5D Konstruksion: Arrestohen dy drejtorë të Bashkisë Tiranë për vjedhje me tendera e biznes ndërtimi

[Albo]

Rama reagon për arrestimet e ish-drejtorëve të bashkisë: Bashkohem fjalë e presje me deklaratën e Veliajt



Kryeministri Edi Rama ka mbështetur reagimin e kryebashkiakut Erion Veliaj në lidhje me arrestimet e disa ish-zyrtarëve dhe zyrtarëve të bashkisë Tiranë.

Reagimi i plotë:

S’mund të jem më shumë dakord me sa u tha sot kryebashkiaku Erion Veliaj qytetarëve të Tiranës, në mesazhin e drejtëpërdrejtë lidhur me ndalimin nga SPAK-u të disa ish-drejtorëve e drejtorëve të bashkisë!

Mendësia e vjetër komuniste, fatkeqësisht ende shumë e pranishme në mënyrën e të parit të tjetrit si armiku që duhet shkatërruar (falë trashëgimisë së hidhur në një segment të tërë të politikës e të medias shqiptare të një komunisti fanatik, të konvertuar në liderin trushpëlarës të krejt atij segmenti që nga dita e parë e pluralizmit deri sot) nakatosur me thashetheme kafenesh, mllefe interesaxhinjsh dhe interesa gjobaxhinjsh, nëpër ekrane e portale që u ngjajnë tabelave të fletë-rrufeve të komunizmit, prodhon përditë baltë e helm me çështjet e drejtësisë! Po kësaj s’kemi ç’i bëjmë për sa kohë shpifjet e politikanëve dhe denigrimet e killerave mediatikë, janë bërë pjesë e jetës sonë publike të kthyer në një xhungël ku s’e merr vesh i pari të dytin, ku nuk debatohet me argumenta po vetëm propagandohet me akuza e bërtitet për të mos lënë tjetrin të flasë, ku liria e shprehjes është bërë liri e shpifjes, ku shpifësit përveçse me votë nuk ndëshkohen as me ligj e as me zakon, po vetëm zaptojnë me pafytyrësi që edhe në Kanunin e vjetër të shqiptarëve, edhe në çdo libër edukate të qytetërimit demokratik, konsiderohet shkelje e pafalshme.

Por ky i sotmi është përsëri rasti për të thënë me zë të lartë, se mbështetja jonë për SPAK-un nuk është propagandë, po vullnet i hekurt politik; qëndrimi ynë pa koment, sa herë SPAK-u godet brenda strukturave të ekzekutivit në çdo nivel, nuk është strukje, as frikë, po shprehje shembullore e vijës së kuqe mes nesh, partisë që qeveris e udhëheq Reformën në Drejtësi dhe Drejtësisë së Re që ka të gjithë mbështetjen tonë; goditjet e SPAK-ut ndaj kujtdqoftë në radhët e ekzekutivit, në çdo nivel të qeverisjes, që ka shkelur ligjin dhe ka tradhëtuar misionin tonë në shërbim të këtij vendi e të këtij populli, ne nuk i përjetojmë si gjëma, as si fajësi kolektive, po si një ndihmë të paçmuar në një luftë kundër korrupsionit, të cilën deri dje nuk e bënim dot sa e si duhej, pikërisht sepse mungonte krahu i drejtësisë së pavarur!

Kështu që edhe kjo çështja më e fundit e disa ish-zyrtarëve e zyrtarëve të bashkisë Tiranë, edhe qëndrimi i drejtë i Erionit sot, me të cilin bashkohem fjalë e presje, dëshmojnë edhe njëherë se ne as nuk e kontrollojmë SPAK-un, as nuk kemi ndërmend të ndryshojmë qasjen fuqimisht mbështetëse për SPAK-un, as nuk komentojmë çfarëdoqoftë lidhur me vërtetësinë e akuzave të SPAK-ut, për këdoqoftë që SPAK-u merr të pandehur dhe as nuk kemi asnjë lidhje me dokrrat e segmentit politik e mediatik, që prodhon përditë baltë e helm në seanca parlamentare, shfaqje televizive e kanale digjitale, ku lloj-lloj pjellash të mendësisë së errët inkuizicionale, na bëjnë gjyqe si ato të komunizmit, duke u përpjekur të na fusin të tërëve në çdo trastë e thes korrupsioni që hapet nga SPAK-u!
Ne jemi në këtë detyrë për të bërë Shqipërinë Europiane 2030 me reforma të vërteta, përpjekje të mëdha, vendosmëri absolute dhe me të gjitha forcat e ekzekutivit, gjyqësorit dhe legjislativit, ku punët janë të ndara e ku lavdi Zotit, popullit që e mbështeti fuqimisht hapjen e rrugës së Reformës në Drejtësi dhe Partisë Socialiste, e cila i hyri detit në këmbë për ta hapur këtë rrugë, tanimë s’jemi më vendi ku për 100 e kusur vite nuk u hetua e gjykua kurrë nga një drejtësi e pavarur, as edhe një person me pushtet politik a lidhje me të!

Prandaj qentë le të lehin, Shqipëria do të shkojë përpara, me qeverinë e Partisë Socialiste që do të ecë vetëm përpara, me Drejtësinë e Re që duhet të vazhdojë vetëm përpara, pa i lënë kusur askujt që përdor flamujt e partive, majtas e djathtas, lart apo poshtë, për të nxjerrë përfitime të paligjshme për veten a të afërmit e vet, duke punuar për shtetin me një xhep të dukshëm për të ardhurat nga puna dhe me një xhep të fshehtë për paratë e marra me korrupsion


Koha Jone

[Albo]

Berisha: Ato që di Veliaj e bëjnë Ramën të paloset brenda gjysmë ore



Ish-kryeministri Sali Berisha, në daljen e tij të përnatshme nga ballkoni i banesës, ku ndodhet në arrest shtëpie bëri akuza të shumta në adrisë të kryeministrit edi Rama.

“Lidhjet e krimit janë lidhjet më të tmerrshme të njeriut dhe ju e patë dje se si brenda gjysëm ore, njeriu që u kap në flagrancë me modelin e vjedhjeve 100% të parave publike, e palosi, e shakulloi, atë që quhet kryetar i organizatës kriminale të qeverisë shqiptare, Edi Ramën.

Edi Rama reagoi dhe ju përgjigj kërcënimeve të njeriut përgjegjës për zhdukjen e 100% të fondeve të inceneratorit të Tiranës. 130 milionë euro dhe që nuk ka as nam as nishan të atij inceneratori, u detyrua të përulet, vetëposhtërohet, të ngrejë çarçafin e bardhë, të kapitullojë dhe ti thotë se unë aprovoj çdo fjalë dhe presje të asaj që the” – tha Berisha.

“Ajo që Erion Veliaj i tha në mënyrë ultimative, ti je kryeministri që ke patur bashkëpunëtor Arben Ahmetajn, i cili u tha shqiptarëve se tek inceneratori i Tiranës kanë ndodhur llaftarira, gjëra të llahtarshme.

Ishte pikërisht ky kod, kodi i llahtarisesh që bëri që të kapërdijë çdo fjalë, të lëpijë çdo presje të Erion Veliajt. Sepse miqtë e mi, 130 mln euro të zhdukura janë euro të dorëzuara nga Rama te Veliaj dhe Erioni e di se në cilën bankë kanë përfunduar, Erioni e di se në cilat llogari janë vendosur.

E vërteta është se po të flasim për llaftarira të Edi Ramës, Erioni di dy herë më shumë se Arben Ahmetaj. Erioni e di se këto kulla që shifni në Tiranë, monumente të korrupsionit dhe drogës, në secilën prej tyre Edi Rama ka më së paku 30%.

Erioni e di se njeriu që jep leje dhe firmos si për ndërtesën 2 katëshe edhe atë 65 katëshe, kudo ka 30 përqindëshin e tij të cilat marrë së bashku janë shumëfishi i djegësit të Tiranës.

Erioni e di se si Edi Rama ka ndërtuar kullën tek stadiumi kullën Kristaq Rama, hotelin. E din se në territorin e bashkisë, Edi Rama ka përvetësuar për vëllanë e tij 37 mijë metër katrorë tokë, publike dhe të pronarëve.

Din pra ato që din Erioni e bën Edvinin të paloset brenda gjysëm ore, të kapërdijë çdo fjalë të Erionit, të lëpijë çdo presje të tij. Çfarë presim më miqtë e mi? Zemërim, zemërim, zemërim. Revoltë, revoltë, dhe vetëm revoltë” – tha Berisha.

©LAPSI.al

[Albo]

VIDEO/ Skema ‘5D’, nuk kemi parë gjë akoma nga Bashkia e Tiranës



Nga Julian Hoxhaj

Afera 5D tronditi opinionin publik, se qe një forme unike korrupsioni qe për here te pare zhduku dhe te famshin 20 përqindësh: ata i morën te gjitha për vete, nuk lanë asnjë qindarke rrugës. Po këtë intership korrupsioni ne bashkine e Tiranes duket se e kane bere te gjithë nga drejtorët e deri te specialistet e thjeshte.

Teksa ka mbrojtur drejtorët e tij të arrestuar tashmë për aferën ‘5D’, Erion Veliaj ka tentuar të relativizojë aferën, duke u shprehur se janë vetëm dy tre persona, nga mbi 11 mijë punonjës të bashkisë së Tiranës dhe mbi 1 mijë tendera në vit që kryen ky institucion.

Por plug, ka hulumtuar duke zbuluar se korrupsioni është kapilar në bashki, pasi skema të ngjashme si drejtorët e ‘5D’, kanë krijuar edhe drejtues të tjerë të këtij institucioni drejtuar nga Erion Veliaj.

Këshilltarët e opozitës në këshillin bashkiak kanë bërë kërkesë për mbledhje urgjentë të Këshillit Bashkiak dhe kërkesë për auditim financiar në lidhje me përdorimin e buxhetit nga Erion Veliaj.

Veliaj ka tentuar të largojë edhe përgjegjësitë nga vetja për këtë aferë. Por emisioni ‘Plug’, edhe këtë të mërkurë, do të risjellë fakte të reja, se Redi Molla, Mariglen Qato, Taulant Tusha, Eglantina Zere, nuk janë vetëm…

Faktet që do ju prezantojmë në këtë emision, tregojnë se në bashkinë e drejtuar nga Erion Veliaj dhe institucionet në vartësi, kultura e korrupsionit është përhapur në mënyrë kapilare në bashkinë më të madhe të vendit.

Kompani të familjarëve apo personave të lidhur me disa drejtorë të tjerë të bashkisë së Tiranës, rezultojnë gjithashtu se kanë përfituar miliona euro tendera nga institucioni që sot drejtohet nga Erion Veliaj.

Për para se t`ju prezantojmë faktet e reja, po risjellim shkurtimisht faktet e publikuara në emisionin e datës 3 prill. Plug’ tregoi se si jo vetëm Redi Molla dhe Mariglen Qato, por zbardhi fijet e aferës që të çojnë te Elvin Tivari dhe Durim Mustafa, dy ish-vartës të Redi Mollës në ujësjellësin e Tiranës.

Plug tregoi se si Durim Mustafa, pasi i shërbeu REdi Mollës dhe Mariglen Qatos si anëtar i komisionit të ofertave në bashkinë e Tiranës, në vitin 2021, bleu një kompani, e cila nisi të bënte biznes me hotel La Brisa në bashkëpronësi të Elvin Tivarit dhe Fatos Malajt, vëllait të kryebashkiakut të Matit, Agron Malaj.

Kompania ABG Ndërtim e Durim Mustafës, mori dhe dy tendera të majm nga ujësjellësi i Dibrës pikërisht për bashkinë e Matit dhe nga OST e Burrelit, vlera e të cilëve shkon në mbi 5 milionë euro…

Në programin e datës 3 prill, zbuluam gjithashtu se fijet e aferës të çonin deri në kabinetin qeveritar, ku Ministrja e Turizmit Mirela Kumbaro, i dha statusin special hotelit të REdi Mollës dhe Elvin Tivarit në Durrës, ku aksioner është dhe Gazmend Haxhia. Ky i fundit dyshohet se është një biznesmen i afërt me Mirela Kumbaron, pasi ajo në vitin 2022 e ka emëruar si pjesë të një bordi këshillimor për turizmin.

Gazmend Haxhia rezulton gjithashtu i përfshirë edhe në aferën e ish-ministrit të shëndetësisë Ilir Beqaj, ku 149 mijë euro për programin EUSAIR që drejtohej nga Ilir Beqaj, ndërsa më pas pagoi 44 mijë euro restorantin Gzona, në pronësi të bashkëshortes së Ilir Beqajt.

Nga investigimi i ‘Plug’, rezulton se disa kompani të tjera, kanë përfituar miliona euro tendera nga bashkia e Tiranës drejtuar nga Erion Veliaj. Skema edhe në këtë rast është e njëjtë si në rastin e ‘5D’, ku vëllai, motra, apo kushëriri janë drejtorë në bashki, ndërsa familjarët e tyre krijojnë kompani e marrin tendera nga Erion Veliaj.

Syri

[Albo]

“Dosja 5D”/ Alimehmeti: Kërkuam mbledhje urgjente dhe audit të jashtëm, por…



Është rrëzuar kërkesat e opozitës për mbledhje urgjente të Këshillit Bashkiak të Tiranës, pas akuzave ndaj disa ish-drejtorëve për dosjen “5D”.

Ilir Alimehmeti, kreu i grupit të këshilltarëve të opozitës, tha se kjo është fshehje pas gishtit, ndërkohë që kemi drejtorë të arrestuar për grabitjen e fondeve publike

Alimehmeti tha se 21 anëtarë të opozitës kanë dorëzuar që në mëngjes kërkesën për një mbledhje urgjente në lidhje me kryebashkiakun për të diskutuar në lidhje me ngjarjet e fundit.

Por edhe kjo kërkesë nuk është pranuar ditën e sotme, vendim ky që sipas Alimehmetit tregon frikë që kanë në bashki për transparencë.

VIDEO

Alimehmeti: Këshilli Bashkiak i Tiranës, vazhdon të mbajë me veprime ose jo një pozicion të paqartë përballë këtyre që po ndodhin.

Të vetmit ata që nuk duan të merren me këtë punë janë anëtarët e këshillit bashkiak të Tiranës.

I bëmë ftesë dhe me shkresë me dt.5 prill, për t’u bashkuar dhe për të kërkuar një mbledhje urgjente.

Jo vetëm që nuk iu bashkuan mendimin, por gjejnë dhe situata që ju nuk kishit firma mjaftueshëm,.

Ne sot paraqitëm një kërkesë me 21 firma, të gjithë të opozitës dhe menjëherë nisën artificat, jo kjo do të diskutohet në një mbledhje tjetër.

Nëse ata duan t’i lajnë duart dhe të fshihen pas gishtit për të mos bërë detyrën e tyre janë fajtorë më veprim ose mos veprim, në këtë rast janë fajtorë me mos veprim.

Është kërkuar ditën e sotme që në mëngjes për mbledhje urgjente dhe audit i jashtëm për financat, të gjejnë ata nëse ka vjedhje kjo bashki, e nëse nuk ka do të jemi të gjithë të lumtur.

Fakti që ata gjejnë artifica, tregojnë se ata kanë frikë.

Balkanweb

[Albo]

SPAK u komunikon akuzat drejtorëve të 5D, amniston kryebashkiakun Veliaj



Prokuroria e Posaçme iu ka komunikuar akuzat disa prej ish-zyrtarëve të arrestuar në kuadër të dosjes “5D”. Burime të besueshme konfirmojnë se Mariglen Qatos, Redi Mollës dhe Taulant Tushës iu është komunikuar akuza për veprat penale korrupsion pasiv dhe mosdeklarim pasurie.

Kjo për shkak të respektimit të afateve për mos parashkrimin veprës penale të mosdeklarimit të pasurisë për shkak të afateve kohore kur dyshohet të jetë kryer.

Ndërkohë, SYRI TV mëson se vijojnë hetimet intensive në disa drejtime, pasi me komunikimin e akuzave për të paktëm 3 ish zyrtar, nuk ka përfunduar ende faza hetimore për mbledhjen e fakteve dhe provave nga SPAK.

Kjo e fundit firmosi disa javë më parë 3 masa sigurie arresti në burg për, Redi Mollën, ish-Drejtor i Ujësjellës Kanalizime në Bashkinë Tiranë, Taulant Tushën, ish- Drejtor i Punëve Publike në Bashkinë e Tiranës, Mariglen Qaton, ish-Drejtor Inspektoriatit së Mbrojtjes së Territorit, në Bashkinë Tiranë.

6 masa të tjera sigurie që u miratuan gjithashtu nga gjykata ishin detyrim parqitje, ku bëjnë pjesë ish-anëtarë komisioni të vlerësimit të ofertave, drejtues sektorësh e drejtorish në Bashkinë e Tiranës apo përfaqësues të kompanisë “5D konstruksion”.

Përmes kësaj kompanie që u provua nga SPAK se de fakto është në posedim të Redi Mollës e Mariglen Qatos, u fituan dhjetra prokurime publike.

Ndaj zyrtarëve vendor, janë duke u kryer edhe veprime hetimore që kanë të bëjnë me pasuritë e tyre dhe burimin e krijimit nëse është i ligjshëm ose jo.

Nga dosja “5D”, u amnistua kryebashkiaku i Tirans Erion Veliaj, përtej akuzave dhe pretendimeve nga aktorë të ndryshëm përfshirë edhe në kallëzimin e bërë nga Belind Këlliçi, mbi bazën e të cilit nisi hetimi. Ndërsa në arsyetimin e gjykatës pa iu përmendur emri, evidentohet roli i tij si titullar i autoritetit kontraktor Bashkia Tiranë në të paktën 3 procedura prokurimi.

Syri

[Albo]

Dosja 5D/ Berisha: Pavarësisht vjedhjeve, nuk konfiskohet asnjë qindarkë dhe asnjë kontratë nuk shpallet e pavlefshme

“Pavarësisht vjedhjeve, nuk konfiskohet asnjë qindarkë dhe asnjë kontratë nuk shpallet e pavlefshme”, tha lideri i opozitës, Sali Berisha, gjatë fjalës së mbajtur në tubimin qytetar.

Ai u shpreh se , nuk kërkohet që të kthehet e gjithë shuma e vjedhur qytetarëve, sepse atë e ndajnë me Dumanë, me Zamanë dhe Erion Veliajn.

“Ky është krim i shëmtuar”, tha Berisha.

Pjesë nga fjala e liderit të opozitës

Shkojmë pak më përtej miqtë e mi.

Konstatohet se dhjetëra kontrata ishin fiktive.

Konstatohet se me këto dhjetëra kontrata, Erion Veliaj, Redi Molla, Tivari e me radhë, vodhën 38 milionë euro.

Por a e dini ju o miq se nuk konfiskohet asnjë qindarkë, asnjë kontratë nuk shpallet e pavlefshme, nuk kërkohet që të kthehet e gjithë shuma e vjedhur qytetarëve.

Sepse atë e ndajnë me Dumanë, me Zamanë dhe Erion Veliajn.

Ky është krim i shëmtuar.

Vetëm ju jeni shpresa e fundit e këtij vendi.

O sot o kurrë, t’u tregojmë vendin.

Miqtë e mi, ka një kod, ka një pasuord, ka një username. Të gjitha këto u vodhën nga hajdutët, u grabitën, u plaçkitën nga hajdutët e 5D, për të vjedhur siç donin paratë publike.

Këta meritojnë dënimet më të rënda.

Asnjë akuzë e përfillshme për ta nuk ekziston.

Sepse Erion Veliaj ka vjedhur kompjuterin e MJAFT-it kur vodhi financat e tij, është ai autori që i nxiti të vjedhin pasuordin dhe username-n.

Vetëm zemërimi juaj është zgjidhja, është verdikti, është fitorja.

VIDEO

Syri

[Albo]

Brenda aferës së inceneratorit të Tiranës/ Këlliçi: Banda e 5 drejtorëve, edhe te 60 mln eurot e dherave!

Nga Belind Këlliçi.

Siç u kemi shpjeguar me fakte të bëra publike prej kohësh tashmë, brenda mega aferës korruptive të inceneratorit të Tiranës, ka një tjetër aferë sa korruptive, po aq dhe kriminale. Bëhet fjalë për aferën e dherave.


Një faturë e cila deri më sot kalon shifrën e 60 milionë eurove. Para të cilat kanë dalë nga xhepat e shqiptarëve.

Besoj e mbani mend marrëveshjen e firmosur më datë 15 tetor 2018, midis Taulant Tushës, Ermal Kapllanajt, Evisjon Salkut dhe inceneratorit të Tiranës.

Nëpërmjet kësaj marrëveshje, pronari faktik i inceneratorit Tiranë Erion Veliaj, përmes drejtorëve të bandës kriminale 5D, vuri në shërbim të biznesit të tij, të gjithë strukturën shtetërore.

Kjo datë shënon dhe pikënisjen e kësaj afere.

Sot po bëjmë publik një e-mail të punonjëses Julia Muça, financiere e inceneratorëve. Ky e-mail i dërgohet Klodian Zotos dhe Stela Gugalles. E-maili mban datën 6 qershor, 2020.

Ky e-mail flet për marrëdhëniet financiare me kompaninë Alesio sh.p.k., që siç dihet nga të gjithë, kjo kompani tashmë është e sekuestruar nga shteti me vendim të formës së prerë, për pastrim parash.

Pra pasi u firmos marrëveshja mes inceneratorit të Tiranës dhe drejtorëve të bandës 5D, vetëm 4 ditë më pas Alesio sh.p.k., firmos marrëveshjen me inceneratorin e Tiranës për depozitimin e dherave dhe inerteve, për gropat e kullave më të rëndësishme të Tiranës.

Sipas këtij e-maili, kjo shoqëri kishte 2 milionë euro detyrime për të paguar nga të cilat, pas komunikimeve verbale, i zbriten 400 mijë euro detyrime për ETC-në, i zbriten 58 mijë euro për një apartament, të cilin SPAK as nuk e sheh dhe as merr mundin ta kërkojë (njëlloj si në rastin e 6 apartamenteve me Llanaj sh.p.k.), i zbriten 32 mijë euro për një eskavator të cilin le ta gjejë SPAK se kujt i përket, e në fund kompanisë i mbeten dhe 370 mijë euro për të paguar, të cilat sipas e-mailit, 145 mijë euro janë marrëdhënie kleringu me palë të tjera (pra ndonjë apartament tjetër në ndonjë kullë të Tiranës) dhe klering 190 mijë euro më një kompani shumë të preferuar nga Alesio sh.p.k., kompaninë Fortis sh.p.k.



Vetëm një kompani ka paguar për 1 vit e gjysëm shifrën e 2 milionë eurove për depozitimin e dherave, e gjitha kjo pas presionit kriminal që pronari faktik i inceneratorit të Tiranës ushtroi mbi biznesin e ndërtimit. Dhe sigurisht kur i përzgjedh shokët, i përzgjedh njëlloj si veten.

I bëj thirrje SPAK, se Shqipëria nuk ka nevojë për drejtësi me regji. Shqipëria ka nevojë që ju të ngriheni në lartësinë e detyrës tuaj, të shkëputeni një herë e mirë nga ky grup i strukturuar kriminal dhe të sekuestroni paratë e vjedhura nga kreu i bandës 5D dhe pronari faktik i inceneratorit të Tiranës, Erion Veliaj.

Vetëm në 2 komunikime të miat, ju kam zbuluar mbi 2 milionë euro asete, për të cilat SPAK refuzon të veprojë. Në kallëzimin tim të dosjes 5D, ju kam treguar asetet e kësaj bande, e ju sërish refuzoni të veproni.

Për të gjitha këto arsye, e për të mos harruar kurrë as vdekjen e Ardit Gjoklajt dhe as shembjen brutale të Teatrit Kombëtar, ftoj qytetarët e Tiranës, të mblidhemi në protestën e rradhës, përpara bashkisë më të korruptuar në Europë, ditën e premte, datë 26 prill, ora 11:00, për ta çliruar Tiranën nga një bandit si Erion Veliaj.

O sot, o kurrë!








Syri

[Albo]

Skemat/ Si vidhnin drejtorët hajdutë të organizatës së Erion Veliajt



Nga CNA.al

Dosja famoze ‘5D’ ishte një nga skemat që tashmë e ka hetuar SPAK-u dhe ka arrestuar disa nga drejtorët kryesorë të Erion Veliajt. Nëntë prej tyre janë nën akuzë, në hetim.

Mariglen Qato dhe Redi Molla u arrestuan, ndërkohë më parë ishte arrestuar edhe Taulant Tusha, në lidhje me një kompani të vendosur në emrin e vjehrrit të vëllait të njërit prej drejtorëve të Erion Veliajt, dhe u verifikua nga SPAK-u, dhe u gjet skema se si kjo kompani fitonte tenderë, dhe në krye të saj në fakt ishin drejtorët e Erion Veliajt.

Ekspertët e opozitës, sipas burimeve zyrtare që ka siguruar CNA, kanë verifikuar dhe kanë gjetur materiale dhe dokumente, dhe po investigojnë të dhëna mbi disa skema të tjera të përdorura përtej dosjes ‘5D’.

Pra, përtej faktit se, drejtorët bënin kompani fiktive, fitojnë tenderë dhe bëjnë disa punime. Skema është më e gjerë, ka kompani të tjera të përfshira, dhe vjedhja nuk është vetëm me faktin që kompania ‘5D’ fiton një tender, kryen punimet, dhe paratë i fitojnë drejtorët. Jo, është më e gjerë sesa kaq.



Skemat

Një nga skemat është fakti që disa kompani private, ndërtues kryesisht, thirreshin më përpara nga drejtorët e Veliajt, për të përfituar një tender. Dhe i thuhej se ai do të ishte përfituesi i atij tenderi, por punimet nuk do t’i bënte ai, por do të merrte vetëm lekët që të paguante taksat, dhe shumën tjetër, 80% të lekëve, do t’ua jepte drejtorëve, të cilët do të kryenin këto punime.

Dikush pyet pse duhej ta bënin këtë disa ndërtues? Shumë prej tyre e kanë bërë për të marrë një punë tjetër në bashki. Pra, një ndërtues që merrte dy apo tri punë, një e merrte për llogari të drejtorëve të bashkisë, duke marrë vetëm paratë për të paguar taksat.

Në këtë rast janë kryer disa verifikime, dhe ka disa dëshmitarë, dhe disa biznesmenë, të cilët e pranojnë se ka funksionuar kjo. Dhe gjithashtu pretendohet se punimet, kryheshin nga punonjësit e bashkisë.

Bashkia bënte tenderin, tenderin e fitonte një kompani e paracaktuar, e cila në fakt nuk bënte asnjë punim, por shkonin mjetet, infrastruktura, punonjësit që ka Bashkia e Tiranës, kryenin punimet, kryenin gërmimet dhe deri tek asfaltimet dhe vijëzimet, dhe më pas rruga dorëzohej.

Por në fakt nuk ndërtohej nga firma fituese. Por rruga ndërtohej nga punonjësit e Bashkisë Tiranë, dhe në aferën që po hetohet nga ekspertët e opozitës, që dyshohet se është më e gjerë sesa dosja ‘5D’, ka disa të dhëna se edhe vetë kompania ‘5D’ e drejtorëve të bashkisë nuk kryente punime në disa prej investimeve, por ato punime janë kryer nga punonjësit e Bashkisë së Tiranës.



Ndaj dhe në disa raste, një nga personat e akuzuar si bashkëpunëtor në këtë skemë është Herion Rrapaj, drejtori i Drejtorisë së Ndriçimit dhe Rrugëve në Bashkinë e Tiranës.Rasti flagrant është ai i vitit të kaluar, kur në rrugën ‘Xhon Belushi’, u kapën punonjësit e bashkisë duke asfaltuar një rrugë, ndërkohë që tenderi zhvillohej disa javë më pas.

Të tilla raste ka me dhjetëra që kanë ndodhur në Tiranë. Pra skema nuk është thjesht dhe vetëm një kompani si ‘5D’ e vendosur në emër të familjarëve për të fituar disa tenderë drejtorët. Ka edhe skema të tjera. Fiton ‘5D’, por punimet i bën bashkia dhe fitimi është kolosal. Fiton një kompani tjetër, dhe i merr punimet ‘5D’-ja, gjoja sikur do t’i kryejë ajo, por në fakt i kryejnë punonjësit e bashkisë, dhe ndërmarrjet brenda saj.

Më flagrante akoma, e fiton një kompani private, dhe punimet i bëjnë punonjësit e bashkisë. Dhe e katërta, i bëjnë punonjësit e bashkisë punimet në një rrugë për zgjedhje, për fushatë apo për interesa të caktuara, dhe më pas zhvillohet tenderi, të cilin e fiton një subjekt ‘X’ dhe me fitimin e tenderit, në fakt investimi është kryer më parë, paratë kaloheshin te drejtorët.

Herion Rrapaj është një nga personat kryesorë të dyshuar për përfshirje këtë skemë, me drejtorët e Bashkisë së Tiranës, pra jo vetëm me skemën e ‘5D’-së, pasi ai ka vënë në dispozicion fabrikën e asfaltimit që ndodhet në Krrabë, dhe është në varësi të Drejtorisë së Rrugëve dhe Ndriçimit në Bashkinë e Tiranës.



Pra, skema është më e gjerë, ka subjekte që janë përfshirë, kanë marrë tenderë, por punët i kanë bërë punonjësit e bashkisë, thjesht dhe vetëm kanë paguar taksat. Ka investime të kryera me punonjësit e bashkisë dhe tenderët janë bërë më vonë, ka tenderë të fituar, të nënkontraktuar me detyrim, e kështu me radhë.

Dhe rrjetat e merimangës së tenderëve dhe prokurimeve në Bashkinë e Tiranës, ashtu siç thotë Erion Veliaj, janë me mijëra, dhe janë rreth 1000 procedura, disa dhjetëra apo qindra prej tyre kanë qenë krejtësisht fiktive, pasi punimet janë kryer nga punonjësit.

Këto fakte të denoncuara publikisht, edhe nga opozita, të denoncuara edhe nga CNA, të dala edhe në dosjen hetimore të SPAK-ut, duket se po zgjerojnë hetimin e ‘5D’, e cila nuk është thjesht dhe vetëm një kompani e vendosur në emër të familjarëve për të fituar tenderë, por afera është shumë më e gjerë me një skemë edhe më të madhe ku janë përfshirë drejtorët e Erion Veliajt.

CNA

[Albo]

“Lavatriçja” e drejtorëve të bashkisë Tiranë u përdor nga Ilir Beqaj dhe Mirela Kumbaro



Disa ditë më parë, një gjykatës i Apelit të Gjykatës së Posaçme ka guxuar të bëjë bashkë disa fakte dhe rrethana në dosjen e drejtorëve të arrestuar të bashkisë së Tiranës, Maringlen Qato, Redi Molla dhe Taulant Tusha, duke i këshilluar prokurorit të çështjes të tregohet më i ashpër.

Gjykatësi Florian Kalaja në vendimin e tij (jodetyrues për SPAK) vuri re se drejtorët e Erjon Veliajt me mënyrën se si kishin vjedhur ngjanin me një “grup të strukturuar kriminal”.

Për këtë, gjykatësi i hetimit paraprak e këshillonte prokurorin të ndryshonte akuzën, të thellohej në hetime dhe t’i referohej pikës 4 të nenit 28 të Kodit Penal”. (LINKU ME POSHTE)

Vendimi i Apelit është ndër rastet e rralla kur një gjykatës e klasifikon një rast korrupsioni si grup i strukturuar kriminal. Deri dje, me këtë term janë përballur kriminelë, njerëz të hurit dhe të litarit, vrasës që ishin bërë bashkë në banda kriminale dhe komplotonin për të vrarë njëri-tjetrin.

Drejtorët e Bashkisë dyshohet se i kishin investuar paratë e tyre në një hotel në Durrës.

Investimi në Durrës i drejtorëve të bashkisë



Paratë që kishin fituar me kompaninë “5D”, drejtorët e Veliajt dyshohet se i kishin investuar për ndërtimin e një hoteli me 5 yje në Durrës në favor të kompanisë “Mediterranean Investment Group”.

Investimi kishte një vlerë prej 15 milionë eurosh. Projekti u prezantua nga Ministrja e Kulturës, Mirela Kumbaro si “vazhdim i strategjisë për turizmin i qeverisë shqiptare për të shtuar investitorët e fuqishëm, por edhe brandet më të fuqishme të turizmit botëror”.

Kompania “Mediterranean Investment Group” ishte e lidhur me Redi Mollën – ish drejtori i arrestuar i Ujësjellësit të Tiranës, i cili akuzohet nga SPAK për veprat penale të korrupsionit dhe fshehjes së pasurisë.

“Mediterranean Investment Group” u themelua në shtator të vitit 2020 dhe njëri prej aksionerëve me 24% ishte Selim Molla, babai i ndjerë i Redi Mollës, i cili ia trashëgoi aksionet në birit në shkurt 2024.

27% e kësaj kompanie i përket kompanisë LANDWAYS INTERNATIONAL, që është e Gazmend Haxhiajt. Kompanitë dyshohet se shërbenin si lavatriçe e parave të vjedhura nga taksat.

“Lavatriçja” në shërbim të Ilir Beqajt dhe Mirela Kumbaros



Të enjten, një rast tjetër korrupsioni u ndëshkua nga SPAK.

Ilir Beqaj u arrestua me disa bashkëpuntorë të tij, pasi u përgjua duke vjedhur fondet e Bashkimit Europian në Agjencinë që drejtonte.

Nëpërmjet sekserëve të tij, Beqaj prodhonte fatura fiktive, për shërbime që bënte sikur i kryente në restorantin e tij tek Kalaja e Tiranës, “Gzona”.

Në njoftimin e SPAK përmendet se si për një drekë, për një aktivitet kishte prodhuar fatura edhe agjencia që drejtonte Ilir Beqaj, edhe Ministria e Kulturës që drejtohet nga Mirela Kumbaro.

Bëhet fjalë për Konferencën FESTA (E Ardhmja e Turizmit të Qëndrueshëm Mjedisor në Shqipëri”).

Fatura që kishte printuar Ilir Beqaj ishte 125 mijë euro, kurse ajo e Mirela Kumbaros shkonte diku tek 380 mijë euro, pra thuajse 3 herë më shumë.

Sipas SPAK, në të dyja rastet ishte kontraktuar e njëjta shoqëri tregtare e quajtur “Landways International” sh.p.k me Ortak e Administrator personi nën hetim Gazmend Haxhia.

Vini re, është e njëjta kompani që shfrytëzonin drejtorët e bashkisë së Erjon Veliajt.

është kompania “Landways international” që zotëron 27% të hotelit “Mediterrain Investment Group” në Durrës, i njëjti hotel për të cilin SPAK dyshon se është ndërtuar me paratë e vjedhura nga taksat e Bashkisë së Tiranës.

Me pak fjalë, “lavatriçen” e parave të drejtorëve të Bashkisë së Tiranës e përdori edhe Ilir Beqaj. Ky fakt i bërë publik nga gazetarja Ola Xama gjatë emisionit “Të paekspozuarit” tregon se drejtorët e Veliajt ishin të hapur që “lavatriçen” e tyre të parave ta përdornin edhe miq dhe drejtues të tjerë të shtetit, si në këtë rast Ilir Beqaj.

Por me arsyetimin që ka hartuar gjykatësi Florian Kalaja grupi i strukturuar kriminal i bashkisë tashmë i shtrin tentakulat edhe më tej në qeveri.

Lapsi.al

[Albo]

Berisha: Dumani firmosi 21 arreste për Veliajn e vëllain e tij, por nuk u ekzekutuan, pasi Veliaj kërcënoi me mesazhe Ramën



Kryetari i Partisë Demokratike Sali Berisha, me anë të një deklarate për mediat, ka denoncuar skandalin e tërheqjes së 21 urdhër arresteve të firmosur nga SPAK, por që ngelën të pa ekzekutuar.

Në deklaratën e tij, Berisha thotë se, me 26 qershor ishin firmosur urdhër ndalimet për Erion Veliajn dhe vëllain e tij, si dhe persona të tjerë, por ato u anuluan sepse Veliaj kërcënoi Edi Ramën me mesazhe për kontot e parave të djegësave.

SALI BERISHA: Jam sot këtu për të denoncuar një ngjarje e cila nuk është regjistruar kurrë më parë në historinë e shtetit shqiptar. Me datën 26 qershor, mediat pranë qeverisë, por dhe media të tjera informuan publikun se Skrapi i partisë me Dumanin, kishin firmosur 21 mandate arresti, ndër të cilët Erion Veliaj dhe vëllain e tij. Por gjer sot me datën 8 korrik, nga këto mandate arresti, rezulton se nuk është arrestuar asnjë njeri. Rezulton një skandal të paparë ndonjëherë, që ato u gëlltitën nga ata që i firmosën. Ky akt, i paprecedentë është dëshmi flagrante se, Altin Dumani dhe Skrapi i partisë, nuk janë gjë tjetër veç se vegla të verbëta në duart e Edi Ramës.

Ky akt dëshmon kontrollin e plotë të Edi Ramës mbi Skrapin e partisë. Ky akt fakton se në Skrapin e partisë asgjë nuk mund të lëvizë pa firmën përfundimtare të Edi Ramës. Normale që çdo qytetar shtron pyetjen, si ndodhi një akt i tillë? A lëshoi urdhër arresti, apo kufizim të lëvizjeve për Erion Velian dhe vëllain e tij, Altin Dumani, pa miratimin paraprak të Edi Ramës. Jo, ju garantoj se ai këtë akt e bëri me miratimin e plotë paraprak të Edi Ramës. Por ishte Erion Veliaj me mesazhet drithëruese që i dërgoi, ai që palosi Edi Ramën, duke i rikujtuar të gjithë kontot e fshehta bankare për paratë e djegësit të Tiranës.

Duke i rikujtuar të gjithë gjobat e tmerrshme që ai vendos për çdo kullë dhe ndërtesë, prej 30 për qind. Duke i rikujtuar se për të vjelur këto ryshfete dhe gjoba, ai ka shkelur kushtetutën dhe vendime të Gjykatës Kushtetuese, të cilat kompetencën e lejeve të ndërtimit në territorin e një bashkie ja njohin të drejtë ekskluzive Këshillit të Territorit të asaj bashkie.

Pra, ishte jo mëshira e Edi Ramës, por frika dhe tmerri që kishte nga denoncimet që do të bënte Erion Veliaj, që dinte shumë më tepër se sa Arben Ahmetaj për aferën e djegësit të Tiranës, vjedhjes së shekullit dhe për aferat e tjera për Edi Ramën, që detyroi Zamanin e partisë të gëlltisë 21 mandate, ti shndërrojë ato në kallp mandate. T’u faktojë shqiptarëve se ai nuk është asnjë gjë tjetër veç se një shërbëtor i përulur, i marrë peng për aferat e tij nga Edi Rama dhe klani i tij i qeverisë. Në 11 korrik të gjithë në shesh, pa drejtësi të pavarur nuk ka liri.

ORA NEWS

[Albo]

Dyshime për përfitime me tendera, SPAK sekuestron kompaninë “5D Konstruksion”

Prokuroria e Posaçme kundër Korrupsionit dhe Krimit të Organizuar ka vijuar hetimet paraprake për procedimin penal nr.75, të vitit 2023, që bën fjalë për veprat penale “Refuzimi për deklarimin, mosdeklarimi, fshehja ose deklarimi i rreme i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”, “Shkelja e barazisë së pjesëmarrësve në tendera dhe në ankande publike”, “Korrupsioni aktiv ndaj personave që ushtrojnë funksione publike”, “Korrupsioni pasiv i personave që ushtrojnë funksione publike” dhe “Pastrimi i produkteve të veprës penale ose veprimtarisë kriminale” e kryer në bashkëpunim, të parashikuara nga nenet 257/a/2, 258/2, 244, 259/2 dhe 287/2 të Kodit Penal.

Nga ana e organit procedues janë kryer veprime të mëtejshme hetimore për të përcaktuar shumat monetare që janë përfituar nga shoqëria tregtare “5D Konstruksion” sh.p.k. si rezultat i realizimit të kontratave publike të përfituara në kundërshtim me ligjin dhe me rregullat e prokurimit publik, si dhe si rezultat i veprimeve të kundraligjshme që përbëjnë veprat penale “Shkelja e barazisë së pjesëmarrësve në tendera dhe në ankande publike” dhe “Korrupsioni pasiv i personave që ushtrojnë funksione publike”, të parashikuara nga nenet 258 dhe 259 të Kodit Penal.

Po kështu, janë kryer veprime hetimore për të verifikuar mënyrën e qarkullimit të shumave monetare që përbëjnë “produkt” të veprës penale, duke përfshirë veprimet financiare të kryera nga shoqëria “5D Konstruksion” sh.p.k brenda aktivitetit të saj tregtar, si dhe destinacionin e shumave monetare të transferuara nga shoqëria tregtare në drejtim të subjekteve të tjera tregtare apo në drejtim të personave të tretë.

Nga veprime hetimore të kryera në këtë drejtim janë mbledhur provat e nevojshme nga të cilat krijohen dyshime të arsyeshme se, shumat monetare të përfituara në mënyrë të parregullt nga shoqëria “5D Konstruksion” sh.p.k që përbëjnë “produkt” të veprës penale, pjesërisht janë nxjerrë jashtë sistemit bankar nëpërmjet skemës së pagesave për punime fiktike duke u disponuar në gjendje “cash” nga pronarët e vërtetë të shoqërisë tregtare, si dhe pjesërisht janë ri-investuar në aktivitetin tregtar të shoqërisë tregtare të mësipërme. Janë mbledhur prova të mëtejshme që krijojnë dyshimin e arsyeshëm se shumat monetare të përfituara në gjendje “cash” janë përdorur më pas për të investuar në blerjen e pasurive të paluajtshme.

Pasi janë kryer veprimet hetimore të nevojshme Prokuroria e Posaçme ka paraqitur në datën 24.06.2024, kërkesën për vendosjen e masës së sigurimit pasuror “sekuestro preventive” për disa pasuri që mundet të konfiskohen.

Gjykata e Posaçme e Shkallës së Parë për Korrupsionin dhe Krimin e Organizuar, me vendimin nr.388, datë 05.07.2024, ka vendosur pranimin e kërkesës së Prokurorisë së Posaçme dhe caktimin e masës së sigurimit pasuror “sekuestro preventive” për pasuritë si më poshtë:

Shoqëria tregtare “5D Konstruksion” sh.p.k, së bashku me pasuritë e paluajshme dhe të luajtshme në pronësi të saj, si shoqëri tregtare që është përdorur dhe ka shërbyer si mjet për të realizuar veprat penale, që lejohet të konfiskohet sipas nenit 36/1, shkronja (a) të Kodit Penal.
Pasuria e paluajtshme e llojit truall me sipërfaqe 506.25 m² dhe ndërtesë me sipërfaqe 164 m², ndodhur rrugën “Tefta Tashko”, Tiranë, rregjistruar në emër të shtetasve S.M dhe O.M, si pasuri e përfituar pjesërisht nga burime financimi që rrjedhin nga produkte të veprës penale.
Pasuria e paluajtshme e llojit truall me sipërfaqe 51.3 m², ndodhur rrugën “Tefta Tashko”, Tiranë, rregjistruar në emër të shtetasve S.M dhe O.M, si pasuri e përfituar pjesërisht nga burime financimi që rrjedhin nga produkte të veprës penale.
Shoqëria tregtare “Restur” sh.p.k, së bashku me pasuritë e paluajshme dhe të luajtshme në pronësi të saj, në zotërim të shtetasit R.M, si pasuri vlera e të cilës i korrespondon vlerës së produktit të veprës penale dhe që mund të konfiskohet bazuar në nenin 36/1 shkronja (ç) të Kodit Penal.
Pasuria 24 % e kuotave në shoqërinë tregtare “Mediterranean Investment Group” sh.p.k, me seli në Durrës, rregjistruar në emër të shoqërisë tregtare “Restur” sh.p.k, me ortak dhe administrator R.M, si pasuri vlera e të cilës i korrespondon vlerës së produktit të veprës penale dhe që mund të konfiskohet bazuar në nenin 36/1 shkronja (ç) të Kodit Penal.
Pasuria e paluajtshme e llojit apartament me sipërfaqe të përgjithshme 122.7 m², me emërtimin B_43, si dhe pasuritë parkim Nr.P24 me sipërfaqe të përgjithshme 42 m² dhe parkim nr.P25 me sipërfaqe të përgjithshme 42 m², për të cilat është lidhur kontrata e sipërmarrjes midis shtetases S.Q. dhe shoqërisë “5D Konstruksion” sh.p.k, si pasuri që rrjedh nga produktet e veprës penale dhe për këtë shkak është pasuri që mundet të konfiskohet.
Pasuria e paluajtshme e llojit apartament me sipërfaqe të përgjithshme 86.4 m², me emërtimin A_42, për të cilën është lidhur kontrata e sipërmarrjes datë 29.09.2023 midis shtetases S.Q dhe shoqërisë “5D Konstruksion” sh.p.k, si pasuri që rrjedh nga produktet e veprës penale dhe për këtë shkak është pasuri që mundet të konfiskohet.
Në datën 08.07.2024 policia gjyqësore në Drejtorinë e Policisë së Shtetit dhe Agjencia për Administrimin e Pasurive të Sekuestruara dhe të Konfiskuara kanë nisur veprimet përkatëse procedurale për vënien në ekzekutim të vendimit gjyqësor të mësipërm, me qëllim marrjen në administrim të pasurive të sekuestruara. Veprimet e ekzekutimit të vendimit gjyqësor janë në proces dhe po vijojnë të kryhen edhe në ditën e sotme.

Hetimet paraprake lidhur me këtë procedim penal ende nuk kanë përfunduar, vazhdojnë hetimet për fakte të tjera penale apo për persona të tjerë që mund të përfshihen në objektin e hetimeve të këtij procedimi penal.


Lapsi

[Albo]

Sekuestrohet 5D Konstruksion dhe pasuritë e Redi Mollës

Prokurorët e SPAK vendosën sekuestro preventive të kompanisë që përfitoi miliona euro tenderë me procedura të dyshuara si të manipuluara. Nën sekuestro edhe aksionet e Redi Mollës në hotelin me status qeveritar si investim “special”.

Nga Gjergj Erebara


Kreu i Bashkisë së Tiranës, Erion Veliaj dhe ish-kreu i UKT-së, Redi Molla gjatë një inspektimi në vitin 2017.

Prokurorët e posaçëm njoftuan të martën se kanë kërkuar dhe marrë autorizim nga gjykata për sekuestro preventive të kompanisë 5D Konstruksion si dhe të kompanisë Restur dhe aseteve të saj, konkretisht 24% të aksioneve në kompaninë “Mediterranean Investment Group” sh.p.k, e cila po ndërton një hotel me vlerë të deklaruar 15 milionë euro dhe që ka marrë statusin “special” nga ana e qeverisë së kryeministrit Edi Rama.

Prokurorët thonë se morën vendimin e sekuestros pasi hetimet zbuluan se të ardhurat e kompanisë 5D Konstruksion përbëjnë produkt të veprave penale si dhe faktin që paratë e përfituara nga 5D Konstruksion u nxorrën cash prej saj për t'u përdorur nga pronarët e dyshuar, Mariglen Qato dhe Redi Molla, për blerjen e pronave të tjera.

“Nga veprime hetimore të kryera në këtë drejtim janë mbledhur provat e nevojshme nga të cilat krijohen dyshime të arsyeshme se, shumat monetare të përfituara në mënyrë të parregullt nga shoqëria “5D Konstruksion” sh.p.k që përbëjnë “produkt” të veprës penale, pjesërisht janë nxjerrë jashtë sistemit bankar nëpërmjet skemës së pagesave për punime fiktike duke u disponuar në gjendje “cash” nga pronarët e vërtetë të shoqërisë tregtare, si dhe pjesërisht janë ri-investuar në aktivitetin tregtar të shoqërisë tregtare të mësipërme. Janë mbledhur prova të mëtejshme që krijojnë dyshimin e arsyeshëm se shumat monetare të përfituara në gjendje “cash” janë përdorur më pas për të investuar në blerjen e pasurive të paluajtshme,” thuhet në njoftimin e SPAK.

Kompania 5D Konstruksion u vu nën hetim nga prokuroria pas një denoncimi të kandidatit të opozitës për postin e kryebashkiakut të Tiranës Belind Këlliçi, i cili deklaroi në vitin 2023 se kompania i përket drejtorëve të bashkisë pavarësisht se rezulton nën pronësinë e një qytetari tjetër.

Në prill të këtij viti, prokurorët arrestuan Redi Mollën dhe Mariglen Qaton, dy drejtues jetëgjatë të bashkisë Tiranë gjatë qeverisjes së kryetarit Erion Veliaj dhe i akuzuan për manipulim tenderësh, korrupsion dhe pastrim parash. Krahas tyre u vendosën në masa sigurie dhe disa drejtorë të tjerë të bashkisë, të cilët akuzohen për manipulim të tenderëve.

Kompania 5D, e cila ka pasur të ardhura bruto prej 22 milionë eurosh mes viteve 2016 dhe 2022, është zgjeruar gjatë viteve të fundit në ndërtim pallatesh ndërsa një prej aksionerëve të saj, Redi Molla, ka hyrë si investitor në hotelin me status special në Durrës. Kompania e hotelit do të vijojë të administrohet nga pronarët ndërsa SPAK është përmbajtur me sekuestrimin vetëm të 24% të aksioneve të kontrolluara nga Molla.

BIRN

[Albo]

SKEMA/ Si i nxorën jashtë shtetit paratë drejtorët e Tiranës. Me paratë që i rifusnin, Qato e Molla blenë prona

Kompania “5D” që sipas SPAK zotërohet nga drejtorët e arrestuar të bashkisë së Tiranës si dhe dy subjekte të tjera janë sekuestruar. Prokuroria e Posaçme thotë se janë zbuluar shuma parash që kanë qarkulluar me të cilat më pas janë blerë edhe pasuri të tjera të paluajtshme. Tashmë edhe një vilë, trualli dhe katër apartamente të tjera janë bllokuar nga shteti

VIDEO

SPAK ka vendosur sekuestron ndaj 3 kompanive që janë të lidhura me drejtorët e bashkisë së Tiranës, Redi Molla dhe Mariglen Qato.

Bëhet fjalë për subjektin “5 D Konstruksion”, që është duke ndërtuar dhe një objekt në zonën e plazhit në Durrës, dhe të regjistruar në emër të Nestor Muhamellarit.

Një tjetër kompani është Restur e themeluar në vitin 2020 me ortak dhe administrator vetë Redi mollën. Në administrim të shtetit është dhe 24 për qind e kuotave të subjektit “Mediterranean Investment Group, dhe që zotërohen prej Redi Mollës

Gjatë hetimeve të nisura në vitin 2023 SPAK thotë se ka zbuluar shuma monetare që kanë kaluar nga kompani të tjera drejt “5D”-së, që akuzohet se në fakt i përkasin dy drejtorëve të Tiranës, Molla dhe Qato.

Paratë pjesërisht janë nxjerrë jashtë sistemit bankar nëpërmjet skemës së pagesave për punime fiktive, duke u disponuar në gjendje “cash” nga pronarët e vërtetë të shoqërisë tregtare, si dhe pjesërisht janë ri-investuar në aktivitetin tregtar të shoqërisë tregtare të mësipërme, thuhet në deklaratën e SPAK.

Madje paratë janë përdorur më pas edhe për blere të pasurive të tjera të paluajtshme.

Së bashku me tre kompanisë spak ka bllokuar truallin 506 m2 dhe ndërtesën në të në rrugën Tefta Tashko tiranë e që I përkasin shtetasve Selim Molla, Ollga Molla.

Të njëjtëve persona u është bllokuar dhe trualli 51.3 m2 në të njëjtën zonë.

Një apartament 122 m2 dhe dy parkime me 42 m2, në emër të Sanije Qatos e afërme e Mariglen Qatos, po ashtu janë sekuestruar se bashku me një apartament 86 m2 që i përket të njëjtit person.

Ndërkaq hetimet aktualisht po vijojnë për fshehje pasurie, shkelje e barazisë në tendera dhe korrupsion.

Pronat e sekuestruara nga SPAK:

1. Shoqëria tregtare “5D Konstruksion” sh.p.k, së bashku me pasuritë e paluajshme dhe të luajtshme në pronësi të saj, si shoqëri tregtare që është përdorur dhe ka shërbyer si mjet për të realizuar veprat penale, që lejohet të konfiskohet sipas nenit 36/1, shkronja (a) të Kodit Penal.

2. Pasuria e paluajtshme e llojit truall me sipërfaqe 506.25 m² dhe ndërtesë me sipërfaqe 164 m², ndodhur rrugën “Tefta Tashko”, Tiranë, rregjistruar në emër të shtetasve S.M dhe O.M, si pasuri e përfituar pjesërisht nga burime financimi që rrjedhin nga produkte të veprës penale.

3. Pasuria e paluajtshme e llojit truall me sipërfaqe 51.3 m², ndodhur rrugën “Tefta Tashko”, Tiranë, rregjistruar në emër të shtetasve S.M dhe O.M, si pasuri e përfituar pjesërisht nga burime financimi që rrjedhin nga produkte të veprës penale.

4. Shoqëria tregtare “Restur” sh.p.k, së bashku me pasuritë e paluajshme dhe të luajtshme në pronësi të saj, në zotërim të shtetasit R.M, si pasuri vlera e të cilës i korrespondon vlerës së produktit të veprës penale dhe që mund të konfiskohet bazuar në nenin 36/1 shkronja (ç) të Kodit Penal.

5. Pasuria 24 % e kuotave në shoqërinë tregtare “Mediterranean Investment Group” sh.p.k, me seli në Durrës, rregjistruar në emër të shoqërisë tregtare “Restur” sh.p.k, me ortak dhe administrator R.M, si pasuri vlera e të cilës i korrespondon vlerës së produktit të veprës penale dhe që mund të konfiskohet bazuar në nenin 36/1 shkronja (ç) të Kodit Penal.

6. Pasuria e paluajtshme e llojit apartament me sipërfaqe të përgjithshme 122.7 m², me emërtimin B_43, si dhe pasuritë parkim Nr.P24 me sipërfaqe të përgjithshme 42 m² dhe parkim nr.P25 me sipërfaqe të përgjithshme 42 m², për të cilat është lidhur kontrata e sipërmarrjes midis shtetases S.Q. dhe shoqërisë “5D Konstruksion” sh.p.k, si pasuri që rrjedh nga produktet e veprës penale dhe për këtë shkak është pasuri që mundet të konfiskohet.

7. Pasuria e paluajtshme e llojit apartament me sipërfaqe të përgjithshme 86.4 m², me emërtimin A_42, për të cilën është lidhur kontrata e sipërmarrjes datë 29.09.2023 midis shtetases S.Q dhe shoqërisë “5D Konstruksion” sh.p.k, si pasuri që rrjedh nga produktet e veprës penale dhe për këtë shkak është pasuri që mundet të konfiskohet.


ORA NEWS

[Albo]

DOSJA “5 D”/ SPAK zbërthen fijet që lidhin drejtorët e Tiranës në ndërtimin e hotelit në Durrës, i shpallur “investim strategjik”

Në dosjen “5 D”, rezulton të jenë të përfshirë një zinxhir veprimesh, por edhe emrash.

Madje aty del edhe emri i Gazmend Haxhiajt, i cili është tashmë në masën e sigurisë detyrim paraqitje për dosjen SASPAK të fondeve të huaja kur drejtor ishte Ilir Beqaj.

Po ashtu rezulton në këtë procedim edhe emri i Elvin Tivarit ish-drejtor i shitjeve në UKT.

Lidhja konstatohen në ndërtimin e një hoteli në Durrës, për të cilin është themeluar “Mediterranean investment Grup” që ka marrë dhe lejen e ndërtimit.

SPAK aktualisht ka sekuestruar 24 për qind të aksioneve që i përkasin Redi Mollës. Ndërsa, po ashtu pjesë aksionesh ka dhe Gazmend Haxhia që njëkohësisht është dhe administrator i shoqërisë “5D”.

Por lidhjet vijojnë edhe më tej. Prokuroria ka zbuluar se hoteli do të ndërtohet dhe mbi një sipërfaqe prej 800 metër katrorë që fillimisht ka qenë e Elvin Tivarit.

Ky i fundit rezulton të ketë në bashkëpronësi me Redi Mollën kompaninë “Gaztro Faktori”, ndërsa trualli i është shitur subjektit “Mediterranean”, ku janë 4 bashkëpronarë, kundrejt 150 mijë eurosh.

Një tjetër sipërfaqe me vlerë 300 mijë euro i është shitur subjektit që do ndërtoje hotelin prej Selim e Ollga Mollës dhe Elvin Tivarit që kanë qenë bashkëpronarë.

Ndërkaq konstatohet se Selim Molla ka derdhur në llogarinë e shoqërisë “Restur” që ka në pronësi djali i tij shumën prej 566,440 euro në formë huaje dhe më tej fondi ka kaluar të “Mediterranean”.

Por edhe kompania “5 D”, përfshihet në këtë situatë ku ka marrë përsipër edhe punimet në objekt ku janë evidentuar 526 milionë lekë fatura 252 milionë prej të cilëve janë paguar.

ORA NEWS

[Albo]

PRONARË ME 300 MIJË LEKËSHA/ Redi Molla i “5 D”-së, aksione dhe tek “Gastro Factory”, administrator Elvin Tivari, ish-drejtori tjetër i Tiranës

Nga Edison Vatnikaj



Redi Molla, ish-drejtori në Bashkinë e Tiranës duket se nën administrim të tij nuk ka pasur vetëm shoqërinë famëkeqe “5D konstruksion”, por ka qenë ortak edhe në disa shoqëri të tjera.

Sipas shkresave hetimore që “Ora News” disponon, rezulton se me datën 13.10.2023 është regjistruar subjekti tregtar “Gastro Factory shpk”, me seli në rrugën “Sami Frashëri” në Tiranë.
Si aktivitet tregtar ka restorant dhe import dhe eksport, apo tregtim mallrash ushqimore në fushën e gastronomisë.

Administratori i shoqërisë rezulton të jetë Elvin Tivari i cili njëherësh ka qenë ish-drejtor i shitjeve në Ujësjellës Kanalizime Tiranë (UKT), ku është ortak me vlerë kapitali 34,000 lekë.
Ortakë të tjerë në këtë shoqëri rezulton të jetë Redi Molla me 33,000 lekë, dhe po me të njëjtën shumë kapitali ortaku tjetër është Dritan Kadiu.

Sipas arsyetimit të gjykatës nuk ka asnjë të dhënë nëse Prokuroria e Posaçme e ka pasur në vëmendje këtë fakt lidhur me investimin e të ardhurave të Redi Mollës në subjektin tregtar “Gastro Factory shpk”.

Po në vijim thuhet se në relacionin e oficereve të policisë gjyqësore është evidentuar ky fakt dhe se në konkluzionet e këtij akti i është propozuar Prokurorisë së Posaçme që sekuestron preventive të shtrijë në 33 % të aksioneve që i përkasin Redi Mollës.

ORA NEWS

[Albo]

Skandali i abuzimeve/ Bashkëpunimi “5D” - “Fusha Shpk”, dy shoqëritë fituan tender për ndërtimin e rrugës që lidh aeroportin me autostradën në Vlorës

Nga Edison Vatnikaj



Kompania “5D” nën hetim për skandalin e abuzimeve të korrupsionit të drejtorëve të Bashkisë së Tiranës, duket së nuk është kufizuar në firmosjen e tenderave nga autoriteti kontraktor Bashkia e Tiranës, por ka shkuar dhe më tej më marrjen e projekteve të mëdha.

Në dosjen e SPAK-ut është evidentuar një komunikim i një prej punonjësve të shoqërisë “5D”, e cila në komunikimet e zhvilluara në muajin shkurt të vitit 2021 tregon për një procedurë prokurimi që "5D"-ja ka fituar.

Nga verifikimet rezulton se bëhet fjalë për ndërtimin e rrugës që lidh aeroportin e Vlorës me autostradën e këtij qyteti procedurë prokurimi e fituar nga shoqëria “5D” dhe “Fusha shpk”, ku dyshohet se është përfituar nëpërmjet procedurave të paligjshme.

Për këtë procedurë në arsyetimin e saj, Apeli shprehet se nga ana e Prokurorisë nuk kanë një analizë për mënyrën se si është fituar kjo procedurë.

Gjithsej prokuroria ka evidentuar 12 procedura prokurimi, e ndërsa besohet se shoqëria “5D” ka nën dyshim edhe 11 tendera që mund të jenë subjekt hetimi për SPAK-un.

ORA NEWS