Djemte e Detit

[sirena_adria]

Lamtumirë Gent Demaliaj!

Aurela Gaçe

Mos qaj, mos qaj
Mos qaj për vdekjen o njeri…. Genti i Djemve të Detit. Kështu të thërrisnim… I paharruar qofsh për familjen e miqtë e gjithë fansat e tu. Luftove gjatë me sëmundjen, por tani shpirti yt u prehtë në paqe e të qoftë dheu i lehtë.




Shuhet ylli i grupit “Djemtë e detit”. Solisti humb betejën me sëmundjen në moshën 40-vjeçare

“Jo mos qaj ti o njeri i vetmuar, se jeta dorën ty nuk ta dha…”. Këto vargje të këngës së njohur “Mos qaj” të grupit legjendë pas viteve ’90 “Djemtë e detit” kanë mbushur dje statuset në rrjetet sociale Facebook e Twitter, të qindra fansave dhe njerëzve të artit, duke shprehur kështu dhembjen për ndarjen e parakohshme nga jeta të solistit të këtij grupi. Pas disa vitesh beteje me sëmundjen, Gentian Demaliaj e ka humbur dje përgjithmonë luftën me të. Vetëm 40 vjeç, një nga zërat më të veçantë të muzikës shqiptare këto vite, shpirti i rrokut, një këngëtar që prodhoi hite në vetëm disa vite karrierë Gentian Demaliaj do t’i mungojë gjatë muzikës shqiptare. Këngë si “Mos qaj”, “Jo tani”, “Ëndrrat që për ty i thura”, “Baladë për Jakup Ferrin”, “Lamtumirë”, “Kohë pa ty”,”Përrallë dashurie”, “Izolimi vdes” etj, janë kthyer në hite muzikore jo vetëm për brezin e të rinjve të pas viteve ’90. Nuk ishte vetëm muzika ajo çfarë e bënte këtë grup tërheqës, por edhe vargjet. Shpesh në to gjeje dhembje, por sipas Demaliajt “ky është realiteti”. “Hidhni sytë brenda këtij realiteti ku ne jetojmë dhe a nuk ju duket kështu?! I përkasim këtij vendi, ndaj dhe kemi menduar të prekim temat sociale të ditëve të sotme”, shprehej ai në një intervistë një vit më parë. Me një pamje rrokeri, Demaliaj nuk ndryshoi asnjëherë stil që me shfaqjen e tij për herë të parë në skenë. “Jam një njeri me një shpirt të lirë, dhe dua të lë këtë përshtypje”, shprehej ai. Babai i një vajze, Edeas, Genti ishte i lidhur shumë me të, e cila duket se ka trashëguar pasionin e këngës. Disa vite më parë ajo u vlerësua me çmimin “Zërat më të mirë” në Festivalin e Shkodrës, ndërsa në Festivalin e Tiranës u vlerësua me çmimin “Interpretuesja më e mirë”.” Mendoj se do të bëhet këngëtare shumë e mirë, pasi e ka njohur shpejt talentin e saj”, shprehej Demaliaj për të bijën. Kohët e fundit ajo i ka ndenjur pranë të atit, me shpresën se do të mund t’ia dilte të fitonte mbi sëmundjen. Muzika ishte gjithçka për Demaliajn, i cili nuk bëri kompromis asnjëherë me të, në kushtet e tregut të sotëm muzikor. Ai e mbajti larg muzikën e tij nga komercialiteti. “I vetmi përfitim është nga muzika. Por edhe nëse nuk fitoj shumë nga ajo më plotëson shpirtërisht”, shprehej ai. Kohët e fundit këngëtari bëri një jetë disi të tërhequr nga skena për shkak të sëmundjes. Një nga shfaqjet e tij të fundit ishte në Festivalin e RTSH-së si anëtar jurie. Në vitin 2013, me një vendim të Këshillit të Ministrave, qeveria shqiptare i dha atij një shumë prej 35 milionë lekësh për t’u kuruar jashtë vendit.

Me një zë të veçantë, Demaliaj do të veçohej menjëherë si këngëtar që me daljen e parë të grupit “Djemtë e detit”.

Ishte i pari grup muzikor që vinte nga rrethet dhe po depërtonte me sukses në zemër të kryeqytetit. I krijuar në Lezhë, muzika e tyre e hershme kishte ndikime të qarta nga hard-rroku dhe metali, që ishte shumë aktual në mesin e viteve ‘80 në të gjithë botën. Prezent në skenën e muzikës prej shumë vitesh, hiti i tyre më i madh mund të konsiderohet kënga “Mos qaj”, një baladë e cila pa dyshim që mund të hyjë në antologjinë e rrokut shqiptar, nëse bëhet një e tillë. Djemtë e Detit kanë marrë pjesë në shumë koncerte dhe festivale dhe sigurisht çmimet nuk kanë munguar, kanë dalë në krye në festivale rroku, si dhe janë vlerësuar nga vetë publiku. Fazën e parë të karrierës së tyre e përmbyllën me albumin “Izolimi vdes”, ndërsa albumi i tyre i dytë i prezantuar disa vite më parë quhej “Epos”. Homazhet për nder të këngëtarit do të zhvillohen sot në orën 12.30 në sallën e RTSH-së ndërsa ceremonia mortore do të zhvillohet në orën 14.00.



Gent Rrushi/ Pianisti dhe kompozitori e quan zërin dhe stilin e Gentian Demaliajt unik

Këngët e tij e kanë kaluar testin e kohës

Gjithnjë mes miqsh muzikantë. Kështu e kujton pianisti dhe kompozitori Gent Rrushi, këngëtarin Gentian Demaliaj. “Ajo që më bie në sy është se këngët e kënduara prej tij edhe pse të vështira teknikisht për t’u kënduar, ishin këngë për një publik të gjerë. Tematikisht të këndueshme dhe të qarta. Me fjalë “të dashura”, thotë Rrushi. Për të ndarja nga jeta e këngëtarit, është një humbje për rokun shqiptar, i cili humbi një nga përfaqësuesit e tij të denjë në këto dy dekada.


Vitet ’90 bashkë me kaosin duket sikur sollën dhe një ndryshim në skenën muzikore shqiptare me krijimin e grupeve të reja muzikore. Një prej tyre ishte dhe “Djemtë e detit”…solisti i të cilit Gent Demaliaj dallohej për timbrin e tij të veçantë?

Vitet ’90 sollën shumë zëra të rinj, shumë stile muzikore dhe energji të ndrydhura nga koha. Shumë liri deri në një lloj ekstremi kaotik, për të cilin shoqëria jonë asokohe kishte etje. Po rinisnim të ecnim në një rrugë të ngrirë nga koha. Të gjithë të rinj që provonim ç’ishte liria në mënyrën e tyre. Letërsia piktura, muzika sidomos (delja e zezë e diktaturës) vërshuan ngado. Në të gjithë këtë atmosferë u dëgjua jo vetëm zëri i tij, po stili i pangatërrueshëm. Timbri i qartë, forca interpretative binte në sy. Kështu e mbaj mend Gent Demaliajn. E para erdhi njohja virtuale e më vonë u njohëm personalisht përmes koncerteve të tij me grupin “Djemtë e detit”.


Si e kujtoni Gentin?

Ajo që kujtoj gjithmonë është vërtetësia në figurën e tij artistike. Mënyra sesi e kishte ndërtuar profilin e tij njerëzor, që e përçonte edhe përmes muzikës. Ai dinte të punonte me bashkëpunëtorë, miq muzikantë. Sa herë e takoja do ishte mes muzikantësh me të cilët bashkëpunonte. Ajo që më bie në sy është se këngët e kënduara prej tij edhe pse të vështira teknikisht për t’u kënduar, ishin këngë për një publik të gjerë. Tematikisht të këndueshme dhe të qarta. Me fjalë “të dashura”!


Çfarë është kjo humbje për muzikën shqiptare?

Humbje të tilla na bëjnë të kthejmë kokën pas dhe të shohim muzikën e atyre viteve, jo thjesht me nostalgji, por me ëndje për ta ridëgjuar sërish ashtu siç është. Dhe nuk do t’i hiqja asnjë notë. Thjesht dua ta shijoj. Melosi shqiptar ndihet kudo në nuancat e zërit të Gentit, edhe pse ai këndonte me një stil muzikor të sapopranuar pas ’90-s. Sa herë dilte në skenë do sillte një këngë që mbetej në fondin e muzikës sonë. Dinte të performonte, jo thjesht të këndonte. Dhe këtë na e tregoi, pasi e plotësoi veten përmes aktrimit. Këngët që këndoi e shkroi e kanë kaluar testin e kohës. Vitet e fundit ajo që vëreja te Genti, ishin daljet e mirëmenduara. Kjo ka të bëjë me atë që ai kishte parim të pashprehur. Të mos bërit kompromis me realitetin.


Ç’të vjen tani në kujtesë nga takimet me të?

Para disa viteve rastisi të luanim bashkë diku. Ajo që më la mbresë atë mbrëmje, ishte mënyra se si Gent Demaliaj i personalizonte këngët që s’ishin të tijat. E kishte mundësinë. Zoti i fali zërin e mrekullueshëm dhe inteligjencën për ta përdorur atë. Nuk po i përmend titujt e këngëve të tij. S’është e nevojshme të gjitha i dimë. Por ajo të cilës ai i vuri vulën dhe e bëri pjesë të arkivit të rock-ut shqiptar është “Balada e Jakup Ferrit”. Të jesh artist është fat, në këtë jetë sepse ndan shpirtin tënd me njerëzit që frymojnë. Dhe pranë Zotit, sepse mesazhi yt tashmë udhëton në kohë e hapësirë. Nuk humbet kurrë. Gent Demaliaj e përmbushi misionin e vet, me testamentin tingullor që na la. Dhe pse ne donim shumë që ta kishim sa më gjatë pranë. Të bënim muzikë sërish e sërish… RIP Gent Demaliaj!


http://gazeta-shqip.com/lajme/2015/0...gent-demaliaj/

[sirena_adria]

Djemtë e grupit: Së shpejti një këngë për Gentin

Pjesëtarët e grupit “Djemtë e detit” tregojnë historinë e krijimit… momentet e tyre të arta dhe dhimbjen për ikjen pa kthim të Gentit…

Me zërin e tij në sfond dhe lulet që mbuluan arkëmortin, qindra fansa, njerëz të kulturës, miq dhe bashkëqytetarë lezhjanë i kanë dhënë dje lamtumirën yllit të muzikës rok në vend pas viteve ’90, Gentian Demaliaj. Homazhet për nder të artistit u mbajtën paradite në hollin e RTSH-së, për të vijuar më pas me kortezhin e gjatë të njerëzve që mes lulesh e lotësh e shoqëruan deri në banesën e fundit. Ndarja e parakohshme nga jeta e këngëtarit Demaliaj është përjetuar me dhimbje nga mijëra fansa të tij kudo. Rrjetet sociale janë mbushur me vargje dhe këngë të tij, në shenjë nderimi për legjendën e muzikës së re shqiptare. Të pranishëm në ceremoninë e lamtumirës kanë qenë dhe tre anëtarët e grupit “Djemtë e detit”, ndërsa dy prej tyre nuk patën mundësi të vinin pasi jetojnë jashtë. Por emisioni “Pasdite” në “Top Channel” ka mundur ta bashkojë sërish grupin. Flamur Toska, Bujar Daci, Shkëlqim Rustia dhe përmes lidhjes telefonike Shkëlqim Metaj dhe Valentin Markbukaj kanë sjellë disa kujtime nga koha e krijimit të grupit, trishtim për humbjen e parakohshme të mikut të tyre dhe planet për të ardhmen.

“Sot është një çast i vështirë për të folur, pas kësaj tragjedie. Muzika shqiptare ka humbur një nga zërat më të mrekullueshëm”, tha Toska. Ai është kthyer pas në kohë duke kujtuar kohën kur grupi u njoh me Gentin. Fillimisht grupi ka pasur soliste këngëtaren Merita Selimi. “Shkëlqimi vjen një ditë në studio, dhe na thotë se kishte gjetur një element të veçantë, një djalosh simpatik. Ne e pamë dhe na u duk i vogël. Ishte vetëm 15 vjeç. Por kur e dëgjuam në piano, vokalin dhe grinë e zërit të tij u befasuam”, tregoi Flamuri njohjen me Demaliajn. Ky takim i rastësishëm do të ndryshonte të ardhmen e grupit. Genti ishte një fans i tyre. “Ishte koha kur Shqipëria ishte në tranzicion dhe ne ndiheshim si disidentë në muzikën që bënim. Kur e dëgjova të këndonte për herë të parë mbeta i shokuar. Pasi kënga e tij për atë kohë ishte revolucion”, kujtoi Shkëlqimi.

Koncertin e parë grupi tashmë me një solist të ri e bëri në Pallatin e Kulturës Lezhë. Me rebelizmin ku besonin, ata ngjitën në skenë një këngë të grupit “Europe”. Një këngë e ndaluar që do t’i bënte të rrinin disa orë në policinë e qytetit. Si kompozitor i grupit Bujari ka sjellë në kujtesë bashkëpunimet për krijimin e këngëve. Genti, sipas tij, dinte të futej në strukturën e këngës. Duke marrë rastin e këngës hit të grupit “Mos qaj”, ai tregoi se pasi e kishte ndërtuar muzikën ia tregon Gentit. “Ai më tha që muzika ishte shumë e bukur, thjesht duhet t’i rrinim strukturës. Tekstin e bëri Genti dhe ishte një tekst shumë përparimtar për kohën. Unë i thosha se ndoshta po guxojmë mos duhet të kemi frikë, por ai ishte i bindur te teksti”, kujtoi Daci.

Përmes lidhjeve telefonike nga Australia dhe Zvicra dy anëtarët e tjerë të grupit Valentin Markbukaj dhe Shkëlqim Metaj shprehën dhimbjen për ndarjen nga jeta të Demaliajt. “Genti ka lënë pas shumë kujtime. Ndihem me fat që kam pasur mundësi të kem bashkëpunuar me një vokal të kalibrit të tij. Ishte një rock star, jam i sigurt që do të kujtohet si i tillë”, tha Markbukaj. Djemtë folën dhe për kohët kur ai luftoi me sëmundjen, për entuziazmin që shihte të nesërmen.

Sipas Flamurit, grupi do të rikthehet së shpejti në treg me një këngë kushtuar Gentit. “Kemi në projekt një krijimtari të re, dedikuar Gentit për gjithçka na ka lënë. Shumë shpejt do të kemi një këngë kushtuar atij”, tha ai.

Grupi “Djemtë e detit” u krijua për herë të parë në qytetin e Lezhës në vitin 1989. Muzika e tyre do të shihej si revolucion për kohën, dhe gjithë tekstin e trishtë që mbartte. Me ndikime nga hard roku dhe metali, ata sollën një frymë të re në muzikën shqiptare. Zëri i Demaliajt do t’i jepte grupit një sukses jo vetëm në skenën e festivaleve, por dhe në turet koncertore që bënë brenda dhe jashtë vendit. Ndarja nga jeta e Demaliajt është një humbje jo vetëm për grupin, por dhe për muzikën shqiptare.

http://gazeta-shqip.com/lajme/2015/0...ge-per-gentin/