Angli, ngrihet Akademia Shqiptare UK

[Shijaksi-London]

"DO SHERBEJE PER DISKUTIME E SHKEMBIM PERVOJE"

Angli, ngrihet Akademia Shqiptare
Intelektualët emigrantë bashkohen në një rrjet


--------------------------------------------------------------------------------

Nga Londra
Muhamed Veliu


ANGLI

Një iniciativë tërheqëse në Britaninë e Madhe fton akademikët dhe intelektualët që ndodhen në këtë vend të njohin rrjetin akademik shqiptar dhe të jenë pjesë e një sipërmarrje mjaft të re. Ky rrjet, fillimisht elektronik ofron mundësinë për njohje dhe shkëmbim informacionesh të ndryshme rreth fushave në të cilat studjojnë apo kryejne studime shkencore. Ndërtimi i këtij rrjeti elektonit i kësaj natyre në Angli për shqiptarët, është rezultat i një iniciative të dy moderatoreve, Enkeleida Tahiraj akademike ne SSEES/University College Londer, si dhe e kandidates për Doktore Shkencash në Universitetin e Yorkut, dhe Juli Vullnetari, njëkohësisht studente në metodat e kërkimit social në studime të migrimit, në Universitetin e Sussexit, Brighton. Shumë pak kohë pas konkretizimit të kësaj iniciative, në më pak se dy muaj ekzistencë rrjeti numëron më shumë se 50 anëtarë. Optimizmi me të cilin u prit kjo iciativë, tregoi më së miri se dëshira për diçka të tillë ekzistonte tek shumë studentë dhe akademikë që gjenden në Britaninë e Madhe, jo vetëm për të njorur njëri-tjetrin pse jo edhe për të shkëmbyer dije e përvojë, për të bashkëpunuar dhe më pas për të bërë të njohura studimet e tyre. Gati gjysma e anëtarëve të "Akademisë Shqiptare në UK" patën rastin fundjavën e shkuar që të njihen nga afër. Qëllimi i këtij takimit të parë ishte çuarja mëtej e punës së rrjetit në dobi të anëtarëve të tij dhe më gjerë. Në fjalën e saj të hapjes Mirela Bogdani, e cila studion shkenca politike në Universitetin e Kardifit ka theksuar se, "kjo iniciativë është diçka e veçantë dhe e nevojshme për të gjithë" shqiptarët në Angli. Rrjeti Akademik i Shqiptarëve në Britaninë e Madhe, është një iniciativë që ka synim të shërbejë si platformë diskutimesh dhe shkëmbimesh profesionale duke mbledhur rreth vetes shumë studentë kërkues, lektorë e intelektualë shqiptarë, të cilët janë të vendosur në institucione akademike apo kërkimore në Britaninë e Madhe, si dhe joshqiptarë që kanë interes në studime shqiptare.


Ja çfarë synon kjo akademi shqiptarësh

Themelueset e rrjetit "Akademia shqiptare UK", kanë menduar që objektivat kryesore ku do të fokusohet vijueshmëria e tij të jenë disa. Më kryesoret janë, krijimi i një rrjeti njohjeje dhe bashkëpunimi shkencor midis pjesëmarrësve, kryesisht akademikë, ashtu edhe institucione të administratës publike e institucione të tjera politike. Nxitja e mbështetja e punimeve apo botimeve të përbashkëta nga pjesëmarrës në fusha të përafërta, si dhe ndarja e informacioneve në lidhje me organizime, botime, aktivitete shkencore e intelektuale që kanë lidhje me çështjet shqiptare kudo në botë, janë dy prej objektivave tjera të rëndësishme të këtij rrjeti. Gjatë muajve të ardhshëm, "Akademia shqiptare UK", do të ketë faqen e saj mjaft tërheqëse në internet, shumë të pasur me informacione në lidhje me qëllimin e iniciativës, si dhe materiale e publikime shkencore nga fusha të ndryshme. Ajo do të "qëndiset" për dy qëllime, së pari informacione për akses publik, dhe së dyti me informacione për vetë anëtarët. Aktualisht, adresa e këtij rrjeti është ende:
http://groups.yahoo.com/group/ akademia_shqiptare_UK