Krize apo krisje ne marredheniet shqiptaro-greke?

[dordi1]

Robert Goro
Korrespondenti i BBC-së në Athinë



Në fillim të kësaj jave Athina bëri deklaratën më të ashpër ndaj Tiranës që nga ardhja e socialistëve shqiptarë në pushtet, në vitin 1997.

Deklarata e ministrit të jashtëm, Jorgos Papandreu, një politikan që është shquar gjithmonë për tonet e veta të moderuara si dhe për pikëpamjet e tij në drejtim të stabilitetit të Ballkanit Perëndimor, për këtë arësye merr rëndësi të veçantë.

Ashpërsia me të cilën shefi i diplomacisë helene komentoi incidentet e shumëpërfolura të Himarës dhe deklarimi i tij publik për herë të parë se atje ka një popullsi solide me origjinë greke, të shtyjnë të besosh se fjalët e zotit Papandreu nuk ishin një reagim emocional i çastit, sikurse u hamendësua nga ndokush.

Më së shumti ka gjasë se ato shprehnin një preokupim të akumuluar nëpër muaj apo vite dhe të shfryrë ndoshta as në vendin dhe as në momentin e duhur.

Përtej hamendjes se deklarata mund të jetë ndikuar edhe nga atmosfera elektorale që po dominon përditë e më shumë në Greqi, si dhe të jetë pasojë e ambicieve të pashpallura të zotit Papandreu për të fituar në një të ardhme të afërt kreun e partisë së vet, PASOK-ut në pushtet, fjalët e shefit të diplomacisë greke zbulojnë një të vërtetë që këto vitet e fundit është endur vazhdimisht në horizont.

Se, përkundër deklarimeve të purpurta, marrëdhëniet midis Greqisë e Shqipërisë nuk kanë patur atë nivel që kanë trumbetuar publikisht qeveritarët në të dy anët e kufirit.

Por më së shumti ato i ka karakterizuar mosbesimi i kamufluar, i bazuar më së shumti në reminishenca të së kaluarës dhe pavarësisht se pas çdo takimi zyrtar të dy palët kanë deklaruar se e hedhin vështrimin përpara.

Kështu janë deklaruar Tirana e Athina dhe në një takim që ambasadori i Shqipërisë në Athinë, Bashkim Zeneli zhvilloi me ministrin alternat grek të punëve të jashtme, Tasos Janitsis dhe ku këtij të fundit iu dha një mesazh i kryeministrit Fatos Nano, ku ndër të tjera theksohej pikërisht vendosmëria për të ruajtur nivelin e marrëdhënieve shumë të mira.

Ndërkaq, sipas burimeve të mirëinformuara, pala shqiptare ka theksuar se në marrëdhëniet midis të dy vendeve vështrimi duhet të hidhet përpara, me frymën e europianizmit dhe pa iu rikthyer temave të mbyllura e disi folklorike, pa tone imponuese dhe duke respektuar sovranitetin e njeri-tjetrit.

Por edhe ministri grek, i cili gjithashtu është shprehur për ruajtjen e marrëdhënieve të mira, i është përmbajtur pikëpamjeve të shefit të vet, duke përkujtuar angazhimet e Shqipërisë në kuadër të negociatave të saj me Bashkimin Europian.

"Zhvillimi i zgjedhjeve të rregullta dhe demokratike është pjesë përbërëse e procesit të përafrimit të Shqipërisë me BE-në," ka deklaruar pas takimit ministri Janitsis, duke shtuar se "predispozicioni i qeverisë shqiptare do të gjykohet mbi bazën e veprimeve që do të bëjë ajo qeveri" dhe se "qeveria greke po i ndjek nga afër zhvillimet".

Natyrisht, zhvillimet që pasuan deklaratën e zotit Papandreu, i zhgënjyen ndoshfa skeptikët që prisnin shpërthimin e ndonjë krize në marrëdhëniet dypalëshe.

Kriza nuk ka ardhur, por krisja ndërkaq është fakt. Dhe pavarësisht se të dy palët janë angazhuar që t’i ulin tonet, mëria reciproke duket se do të vazhdojë ca më gjatë.