Mbështetësit e opozitës bllokojnë akset rrugore, kërkojnë qeveri teknike

[Albo]

Opozita bllokon rrugët, përplasje me policinë në Tiranë dhe Elbasan

Një grup deputetësh nuk shkon në protestë, por takon eurodeputetët bashkë me socialistët



Për thuajse tre orë, opozita mbajti të bllokuar disa nga rrugët kryesore të vendit, jo vetëm si një formë e proteste kundër arrestimit të Sali Berishës, Ilir Metës dhe Ervin Salianjit, por edhe si një test për të dhënë prova të rezistencës ndaj presioneve të pushtetit.

Protesta kishte parashikuar bllokimin e sheshit Shqiponja në Tiranë, të rrethrrotullimit të Milotit, të rrethrrotullimit të Shkozetit, në rrethrrotullimin e Bradasheshit, në rrethrrotullimin e Rrogozhinës dhe në Levan.

Në pjesën më të madhe të kohës, protesta ka kaluar e qetë. Qytetarët u grumbulluan në sheshet e paracaktuar rreth orës 17:00, pasi deputetët e PD vendosën në mes të rrugës makinat e tyre, ndërsa policia ka qëndruar në distancë.

Në disa raste ambulancat janë lejuar të kalojnë, ndërsa protestuesit kanë djegur goma në rrugë.

Megjithatë në orën 19:00 u duk se policia mori urdhër të bëjë një përpjekje për të prishur protestën. Në Tiranë dhe në Bradashesh pati përplasje. Policët ishin afruar ngadalë, hap pas hapi dhe në fund, kur protestuesit u gjetën të mënjanuar, ata kanë reaguar.







Përpjekjet e policisë për të liruar rrugën kanë qenë të suksesshme në Bradashesh, ku mbështetësit e opozitës u tërhoqën pas disa përplasjeve me uniformat blu.

Ndërkohë në Tiranë, protestuesit nuk janë tërhequr dhe kanë qëndruar deri në fund, kur ishte vendosur mbyllja e protestës deri në orën 20:00. Flamur Noka që kishte marrë përsipër të udhëhiqte protestën në sheshin Shqiponja, tha se, nëse policia do t’i shpërndante protestuesit me dhunë, atëherë “destinacioni i radhës ishte Surreli”.

Por ndërkohë që një pjesë e qytetarëve ndoqën Flamur Nokën në Tiranë apo Tomorr Alizotin në Bradashesh që u përplasën me policinë, një pjesë e deputetëve të Partisë Demokratike nuk morën pjesë në protestë.

Ina Zhupa, Jorida Tabaku, Agron Gjekmarkaj, Oerd Bylykbashi dhe kryetari i grupit parlamentar të PD, Gazment Bardhi zgjodhën të shkojnë në takim me një delegacion deputetësh nga Parlamenti Europian.



Prezenca e deputetëve në një takim me eurodeputetët nuk ishte në sintoni me sakrificën që i kërkohet mbështetësve të opozitës për mosbindje civile dhe bllokim rrugësh, akte për të cilat policia paralajmëroi disa herë se do të ndiqen penalisht dhe ata që i kryejnë, rrezikojnë burgun.

Lapsi.al

[Albo]

Mbyllet protesta e opozitës, paralajmërohet tubim në Surrel



Pas tre orësh opozita ka mbyll mosbindjen civile, duke paralizuar qarkullimin në 6 kryqëzimet kryesore të vendit. Në përfundim, Sekretari i Përgjithshëm i PD, Flamur Noka tha se “sot e gjithë Shqipëria ishte në duart e opozitës”.

Sipas tij nuk ka më kthim pas dhe se aksioni opozitar dhe mosbindja civile do të vazhdojë.

“E gjithë Shqipërua sot ka qenë në duart e opozitës. Dua të falënderoj të rinjtë dhe të rejat, qytetarët që iu përgjigjen ftesës së opozitës në këtë hap të madh të opozitës. Falënderoj edhe qytetarët shqiptarë që shmangen, bënë gjithçka që të shmangen përplasjet.

Sot ka qenë një ditë e zezë për narkoshtetin dhe bandat e pushtetit. Të tmerruar ata kanë sjellë policinë për të intimiduar opozitën.

Rezistenca jonë do të vazhdojë. Qeveria teknike është e vetmja zgjidhje për Shqiptarët. I pyetur nëse Surreli do të jetë destinacioni i radhës, Noka u shpreh se “sot e shmangëm, por nuk do ta shmangim gjithmonë”

Lapsi

[Albo]

Berisha: Shqipëria 3 orë në duart e opozitës! Narko-regjimi dridhet!

Lideri i Partisë Demokratike ka përshëndetur protestën e opozitës pasditen e sotme, ku bllokuan për 3 orë 6 akset kryesore të vendit në shenjë mosbindje civile dhe ku u përsëritën kërkesat për qeveri teknike, lirimin e liderëve të opozitës dhe kthimin e vendit në normalitet.

Berisha përmes një postimi në rrjetin social Facebook, thekson se mosbindja civile ka dridhur narko-regjimin.

Postimi:

Shqipëria 3 orë në duart e opozitës! Narko-regjimi dridhet!

Mirënjohje të pakufishme për të gjithë ju që me drejtimin, përkushtimin, organizimin, guximin që dëshmuat në këtë betejë të mosbindjes civile të opozitës kundër narko-regjimit dhe për suksesin e plotë që u arrit. Shqipëria u paralizua dhe për tre orë ishte në duart tuaja. Narko-diktatura u dridh! Kreu i saj Edi Rama ndersej fallangat e tij kundra jush, por deshtoi. Ju qëndrestare të pamposhtur, përmbushët misionin tuaj. Nderim dhe mirënjohje! O sot, o kurrë! Është rradha jonë, është rradha jonë! Fitore! #sb

Syri