Prifti: PS po blen zgjedhjet

[Albo]

Deputeti socialist Dritan Prifti vë alarmin për manipulimin e zgjedhjeve

Deputeti socialist i ka dërguar një letër Presidentit Moisiu, ku i dëshmon për disa përpjekje të drejtuesve të PS-së në Fier për manipulimin e zgjedhjeve përmes blerjes së komisionerëve dhe përdorimit të policisë

Deputeti i Partisë Socialiste, Dritan Prifti, i ka dërguar disa ditë më parë Presidentit të Republikës z.Alfred Moisiu, një letër ku i shpreh mbështetje për veprimet e tij në funksion të një procesi zgjedhor të lirë dhe të ndershëm. Z.Prifti i ka kërkuar gjithashtu Presidentit Moisiu që të përdorë gjithë organet kushtetuese në varësi të tij për të garantuar që "fati i votimit të mos vendoset dhe as të mos përdhoset jashtë kutisë së votimit". Presidenti i Republikës pas marjes së letrës i ka telefonuar dje deputetit socialist Prifti, për të diskutuar më hollësisht rreth procesit zgjedhor, rolit të Presidentit në ketë proces dhe shqetësimeve konkrete të deputetit Prifti. Deputeti Dritan Prifti informoi Presidentin për disa informacione që kanë ardhur nga zona e tij elektorale si dhe nga Partia Socialiste e Fierit, për përpjekje të disa personave me uniformë policie për të ndërhyrë në procesin zgjedhor në favor të familjarëve të tyre dhe për disa tentativa për manipulim ose blerje të komisionerëve. Presidenti i Republikës gjatë bisedës telefonike garantoi deputetin Prifti se të gjitha institucionet e shtetit, përshirë Policinë e Shtetit, Prokurorinë dhe Shërbimin Informativ Shtetëror, janë porositur prej tij dhe do të kryejnë detyrën, jo vetëm në Fier, por në gjithë Shqipërinë. Presidenti gjithashtu i kërkoi deputetit Prifti që të gjitha provat për komprometimin e procesit zgjedhor të mblidhen dhe denoncohen në organin e akuzës pa hezitim.


--------------------------------------------------------------------------------

Republika e Shqipërisë

Kuvendi i Shqipërisë

Zyra e Deputetit Dritan Prifti

Sh.T. z.Alfred Moisiu

President i Republikës

Kopje: z.Ilirjan Celibashi

Kryetar i Komisionit Qendror të Zgjedhjeve, Tiranë

Shkëlqesia Juaj, z.Moisiu,

Si deputet i Parlamentit të Republikës së Shqipërisë dhe si qytetar i thjeshtë i këtij vendi, dëshiroj t'ju shpreh mirënjohje dhe falenderime të sinqerta për përpjekjet tuaja të vërteta për realizimin e zgjedhjeve të lira dhe të ndershme në 12 Tetor. Unë kam vlerësuar shqetësimin tuaj si kryetar shteti, por dhe si qytetar i Shqipërisë, se zgjedhjet e 12 Tetorit duhet jenë model i qartë i demokracisë në vend dhe shembull i pjekurisë së klasës sonë politike. Këto zgjedhje janë një hap i rëndësishëm përpara drejt integrimit europian, por dhe një hap i rëndësishëm në emancipimin e shoqërisë shqiptare. Janë të paktë ata që dëshirojnë që zgjedhjet e 12 Tetorit të ngjajnë me masakrat e referendumeve të shkuara, me vjedhjet masive të votave, apo me marifetet jo etike të shumicave parlamentare. Ne dëshirojmë zgjedhje të lira, të ndershme, të pakontestueshme dhe të pranuara nga të gjitha palët si të tilla. Unë vlerësoj porositë që institucioni juaj, në zbatim të dispozitave Kushtetuese, ka përcjellë për institucionet e Policisë së Shtetit, Prokurorisë dhe Shërbimit Informativ, për të ruajtur integritetin e procesit zgjedhor.

Në zonën time elektorale në Komunat Qendër, Topojë, Mbrostar dhe Libofshë është zhvilluar një fushatë elektorale përgjithësisht civile. Ditët e fundit jam informuar për përpjekje të ndonjë kandidati për kryetar komune në Libofshë për blerje votash, për oferta joshëse që u bëhen anëtarëve të komisioneve të votimit për shitje votash e rezultatesh. Unë do të përpiqem të mbledh faktet dhe të denoncoj ata që bëjnë pazare në kurriz të vullnetit të popullit. Me këtë rast, dëshiroj të kërkoj dhe njëherë angazhimin tuaj dhe të të gjitha strukturave kushtetuese në mbrojtje të votës, që të mos lejojnë që fati i zgjedhjeve të vendoset ose përdhoset jashtë kutive të votimit. Ata që për interesa të ngushta meskine përpiqen të cënojnë vullnetin e popullit dhe të frenojnë rrugën tonë drejt Europës, duhet të identifikohen dhe izolohen. Duke ju shprehur respektin tim për personin dhe institucionin tuaj

Sinqerisht,

Dritan Prifti, MBA, MPA