SPAK arreston deputetin socialist Plarent Ndreca, akuzohet për korrupsion me tenderat

[Albo]

Abuzim me tenderat, SPAK merr të pandehur deputetin socialist Plarent Ndreca

SPAK i ka komunikuar akuzën deputetit të Partisë Socialiste Plarent Ndreca, i cili akuzohet për “shkelje të barazisë së pjesëmarrësve në tendera apo ankande publike”. Hetimet janë fokusuar në kohën kur Ndreca ishte Sekretar i Përgjithshëm i Ministrisë së Brendshme.

Nga Vladimir Karaj


Deputeti i PS Plarent Nderca.

Deputeti i Partisë Socialiste dhe ish-Sekretari i Përgjithshëm i Ministrisë së Brendshme Plarent Ndreca është marrë i pandehur nga SPAK, të premten më 25 tetor, pasi akuzohet për “shkelje të barazisë në tendera”.

“Duke iu përgjigjur interesit të gjerë publik, ju komunikojmë se më dt.25.10.2024, të pandehurit, Plarent Ndreca, i është komunikuar, përmes avokatit të tij, përfundimi i hetimeve për procedimin penal nr.240/2021 për veprën penale “Shkelje e barazisë së pjesëmarrësve në tendera apo ankande publike”, parashikuar nga nenet 258 dhe 25 të Kodit Penal. Më shumë detaje do të vijojnë në një moment të dytë”, njoftoi Prokuoria e Posaçme.

Ndreca është kallëzuar nga Kontrolli i Lartë i Shtetit dhe hetimet duket se kanë gjetur shkelje sa i përket tenderave të zhvilluara nga Ministria e Brendshme në kohën që ai ishte Sekretar i Përgjithshëm dhe ministër ishte Sandër Lleshaj.

Ndreca e mori mandatin e deputetit në janar të këtij viti dhe i zuri vendin ish-zëvendëskryeministrit Arben Ahmetaj, i cili nga ana e tij e humbi mandatin pasi u shpall në kërkim nga Prokuroria e Posaçme për akuzat e korrupsionit dhe krimit të organizuar dhe u arratis nga Shqipëria.

Ndreca ka mbajtur një sërë postesh të rëndësishme në administratën publike dhe prej vitit 2013 ka shërbyer disa herë si sekretar i Përgjithshëm në ministritë e Arsimit, Mjedisit dhe atë të Punëve të Brendshme. Ai i shtohet një liste të gjatë të përfaqësuesve të Partisë Socialiste të akuzuar nga SPAK për shkelje, korrupsion e të ngjashme. Deri në momentin e publikimit të këtij shkrimi Ndreca nuk iu përgjigj kërkesës së BIRN për koment mbi akuzën.


BIRN

[Albo]

Rasti Ndreca si simbol i antishtetit

Pak ditë më parë, kryeministri Edi Rama iu hakërrye disa kritikëve, emrat e të cilëve nuk i dha, të cilët, sipas tij, e akuzonin në mënyrë shumë të padrejtë se ka partitizuar çdo hallkë të administratës publike duke shkatërruar çdo themel të shtetit të së drejtës. Në fakt, historia e karrierës së deputetit socialist, Plarent Ndreca sugjeron se kritikat nuk janë aq të pabaza.

Nga Gjergj Erebara


Kryeministri Edi Rama në Kongresin e PS më 28 korrik 2024. Foto: LSA.

Më 19 tetor, kryeministri Edi Rama pati një nga shpërthimet e tij të rëndomta të protestës kundër kritikave, të cilat ai i konsideron si shumë të padrejta në lidhje me partitizimin e tejskajshëm të administratës publike.

“E trajtojnë administratën publike si një vend ku nuk ka njerëz, por vetëm dele që janë mbledhur nga kopetë e partive, domethënë, një tmerr,” deklaroi Rama para se të deklarohej krenar për çfarë ka arritur.

Për këdo që e ka harruar, ndërtimi i një administrate publike me qëllim ndarjen e shtetit nga partia në pushtet ka qenë një nga dymbëdhjetë kushtet që Bashkimi Evropian vendosi këtu e pesëmbëdhjetë vjet të shkuara si parakusht për integrimin e Shqipërisë në Bashkimin Evropian. Dhe miratimi me kompromis në vitin 2012 i një ligji për administratën publike, – ku sanksionohet se një numër postesh të larta publike, plotësohen në bazë të kritereve profesionale, (nënkupto: me konkurs të hapur) dhe mbrohen nga shkarkimet e padrejta nga puna duke i garantuar shpërblime të majme apo kthim në detyrë me vendim gjykate pas pushimit të padrejtë, – u miratua nën presionin e Brukselit dhe me kompromis mes PD-së dhe PS-së.

Më shumë se një dekadë më pas, Komisioni Evropian në Pozicionin Negociues [link] veçon si problem Reformën e Administratës Publike dhe vëren se Shqipëria është mesatarisht e përgatitur në këtë fushë. Termi mesatarisht i përgatitur është në gjuhën e BE-së një nga pesë shkallët e vlerësimit të gjendjes së një vendi kandidat në një fushë të caktuar. Shkalla e parë është Hapat e parë, ndërsa shkalla më e lartë, pra pika kur vendi kandidat është gati për anëtarësim, është I përparuar. Nga gjendja aktuale Shqipëria duhet të kalojë në shkallën Nivel i mirë dhe pastaj në Nivel i përparuar.

Të jesh në një gjendje të caktuar në rrugën e integrimit Evropian është një gjë dhe drejtimi dhe shpejtësia e lëvizjes është një gjë tjetër. Me pak fjalë, në mënyrë që të përdorim kutin e Brukselit për përgatitjen e administratës, na duhet të shohim se ku ka qenë Shqipëria, fjala vjen, në ditën që Edi Rama mori pushtetin dhe ku është sot. Dhe konkluzioni është që jemi në vendnumëro. Në Raportin e Progresit të vitit 2015, kohë kur ky sistem pikëzimi filloi të përdorej nga zyrtarët e Brukselit, vlerësimi për gjendjen e administratës civile në Shqipëri ishte nivel mesatarisht i përgatitur. [Link] Ky është i njëjti vlerësim me gjendjen aktuale. Pra, ndërsa Rama pretendon se niveli i administratës së tij është që të çuditemi fare se sa mirë, diçka që atë e bën “krenar”, dukshëm ky pretendim nuk ndahet nga Bruseli.

Këtë historinë e mungesës së progresit në zhvillimin e një administrate civile profesionale, jopartiake dhe llogaridhënëse mundet ta kuptojmë më mirë nga karriera e deputetit socialist Plarent Ndreca duke parë jetëshkrimin e tij zyrtar, një tregues kuptimplotë se sa pak respekt kryeministri ka treguar për profesionalizmin dhe karrierën në shërbimin civil.

Sipas jetëshkrimit të deputetit të publikuar në faqen zyrtare të Kuvendit, [Link], Ndreca u bë Sekretar i Përgjithshëm i Ministrisë së Arsimit në vitin 2013, kur socialistët erdhën në pushtet dhe katër vjet më vonë u bë Sekretar i Përgjithshëm i Ministrisë së Turizmit dhe Mjedisit. Në vitin 2019, ai u emërua Sekretar i Përgjithshëm i Ministrisë së Punëve të Brendshme. Aktualisht ai pritet të merret i pandehur në lidhje me problemet e vërejtura në disa procedura tenderimi, probleme të identifikuara nga Kontrolli i Lartë i Shtetit dhe të denoncuara në SPAK.

Për këdo që nuk ka pasur rastin të njohë strukturën e shtetit shqiptar dhe të shteteve të së drejtës në përgjithësi, posti i Sekretarit të Përgjithshëm të një institucioni është pozicioni më i lartë që mund të arrijë një nëpunës civil. Pra, një post karriere të cilin duhet ta mbajë një zyrtar që ka kaluar shumë shkallë në shërbimin civil në atë institucion që ka shërbyer. Me pak fjalë, dikush që ka bërë karrierë si nëpunës civil në Ministrinë e Arsimit, pas dekadave të shërbimit mundet, falë meritave, të arrijë në pozicionin e Sekretarit të Përgjithshëm të këtij institucioni. Dhe Sekretari i Përgjithshëm i takon anës jopartiake të një institucioni qendror si memorie institucionale dhe si post i siguruar falë shërbimit korrekt në detyra të tjera më të ulëta. Pra ky është zyrtari që, ndërsa ministri dhe zëvendësministrat dhe këshilltarët e ministrit ndërrohen në varësi të rezultatit të zgjedhjeve, Sekretari i Përgjithshëm mbetet.

Posti i Sekretarit të Përgjithshëm është gjithashtu pozicioni që mbulon prokurimet publike. Pra, nëse vendimi i qeverisjes politike është që vendi të priorizojë, fjala vjen, një sektor të ekonomisë me investime apo një punë të caktuar, zbatimi i këtyre politikave bëhet nga profesionistë jopartiakë, të cilët, në funksion të zbatimit të politikave, kryejnë procedurat e tenderimit.

Tani Rama, para se të në ankohet se po i shajmë administratën si një “kope delesh” apo një “tmerr”, (me thënë të drejtën, unë mund të përdor fjalë ku e ku më të papëlqyeshme se sa këto për ta përshkruar), duhet të na shpjegojë se me çfarë eksperience të mëparshme në sektorin e arsimit, Ndreca u bë Sekretar i Përgjithshëm i Ministrisë së Arsimit, me çfarë eksperience të mëparshme u bë supereksperti i çështjeve të turizmit dhe mjedisit apo supereksperti i punëve të brendshme dhe të rendit publik. Mbi të gjitha, Rama është i lutur të na shpjegojë procesin përzgjedhës të Ndrecës në secilin nga këto pozicione, të dhëna të tilla si data e hapjes së konkursit, pjesëmarrësit, kriteret e vlerësimit dhe vendimmarrjen mbi vlerësimin, për të na lënë të kuptojmë se pse nuk janë Ndrecët socialistë “tmerri” dhe “kopeja e deleve” për të cilën ai pretendon se po merr kritika të pamerituara.

BIRN

[Vinjol]

@Albo sa ju bene nga te tijet megjithe kte ???

[Albo]

SPAK dërgon për gjykim deputetin socialist Plarent Ndreca dhe 15 zyrtarë për abuzim me tenderat

Prokuroria e Posaçme njoftoi dërgimin për gjykim të dosjes ndaj Plarent Ndrecës dhe 15 ish-zyrtarëve të Ministrisë së Brendshme dhe institucioneve të tjera, që akuzohen se abuzuan me tenderat për 4 komisariate. SPAK akuzon deputetit Ndreca se ka udhëhequr grupin e zyrtarëve për të favorizuar në shkelje të ligjit një biznesmen.

Nga Vladimir Karaj


Deputeti socialist, Plarent Ndreca pas daljes nga Prokuroria e Posaçme. Foto: LSA.

Prokuroria e Posaçme njoftoi të mërkurën dërgimin për gjykim të një grupi zyrtarësh e ish-zyrtarësh të një sërë institucionesh, që akuzohen se nën udhëheqjen e deputetit (atëherë Sekretar i Përgjithshëm i Ministrisë së Brendshme) Plarent Ndreca, dyshohet se favorizuan në shkelje ligjore arkitektin Gjon Radovani për të fituar tendera me vlerë 34 milionë lekë.

Prokuoria bën me dije se nga hetimet ka rezultuar se zyrtarët e Ministrisë së Brendshme, Agjencisë së Zhvillimit të Territorit, Agjencisë Kombëtare të Planifikimit të Territorit dhe Inspektoratit Kombëtar të Mbrojtjes së Territorit bashkëpunuan “në mënyrë të qëllimshme për të favorizuar një bashkim operatorësh ekonomikë, duke shkelur dispozitat e ligjit për prokurimet publike”.

“Nga provat e mbledhura, rezulton se një grup zyrtarësh të udhëhequr ex officio nga Plarent Ndreca, ish-Sekretar i Përgjithshëm i Ministrisë së Brendshme, i cili ka qënë titullar i autoritetit kontraktor kanë kryer shkelje ligjore në fazat e tenderit për të shpallur fitues shtetasin Gjon Radovani, pavarësisht mospërmbushjes së kritereve ligjore nga ky i fundit”, thuhet në njoftim.

I pyetur nga BIRN për akuzat ndaj tij, deputeti Ndreca këmbënguli se çështja ishte ende në hetim dhe pretendoi se publikimi i të dhënave në këtë rast ishte shkelje penale.

“Çështja konsiderohet akoma nën hetim dhe çdo e dhënë që del, është shkelje penale ajo e “nxjerrjes së sekretit hetimor”. Unë do mbaj qëndrim atëher kur duhet e si duhet, pa e cënuar procesin hetimor, institucionet dhe pa thyer ligjin,” tha Ndreca përmes një mesazhi të shkruar.

Veç Ndrecës, në listën e të akuzuarve janë një numër zyrtarësh të tjerë që dyshohen për shkelje të ligjit. Sipas prokurorisë, të përfshirë janë anëtarët e njësisë së prokurimit Denisa Skënderaj, Lira Kolasi, dhe Blendi Kovi, anëtarët e Komisionit të Vlerësimit të Ofertave Lindita Mukaj, Ferdinant Tarazhi, Silva Dauti, Grida Isufi, Deni Klosi, Jonarda Qurku, anëtarja e Komisionit të Shqyrtimit të Ankesave, Julia Hysa, dhe zyrtarët e tjerë të përfshirë si Elora Kokalari, dhe Aida Shehi, që akuzohen se “kanë kontribuar në devijimin e procedurave ligjore”.

Prokuroria po ashtu akuzon një komision për marrjen në dorëzim të projektit, se ka nënshkruar procesverbale të rreme. Anëtarët e komisionit, Emiliano Mehmeti, Klejdi Meço dhe Erand Rrobaçi po ashtu janë dërguar për gjykim.

Prokuroria thotë se Ministria e Brendshme në kontratën “Studimi dhe Projektimi i disa objekteve të Policisë së Shtetit” kishte caktuar një vlerë totale prej 54,234,000 lekë (pa TVSH) për katër objekte policore. Por kjo vlerë u ndryshua duke zvogëluar numrin e objekteve në 2 dhe reduktuar vlerën në 34,2 milionë lekë. Prokuoria thotë se kjo u bë “për të favorizuar fituesin”.

Arkitekti Gjon Radovani, ish-zëvendës ministër i Zhvillimit Urban në qeverinë e parë të kryeministrit Edi Rama, mohoi në një reagim publik të kishte përfituar në mënyrë të paligjshme. Ai këmbënguli në një procedurë të rregullt dhe tha se ishte në gjyq me ministrinë e Brendshme që kishte refuzuar të paguante faturën. “Pas një kalvari prej tre vitesh të gjendur para një padrejtësie për ne tashmë të pazgjidhshme i kemi kaluar çështjen një avokati për të marrë rrugën e mundshme të një procesi civil kundër debitorit,” shkroi Radovani në faqen e tij në Facebook.

Edhe SPAK pranon në njoftim për shtyp se fatura nuk u pagua, por e konsideron dëm shumën e planifikuar për pagim, ndërsa thotë se mospagimi është rezultat i paligjshmërive të gjetura nga auditi në proces. “Nga veprimet e paligjshme të kryera, shtetit i është shkaktuar një dëm financiar, i vlerësuar sipas kontratës në vlerën prej 34,248,000 lekë. Deri në këtë moment, kjo vlerë nuk është ezekutuar ndonëse përfituesi ka lëshuar faturat përkatëse për shkak të kundërshtimit/auditimit të Drejtorisë së Përgjithshme të Policisë së Shtetit mbi paligjshmëritë e evidentuara gjatë procesit”, thuhet në njoftim.

BIRN