fadil Karreci me motivacionin: “shkelje të betimit, mosnjohje dhe zbatim të akteve ligjore, për shkelje të normave të detyrës dhe për favorizim të trafiqeve të paligjshme”. Shkarkimi dhe përjashtimi nga detyra i dy krerëve të policisë së Rinasit është kryer menjëherë pas zbulimit të një rrjeti të trafikut të klandestinëve. Më datë 28 qershor, në aeroportin e Budapestit janë kapur dy shtetas shqiptarë, të cilët lëviznin pa vizë. Xhevahir Vushaj dhe Spartak Kondi kishin kaluar nga aeroporti i Rinasit dhe kishin si destinacion Ukrainën. Vushaj do të shkonte më pas në SHBA ndërsa Kondi ishte sekseri, të cilit i ishin paguar 12 mijë dollarë. Menjëherë pas kësaj, policia ka arrestuar kontrollorin Virgjil Sejdarasi si personin përgjegjës për këtë shkelje. Sejdarasi është liruar më pas nga prokuroria pasi për të nuk kishte asnjë provë se ishte i implikuar në trafik. Kohë më parë, në aeroportin e Rinasit ishte zbuluar një tjetër rrjet i trafikut të klandestinëve dhe e gjithë policia e aeroportit ishte shkarkuar nga detyra. Tashmë zbulimi i skandalit tjetër ka bërë që për të disatën herë të “shkrihet” i gjithë komisariati i Pikës së Kalimit Kufitar të Rinasit.
Lëvizjet
Krerët e Ministrisë së Rendit, pasi kanë analizuar situatën e krijuar në aeroportin e Rinasit kanë vendosur që të largojnë prej aty edhe katër punonjës të tjerë. “Kështu janë larguar nga Komisariati i Policisë së Aeroportit Rinas, dhe janë transferuar e emëruar në detyra të tjera: Kapiten i Parë, Sokol Matoshi, Kryeinspektor Etem Skënderaj, Kryesinspektor Hysni Elezi dhe Kryeinspektor Fran Kaçorri”,- thuhej në njoftimin zyrtar të drejtorisë së Policisë së Shtetit. Sipas tij, në postet e lëna bosh janë emëruar dje inspektor Lajdi Korini, N/inspektor Aldo Londo, N/inspektore Nirda Dushi, N/inspektor Altin Shehu, N/inspektore Enerjeta Kalemaj, N/inspektore Nida Asmadhi, N/inspektore Laurela Kristani dhe N/inspektore Adisa Dani. Dje në Rinas, Ibraj ka paralajmëruar se në ditët në vijim pritet të ketë ndryshime të tjera në këtë komisariat. “Ndryshimet në Komisariatin e Rinasit erdhën si rezultat i inspektimeve dhe kontrolleve të herëpashershme në këtë komisariat, ku disa punonjës u gjetën me shkelje. Si rezultat i masave të marra vlen të përmendin përjashtimet nga detyrat që kanë patur të dy kontrollorët e këtij Komisariati, Virgjil Sejdarasi dhe Alket Begaj, të cilët me veprimet e tyre në kundërshtim me detyrën, favorizuan shtetas të ndryshëm në kalimin e paligjshëm të kufirit”,- tha dje Ibraj.

[Albo]

Arben Ibro, rrëfen arsyet për largimin e tij nga policia e shteti dhe çdo të bëjë në të ardhmen

[b]“Përse më përjashtuan nga policia”

Ish-komisari: Vendimi i eprorëve të mi ishte i nxituar

Laureta Rryçi

Arben Ibro, ish-shefi i Komisariatit të Rinasit e cilëson përjashtimin e tij nga policia si vendim të nxituar të eprorëve të tij.

Në një intervistë ekskluzive për gazetën ”Panorama” ai tregon se ka qenë i pari që ka denoncuar shkeljet që kanë bërë kontrollorët që ishin nën vartësinë e tij, duke ia lënë në dorë punën kështu SHKB-së (Shërbimi i Kontrollit të Brendshëm), për verifikime të mëtejshme. Ish-kreu i bluve të Rinasit rrëfen se të tilla raste ka pasur edhe më parë dhe përsëri ua ka raportuar eprorëve. Sipas 42-vjeçarit, motivacioni që kanë përdorur për ta përjashtuar nga policia është i padrejtë.

Ju prej dy ditësh jeni përjashtuar nga Policia e Shtetit. A jua kanë komunikuar një masë të tillë, dhe nëse po, me çfarë motivacioni?
Po, masën e përjashtimit nga policia ma kanë komunikuar dhe jam njohur si pasojë edhe më motivacionin. Në motivacion bëhej fjalë për shumë shkelje që, sipas tyre, kisha bërë unë. Në të thuhej përjashtim nga policia për shkelje të betimit, për moskërkim llogarie e të tjera.

Pas kësaj mase ndëshkuese që u mor ndaj jush, çfarë veprimi do të ndërmerrni?
Unë do të zbatoj procedurat ligjore që kam të drejtë të ndjek, duke u bazuar gjithmonë në ligj. Normalisht që do të apeloj duke u ankuar kështu për të drejtën time, për t'u rikthyer në polici.

Pas masës që më dhanë, kjo është e vetmja rrugë ligjore të cilën unë mund ta ndjek për të rifituar pozicionin tim në Policinë e Shtetit.

Si e gjykoni motivacionin që është përdor për t'ju përjashtuar nga policia?
Motivacionin e quaj të padrejtë. Shkak për heqjen time nga detyra e drejtuesit të policisë së Aeroportin e Rinasit u bë arrestimi i dy policëve për trafikim klandestinësh, por s’e kuptova lidhjen që mund të kisha unë me ta. Veprimi i tyre është përgjegjësi individuale dhe jo kolektive. Asnjëherë nuk kishte ndodhur që për një përgjegjësi individuale të shkrihej një komisariat i tërë. Unë isha ai shef komisariati që në momentin e parë që mora informacionin ua raportova shefave të mi duke ndjekur procedurën normale të punës. Më pas i takonte SHKB-së të hetonte për më gjatë, pasi kjo nuk është detyra ime.

A mendoni se përjashtimi juaj nga policia ka ardhur si rezultat i prishjes së ndonjë interesi?
Jo nuk e mendoj një gjë të tillë. Mund të them vetëm se është një vendim i nxituar nga ana e eprorëve të mi.

Çfarë informacioni morët?
Bëhej fjalë për një person i cili ishte kthyer nga jashtë për dokumente të falsifikuara. Ky qytetar kishte kaluar me lehtësi në Rinas duke u ndihmuar nga kontrollori. Kështu që unë, sapo e mësova një gjë të tillë, raportova rastin me emrin e kontrollorit që duhet të mbante përgjegjësi para ligjit, ashtu siç më takonte. Ndërkohë që më vonë mësoj urdhrin e ri për shkrirjen e të gjithë komisariatit.

Që kur e keni marrë këtë post, keni pasur raste të tjera të ngjashme me këtë të fundit, të cilat ua keni raportuar eprorëve?
Sigurisht që po. Unë kam pothuajse një vit si shef Komisariati në Rinas dhe në të tilla raste, sapo kam marrë informacione ua kam raportuar eprorëve, dhe ata kanë dijeni për këtë gjë.

Kemi mësuar se ju jeni nën hetim edhe për ”favorizim të trafikimit të klandestinëve”, ju keni dijeni për një gjë të tillë dhe si qëndron e vërteta?
Unë nuk kam dijeni që jam nën hetim për këtë çështje. Por, megjithatë, policia ka të drejtat e saj për të kryer çdo procedurë ligjore që është në të mirë të shtetit dhe të së vërtetës. Unë jam i hapur, të hetojnë për të gjitha pistat që kanë dyshime në lidhje me punën time.

Sa vjet punë keni në polici?
Në Policinë e Shtetit kam plot 20 vjet punë.

Si ndiheni tani, kur pas 20 vitesh punë përjashtoheni nga policia?
Emocionet që unë po përjetoj këto ditë do t‘i shpreh kur të vijë koha e duhur. Megjithatë, mund të them se jam i qetë. Unë e di që kam punuar mirë, kështu që edhe ndërgjegjen e kam të pastër. Ajo çka na mundon më shumë ne, që na flakin një ditë të bukur nga policia pas shumë vitesh punë dhe sakrificë, është se vetëm atë ditë kuptojmë se sa pas dore kemi lënë familjen tonë vetëm e vetëm për punën. Unë kam plot 20 vjet që nuk i jam përkushtuar ashtu siç duhet familjes sime.

Përse, në ç’orar punonit kur drejtonit policinë në Rinas?
Dita e punës niste në orën 08.00 të mëngjesit dhe mbaronte në orën 19.00 të darkës, pa bërë përjashtim as të shtunat dhe as të dielat.



Të shkarkuarit VIP-A

Kryekomisar Pjerin Ndreu
Kryekomisar Neritan Nallbati
Kryekomisar Gjovalin Loka
Kryekomisar Ilirian Dida
Kryekomisar Xhevahir Karaj
Kryekomisar Agron Hasanaj
Komisar Luan Shehu
Komisar Orest Afezolli
Komisar Azem Duraku
N/Komisar Agron Jaçe
Komisar Arben Ibro


Idajet Zeka ka marrë drejtimin e uniformave blu në aeroport
Rinasi pas shkrirjes së komisariatit

Ndryshimi i një pjese të madhe të personelit të policisë në Rinas nuk ka kaluar pa u vënë re nga banorët e përhershëm të aeroportit. Një kamerier i lokalit, që ndodhet ngjitur me hyrjen kryesore, tregon se mbrëmjen e së shtunës, aty vërtet ishte bërë “nami”. Një numër i madh makinash policie me funksionarë të lartë të cilët, kishin ardhur në Rinas, për të bërë prezantimin e funksionarëve të rinj dhe gjithashtu njohjen me shkarkimet dhe përjashtimet nga policia. Kamerieri ka qenë i pari, person jashtë Ministrisë së Rendit që ka mundur të mësojë ndryshimet, pasi mjaft policë kanë zgjedhur të ulen në kafe, pas mbledhjes së gjatë ku mësuan ndryshimet. “Kanë qenë këtu mbrëmë, rreth orës 21.15”, thotë ai. Ndërsa të dielën në Rinas ka më shumë lëvizje të policisë. Një nga të sapoemëruarit si kontrollorë na shpjegon se do t´u duhet të mësojnë, se si kryhen kontrollet me anë të kompjuterave dhe mjeteve të tjera. Ai thotë se ka ende disa kontrollorë “të vjetër” që u shpjegojnë se si funksionojnë gjërat aty. Ndërkohë që furtuna e së shtunës duket që veç emrave ka lënë pas edhe më shumë rreptësi e korrektësi njëherësh. Policë që në pjesën më të madhe të kohës qëndrojnë gati, duket se ende nuk e kanë marrë veten nga ajo që ka ndodhur një ditë më parë. Idajet Zeka, shefi i komanduar i Komisariatit të Rinasit, thotë se po punon për t’u njohur më mirë me problemet që mund të ketë ky komisariat. Ndërkohë, ai pohon se e njeh Komisariatin e Rinasit dhe e di se cilat janë pikat kryesore për të cilat duhet të punohet dhe të përmirësohen rezultatet. Me një staf pothuajse të ri policor atij do t’i duhet të punojë për të shmangur trafiqet e paligjshme, sidomos atë të qenive njerëzore, që është i përhershëm, por edhe atë të drogës. Ndërkohë që tashmë me një sitem të ri të menaxhimit të informacionit, Rinasi është kthyer edhe në një pikë strategjike, e cila mund ta ndihmojë policinë për ndalimin e shumë personave të kërkuar. Ndryshimet e menjëherëshme në këtë komisariat erdhën pas kapjes nga policia bullgare e dy shqiptarëve të pajisur me viza false, të cilët kishin hipur në aeroplan me ndihmën e dy kontrollorëve të aeroportit, tashmë të arrestuar nga policia. Ndërkohë që burime nga Drejtoria e Përgjithshme e Policisë bënë të ditur se personat e përjashtuar, ish-punonjës të këtij komisariati, mund të vihen nën hetim për favorizim të trafikut klandestin.