RD
I emëruar në Itali nga ish-ministri i Jashtëm, Paskal Milo, nuk mundi të arrestohej dot nga karabinierët pasi gëzon ende imunitetin e diplomatit
Drogë në ambasadën shqiptare në Romë. Akuza është bërë nga Antimafia italiane, por pasaporta diplomatike që mbante konsulli i ambasadës shqiptare në Itali, Drini Bello, e ka shpëtuar atë nga arrestimi gjatë operacionit të koduar me emrin "Parajsa". Burime të konfirmuara bëjnë të ditur se zyrtari i lartë i ambasadës tonë në kryeqytetin italian në Romë është person i përfshirë në aktivitetin kriminal të organizatës. Diplomati shqiptar dyshohet se është një nga drejtuesit e një rrjeti që merret kryesisht me trafik klandestinësh dhe drogë.
45-vjeçari Drini Bello ishte emëruar diplomat në Romë nga ish-ministri i Jashtëm, Paskal Milo. Ai jetonte prej disa vitesh në Itali. Burime të rezervuara konfirmojnë se familja e tij ka patur disa precedentë vitet e fundit.
Diplomatit, u zbulua bashkë me një numër personash të tjerë si pjestarë të një organizate kriminale në Itali gjatë operacionit të koduar "parajsa". Ky operacion duhet të ekzekutojë 59 urdhër arreste, ku një numër nga të dyshuarit kanë shtetësi shqiptare. Veprimtaria e tyre ka të bëjë me kontrabandën, emigracionin klandestin dhe vjedhjet.
Ndërkohë, antimafia italiane ka zbuluar se Bello fshihte drogë në ambasadën shqiptare në Romë, ndërsa në Shqipëri konfirmojnë se ai ka qenë efektiv i Shërbimit Informativ Shtetëror.
Ky është rasti i dytë që një efektiv i këtij institucioni dyshohet se është i implikuar në veprimtari kriminale. Disa më muaj më parë u arrestua po në Itali, Ramadan Paja, kryetar i SHISH për Portin e Durrësit, si i përfshirë në trafikun e të miturve nga Shqipëria.
Për implikim në veprimtari kriminale janë denoncuar publikisht edhe disa deputetë dhe zyrtarë të tjerë të lartë socialistë në disa Raporte të kohëve të fundit të organizmave ndërkombëtare. Kohë më parë akuza të ndërsjellta janë bërë edhe mes vetë zyrtarëve socialistë. Deputeti Petro Koçi, bëri kallzim për ndjekje penale në prokurori në adresë të kreut socialist të Komisionit parlamentar të Ligjeve, Spartak Braho, për lidhjet e tij me klane të drogës e të trafikut klandestin. Për lidhjet e politikës me krimin, opozita ka inicuar disa debate parlamentare ku kanë dalë fakte tronditëse, por krerët e mazhorancës së majtë vazhdojnë të qëndrojnë në mbrojtje të klaneve më të errëta kriminale të qeverisjes së tyre. Ky është një tjetër skandal, që provon se akuzat e opozitës për imlikim të qarqeve më të larta të pushtetit me krimin e organizuar janë një realitet i hidhur në Shqipëri.
H.RAMA
Krijoni Kontakt