Policia: Protestuesit na goditën nga këmbët, prandaj reaguam
Policia ushtroi dhunë duke përgjakur dje para Kuvendit dhjetëra protestues, ish të përndjekur politikë. Ajo shoqëroi mbi 20 persona në komisariate dhe i denoncoi së bashku me organizatorët në Prokurori.
Ish të përndjekurit: Igli Toska po na dhunon si komunistët më përpara.
Policia ka ushtruar dhunë dje ndaj pjesëmarrësve në protestën e ish të përndjekurve politikë para Kuvendit. Pas përplasjes së disa qindra protestuesve dhe policisë, kjo e fundit ka reaguar në mënyrë të dhunshme, duke përgjakur dhjetëra protestues. Policia përdori mjete nga më të ndryshmet për të goditur protestuesit, si shkopinj gome, grushta e mjete të tjera.
Ish të përndjekurit që po protestonin para parlamentit për të miratuar ligjin e dëmshpërblimit të vuajtjeve të tyre gjatë viteve të burgut në kohën e diktaturës komuniste, janë irrituar edhe më shumë nga sjellja e policisë. Shumë prej të plagosurve nga ana e të përndjekurve janë dërguar në spital, ku dhe kanë marrë mjekimet e nevojshme.
Protesta ka qenë duke vijuar e qetë deri nga ora 11:30 minuta, kur forcat e policisë janë shtuar edhe më shumë para parlametit. Protestuesit janë informuar se ligji për dëmshpërblimin e tyre nuk është futur në radhë në seancën plenare dhe janë irrituar. Ata janë drejtuar drejt hyrjes së parlamentit, ku ishin të vendosur dhjetëra uniforma blu që pasoheshin nga efektivë të forcave speciale. Policia ka vendosur më pas edhe telin me gjemba për të penguar drejtimin e protestuesve për në Parlament. Policia ka përdorur dhunën për të shpërndarë protestuesit, duke shoqëruar edhe shumë prej tyre në komisariate.
Drejtuesit e protestës para Kuvendit e kanë quajtur këtë një sjellje brutale të urdhëruar nga ministri aktual i Rendit Igli Toska. Pjesëmarrësit në protestë kanë filluar të thërrasin parrulla kundër ministrit aktual të Rendit. Dhunën e ushtruar nga policia ata e kanë quajtur si një ridhunim që u bëhet nga ana e komunistëve në pushtet.
Ndërsa policia e Tiranës në një njoftim për shtyp pretendon se organizatorët e protestës u kanë bërë thirrje protestuesve për t'u afruar në drejtim të Kuvendit. "Organizatorët dhe pjesëmarrësit në tubim janë konfrontuar me forcat e Rendit duke i qëlluar ata nga këmbët dhe duke i shtyrë, derisa u afruan tek postoblloku i rrethimit të jashtëm. Me masat e marra nga policia duke përforcuar efektivat e saj, pa përdorur dhunë mbi protestuesit, i rivendosën ata tek vendi i miratuar për zhvillimin e protestës," thuhet në deklaratën e Policisë së Tiranës.
Ndërkohë televizionet transmetuan pamje ku dhjetëra protestues ishin të gjakosur në vende të ndryshme të trupit. Policia thotë se kanë shoqëruar në komisariate, 21 persona që janë identifikuar dhe më pas janë lënë të lirë. Policia thotë se për këto 21 persona dhe për organizatorët e protestës, është bërë kallëzimi penal pranë prokurorisë së Tiranës, për thyerje të ligjit mbi tubimet. Drejtuesit e protestës së ish të përndjekurve thonë se janë shoqëruar nga policia mbi 40 persona, mbi të cilët është ushtruar edhe dhunë.
Gazeta "Tema"
Krijoni Kontakt