A po përgatitet NATO të hyjë në konflikt të hapur me Rusinë para betimit të Donald Trump president?

[Albo]

“Moska po përgatitet për konfrontim afatgjatë”, Rutte: Ka ardhur koha për të kaluar në mentalitetin e luftës!



Kreu i NATO-s ka thënë se është koha për të “kaluar në një mentalitet të kohës së luftës”, pasi ai paralajmëroi se anëtarët e aleancës ushtarake nuk po shpenzonin mjaftueshëm për t’u përgatitur për kërcënimin e një konflikti të ardhshëm me Rusinë.

Sekretari i Përgjithshëm Mark Rutte tha se Moska po “përgatitet për një konfrontim afatgjatë me Ukrainën dhe me ne”, duke e përshkruar situatën aktuale të sigurisë si më të keqen në jetën e tij.

“Ne nuk jemi gati për atë që do të na vijë në rrugën tonë pas katër deri në pesë vjet,” tha ai në fjalimin e tij të parë madhor që kur u bë sekretar i përgjithshëm në tetor, duke u kërkuar anëtarëve të “ngarkojnë” shpenzimet e tyre të mbrojtjes.

Komentet e tij vijnë disa javë përpara se presidenti i sapozgjedhur Donald Trump të marrë detyrën, pasi kishte sugjeruar më parë se SHBA nuk do të mbronte aleatët e NATO-s që nuk po shpenzonin mjaftueshëm për mbrojtjen.

Anëtarët e NATO-s janë zotuar të shpenzojnë të paktën 2% të vlerës së ekonomive të tyre – të matura me PBB – në mbrojtje në vit deri në vitin 2024. Por duke folur në një ngjarje në Bruksel, ish-kryeministri holandez tha se do të nevojiteshin “shumë më shumë” pasi rreziku “lëviz drejt nesh me shpejtësi të plotë”.

Ai tha se anëtarët evropianë kishin shpenzuar mbi 3% të PBB-së për mbrojtjen gjatë Luftës së Ftohtë.

“Nëse nuk shpenzojmë më shumë së bashku tani për të parandaluar luftën, do të paguajmë një çmim shumë, shumë, shumë më të lartë më vonë për ta luftuar atë,” tha ai.

Ai shtoi se ekonomia e Rusisë ishte “në një bazë lufte”, me shpenzimet e saj për mbrojtjen deri në vitin 2025 të vendosura të jenë “një e treta e buxhetit të shtetit të Rusisë – dhe niveli më i lartë që nga Lufta e Ftohtë”.

Rusia ka rritur ndjeshëm shpenzimet e saj të mbrojtjes që nga fillimi i pushtimit në shkallë të plotë të Ukrainës, me nivele rekord të miratuara për vitin 2025. Rutte foli në një pikë kritike të luftës në Ukrainë, me forcat ruse që po luftonin përpara në lindje të vendit. Deri në nëntor, Moska kishte pushtuar gjashtë herë më shumë territor ukrainas në vitin 2024 krahasuar me të gjithë vitin 2023.

Ndërsa shpenzimet mesatare të mbrojtjes për anëtarët e NATO-s në Evropë dhe Kanada vlerësohen në 2%, jo të gjitha e përmbushin objektivin. Trump tha në shkurt se ai do të “inkurajojë” Rusinë të sulmojë çdo anëtar të NATO-s që dështon të paguajë faturat e saj si pjesë e aleancës ushtarake perëndimore. 32 anëtarët e NATO-s në Evropë dhe Amerikën e Veriut pajtohen që nëse një anëtar sulmohet, të tjerët duhet të ndihmojnë në mbrojtjen e tyre.

Balkanweb

[Albo]

Zvicra fillon rinovimin e tuneleve të luftës



Zvicra planifikon të rinovojë rrjetin e saj të bunkerëve të vjetër që u rezistojnë sulmeve bërthamore, që gjithnjë e më shumë po vlerësohen sidomos tani kur pasiguria në botë është rritur, veçanërisht pas sulmit në shkallë të gjerë të Rusisë ndaj Ukrainës. Falë një ligji të vitit 1963, Zvicra është tashmë përpara fqinjëve si Gjermania. 9 milionë banorëve të saj, duke përfshirë të huajt dhe refugjatët, u garantohet një vend në një bunker për t’i mbrojtur nga bombat dhe rrezatimi bërthamor.

“Në vitet e ardhshme, Konfederata Zvicerane dëshiron të heqë disa nga kufizimet nga rregullat aktuale dhe të rinovojë disa nga bunkerët më të vjetër”, tha për agjencinë e lajmeve Reuters, Louis-Henri Delarageaz, komandant i mbrojtjes civile për kantonin Vaud.

Në muajin tetor, qeveria nisi konsultimet për të bërë të mundur “sigurinë” e Zvicrës “në rast të një konflikti të armatosur”dhe planifikon një përditësojë strukturat e vjetra me një buxhet prej 250 milionë dollarësh.

“Kjo nuk do të thotë se po përgatitem për konflikt, jo, nuk është ky mesazhi, por duam që të kemi një rrjet strehmi të sigurtë dhe ne duhet t’i mirëmbajmë bunkerët dhe të sigurohemi që janë funksionalë”, thotë Louis-Henri Delarageaz.

Në fshatin Bercher, të kantonit Vaud, oficerët e mbrojtjes civile, kontrolluan një bunker që gjendet poshtë një blloku apartamentesh, në kuadër të inspektimit të detyrueshëm, çdo dhjetë vjet.

Pas kontrollit, kreu i grupit të inspektimit Gregory Fuhrer vlerësoi se në gjendjen që ishte, bunkeri ishte i papërdorshëm. “Pronarit të bllokut të apratamenteve do t’i jepet një afat një vjeçar për të rregulluar defektet, përndryshe duhet të paguajë 900 dollarë për çdo banor në një bunker publik”, u shpreh ai.

Që në 1815 kur u njoh neutraliteti i Zvicrës, ky vend nuk është përfshirë në luftra të huaja.

Ajo u pushtua nga Franca në shekullin e 18-të dhe pësoi disa bombardime ajrore gjatë Luftës së Dytë Botërore.

Komandanti i mbrojtjes civile për kantonin Vaud, Louis-Henri Delarageaz tha se pasi Rusia sulmoi Ukrainën në vitin 2022, zyra që ai drejton u përball me një rritje të thirrjeve telefonike nga banorë të shqetësuar, që kërkonin informacion mbi bunkerët.

“Papritur shumë njerëz na merrnin dhe na pyesin se “ku janë bunkerët, ku është vendi im, a është gati streha ime?” tha ai, duke shtuar se kërkesat nga ana e qytetarëve francezë për një vend në bunker, u desh të refuzohen.

Ndërsa shumica e zviceranëve kanë bunkerë privatë, disa mbështeten tek bunkerët e komunitetit. Pranë zyrës së zotit Delarageaz gjendet një nga 350 bunkerët e tillë të kantonit Vaud. Bunkerët janë mirëmbajtur, me krevate marinari dhe tualete.

Aty pranë është një qendër komandimi nëntokësore, një spital nëntokësor me një sallë operacioni dhe dushe dekontaminimi si dhe një bunker për të mbrojtur veprat e artit. “Ne në Zvicër jemi largpamës”, thotë zoti Delarageaz. “Ka një fjalë të urtë latine që thotë: “Nëse doni paqe, përgatituni për luftë”.

Koha Jone