Calcio Mercato

[SUPERSTAR_N1]

Te rejat me te fundit shit-blerjet me te bujshme gjithcka reth Blerjve

[SUPERSTAR_N1]

Sulmuesi i Uest Hemit ndodhet ende në planet e Mançesterit


Paolo di Kanio te Kievo? Personi në fjalë falënderon, por refuzon: "E njoh shumë mirë presidentin Kampedeli, që është mik i ngushtë i agjentit tim, - deklaroi Di Kanio në adresën e tij elektronike në Internet, - dhe interesimi i tij për mua më gëzon shumë, ashtu sikurse më gëzon shumë edhe fakti që trajneri i Mançester Junajtit, Sër Aleks Fergusoni, më ka ende në planet e tij. Fakti që në Itali më kujtojnë ende, është një arsye më shumë për t'u kënaqur, por gjithashtu edhe lavdërimet e trajnerit të një skuadre që luan futboll të shkëlqyeshëm, si Mançesteri, më bëjnë të ndihem krenar. Por, gjithsesi, - përfundoi ish-lojtari i Lacios, - mund të shtoj se hëpërhë nuk më leverdis të kthehem në Itali, megjithëse më bëhet qejfi që Kampedelit, një të pasionuari të madh pas futbollit anglez, i kam shkuar në mendje unë. Për sa i përket Mançesterit, nuk e kam fshehur kurrë faktin se e adhuroj lojën e tij. Gjithsesi, ndihem shumë mirë te Uest Hemi dhe nuk do të kishte asnjë problem për mua sikur t'i mbyllja të dyja sezonet e fundit të karrierës sime si profesionist në "Apton Park", ku kam marrëdhënie të shkëlqyera me klubin dhe tifozët.

[SUPERSTAR_N1]

Guidolin: Vetëm unë kam pasur dyshime te vetja

Një ditë pasi është konfirmuar në krye të stolit nga këshilli administrativ i klubit kuqeblu, trajneri i Bolonjës, Françesko Guidolin, deklaroi: "Nëse ndokush kishte dyshime, ai isha vetëm unë, që pandeha se ky do të kish qenë sezoni im i fundit me bolonjezët. Po të mos e kisha vënë unë, askush tjetër nuk do ta vinte në diskutim drejtimin teknik të skuadrës." Trajneri më pas saktësoi: "Unë vetë e futa veten në diskutim, sepse ashtu ishte e drejtë që të bëja. Vetëm më pas klubi e bëri një gjë të tillë." Kështu që klubi kuqeblu nuk ka pasur asnjë paqartësi dhe, siç konfirmon edhe vetë trajneri Guidolin, ai ka nisur të bisedojë me trajnerë të tjerë vetëm në çastin kur mori sinjale paqartësie nga ana e trajnerit, që e ka drejtuar Bolonjën në dy sezonet e fundit. "Di që klubi ka biseduar edhe me dikë tjetër. Por kjo është më se e pranueshme, pasi në ato çaste edhe mund të më kishte humbur. Mund të kisha thënë mjaft." Emri më i lakuar për zëvendësimin e trajnerit venet qe ai i Karleto Macones, i cili do të kishte marrë me vete edhe Roberto Baxhion, duke shënuar kështu një rikthim të dyfishtë në "Dal Ara". Megjithatë, duket se në këshillin e administratës ka peshuar edhe paga e Guidolinit, 2 milionë euro neto në sezon. Në rast shkarkimi të mundshëm, klubi do t'ia paguante njëlloj ato para, që në kuadër të shkurtimit të rrogave, do të ishte një lëvizje paksa e rrezikshme.

[SUPERSTAR_N1]

Juvja "i vjedh" edhe Nestën Interit


Pas titullit edhe Nestën. Interi po lë (ose ndofta ka lënë) që Juventusi t'i marrë nga duart edhe qendërmbrojtësin e Lacios dhe të kombëtares italiane, Alesandro Nestën, pasi la që t'i vidhej nën hundë, më datë 5 maj, titulli kampion i Italisë, pikërisht nga ekipi i Lipit, titull që deri në ato çaste, skuadra e Kuperit u duk sikur e kishte futur në xhep. Një pushtet bardhezi...
Me sa duket, "kolovarësja" e mbrojtësit më të mirë në Itali dhe ndofta edhe në botë ka ndalur në krahët e bardhezinjve. Transferimi i Alesandro Nestës te Juventusi (nga Sendai ka pohuar se gjatë këtyre ditëve do të bëjë të ditur emrin e ekipit të tij të ri) duket pothuajse punë e mbaruar, ose në mbarim e sipër. Burime shumë të sigurta pohuan se për të zyrtarizuar gjithçka, tashmë mungon vetëm firma e lojtarit. Lacio (as presidenti Kranjoti nuk e fsheh më) e ka të domosdoshme t'i shesë lojtarët e saj më të çmuar dhe, në fakt, përveç Nestës, do të largohet dhe Hernan Krespo. Madje ka gjasa që kontrata mes Juves dhe lacios të jetë sigluar dhe tashmë të mungojë vetëm firma e lojtarit, që ndodhet në Japoni për të luajtur në Botëror me kombëtaren "axurre". Shitja e Nestës te Juvja mund të sillte në arkat e Lacios 30 milionë euro, aq sa do të paguante dhe Interi, duke i shtuar kësaj oferte edhe Marko Materacin e duke e çuar në 60 milionë euro vleftën. Po kaq kushton edhe Nesta, plus kartonin blu të një lojtari si Davids, i cili vazhdon të "përplasë këmbët", pasi ka dëshirë të shkojë te Roma, por edhe Zambrota ose Takinardi, ose, tekefundit, lojtari i Kievos, Eriberto, që Juvja sapo e ka blerë nga veronezët dhe i pëlqen shumë trajnerit Mançini.

[SUPERSTAR_N1]

Metzelder, nëse s'vjen Nesta


Reali i Madridit ishte përpjekur të blente mbrojtësin e Lacios Alesandro Nesta për të fuqizuar repartin mbrojtës. Por konkurrenca është e madhe dhe kështu klubi iberik ka preferuar ta lërë mënjanë italianin dhe në vend të tij kërkon të bëjë të tijin Kristof Metzelderin e Borusias së Dortmundit, i cili para një jave u shpall nënkampion bote. Mbrojtësi, i cili do të mbushë 22 vjeç në nëntor, bën pjesë në kombëtaren gjermane të drejtuar nga Rudi Fëler, dhe duket se do të jetë një nga lojtarët më kryesorë të mbrojtjes gjermane.

[SUPERSTAR_N1]

Niki Bat, i pashitshëm


Trajneri i Mançester Junajtid, Aleks Ferguson, ka bërë të qartë se nuk i shkon në mendje të shesë mefushorin Niki Bat. Ishte folur se lojtari i Anglisë do të kalonte tek Interi, por "Fergi" i ka siguruar tifozët e Mançesterit se "kokëkuqi" nuk do të largohet. "Kam marrë shumë telefonata për Batin, - tha Sër Aleksi. - Por ne nuk kemi kërkuar kurrë ta shesim. E njëjta gjë vlen edhe sot. Ai nuk është ankuar kurrë në rastet kur nuk ka qenë në formacion dhe ka qenë gjithmonë gati kur e kam thirrur. Kjo tregon karakterin e tij. Niki ishte ylli i Anglisë në Botëror dhe luajti shumë mirë."

[Eros]

2 lojtare te Ac Milanit u blen nga Atletico Madritit ne ditet e fundeshe.Njeri nga keto te 2 ishte nje nga legjendat e Milanit Demetrio ALbertini dhe tjetri ishte Jose Mari.Mesa duket Demetrio Albertini do te mbaroj karieren e tij si futbollist me eekipin e Atletico Madrit.

[SUPERSTAR_N1]

Roma: Shnaideri, alternativa për Davidsin

Zëra që kanë mbërritur nga Gjermania kanë bërë të ditur se Roma ka ndër mend të blejë Bernard Shnaiderin nga Bajeri i Leverkusenit. Klubi verdhekuq do ta zhvendosë të gjithë vëmendjen te mesfushori i kombëtares gjermane vetëm në rast se nuk do të arrijë të blejë Edgar Davidsin deri në ditët e para të javës së ardhshme. Jo rastësisht, drejtori sportiv Baldini pritet në Leverkusen për t'i parashtruar ofertën presidentit Reiner Klamund, që do të jetë prej 17 milionë eurosh. Marrëveshja ka shumë gjasa që të arrihet.

[SUPERSTAR_N1]

Reali në Romë për Nestën dhe Krespon

Presidenti i Realit të Madridit, Florentino Perez, javën e ardhshme do të vijë në Itali për të folur me Kranjotin për Nestën dhe Krespon. Gjithsesi, zor se do të arrijë ta blejë të parin, por, për sa i përket sulmuesit, gjithçka duket e mundshme. Krespo mund t'u sillte arkave të klubit roman ato 25 milionë euro të nevojshme, që lacialët mund t'i përdornin për të blerë Rivaldon nga Barcelona. E vështirë, por jo e pamundur që të vijë Rikelme hua, pasi nuk i pëlqen Mançinit. Para disa ditësh, presidenti i Barcelonës i kishte bërë të ditur Rivaldos së nuk kishte ndër mend të kishte në skuadrën e tij një lojtar të pamotivuar dhe me pretendime të mëdha ekonomike, pas fitimit të Kupës së Botës me përfaqësuesen e "Selesaos". Duke konsideruar faktin se Krespo ka kohë që është në planet e Realit dhe se shitja e tij do të sillte 40 milionë euro në arkat e klubit bardhekaltër, është e lehtë të mendosh se me ato para Kranjoti mund ta fuqizonte në mënyrë të ndjeshme Lacion. Madje, duke pasur edhe një mundësi të hapur që përkrah Rivaldos të vinin edhe Rikelmen, që nuk është pritur me shumë entuziazëm në Barcelonë, sidomos nga trajneri Van Gal. Presidenti Gaspart vazhdon ta mohojë se asi argjentinas mund të shkojë hua në ndonjë skuadër tjetër. Por zërat po bëhen gjithnjë e më këmbëngulës dhe përgënjeshtrimet nuk mjaftojnë për të kthjelltësuar qiellin e zymtë që është krijuar mbi të ardhmen e Rikelmes. Megjithëse po merret më shumë me çështjen "Nesta", klubi bardhekaltër nuk e ka lënë pas dore pistën spanjolle.

[SUPERSTAR_N1]

Juve, rikthim i fuqishëm për Nestën

Kur e ardhmja e Alesandro Nestës u duk se thuajse kishte marrë një kuptim, pra kur mbrojtësi qe fare pranë transferimit tek Interi, befas Juvja ndërhyri sërish, duke u prishur punë milanezëve. Në fakt, në mbrëmjen e ditës së enjte, drejtuesit bardhezinj u takuan me përfaqësuesit e Lacios dhe agjentin e lojtarit. Gjatë këtij takimi u parashtrua edhe oferta më e fundit nga ana e torinezëve: 25 milionë euro, plus kartonin blu të Takinardit, si dhe bashkëpronësinë e Kamoranezit. Por Kranjoti nuk është luhatur aspak nga pozicioni i tij: kërkesa e tij mbetet 30 milionë euro, plus Edgar Davidsin. E gjithë kjo ka ndodhur vetëm pak minuta pasi drejtori i përgjithshëm i Juves kishte bërë një "ese" të përgjithsme mbi merkaton: "Nuk përbën asnjë sekret fakti që Interi është i favorizuar për lojtarin bardhekaltër dhe mund ta blejë shumë shpejt." Por, ndërkohë që Moxhi fliste, Kranjoti po merrte në konsideratë ofertën e re të klubit torinez. Një ofertë që mbërriti fill pasi Interi kishte bërë një hap mjaft domethënës përpara, duke mos e konsideruar më të pashitshëm Kristiano Zanetin. Kuperi, që më parë i kishte dal krah lojtarit të tij, tashmë e ka kuptuar se tekefundit do të ishte më mirë që ta humbiste mesfushorin në këmbim të mbrojtësit. Ndërkaq, pasditen e ditës së enjte, Masimo Morati ishte takuar me Serxhio Kranjotin, për t'i parashtruar këtij ofertën e fundit të Interit, që do të ishte 27 milionë euro, plus kartonin blu të Nikola Ventolës dhe bashkëpronësinë e Stefan Dalmatit. Por, ndërkohë, Reali i Madridit, mund të dalë në skenë dhe t'i befasojë të tërë. Drejtuesi madrilen Horge Valdano ka bërë të ditur se skuadra e "merenguesave" ka disa boshllëqe, sidomos në mbrojtje, që vetëm një lojtar i madh mund t'i mbulojë. Në faqen zyrtare elektronike në internet, tifozët patën mundësinë të shprehnin preferencat e tyre dhe lojtari më i votuar ka qenë, pa qenë nevoja ta zbulojmë ne, pikërisht Alesandro Nesta.

[SUPERSTAR_N1]

Kuper: Morati e di se çfarë dua

Në përfundim të takimit miqësor me Morbenjon, trajneri i Interit, Hektor Kuper, foli për çështjen "Nesta". "Merkaton nuk e bëj unë. Mund të them vetëm se Kristiano Zaneti është një lojtar shumë i rëndësishëm për këtë skuadër, ndaj më duhet të vlerësoj me kujdes nëse është e mundur të mbetemi pa të. Megjithatë, presidenti e di mirë se çfarë i kam thënë. Kësaj here i dhashë opinionin tim." Ndërsa për sa i përket brazilianit Eriberto, ai u shpreh shkurt: "Është një lojtar i vlefshëm". Nuk e ka thënë në mënyrë shumë të qartë, megjithatë, me fjalët e cituara më sipër, Hektor Kuperi la të nënkuptohet se nuk e cilëson më lojtar të pashitshëm Kristiano Zanetin. Mesfushori i kombëtares italiane është i vetmi lojtar që kreu lacial ka kërkuar në këmbim të Nestës. Kishte qenë pikërisht vendosmëria e trajnerit argjentinas për ta mbajtuar atë te zikaltrit, pasi e konsideronte një nga pikat më të forta të 11-shes bazë, që e ka ngadalësuar shumë çështjen "Nesta". Juvja, që për pak sa s'u duk e humbur, është kthyer fuqimisht në hapat e saj për qendërmbrojtësin e fortë të bardhekaltërve. Pas takimit Xhiraudo-Kranjoti, letrat në tryezë janë përzier sërish, duke e shtyrë kështu ekipin zikaltër që t'i rishikojë strategjitë e veta. Tani çështja "Nesta" mund të zhbllokohet përfundimisht edhe sepse presidenti i Interit, Masimo Morati, është gati t'i afrojë Lacios, përveç parave, edhe bashkëpronësinë e mesfushorit francez Stefan Dalmat, që pëlqehet shumë si nga trajneri Mançini ashtu edhe nga presidenti Kranjoti. Në pritje që kjo çështje të zhbllokohet, Interi po punon për të fuqizuar krahët e skuadrës. Blerja e Kamoranezit nga ana e Juves u ka hapur rrugën zikaltërve për të blerë Eriberton, anësor i krahut të djathtë i Kievos. Ndërkaq, kanë vazhduar bisedimet edhe me Kili Gonzalesin. Valencia është duke e marrë seriozisht mundësinë për ta ulur çmimin e argjentinasit, ndaj mund të arrihet shpejt një marrëveshje mbi bazën e 14 milionë eurove, plus një lojtar interist që do të zgjidhet nga klubi spanjoll. Pasi më parë ishte shumë pranë Juves dhe më pas pranë Lacios, "xhevahiri" i Kievos tashmë mund të "zbarkojë" në Milano, për të veshur fanellën e Interit. Megjithatë, peripecitë që paraqet kjo çështje nuk janë të pakta. Në radhë të parë, zikaltrit, në krahun e djathtë të mesfushës kanë një lojtar tepër të vlefshëm, Serxhio Konseisaon, i cili hëpërhë nuk ka shprehur ndonjë dëshirë për t'u larguar. Së dyti, edhe çmimi i brazilianit përbën një tjetër problem. Kievo nuk ka ndër mend të bëjë asnjë zbritje nga 12 milionë eurot që ka kërkuar, ndërkohë që Interi bën sikur nuk dëgjon nga ai vesh. Ky pazar mund të zhbllokohej me hyrjen e Nikola Ventolës në skenë, i cili do të shkonte në "Bentegodi" për të plotësuar boshllëkun e lënë nga Korradi, që ka kaluar tek Interi. Ndërkohë, Interi nuk i ka humbur shpresat për të marrë argjentinasin Kili Gonzales. Morati dhe Kuperi e duan me çdo kusht. Ata kanë kohë që e kanë marrë miratimin e lojtarit, por presin që Valencia t'i ulë pretendimet ekonomike, që aktualisht janë fiksuar te 20 milionë eurot. Dje amerikanojugori ndodhej në Valencia, ku iu bashkua ekipit të saj në grumbullimin e parë në kuadër të sezonit të ardhshëm. Megjithatë, brenda këtyre ditëve, priten zhvillime të mëtejshme.

[master]

Lajmi me i fundit eshte ky.

Shkembim i mundshem Krespo-Bati mes Lacios dhe Romes.

Nuk eshte fantashkence por cfare mund te ndodhi shume shpejt nese Sensi dhe Kranjoti bien dakort.

Preferenca ime do ishte qe dhe Kanavaro dhe Nesta te ikshin te Juve.

[SUPERSTAR_N1]

Inter, planet zhvendosen te Kanavaro

Gjatë orëve të fundit, në kampin interist ka marrë përmasa reale një alternativë për Alesandro Nestën. Bëhet fjalë për Fabio Kanavaron. Në fakt, Masimo Morati është dukur disi i bezdisur nga deklaratat e homologut lacial, Kranjoti, në lidhje me çështjen e qendërmbrojtësit bardhekaltër dhe ka vendosur ta përqendrojë të gjithë vëmendjen te futbollisti i Parmës. Marrëdhëniet me Tanzin janë të shkëlqyera, duke pasur parasysh edhe bashkëpronësinë e Adrianos, që ndajnë mes tyre, prandaj kjo çështje ka mundësi të mira të realizohet. Interin, që të ndryshojë drejtim e ka shtyrë edhe entuziazmi i pakët me të cilën janë pritur në kryeqytet përpjekjet e Moratit për t'ia prishur mendjen Kranjotiti dhe për të përvetësuar Nestën. Milanezët u ishin përulur të gjitha kërkesave të lacialëve, madje duke pranuar që, përveç parave ,t'u jepnin edhe kartonin blu të Dalmatit si dhe bashkëpronësinë e Kristiano Zanetit. Vetë agjenti i lojtarit, zoti karlo Palaviçino, bëri të ditur se klienti i tij do ta mirëpriste transferimin te Lacio, pavarësisht nga dëshira e madhe që ka për të tentuar edhe një herë të fitojë kampionatin me fanellën zikaltër. Por, megjithatë, Kranjoti nuk luajti as edhe një milimetër nga pozicioni i tij, duke i shtyrë zikaltrit të kërkojnë gjetkë, në rast se rezistenca e "shqiponjave" do të vazhdojë edhe për një kohë të gjatë. Dhe kështu që kandidatura e Fabio Kanavaros për një vend në prapavijën e sezonit të ardhshëm të skuadrës së Hektor Kuperit ka ardhur duke u rritur. Më parë Juvja dhe më pas Milani nuk arritën t'ia "rrëmbenin" Parmës lojtarin e Kombëtares, i cili, pa iu dridhur qerpiku, pohoi se në gjurmët e tij ndodhej edhe Interi. Hipoteza interiste i pëlqen shumë Kanavaros, madje disa herë më shumë se sa ajo milaniste dhe ndoshta aq sa ajo juventine. Do të shohim nëse mes dy "grindavecëve", Morati-Kranjoti, do të dalë i fituar i treti, presidenti i Parmës, Tanzi, natyrisht edhe Kanavaro.

[SUPERSTAR_N1]

Dalmat: Nuk luaj nga Interi

Stefan Dalmat një gjë e ka shumë të qartë, faktin se do të qëndrojë tek Interi. Ai e ka hedhur kështu hapin e tij të parë. Mesfushori, emri i të cilit është shfaqur shumë herë në listën e lojtarëve që do të largoheshin nga zikaltrit, vetëhiqet nga merkato dhe mendon për sezonin e ardhshëm. "Interi ka pasur gjithnjë besim tek unë, - tha francezi, - kështu që edhe mua nuk më ka shkuar kurrë në mendje të largohem, ndaj nuk jam në merkato. Dua që t'i bëj për vete tifozët interistë dhe ata të kombëtares franceze dhe kjo do të varet nga rendimenti im në kampionatin e ardhshëm me fanellën e Interit. Duhet të luajmë shumë mirë, sepse ky vit do të jetë shumë i rëndësishem për të gjithë ne, në disa aspekte edhe përcaktues. Por nuk dua të shkoj shumë larg me mendimet e mia, sepse kemi përpara një objektiv shumë të rëndësishëm që është në prag, kulifikimi për në Ligën e Kampioneve, që vetëm në muajin gusht do të shohim nëse do ta arrimë apo jo, pas takimeve para-eliminatore". Dhe një gjë e tillë do të ishte më e lehtë të realizohej pa menduar më për titullin e humbur në javën e fundit të kampionatit të kaluar. "Duhet ta harrojmë 5 majin dhe të kaluarën dhe të përqendrohemi te sfida me dy takime që na pret, pasi është çelësi i sezonit tonë të ardhshëm". Por edhe këtë vit për të mbetet një mëdyshje e madhe: roli. Në fakt, ka qenë dhe vazhdon të jetë një dilemë e madhe pozicioni i dalmatiti në fushë, pasi Kuperi nuk ka vendosur ende nëse do ta angazhojë në krahun e djathtë apo në qendër të mesfushës. Dalmati është vënë tërësisht në shërbim të trajnerit argjentinas, megjithëse rrëfeu se në qendër ndihet më mirë. "Mund të luaj në çdo pozicion të mesit të fushës. Gjatë dy miqësoreve të para ndaj Bromiezes dhe Morbenjos kam luajtur gjithnjë në krahun e djathtë gjatë pjesës së parë dhe në qendër gjatë së dytës. Mua më pëlqen më shumë roli i dytë, pasi është pozicioni im natyral. Do të më pëlqente shumë të luaja si mesfushor i qendrës me tipare sulmuese, duke u mbuluar nga pas nga një tjetër lojtar. Por ekipin e vendos Kuperio dhe unë vetëm sa i përgjigjem urdhrave të tij. Vëtë ai më ka folur gjatë. Tani e di se çfarë kërkon nga unë dhe ai e ka kuptuar më mirë se kushdo tjetër se në ç'pozicion mund t'i shfrytëzoj më mirë aftësitë e mia në dobi të skuadrës. Nëse luaj në krahun e djathtë, mund t'i kapërcej kundërshtarët në shpejtësi e sipër, por mendoj se as unë dhe as Rekoba këtë vit nuk do të luajmë shumë si anësorë".

[SUPERSTAR_N1]

Milani i kthehet Hubnerit për sulmin

Milani nuk mendon të fuqizojë vetëm mbrojtjen, por, ndërkohë po kërkon edhe një sulmues. Pas largimeve të Simones, Hoze Marisë dhe Havi Morenos, Ançeloti rrezikon të mbetet disi "jetim" në repartin e avancuar. Kjo situatë i ka shtyrë drejtuesit kuqezinj të nisin sërish bisedimet me Dario Hubnerin, qendërsulmuesin e Piaçencës, i cili u provua gjatë turneut veror nga kuqezinjtë dhe më pas iu dha sërish emilianëve. Bardhekuqtë kanë kërkuar 4 milionë euro për pykën e tyre, por mund t'i ulnin disi pretendimet ekonomike. Hëpërhë drejtuesit emilianë nuk kanë ndër mend ta ulin më shumë se 3,2 milionë euro çmimin e futbollistit, që u shpall golashënuesi më i mirë i kampionatiti të kaluar italian (me po aq gola se dhe juventini Trezege), me kusht që kuqezinjtë t'u sillnin në "Garrili" qendërsulmuesin e Mesinës, Godeas (27-vjeçar). Pikërisht në pritje të transferimit të Hubnerit, njerëzit e merkatos te bardhekuqtë e kanë pezulluar transferimin e Nikola Kaçias në Livorno. Por, në rast se Hubneri do të qëndrojë te Piaçenca, atëherë Milani do t'i shpejtonte ritmet për të sjellë në "San Siro" rusin Sishev. Nëntëmbëdhjetëvjeçari i talentuar i Spartakut të Moskës u prenotua përpara një jave nga një aksion "blitz" i Alberto Braidës në kryeqytetin rus dhe mbetet për t'u përcaktuar vetëm koha dhe mënyra e "zbarkimit" të tij në oborrin e "Djallit".

[SUPERSTAR_N1]

Ahn s'kthehet më në Peruxhia

Marrëdhëniet midis Peruxhias dhe lojtarit korean Ahn i ngjajnë pak a shumë një "telenovele". Kur pothuajse çdo gjë dukej e rregulluar, mbërrin lajmi nga vetë lojtari që nuk do të kthehet më në Umbria. Koreani, përveç tri fakseve të dërguara klubit, ka bërë të ditur që kërkon të "lirohet nga çdo përkushtim me Peruxhian".
Presidenti Luçiani Gauçi, pa dyshim, është inatosur pas zgjedhjes së sulmuesit aziatik, të cilin e gjobiti që nuk erdhi në skuadër më 3 korrik, gjatë grumbullimit të saj në Pian de Masiano.

[SUPERSTAR_N1]

Sereni: Do ta tregoj sesa vlej

Mateo Sereni, portieri i ri i Breshias, u paraqit zyrtarisht nga klubi i presidentit Korioni. Sapo kishte mbushur 20 vjeç e shtatë muaj, kur debuton për herë të parë në Serinë A (Kremoneze-Sampdoria 0-0, më 10 shtator 1995). Një përvojë e bukur për portierin emilian, që konsiderohej një nga të rinjtë më premtues të futbollit italian. Pas dy sezonesh me fanellën blukaltër, kalon te Piaçenca dhe pastaj tek Empoli në Serinë A. Pas rënies në Serinë B me ekipin toskan, Sereni kthehet te Sampdoria. Më pas erdhi aventura në Premier Ligë, me Ipsuiç Taunin. Megjithatë, që sot Sereni është numri 1 i portës së Breshias, klubi që e kërkoi me çdo kusht shërbimin e tij: "Jam shumë i lumtur, - ka deklaruar Sereni, - sepse Breshia që më kërkoi më këmbëngulje po më dhuron një mundësi të madhe, atë të kthimit në Serinë A. Në Angli përfitova shumë përvojë, por më shumë parapëlqeja të kthehesha në Itali për të treguar sesa vlej". "Breshia, - vazhdon ish-portieri i Sampdorias, - më bindi dhe tani jam i lumtur që do të jem i gatshëm për Maconen. Nuk dua të bie në eufori, por shpresoj të mos zhgënjej asnjë në skuadër." Sereni do të jetë një nga udhëheqësit e mbrojtjes që me largimet e Bonerës dhe Mangones do të jetë e gjitha e re. "Mbrojtja jonë, - shpjegoi Sereni, - është e re, por më duket e mirë. Personalisht do të kërkoj të bëj më të mirën dhe të përshtatem shpejt me grupin." Sereni mbërriti te Breshia me formulën e huasë me të drejtë kontrate.

[SUPERSTAR_N1]

Juve-River, pakt "i artë"

Juventusi dhe River Plejti kanë bërë një marrëveshje. Pas një mbledhjeje të gjatë midis drejtuesve bardhezinj dhe presidentit të klubit argjentinas, Hoze Maria Aguilar, i shoqëruar nga sekretari i tij, Mario Izrael, palët vendosën të caktojnë një çmim për Fernando Kavenagin dhe Andres D'Alesandron. Por jo vetëm kaq. Në të vërtetë, juventinët mund të kenë në duar shumë shpejt kartelat e të gjithë lojtarë të rinj dhe të talentuar argjentinas.
Çmimi i vendosur për Kavenagin u caktua rreth 12 milionë dollarë. Lojtari mund të vijë në Itali në dhjetor, por nuk përjashtohet mundësia e dhënies hua te Rexhina. Po ashtu ka dalë në pah edhe emri i Martin Demikelisit. Bëhet fjalë për një mbrojtës 21-vjeçar që luan edhe si qendërmbrojtës edhe si mbrojtës i majtë. Nuk harrua as D'Alesnadro, që i pëlqen shumë Umberto Anjelit, po që përjetoi momente negative në turneun e Klausurës. Talenti i tij është i padiskutueshëm dhe Juvja nuk kërkon ta humbasë këtë mundësi.

[SUPERSTAR_N1]

Më pak ekstrakomunitarë në Itali

Mjaft me ekstrakomunitarët dhe më shumë hapësirë për të rinjtë italianë! Gjatë një mbledhjeje të Këshillit Drejtues të Federatës Italiane u diskuatua rreth lojtarëve të huaj në Itali. Ky këshill vendosi të reduktojë numrin e ekstrakomunitarëve. Pas mbledhjes të së mërkurës në mëngjes, avokati dhe njëkohësisht presidenti i shoqatës së futbollistëve Serxhio Kampana tha: "Duke filluar nga sot dhe deri në 31 gusht, ekipet mund të federojnë vetëm një ekstrakomunitar, përveç atyre që janë prej kohësh të federuar në Serinë A. Në sezonin 2003-2004, ky rregull do të jetë sërish i vlefshëm. Kjo është një strategji e studiuar dhe ka si objektiv që në fund të një trevjeçari numri i ekstrakomunitarëve në një ekip të mos jetë më i madh se katër. Në teori, ky bllokim mund të zgjatë disa vjet, deri sa futbollistët italianë të kënë saktësuar pozicionet e tyre. Gjithashtu është vendosur që, në rast përsëritjeje të pasaportave false, dënimet të jenë më të rënda dhe të mos këtë falje për futbollistët, madje duke mos ia quajtur skuadrës ato ndeshje ku ka luajtur lojtari i kapur me parregullsi

[SUPERSTAR_N1]

Edmilson, i kërkuar edhe në Serinë A

Mbrojtësi i kombëtares braziliane, Edmilson, është rikthyer në Francë, tek ekipi i tij Lion. Sapo mbërriti në Lion, ai u njoh me një mori kërkesash nga ata që pretendojnë të jenë ekipet e tij të ardhshme. Klube të mëdha italiane kërkuan të kontaktojnë brazilianin, dhe ishin pikërisht Juventusi, Lacio dhe Roma. Por vetë lojtari duket se është i tërhequr nga Reali i Madridit. "Të shkoj te Reali i Madridit, - ka shpjeguar ai, duke iu referuar disa aludimeve të bëra nga shtypi spanjoll ditë më parë, - është një ëndërr, por ajo nuk është e vetmja skuadër e botës." Drejtuesit e Lionit kanë deklaruar publikisht se kanë marrë shumë oferta nga Anglia dhe Seria A, por asnjë nga Florentino Perez.
"Dëshira ime, - ka thënë Emdilsoni, kampion bote dhe autor i një goli në botërorin e fundit aziatik, - për t'u transferuar në një ekip të madh është në duart e menaxherit tim, presidentit të Lionit, Xhan Mikel Aulas dhe, sigurisht, në dorë të Zotit". Duhet thënë se çmimi i kartelës së lojtarit ka ardhur duke u rritur sidomos pas Kampionatit Botëror, dhe tashmë i kalon të 20 milionë eurot.