SPAK merr të pandehur ish-kryeministrin Sali Berisha, i komunikon akuzat

[Albo]

SPAK merr të pandehur ish-kryeministrin Sali Berisha

Prokuroria e Posaçme ka mbyllur hetimet dhe ka njoftuar akuzat për ish-kryeministrin Sali Berisha, dhëndrin e tij Jamarbër Malltezi, të akuzuar për korrupsion në atë që njihet si afera e terreneve sportive të klubit Partizani.

Nga Vladimir Karaj


Ish-kryeministri Sali Berisha pas njoftimit të akuzës nga SPAK. Foto | LSA

Kryetari i Partisë Demokratike dhe ish-kryeministri Sali Berisha është thirrur në SPAK të mërkurën, ku i është njoftuar akuza e korrupsionit pasiv, marrja si i pandehur dhe mbyllja e hetimeve ndaj tij dhe dhëndrit të tij Jamarbër Malltezi.

Paraqitja e Berishës në SPAK u bë në praninë e dhjetra mbështetësve që protestuan para dyerve të Prokurorisë së Posaçme. Berisha i cili është hetuar në masën e sigurisë “arrest shtëpie”, qëndroi për rreth 30 minuta në zyrat e prokurorisë.

Në një deklaratë për mediat dhe mbështetësit e tij të mbledhur në rrugën para godinës së Prokurorisë së Posaçme, Berisha sulmoi prokurorinë se kishte ngritur çështje politike të bazuar sipas tij në mashtrime.

“I pandehur, atë akuzë që kam patur (korrupsion pasiv). Asgjë tjetër përveçse 500 faqe mashtrime, mashtrime. Më ka korruptuar dhëndri im”, tha ai.

Ish-kryeministri sulmoi SPAK dhe listoi një mori çështjes që përshijnë qeveritarët aktualë, që ai aludoi se nuk po hetoheshin.

Berisha është në hetim për veprën penale të korrupsionit së bashku me dhëndrin e tij, Jamarbër Malltezi, i cili akuzohet nga SPAK se ka përfituar të ardhura në vlerën e 5.4 milionë eurove nga një biznes ndërtimi në mënyrë të parregullt falë vendimeve të qeverisë të marra nga vjehrri i tij.

Si Berisha ashtu edhe Malltezi i kanë kundërshtuar akuzat dhe e kanë cilësuar hetimin si të orkestruar nga kryeministri Edi Rama. Gjithashtu, Berisha dhe mbështetësit e tij e kanë cilësuar këtë masë si përpjekje për asgjësimin e opozitës.

Berisha, 79 vjeç, është zyrtari më i lartë i opozitës në tre dekada që përballet me një situatë të tillë ligjore. Hera e fundit që një ish-kryeministër është përballur me heqje imuniteti, arrestim dhe proces gjyqësorë ka qenë në vitin 1993, kur mazhoranca e asaj kohe e Partisë Demokratike autorizoi arrestimin dhe përndjekjen e ish-kryeministrit socialist, Fatos Nato.

BIRN

[Albo]

‘Prokurorët e SPAK, palaço të Ramës’/ Malltezi: Mashtrues...Kanë lënë në akuzë sikur destinacionin e ndryshoi Berisha



Anëtari i Këshillit Kombëtar të PD-së, Jamarbër Malltezi ka denoncuar prokurorët e SPAK se janë vegla në duart e Edi Ramës, pasi kanë lënë në akuzë sikur destinacionin e ‘Klubit Partizani’ e ndryshoi Sali Berisha, ndërkohë që dokumentat faktojnë krejtësisht të kundërtën.

Në postimin e tij në Facebook, Malltezi publikon vendimin e Këshillit Teknik të KRRT e Bashkisë Tiranë 10 drejtorë të Ramës, me vendim të marrë në datë 08. 06. 2006 pa asnjë kërkesë të pronarëve të tokës dhe para se pronarët të lidhnin kontratë me kompaninë e ndërtimit.

‘Mashtrues ordiner që gënjejnë e fshehin dokumente. Dividentin duan ta quajnë rryshfet! Por është për guinness se thonë që Berisha i ndihmoi në 2006-2009, por Malltezi mori divident në 2017! 10 vjet më pas!’, shkruan Malltezi.

Postimi i plotë:

Prokuroret politike te #spak jane kthyer ne vegla te Edi Rames dhe krejt palaco. Kane lene ne akuze genjeshtrat e trasha sikur destinacionin e ndryshoi Berisha me 21.11.2006 kur e kane ne dosje qe e ndryshoi Edi Rama me 08.06.2006. Biles e ndryshuan qysh me 12.05.2006 me vendim te keshillit teknik te KRRT (10 drejtore te Edi Rames) pa asnje kerkese te pronareve te tokes dhe para se pronaret e tokes te lidhnin kontrate me kompanine e ndertimit (vol.15 fq.10).

Plus, kur me thirren me 25.01.2024 une depozitova harten me ngjyra dhe vendimin nr. 238 te KRRT date 27.12.2008 me te cilin Edi Rama miratoi zonimin funksional te kompanise Urbaplan dhe e ndryshuan destinacionin e pjeses tjeter ne “zhvillime te reja me parametra te larte urbane” - kur shoh sot tek akuza kane lene qe pjeses tjeter ia ndryshoi Berisha ne 2013! Po ketyre dokumenteve si tia bejme pa mire?

Mashtrues ordiner qe genjejne e fshehin dokumente.

Dividentin duan ta quajne rryshfet! Por eshte per guinness se thone qe Berisha i ndihmoi ne 2006-2009 por Malltezi mori divident ne 2017! 10 vjet me pas!









Syri

[Albo]

'Qeveri-SPAK-GJKKO, një trup i vetëm', Gjokutaj: Moszbardhje vendimesh për të na humbur kohë për zgjedhjet

VIDEO

I ftuar në TASK FORCE në SYRI TV me moderatoren Sonila Meço, avokati Genc Gjokutaj ka folur për thirrjen e sotme në SPAK të liderit të opozitës, Sali Berisha dhe akuzën e komunikuar nga SPAK.

Gjokutaj u shpreh se gjykatat me qëllim nuk kanë zbardhur vendimet, për të humbur kohën dhe për të mbërritur çështjen në afatet që do oreksi mazhoritar, me në krye Edi Ramën.

Avokati u shpreh gjithashtu se qeveria, SPAK, GJKKO, janë një trup i vetëm dhe meren vesh bashkë në lidhje me akuzat.

'Direkt pas mandatit të tretë fillon depozitohet kallëzimi dhe mbahet në krye të tre viteve që të kalojë edhe një vit i cili përkon me zgjedhjet elektorale, ndaj këto gjykata me qëllim nuk kanë zbardhur vendimet, me qëllim për të na humbur kohën dhe për të mbërritur në afatet që do oreksi mazhoritar, me në krye Edi Ramën.

Ky preçedent inkriminon vendimmarrjen, pengon iniciativën ligjvënëse, por këto Edi Rama i ka të fundit në program.

Ju e dini që këta janë një trup i vetëm, qeveri SPAK, GJKKO, e dini ju që SPAK po ushtron presion mbi gjykatën kushtetuese që të nxjeri të paligjshme sky dhe encrochatin?

Këta janë fabrika e mashtrimit e ngritur në sistem, keta hedhin në lojë çdo lloj topi që ekziston dhe pastaj nuk mbajnë përgjegjësi.'- u shpreh Gjokutaj.

Syri

[Albo]

Kronologjia/ Berisha i pandehur pak para zgjedhjeve parlamentare



Asnjë surprizë nga përpjekja e SPAK për të goditur kreun e opozitës. Procesi që nisi me denoncimin e Taulant Ballës në prokurorinë speciale ka hedhur një hap tjetër, tani që kanë mbetur pak muaj nga zgjedhjet e ardhshme parlamentare.

Prokurorët Arben Kraja dhe Enkelejda Millonai i komunikuan Sali Berishës akuzën e “korrupsionit pasiv kryer në bashkëpunim” në lidhje me truallin e kompleksit Partizani, që iu kthye disa familjeve të Tiranës, mes të cilëve ishte përfitues edhe dhëndri i tij, Jamarbër Malltezi.

Ndërsa hynte në SPAK, Berisha u brohorit nga disa qindra militantë të thirrur në protest kundër arrestimit të tij nga organet e drejtësisë. Në fakt, që nga fillimi, procesi për të cilën Berisha mbahet nën arrest shtëpie, ka qenë i diktuar nga politika.

Dosja e hartuar në zyrat e PS dhe izolimi i Berishës në shtëpi

Edi Rama nuk e ka fshehur asnjëherë që është ai që qëndron pas burgosjes së Sali Berishës. Së pari, është fakt se kreu i opozitës është arrestuar në bazë të një denoncimi të Taulant Ballës, i cili rreth katër vite më parë u paraqit në SPAK me një dosje të kopsitur në zyrat e Partisë Socialiste.

Sipas socialistëve, qeveria e drejtuar nga Berisha kishte krijuar kushtet dhe kishte marrë vendime që favorizonin dhëndrin e tij Jamarbër Malltezi për të përfituar nga privatizimi i truallit të kompleksit Partizani, duke qenë pjesë e familjeve trashëgimtare.

Për gati 3 vjet dosja qëndroi e fjetur në zyrat e SPAK. Berisha dhe dhëndri i tij nuk u morën asnjëherë në pyetje, por një ditë të nxehtë korriku Taulant Ballën u shfaq në dyert e SPAK, pasi prokurorët e informuan për zhvillimet me dosjen që do të çonte në arrestimin e Berishës dhe dhëndrit të tij.

Në tetor, ndërsa Jamarbër Malltezi po priste bashkëshorten e tij në Rinas, u rrethua nga policia dhe iu vunë prangat. Arrestimi u filmua dhe pamjet e shoqërimit u shpërndanë me bujë në media.

Pas arrestimit, të tij SPAK çoi direkt në gjykatë kërkesën për detyrim paraqitje dhe sekuestrimin e pasaportës së Sali Berishës. Procedura ishte e pazakontë. Duke qenë deputet, ndaj Berishës nuk mund të vihej një masë sigurie pa marrë autorizim nga parlamenti.

Me këtë arsyetim Berisha refuzoi të bindej. SPAK ashpërsoi qëndrimin. Me firmë të Altin Dumanit, u dërgua në parlament kërkesa për arrestimin dhe izolimin e Sali Berishës në shtëpi.

Non grata e amerikanëve dhe presioni i Ramës për arrestimin e Berishës



Arsyetimi që u bë për shpalljen e Berishës non grata nga Shtetet e Bashkuara të Amerikës për korrupsion madhor, u shoqërua me presione ndaj SPAK për gjetjen e provave për këtë korrupsion që përmendej nga Departamenti Amerikan i Shtetit. Logjika ishte e përmbysur. Zyrtarët e huaj i drejtoheshin SPAK përmes “prezumimit të fajësisë”, pasi non grata ishte shpallur, Departamenti i Shtetit kishte përmendur korrupsionin madhor dhe ishin ata që tani duhet të gjenin provat.

“Vendimi për ta përcaktuar (non-grata) ishte një vendim institucional dhe jo politik. E morëm për shkak të korrupsionit që gjetëm. I bëj thirrje institucioneve në Shqipëri që t’i marrin në konsideratë këto” shprehej Gabriel Escobar në Tetor të vitit të kaluar, kur ishte i dërguar i SHBA për Ballkanin Perëndimor.

Deklarata tingëllon si një urdhër i qartë për prokurorët e SPAK, të financuar dhe të zgjedhur nga një përkujdes i vazhdueshëm i zyrtarëve amerikanë.

Në këtë atmosferë, thirrjet e Edi Ramës që SPAK të bënte arrestime edhe në radhët e opozitës, dukeshin si normale.

Në mbledhjet e kongresit të Partisë Socialiste dhe në mbledhjet e asamblesë, Edi Rama i kërkoi disa herë prokurorëve të SPAK, që të kryenin arrestime edhe në anën tjetër të llogores politike, duke iu referuar rregullisht Sali Berishës.

Duke bërë si i pakënaqur për faktin se në burg po përfundonin vetëm socialistët e tij hajdutë, Rama u shpreh disa herë se prokurorët nuk duhej ta merrnin për dobësi, faktin që ai kishte heshtur deri tani.



“Kjo është tallje shumë e madhe, që SPAK deri tani përdor vetëm një lloj grepi dhe për vetëm një lloj peshku madje pa e pasur problem që të gjuaj dhe cironka me dinamik, por nuk ka as vullnet që ta përdor dinamitit për peshkaqenët që i bëjnë leksione SHBA, Europës, dhe zgjohen dhe ngrysen duke nxjerrë llum nga goja. Durimi ynë po soset, i imi po” shprehej kryeministri në Maj të vitit 2022.

Rama vazhdoi me disa deklarata, ku nxiste prokurorët e SPAK të godisnin Sali Berishën dhe Ilir Metën.

“Më thonë “Pse po ha nga ju, do me thënë nga ne, sharra e SPAK-ut. Këtu nuk di çtë them për sharrën e tyre, po di ç’të them për sharrën tonë. Sepse ne nuk e kemi kapur drejtësinë e as nuk kam bërë shaka kur thashë duam një drejtësi të drejtë në këtë vend” shprehej kryeministri, duke i kërkuar publikisht prokurorëve t’i tregonin dhëmbët opozitës.

Përdorimi i prokurorëve të SPAK



“Dy laro, mercenarë të Edi Ramës, kanë ardhur pasi kanë vendosur në kundërshtim me Kushtetutën privimin e lirisë ndaj meje, tani jo që nuk tërhiqen, por si eprorë të parlamentit për shkak të porosive të Edi Ramës, vijnë të rëndojnë masat ndaj meje. Kjo është dëshmia më flagrante e një shteti monist, ku parlamenti, prokuroria, policia, ushtria, shërbimi informativ, janë në duart e një njeriu, kontrollohen nga një njeri”

Kjo është një pjesë nga fjalimi i Sali Berishës, ditën kur Arben Kraja dhe Enkelejda Millonai u paraqitën në parlament për të mbrojtur kërkesën e tyre për arrestimin dhe izolimin e kreut të opozitës në shtëpi.

Sali Berisha nuk kishte respektuar masën e sigurisë “detyrim paraqitje”, ndaj prokurorët u paraqitën para kuvendit për një masë më të ashpër, siç është ajo “arrest shtëpie”.

Por dalja e dy prokurorëve para Komisionit parlamentar të cilit i kërkuan autorizim për arrestimin e Berisha ka rritur dyshimet për moszhvillimin e një procesi të drejtë, të ekuilibruar dhe të paanshëm.

Ligji shqiptar kërkon që heqja e imunitetit të deputetit të bëhet pasi prokuroria servir prova bindëse për këtë. Por kjo gjë nuk ndodhi në rastin e Sali Berishës.

Arben Kraja dhe Enkeleida Millonai treguan përpara komisionit të imuniteteve arrogancë që fshihte mungesën e profesionalizmit. Ata i përgjigjeshin thatë dhe pa argumenta avokatëve mbrojtës së Berishës (ky i fundit nuk ishte prezent në sallë).

Kur Genc Gjokutaj i pyeti se pse ata kishin paraqitur në kërkesën e tyre si argument të korrupsionit të Berishës, ndryshimin e destinacionit të truallit sportiv në tokë ndërtimi, kur dihej se një gjë të tillë se kishte bërë ish-kryeministri por Rama si kryebashkiak, prokurori u përgjigj: “kjo s’ka lidhje me imunitetin e Berishës për të cilin po diskutojmë sot”.



Me këtë lëvizje tinzare, ai krijoi precedentin e rrezikshëm që deputeti mund të zhvishet nga imuniteti edhe nëse prokurorët nuk sjellin prova.

Në rastin e Saimir Tahirit parlamenti kishte vepruar ndryshe. Me autoritetin që i jep kushtetuta, parlamenti kishte marrë vendimin që të “lejonte” drejtësisë të kufizonte lirinë e lëvizjes së deputetit Samir Tahiri. Kurse në rastin e Berishës deputetët mbajtën qëndrim se kjo është një e drejtë e SPAK dhe nuk i takon atyre të vendosin.

Pra, deri më tani, Prokuroria e Posaçme ka kufizuar lirinë e një deputeti, në këtë rast liderit të opozitës, duke anashkaluar parlamentin dhe e pastaj ka përdorur këtë “risi” si një rast për të kërkuar arrestimin, duke shmangur detyrimin për të paraqitur prova.

Përdorimi i gjykatësve me probleme në veting



Vendimi i mësipërm i SPAK për të kufizuar lëvizjen e Sali Berishës pa marrë më parë një autorizim nga parlamenti, u konfirmua nga gjykatësja Irena Gjoka.

Fillimisht Irena Gjoka la të pandryshuar kërkesën e SPAK, për të kufizuar lirinë e lëvizjes së Sali Berishës dhe dhëndrit të tij, Jamarbër Malltezi. Që prej asaj dite, vendimi i saj për të shmangur një votim parlamentar, ku të diskutohej imuniteti i deputetit Berisha, e ktheu atë në target sulmi. Ish presidenti dhe ish kryeministri e akuzon se ajo duhej të jepte dorëheqjen nga ky proces, pasi kur ka qenë kryetar shteti në 1996, ai e kishte shkarkuar atë nga gjykatëse.

Por pas kësaj, mediat greke (të nxitura nga vendimet që u dhanë për Fredi Belerin) rrëmuan në të kaluarën e drejtueses së Gjykatës Kundër Krimit të Organizuar dhe Korrupsionit dhe gjetën disa pasaktësi në deklarimet e saj në veting.

Në vitin 2019 Irena Maneku duke përdorur mbiemrin e bashkëshortit të saj të dytë, bëri kërkesë me emrin Irena Gjoka, për t’u bërë anëtare e Gjykatës së Posaçme Kundër Krimit të Organizuar dhe Korrupsionit. Për t’u bërë pjesë e kësaj gjykate duhet të plotësohet një formular vetëdeklarimi ku ndër të tjera duhet të rrëfesh nëse ka pasur dëbime, ka pezull ndonjë proces gjyqësor, ka ndalim hyrjeje në një vend të tretë, etj. Në formularin e saj të vetëdeklarimit, gjyqtarja Irena Gjoka e ka mohuar që ndaj saj të kishte pasur ndonjë dëbim.

Dokumentat e arkivave të Greqisë tregonin se gjykatëses i ishte refuzuar hyrja në zonën Shengen për 10 vjet për shkak të falsifikimit, një fakt që ajo e kishte fshehur kur aplikoi për një post në Gjykatën Speciale. Prokuroria e Përgjithshme konfirmoi se ka nisur kërkesën në Greqi nëse Irena Gjoka preket nga ligji i dekriminalizimit, por pavarësisht këtyre zbulimeve ajo refuzoi të tërhiqet nga çështja e Sali Berishës.

Kreu i opozitës, i pandehur para fushatës së zgjedhjeve parlamentare

Nëse kthen kokën pas, për të parë zhvillimet që çuan në izolimin e Sali Berishës, kuptohet se komunikimi i akuzës sot ishte thjesht një formalitet, detaj i një plani të përgatitur shumë kohë më parë. Prokurorëve të SPAK iu duhet të gjenin provat për ta burgosur kreun e opozitës dhe pak muaj para zgjedhjeve dhe ata e kanë përmbushur detyrën që iu është ngarkuar.

“Kam pasur ato akuza që kam pasur, asgjë më shumë se 400 faqe mashtrim. Vazhdon hakmarrja politike” u shpreh Berisha që tashmë ka ndryshuar status, nga i akuzuar është i pandehur në izolim edhe për zgjedhjet e ardhshme parlamentare.

LAPSI

[Albo]

Manipulimet me dosjen ‘Partizani’/ Berisha-ndërkombëtarëve: Mos e mbështesni monstrën që krijuat se s’do tolerojmë më

VIDEO

Kryetari i Partisë Demokratike, Sali Berisha ka sqaruar opinionin se, dosja e hetimit politik të urdhëruar nga Edi Rama, të cilën e tërhoqi sot gjatë thirrjes në SPAK, është një piramidë mashtrimi.

‘Dokumenti që m’u paraqit sot është një piramidë mashtrimi. Rama dhe Sorosi krijuan një drejtësi monstër’, u shpreh Berisha.

Në fjalën e tij në tubimin qytetar, kryedemokrati Sali Berisha zbërtheu një për një të gjitha hapat e nisjes së procesit të privatizimit, ku prokurorët e SPAK manipuluan provat me qëllim që të mos përmendnin qeverisjen socialiste e cila ishte iniciuese.

Lideri i opozitës, ka vijuar me denoncimin e hetimeve të SPAK për dosjen ‘Partizani’, ku sipas dosjes, ndryshimin e destinacionit e ka bërë Edi Rama kur ishte kryebashkiak. ‘Destinacionin e ndryshoi Edi Rama pa asnjë kërkesë nga pronarët, Dumani-Kraja-Millanoi mashtrojnë hapur’, theksoi Berisha.

Kryedemokrati Sali Berisha ka akuzuar prokurorët se janë ndërzyer nga Edi Rama për të hetuar fondacionin e fëmijëve me autizëm të zonjës së tij, Liri Berisha, e cila shërben pa pagesë. ‘Rama ndërsen zagarët të hetojnë fondacionin e fëmijëve me autizëm, në të cilin Liri Berisha shërben pa asnjë qindarkë fitim’, denoncoi Sali Berisha.

Kryetari i Partisë Demokratike, Sali Berisha i ka bërë thirrje komunitetir ndërkombëtar që të mos e mbështesin më monstrën që krijuan në Shqipëri, një drejtësi të varur totalisht nga Edi Rama. ‘Thirrja ime për komunitetin ndërkombëtar, mos e mbështesni monstrën që krijuat se s’do tolerojmë më’, deklaroi gjatë fjalës së tij kreu i PD, Berisha.

FJALA E PLOTE:

Mirëmbrëma dhe përshëndetjet më të përzemërta ju misionare dhe misionarë të një misioni, të një kauze të madhe dhe të drejtë.

Të kauzës së përmbysjes së narkoshtetit, krijimit të qeverisë teknike.

Kauzës së zgjedhjeve të lira dhe fitores së opozitës.

Të dashur miq, sot unë në zyrat e krimit, në zyrat e krimit të narkoshtetit, u deklarova mercenarëve, grupit të strukturuar kriminal Dumani-Damani, njëqind herë më i mirë Nuredini se Altini, Krajës dhe Mellonait, ish-oficerit të Sigurimit të Shtetit dhe ndrikullës së bandave, motrës sibiologjike të Taulantit me shumë mbiemra, se dokumenti juaj është një piramidë mashtrimi.

Të dashur qytetarë dhe qytetare, dokumenti që ata kanë shkruajtur për katër vite tejkalon çdo imagjinatë në poshtërsinë, në mashtrimin, në falsifikimin, në vetëposhtërimin e njeriut.

Ai dokument tregon se Edi Rama dhe ata që ndihmuan, që kryen reformën e Xhorxh Sorosit, iu dhanë shqiptarëve një monstër që nuk e kanë pasur kurrë të tillë nga ditët më të zeza të diktaturës.

Krijuan te shqiptarët një grup të strukturuar kriminal, një organizatë kriminale që nuk njeh asnjë ligj, asnjë moral, asnjë Kushtetutë, asnjë normë njerëzore, por i kapur kokë e këmbë me krimin është i aftë me dorën e zezë të shkruajë çdo gjë, të vjedhë çdo gjë, të mbulojë çdo gjë, të rrëmbejë çdo gjë.

Sot, do t’u lexoj vetëm pak gjëra nga piramida e mashtrimit të tyre.

Ju lutem.

Meqenëse në dhjetëra e dhjetëra dokumente nga viti 1995 gjer në vitin 2009 që ka përfunduar procesi i njohjes, kthimit, parablerjes së objekteve, të tokës së grabitur, konfiskuar nga regjimi komunist 5 familjeve të Tiranës, për koincidencë, jo për ligj, nuk ekziston asnjë firmë e Sali Berishës.

Çfarë kanë bërë këta horra?

Çfarë kanë bërë këta fundërrina njerëzore që marrin 1 milion euro për pyetje që nuk i bëjnë për vrasje Ymer Lalës, që ndërtojnë vila me paratë e krimit, që si hiena kalojnë nga një zyrë në një tjetër duke marrë peng gjykatës, prokurorë, zyrtarë dhe të tjerë, çfarë kanë bërë?

Meqenëse privatizimi nuk është filluar nga Sali Berisha dhe qeveria e tij, jo, privatizimi i klubit Partizani është nisur nga qeveria e Fatos Nanos me firmat e ministrave Angjeli, Klosi dhe të tjerë.

Mirëpo ligji, neni 7 i ligjit të kthimit të pronave, përcaktonte se propozimi i ndryshimit të pronësisë të një prone publike apo shtetërore, se janë të ndryshme këto, detyron që pronën t’ia kthesh automatikisht të shpronësuarit.

Këta zotërinj nisën procesin e privatizimit. Në këtë moment në mënyrë automatike, toka kalonte tek ish-pronarët legjitimë.

Tani, meqenëse aty janë firmat e ministrave socialistë, dëgjoni këta mashtrues ordinerë, këta të pafytyrë që nder nuk kanë, që turpërojnë të gjallë dhe të vdekur me poshtërsitë e tyre, shkruajnë se procesi i privatizimit filloi në vitin 1995, pikërisht filloi nga qeveria socialiste, por këtë nuk e thonë, në mënyrë që të thonë se filloi me Sali Berishën.

Ky është Altin Dumani, ky llum njerëzor, ky kriminel që heq sekuestron mbi pronat e vrasësve, kundrejt milionave që merr.

Që nuk pyet vrasësin e denoncuar për vrasje, Ymer Lalën, vetëm për ta amnistuar për vrasjen e tij.

Ky është Kraja i Sigurimit të Shtetit, ky faqezi fundërrinë.

Kjo është Millonai, kjo ndrikull krimi e bandës së Elbasanit.

Kjo është drejtësia e re e Xhorxh Sorosit, e mafies së tij, që mashtron shqiptarët, që poshtëron shqiptarët.

Por do dëgjoni pak të dytën, se e dyta është turpi më i madh që mund të bëjë njeriu.

Çfarë shkruajnë?

Meqenëse nuk gjejnë dot asnjë firmë, sepse ligji nuk kërkonte firmën e kryeministrit, kanë firmosur me dhjetëra zyrtare, asnjë prej tyre nuk është në ndjekje penale se kanë zbatuar ligjin, sundonte ligji gjatë qeverisë tonë, zbatohej Kushtetuta.

Meqenëse nuk gjejnë, urdhëroni çfarë shkruajnë: zoti Fatmir Bektashi në kontratat me familjet pronare, në vitin 2007-2008, mori përsipër ndryshimin e destinacionit të të gjithë zonës së madhe dhe këtë e realizoi Sali Berisha në vitin 2013 apo gjashtë vjet më vonë.

Të dashur qytetarë e qytetarë, shikoni se çfarë hetuesish janë, çfarë prokurorësh të poshtër, të pafytyrë, se çdo epitet meritojnë, por nuk dua të prish gojën time.

Ua shpjegoj unë të vërtetën, në vitin 2006, Edi Rama, zonën e klubit Partizani, në qershor ia ndryshon destinacionin pa asnjë kërkesë nga pronarët. Ia kishte vënë syrin për ta zhvilluar dhe grabitur vetë. Po, asnjë pronar nuk kishte paraqitur kërkesë për ndryshimin e destinacionit.

Edi Rama e ndryshon, e sjell pas gjashtë muajsh në Këshillin e Rregullimit të Territorit, i cili aktet e Këshillit të Rregullimit të Territorit të qyteteve i firmos i detyruar nga ligji, sepse Kushtetuta thotë në mënyrë laksative se administrimi i territorit është autoritet i qeverive vendore.

Përveç kësaj, atë vit që Edi Rama po ndërtonte bërdungullën e Zogut të Zi, që kërcënonte jetë të tëra në trafik, qeveria bëri një akt normativ. Ky akt normativ skadoi brenda 4 muajsh dhe qeveria nuk kishte asnjë tagër që të kthente apo të përmbyste vendimet e bashkive.

Kjo është aq e vërtetë saqë pikërisht për Zogun e Zi, Gjykata Kushtetuese vendosi që vetëm gjykatat mund t’u diktojnë qeverive vendore ndryshimet.

Kjo është për vitin 2006. Çfarë ndodhi?

Pjesa dërrmuese ishte pjesa tjetër. Edi Rama me një studio zvicerane, e quajtur UrboPlan, bëri planin e asaj zone, përsëri pa i pyetur pronarët, i shndërroi të gjitha fushat në zonë urbane dhe pallatesh.

I miratoi në këshillin teknik, në këshillin bashkiak në vitin 2008 dhe filloi të japë lejet e ndërtimit.

Pasi humbi pushtetin Edi Rama në vitin 2011, pasardhësi i tij vendosi të bëjë planin e përgjithshëm rregullator të Tiranës, të cilin Edi Rama nuk e kishte bërë kurrë se e ndante me llokma.

Pra, pronarët tani e kishin shesh ndërtimi. Edi Rama kishte dhënë leje ndërtimi.

Plani i përgjithshëm i rregullimit të territorit vjen në Këshillin Kombëtar të Rregullimit në vitin 2013. Ai nuk kishte të bënte me asnjë zonë të veçante, ai kishte të bënte me të gjitha zonat e Tiranës në tërësi. Si qytet. Dhe miratohet. Ai përsëri nuk mund të pësonte asnjë modifikim sepse ai nuk ishte miratuar vetëm në këshillin urbanistik, por në këshillin bashkiak të Tiranës, në parlamentin e Tiranës.

Nuredin Dumani, që është 10 herë më burrë i mirë se Altini, ish-sigurimsi Kraja, simotra

biologjike Millonai, shkruajnë se Fatmir Bektashi, që mori përsipër kontratat me familjet pronare në vitin 2007-2008, ia plotësoi dëshirën Sali Berisha, në një kohë kur ato i kishte bërë të gjitha Edi Rama dhe firma e Sali Berishës ishte detyrim kushtetues.

Miqtë e mi, unë paraqita këto para jush për të kuptuar se çfarë kriminelësh të shpifur, çfarë horrash pa nder, pa dinjitet.

Se njeri që i thotë vetes njeri, që ka familje, ka miq, ka shokë, do të kishte turp nga vetja. Do të pështynte mbi veten e tij para se të vepronte në këtë mënyrë.

Kjo është drejtësia e re.

Kjo është drejtësia e Edi Ramës.

Pse i bëjnë këto veprime?

I bëjnë këto veprime se Sali Berisha çdo ditë, çdo natë ka denoncuar vjedhjet e Edi Ramës.

Ka denoncuar vjedhjet e Olsi Ramës.

Ka denoncuar Linda Ramën.

Dhe çfarë bën Edi Rama? Ndërsen këta zagarë të hetojnë fondacionin e fëmijëve me autizëm, në të cilin Liri Berisha shërben pa asnjë qindarkë fitim.

A mund të imagjinoni një gjë të tillë? Se u thotë Linda, meqenëse Berisha po më denoncon, shkoni njëherë dhe gjeni diçka aty.

O turpe dheu, o hajdutë, o racë hajdutësh.

Bashkë me Dumanët, Krajët dhe fundërrinat do merrni atë që meritoni.

Sot ne ndjehemi më të fortë se kurrë.

Sot ndjehemi më të motivuar se kurrë.

Sot ne dalim ballë për ballë me kriminelë që zënë prita në zyrat e shtetit.

Thirrja ime për komunitetin ndërkombëtar, mos mbështesni monstra se nuk do të tolerojmë.

Jo dhe jo.

Krijuat monstrën në Shqipëri, nuk e pranoni dot se nuk ju lejon korrupsioni të pranoni krimin e shëmtuar që bëtë ndaj shqiptarëve.

Qytetarë e qytetare, fati në duart tona, betejë pa kthim.

Qytetarë e qytetare, kjo është vepër kriminale e Edi Ramës, trafikantëve të drogës, vepër kriminalë e korruptorëve ndërkombëtarë.

A ju kujtohet ju Vllahica, që vodhi komisionin dhe u shkarkua shefi i OLAF-it?

Çfarë ishte ajo? Ajo ishte një Mellonai, ajo ishte një Duman me pantallona.

Ajo nuk ishte vetëm por kishte vëllezër dhe motra të tjerë.

Shikoni pra se çfarë i krijuan Shqipërisë?

Asnjë hetues i Enver Hoxhës nuk e bënte dot këtë.

Ai vendoste në mënyrë absurde, ai thyente kocka, por nuk mund të thonin kurrë se mori përsipër në vitin 2007 dhe ua miratoi në vitin 2013?

A ka përqeshje më të madhe se kjo?

McGonigal nuk ishte vetëm. Kishte të tjerë me fustanë, kishte të tjerë me pantallona.

Shqiptarë dhe shqiptare, ata që shkatërruan drejtësinë, ata u morën lirinë me Edi Ramën.

Ata u morën dinjitetin me Edi Ramën,

Ata që u tregojnë pollet, mbështesin diktaturën.

Në çdo diktaturë, pollet janë në qiell për diktatorin.

Në çdo diktaturë, një krye të polleve del diktatori.

Ndaj ju ftojmë ta vazhdojmë këtë betejë pa komplekse.

Ta vazhdojmë këtë betejë pa komplekse.

Ta vazhdojmë këtë betejë me guxim.

Të ngrihemi dhëmb për dhëmb kundër këtij pushtimi dhe t’i japim Edi Ramës, organizatave të tij kriminale në SKAP, në qeveri, në polici dhe kudo që janë, vendin që meritojnë.

Rrofshi ju, rroftë Shqipëria.

Fitore, fitore, fitore!


Syri