Skandali i Arta Dades!!!!

[kosovar]

Marrë nga www.gazeta55.com)

Skandal, Dade mbron Svilanoviçin e sulmon Prishtinën e Tiranën


Kryeadministratori i Kosovës shfuqizoi dje një memorandum për bashkëpunim mes Shqipërisë e Kosovës, duke deklaruar se dokumenti bie në kundërshtim me rezolutën 1244 të OKB-së
Shefi shqiptar i diplomacisë sulmon firmataren Ermelinda Meksi, duke i dhënë të drejtë Mikael Shtajner e duke shfaqur mirëkuptim për reagimin e Beogradit

Një skandal i rëndë ka tronditur dje marrëdhëniet mes autoriteteve të Shqipërisë dhe atyre ndërkombëtare të Kosovës. Pa një përgatitje paraprake, Ministri shqiptar i Bashkëpunimit Ekonomik Ermelinda Meksi ka nënshkruar, ndoshta edhe me njëfarë ngutjeje, një memorandum bashkëpunimi me disa prej titullarëve të dikastereve më të rëndësishme të kabinetit të Bajram Rexhepit, por me sa duket për këtë veprim ajo nuk ka pasur konsulencën e qeverisë shqiptare, e as miratimin e autoriteteve ndërkombëtare që qeverisin Kosovën prej më shumë se tre vjetësh. Kryeadministratori ndërkombëtar i Kosovës, Mikael Shtajner, gati një muaj pas miratimit, e shfuqizoi dje Memorandumin e Mirëkuptimit për Bashkëpunim Ekonomik dhe Krijimin e Rrethanave për Liberalizimin e Tregtisë ndërmjet Kosovës dhe Shqipërisë, të nënshkruar më 30 maj, duke arsyetuar se janë tejkaluar kompetencat e institucioneve të Kosovës dhe është shkelur Korniza Kushtetuese që ia jep këto atribute përfaqësuesit special të Sekretarit të përgjithshëm të Kombeve të Bashkuara. Shfuqizimi shkaktoi një tërmet të vërtetë në radhët e politikës shqiptare të Prishtinës, e cila shihte pas këtij vendimi presionet e qeverisë së Serbisë e të Jugosllavisë, por ajo që është e çuditshme, vendimi u përshëndet nga shefi i diplomacisë shqiptare Arta Dade. Sipas marrëveshjes të nënshkruar mes ministrit shqiptar të bashkëpunimit ekonomik Ermelinda Meksi dhe homologut të vet në kabinetin e Rexhepit, Ali Jakupi, parashikohej lehtësimi i tregtisë mes të dy anëve të kufirit si dhe ulja e tarifave doganore, duke tentuar unifikimin e tyre me tarifat që tashmë ekzistojnë me Maqedoninë. Kur u nënshkrua memorandumi, autoritetet e UNMIK-ut nuk i paraqitën ministres Meksi ndonjë rezervë për dokumentin, bile kryeadministratori Shtajner shprehu gatishmërinë e tij për të kontribuar në shtimin e vëllimit të bashkëpunimit mes Shqipërisë dhe Kosovës, por duket se përtej fasadës diplomatike, një tension i ri po zë vend në marrëdhëniet mes Kuvendit të Kosovës dhe autoriteteve të UNMIK-ut. Polemika mes Shtajner dhe Kuvendit apo qeverisë së Kosovës është e dyta brenda pak javëvë. Para 20 ditëve, kryeadministratori Shtajner rrëzoi një rezolutë të Kuvendit të Kosovës, i cili nuk njihte marrëveshjen mes Serbisë dhe Maqedonisë për kufinjtë, që sipas deputetëve të Kosovës cenonte tërësinë territoriale të Kosovës. Pas këtij vendimi zëdhënësi i UNMIK-ut deklaroi se përplasje të tilla institucionale do të dëmtonin shumë hapjen e bisedimeve mbi statusin final të Kosovës.

Re.po.

--------------------------------------------------------------------------------


Dade: Meksit i kam çuar një qarkore ku i tregoj se Prishtina e Beogradi janë nën kompetencat e mia

Ministrja e Jashtme e Shqipërisë Arta Dade ka mbështetur dje shfuqizimin e Memorandumit të Mirëkuptimit ndërmjet Kosovës dhe Shqipërisë, nga ana e Kryeadministratorit Shtajner, të nënshkruar më 30 maj. Sipas saj në këtë rast ka një anashkalim të institucioneve që janë përgjegjëse për politikën e jashtme përkatësisht Ministria e Jashtme shqiptare dhe UNMIK‑u. Arta Dade thotë se të dyja këto institucione përgjegjëse për politikën e jashtme nuk kanë qenë në dijeni. "Të dyja këto institucione përgjegjëse për politikën e jashtme nuk kanë qenë në dijeni, deklaroi dje për mediat shefi i diplomacisë shqiptare. Megjithatë Ministria e Jashtme, duke patur parasysh që mund të ketë edhe difekte të tilla u ka derguar që në fillim një qarkore të gjithë ministrive për të respektuar të gjitha procedurat e domosdoshme dhe autoritetin e UNMIK-ut. Dhe natyrshëm në një shtet të konsoliduar çdo gjë kalon përmes Ministrisë së Jashtme, kur është fjala për nënshkrim marrëveshjesh, apo memorandumesh që kanë të bëjnë me marrëdhëniet midis dy shteteve. Aq më tepër që në rastin e Kosovës kemi një status të veçantë dhe të gjithë e dinë që nuk mund të anashkalohet UNMIK-u". Duke komentuar vendimin e kryadministratorit të Kosovës, me të cilin ajo është njohur nëpërmjet një letre që ai i ka dërguar Ministrisë së Jashtme, Dade shprehet se ai është i drejtë e se vendimi mund të jetë marrë edhe nën presionin e autoriteteve të Serbisë. Por duhet të jetë e qartë shprehet Dade, se Shqipëria nuk e konsideron Kosovën të pavarur, por se respekton kornizat e rezolutës 1244 të Këshillit të Sigurimit të OKB-së.

--------------------------------------------------------------------------------


Naiviteti i ministricave të Pandeli Majkos

Ilir Nikolla

Për polemika kompetencash mes dy grave të kabinetit të Pandeli Majkos është folur që në ngjizje të kabinetit hibrid mes klaneve të Nanos e Metës, por dje shprazja inatçore e shefit të diplomacisë Arta Dade ndaj Ermelinda Meksit ka shenjuar krejt qeverisjen e hutuar të Majkos. Pa iu dridhur qerpiku, Dade i ka dhënë të drejtë kryeadministratorit të Kosovës për shfuqizimin e një memorandumi të nënshkruar nga ministri Meksi e homologu i Prishtinës Ali Jakupi, bile ka mirëkuptuar edhe ministrin serb G.Svilanoviç, i cili paska të drejtë të shqetësohet se Shqipëria e trajton Kosovën si shtet të pavarur dhe jo nën protektoratin ndërkombëtar, vetëm e vetëm për të konfirmuar se Meksi ka marrë kompetencat e saj kur ka firmosur me 30 maj rritjen e bashkëpunimit mes Tiranës e Prishtinës. Konflikti institucional mes Kuvendit të Kosovës e kryeadministratorit ndërkombëtar Mikael Shtajner edhe mund të kuptohet, meqë është edhe precedenti i dytë i luftës për pushtet që po përvijohet mes autoriteteve atje, por nuk kapërdihet siç duhet zelli i Dades për të mbrojtur me çdo kusht rezolutën 1244 të OKB-së e për të mirëkuptuar shqetësimin e qeverisë së Beogradit, dhe jo për të evokuar edhe njëherë nevojën për delegimin e më shumë kompetencave autoriteteve të reja të Prishtinës. Pa hamendësuar se prej këtyre qendrimeve mund të krijohet një lidhje okulte me takimet vend e pa vend të Dades me Svilanoviçin, merret vesh qartë se qendrimi i shefit shqiptar të diplomacisë ka lidhje me shpalljen publikisht të faktit se ajo e ka lajmëruar Ermelinda Meksin të mos merret me marrëdhëniet e Shqipërisë me Kosovën, qoftë edhe në aspektin ekonomik, meqë i gjithë ky kuadër është kompetencë e saj. Për njerëz që kanë njëfarë kujtese, u vjen mirë në mend deklarimi triumfator i Dades para do javësh në vizitën e vet të parë në Prishtinë se "më pas Prishtinën do ta vizitojnë mjaft delegacione qeveritare nga Tirana, ku do të nënshkruhen edhe marrëveshje të shumta për thellimin e bashkëpunimit dypalësh". Por Dade nuk shqetësohet shumë se është prishur Memorandumi. Ajo që i vret sytë është firma e Ermelinda Meksit. Ekuacioni është i thjeshtë e i nxjerr zbuluar të dyja gratë-ministrica të kabinetit të Pandeli Majkos. Ndoshta Meksi duhet të kërkonte edhe shoqërimin e Dades në vizitën e fundmajit në Prishtinë, a të ndonjë zëvendësi të saj, meqë ishte puna për një dokument me të vërtetë të rëndësishëm, por Dade duhej të shqetësohej dje, jo aq për zhvlerësimin e firmave të Meksit e të Jakupit sesa për arsyet që shpalli publikisht Shtajner, e që i nënkuptoi qoftë shtypi i Prishtinës, qoftë Arta Dade. Shefi i UNMIK-ut deklaroi prerë se marrëveshja bie në kundërshtim me rezolutën e OKB-së, pra se nuk do të realizohej ndonjëherë. Ky deklarim duhej ta shqetësonte Daden e jo ta nxiste të bënte vlerësimin naiv se bisedimet do të nisnin nga fillimi. Për çfarë do të bisedohej, për nënshkrimin e një marrëveshjeje me një provincë të Jugosllavisë, e ndoshta për hedhjen e firmës edhe me Svilanoviçin. Por ngjan se mbyllja e rrugës për një nënshkrim të ri të Memorandumit nuk përbën shqetësim për diplomacinë shqiptare. Inate grash në kabinetin e Majkos po zbulojnë çdo ditë demagogjinë qeveritare të rrugës Durrës-Prishtinë. E për të dalë nga kjo guackë dështimi, ndryshimet ndoshta s'duhet të kenë parasysh ekuilibra feministe, por duhet të bien mbi të dyja ministricat e Pandeli Majkos.

[Eni]

Majko mbron Daden në konfliktin me Meksin

Në një njoftim për shtypin, kryeministri i Shqipërisë i jep sërish të drejtë Shtajnerit dhe palës serbe për anulimin e Memorandumit të bashkëpunimit mes Shqipërisë dhe Kosovës

Kryeministri Pandeli Majko ka marrë dje hapur anën e shefit të diplomacisë shqiptare Arta Dade në përplasjen për çështje kompetencash me ministrin e Bashkëpunimit Ekonomik Ermelinda Meksi. Në një njoftim shtypi, pas anulimit të një memorandumi bashkëpunimi të nënshkruar me ministrin e Tregtisë të Kosovës Ali Jakupi, zyra e shtypit e kryeministrit informon publikun se tashmë do të jetë Ministria e Jashtme, dikasteri që do të kontrollojë nënshkrimin e çdo marrëveshje të Qeverisë shqiptare me të huajt. Arta Dade i dha të drejtë 3 ditë më përpara kryeadministratorit të Kosovës Mikael Shtajner, i cili shfuqizoi një dokument bashkëpunimi, që thuhej se binte në kundërshtim me rezolutën 1244, meqë tejkalonte kompetencat e qeverisë së Kosovës, garantuar nga Korniza Kushtetuese. Majko e ka monopolizuar marrëdhënien e Shqipërisë me Kosovën, por tashmë duket se kontradiktat në kabinet po venë në rrezik intensifikimin e bashkëpunimit me Prishtinën. Deklarata e Kryeministrit nuk bën asnjë koment për incidentin me UNMIK-un, por lajmëron se tash e tutje kompetencat do të jenë thjesht të Dades, e rrjedhimisht edhe i jep të drejtë Shtajnerit, që deklaroi dy ditë më parë se u tejkaluan kompetencat e ministrit të qeverisë së Kosovës dhe qeverisë serbe, që protestoi se iu "cenua sovraniteti i Jugosllavisë mbi Kosovën".