Tiranë: Mijëra qytetarë dalin në protestë për të rrëzuar qeverinë e korruptuar të Edi Ramës

[Albo]

Mijëra qytetarë mbushin Bulevardin Dëshmorët e Kombit. Ilir Meta nuk merr pjesë (LIVE)





Mijëra opozitarë kanë mbushur bulevardin Dëshmorët e Kombit këtë 20 shkurt në një protestë ku jo vetëm është përkujtuar rënia e përmendores së Enver Hoxhës 33 vite më parë, por që ka shenjuar edhe bashkimin e opozitës rreth një vit para zgjedhjeve të përgjithshme.

Protesta ka nisur me disa fjalime të deputetëve, mes të cilëve Gazment Bardhi, Luçiano Boçi, Flamur Noka etj, të ndërthurur me fjalimet zërave qytetarë, si aktori Mehdi Malkaj etj.

Kulmi i opozitës ka qenë fjalimi i Sali Berishës, që ka folur nëpërmjet dy ekraneve të mëdhenj që transmetonin live nga shtëpia ku lideri i opozitës qëndron në arrest.

Në fjalën e tij, Sali Berisha deklaroi se “ne inaugurojmë sot misionin tonë në Tiranë dhe mbarë Shqipërinë, betejën pa kthim të mosbindjes civile kundër diktaturës së dytë, të bazuar në krimin, drogën, vjedhjen e shqiptarëve. Betejën për çlirimin e Shqipërisë dhe shqiptarëve nga narkodiktatura e shëmtuar e Edi Ramës. Ne inaugurojmë betejën popullore pa kthim për rikthimin e votës së lirë dhe çeljen e dyerve të integrimit evropian të Shqipërisë, të mbyllura nga regjimi i Tiranës. Ne në këtë protestë uragan përcjellim mesazhin për botën se populli opozitar do i rezervojë diktaturës së dytë, dmth narkoshtetin të Edi Ramës, fatin që meriton, fatin që i rezervuam diktaturës komuniste 33 vite më parë”.

Ndërkohë akuzave që i bëhen se Berisha e organizon protestën për të mbrojtur fëmijët e tij, vetë Berisha iu është përgjigjur në fjalimin që ka mbajtur para demokratëve.

“Cilat halle ka Berisha? Ato halle që u shfaqën 10 vite pas ishte pa asnjë pushtet? Ato halle që unë denoncova projektet e serbomadhisë dhe rusomadhisë në rajon? Ato halle që unë denoncova çdo ditë vjedhjet më të mëdha të Edi Ramës? Ato fakte që unë denoncova lidhjet e tmerrshme të pushtetit me krimin? Ato fakte që nisën çuditërisht që unë kundërshtova bashkëqeverisjen e PD me aleancën e qeblësirave, me Rilindjen? Jo miq, Sali Berisha nuk ka halle. Por Sali Berisha është halli më i madh i Edi Ramës dhe miqve të tij, Vuciç, Xhorxh dhe Aleksit Soros dhe mafies ndërkombëtare. Prandaj dhe jam sulmuar politikisht”

Pas fjalës së Berishës ka folur deputeti demokrat Ervin Salianji dhe në këto momente drejt kryeministrisë është qëlluar me gurë dhe shishe molotov. Shkallët e kryeministrisë janë përfshirë nga flakët, ndërsa policët e komisariateve janë zëvëndësuar nga forcat speciale të veshura skafandra dhe mbrojtëset përkatëse.

Tensioni ka zgjatuar fare pak, por pas protestës grupe civilësh prej 7 apo 8 personash janë parë të futen mes turmës së protestuesve që largoheshin dhe kanë “rrëmbyer” disa nga protestuesit që qëlluan me gurë.




















Lapsi

[Albo]

“Zëri i Amerikës”: Protesta e opozitës, Berisha kërkon betejë pa kthim në të gjithë vendin



Në Shqipëri, pas muajsh të gjatë përplasjesh në parlament, opozita mblodhi mbrëmjen e së martës mbështetësit e saj përpara selisë së qeverisë, në një protestë e cila siç deklaroi ish kryeministri Sali Berisha “inauguron sot misionin tonë në Tiranë dhe mbarë Shqipërinë, betejën pa kthim të mosbindjes civile kundër diktaturës së dytë” të kryeministrit Edi Rama. Gjatë protestës nuk munguan incidentet. Në përfundim të fjalës së zotit Berisha, shishe të shumta me lëndë djegëse fluturuan drejt godinës së qeverisë, e po ashtu dhe copa guri nga disa vazo që u thyen nga protestuesit. Përpjekjet për të çarë gardhin metalik, nuk shkuan më tej, dhe nuk u rregjistruan përplasje me policinë e cila nuk ndërhyri për asnjë moment.

Zoti Berisha ju drejtua protestuesve përmes një lidhjeje të drejtpërdrejtë nga shtëpia e tij, ku prej fundit të vitit të kaluar ai është në arrest shtëpie, pasi refuzoi të respektonte vendimin e gjykatës së posaçme për “detyrim paraqitje” dhe “ndalim të lëvizjes jashtë vendit”. Zoti Berisha është nën hetim, nën dyshimet për korrupsion lidhur me procedurat e privatizimit të ish kompleksit sportiv Partizani.

Opozita zgjodhi të protestonte në një ditë simbol për historinë e pluralizimit në Shqipëri, ditën kur 33 vjet më parë në Tiranë u rrëzua busti i diktatorit Enver Hoxha. Duke hequr paralele me këtë datë zoti Berisha theksoi se mesazhi që përcillet është se “populli opozitar do i rezervojë diktaturës së dytë, domethënë narkoshtetit të Edi Ramës, fatin që meriton, fatin që i rezervuam diktaturës komuniste 33 vite më pare”.

Protesta u mbajt në një konteskt të ri zhvillimesh brenda opozitës. Pas gati dy vitesh përplasjesh të forta, që çuan në copëzimin e e Partisë Demokratike, forcës kryesore të së djathtës, tanimë janë ravijëzuar dy linja, nga njëra anë zoti Basha, i mbetur me një numër të kufizuar deputetësh, por që ka në dorë siglën dhe vulën zyrtare të PD-së, dhe nga ana tjetër Rithemelimi, apo grupimi i ish kryeministrit Sali Berisha, të cilit iu bashkangjitën dhe deputetët që mbështesin kreun e grupit parlamentar Gazmend Bardhi. Këta të fundit gëlltitën akuzat e forta që kishin shkëmbyer mes tyre në emër të asaj që e quajtën “bashkim në diversitet”, për të krijuar një front kundër shumicës socialiste të kryeministrit Edi Rama.

Bashkëpunimi mes tyre prej disa muajsh në parlament, u shoqërua me një përfshirje dhe në strukturat partiake. Sekretari i përgjithshëm i Rithemelimit Flamur Noka, dhe zoti Bardhi, hodhën pas shpine atë çfarë kishin thënë për njëri tjetrin, duke u shfaqur së bashku në bazën demokrate. Si zoti Noka, ashtu dhe zoti Bardhi ishin ndër folësit kryesor para manifestuesve në protestë.

Këtij bashkimi i bëri jehonë dhe zoti Berisha në fjalën e tij. “Sot, kur shqiptarët na shohin bashkë pas gjithë brutalitetit që na është bërë, kur shqiptarët na shohin bashkë pas konflikteve tona të brendshme, kur shqiptarët na shohin bashkë kaq shumë në numër, besimi rikthehet në çdo shtëpi, në çdo lagje, në çdo rrugë, në çdo fshat, në çdo qytet. Bashkimi i PD e ka futur politikën shqiptare në një epokë të re. Është ky unitet në diversitet që shqiptarët nuk e kishin arritur njëherë në 33 vite. Është ky unitet në diversitet, dhurata më e çmuar e PD për shqiptarët”, u shpreh zoti Berisha.

Mbetet të shihet se cili do të jetë aksioni i ardhshëm i opozitës, e cila për muaj të tërë ka provuar forma nga më të ndryshmet për të penguar zhvillimin normal të seancave parlamentare. Një qëndrim i cili sipas tyre është kushtëzuar nga sjellja e shumicës, pas refuzimit nga ana e saj të disa kërkesave për ngritjen e komisioneve hetimore, apo dhe të ndryshimit të përbërjes së Komisionit të Posaçëm të Reformës zgjedhore, ku kërkohet zëvendësimi i atyre deputetëve demokratë që janë me zotin Basha.

VOA

[Albo]

Gazment Bardhi: Gjykata të na jap vulën dhe emrin e PD!

Protesta e sotme tregoi se kush është PD-ja e vertetë. Faktet flasin se është Berisha, ndaj drejtësia kot e vonon vulën e PD.

Kreu i Grupit Parlamentar të PD-së, Gazmend Bardhi ka folur pas protestës së opozitës së zhvilluar pasditen e kësaj të marte në Tiranë. Ai i bëri thirrje Gjykatës së Lartë që të mos zvarrisë më çështjen e vulës së PD-së. Bardhi theksoi se pas ditës së sotme është e qartë se kush përfaqëson Partinë Demokratike.

“Edhe unë dua t’i shpreh mirënjohjen e madhe qytetarëve të Tiranës dhe Shqipërisë. Është përgjegjësi e çdo deputeti dhe çdo demokrati. Ne jemi opozitarë dhe nuk do heqim dorë nga opozita.

Ne do ta bëjmë PD-në një alternativë qeverisëse. Nuk jemi kurrë të gatshëm që përgjegjësitë kushtetuese, t’ja çojmë Edi Ramës. Ata që ishin në shesh na kanë sjellë ne këtu dhe ne u përgjigjemi vetëm tyre.

Nuk ka më dyshim kush i gëzon simbolet e Partisë Demokratike. I bëj thirrje Gjykatës së Lartë të zbardhet vendimi dhe Gjykatës së Apelit të japë sa më shpejtë vendimin.

Turi ynë me qytetarët do të vijojë edhe në mënyrë më intensive me ekip më të gjerë. Tashmë do kemi një agjendë edhe më të koordinuar”– tha Bardhi për mediat.

Nuk ka njeri që nuk e di se vula dhe emrin duhet dhënë PD së Berishës.

Koha Jone

[Albo]

Protestuesit u shpërndanë, kryeministri nuk u rrëzua. Berisha rikonfirmohet lider i opozitës



Protesta e opozitës, e cila duhet pranuar se kishte pjesmarrje pas asaj përçarje titanike, tashmë u mbyll.

Folën Flamur Noka, Gazment Bardhi dhe Sali Berisha. Folën edhe disa të tjerë.

Në fund pas fjalës së Berishës filluan të hidhen shishe me molotov mbi kryeministri. Fatmirësisht nuk pati të dëmtuar nga policia dhe nga protestuesit, përveç disa dëmtimeve te hyrja e kryeministrisë.

Policia u tregua korrekte dhe e përmbajtur gjatë protestës.

Ndërkohë kryeministri Rama ndodhet në Turqi në vizitë zyrtare në krye të një delegacioni të madh me ministra.

Protestuesit u shpërndanë, kryeministri nuk u rrëzua. Por Berisha u rikonfirmua lider i krejt opozitës.

Koha Jone

[Albo]

Sali Berisha me podium nga shtëpia: Sot është uragani i lirisë



Ish-kryeministri Sali Berisha si asnjëherë më parë sot është shfaqur nga shtëpia e tij, në një podium të improvizuar, duke iu drejtuar protestuesve me një mesazh.

Në nisje të fjalës së tij, Sali Berisha u shpreh se dita e sotme është dita e uraganit të lirisë.

Berisha tha se 20 shkurti është një ditë në të cilën shqiptarët kremtojnë ngadhënjimin e tyre.

Berisha: Sot është uragani i lirisë. Ju përshëndes ju që keni mbushur sheshin. Ju jeni fitimtarë. Zonja dhe zotërinj, 20 shkurti është një ditë në të cilën shqiptarët kremtojnë ngadhënjimin e tyre. Cdo vit në këtë datë kemi nderuar një ditë që ndau historinë tonë.

Koha Jone

[Albo]

Ish-zëvendës ministri i Jashtëm i Kosovës në protestë, kërkon lirimin e liderit të opozitës



Ish-zëvendës Ministri i Jashtëm i Kosovës, zoti Gani Dreshaj ka marrë pjesë në protestën e sotme të 20 shkurtit para Kryeministrisë në Tiranë, te thirrur nga Partia Demokratike dhe opozita e bashkuar.

Me dy pankarta në duar, ish-diplomati Dreshaj ka kërkuar lirimin e liderit të opozitës, Sali Berisha nga arresti shtepiak i vendosur nga gjykata e dirigjuar nga kryeministri Edi Rama.

Protesta e sotme e 20 shkurtit tregoi edhe njëherë tjetër se opozita shqiptare është në këmbë dhe qindra mijëra shqiptarë nuk shantazhohen nga narko-regjimi i Edi Ramës.

Syri

[Albo]

FOTO/ Studiuesi i njohur gjerman i bashkohet protestës së opozitës kundër Ramës



Protesta e sotme madhështore e shqiptarëve ka pasur pjesëmarrës jo vetëm shqiptarë, por edhe të huaj.

Gjermani Bernd Fisher, një nga studiuesit më të njohur të historisë shqiptare, dhe njëri nga zëra më të njohur pro Shqipërisë nëpër botë, ishte i pranishëm në protestën madhështore të opozitës, mbrëmjen e sotme në Tiranë.



Syri

[Albo]

Berisha: Bashkimi i PD e ka futur politikën shqiptare në një epokë të re. Është kjo demokraci e brendshme që do e aplikojmë në qeverisjen tonë



Kryetari i Partisë Demokratike, Sali Berisha gjatë fjalës së mbajtur në protestën madhështor, deklaroi se bashkimi i PD e ka futur politikën shqiptare në një epokë të re. Është kjo demokraci e brendshme që do e aplikojmë në qeverisjen tonë.

Pjesë nga fjala e kreut të PD-së, Sali Berisha:

Është e rëndësishme miq, që midis këtij tymi dezinformimi, ne të kujtojmë shqiptarët pse po luftojmë.

Ne po luftojmë sepse e duam Shqipërinë.

Po miq, ka njerëz që sot e duan shumë Shqipërinë.

Po miq, ka politikanë që sot e duan shumë Shqipërinë.

A jemi ne të pagabueshëm? Absolutisht jo.

Por kurrsesi nuk jemi si ata.

Jo, jo. Po të ishim si ata sot, do ishim në bashkëqeverisje me rilindjen.

Po të ishim si ata sot, Brava do vazhdonte në krye të opoziëts false.

Po të ishim si ata sot, familjarët tanë nuk do ishin të arrestuar dhe të persekutuar, por do merrnin tendera nga qeveria sepse ky është sistemi që ka ngritur Edi Rama.

Berisha nuk do ishte non-grata dhe as në arrest shtëpie.

Por ne së bashku ne zgjodhëm më të vështirën, sepse ne e duam Shqipërinë.

Shqipërinë nuk e bëjnë tradhtarët, Shqipërinë e bëjnë njerëzit e ndershëm, nuk e bëjnë kurrë ata që e vjedhin atë.

Ne sot luftojmë për Shqipërinë, luftojmë për dinjitetin e shqiptarëve, por kryesorja ne po luftojmë për të ardhmen në Europë të rinisë shqiptare.

Zonja dhe zotërinj, shpopullimi është kërcënimi më ekzistencal për kombin tonë në historinë tonë mijëravjeçare. Kanë ikur 1 milion shqiptarë në 10 vite. 87 përqind e atyre që kanë mbetur, e kanë mendjen të ikin

Me këto ritme, Shqipëria do mbetet pa shqiptarë. Kjo do sjellë humbjen e saj, të traditave tonë, gjuhës, flamurit tonë.

Prandaj miq, përballë këtij kërcënimi, i bëj thirrje çdo shqiptari sot të mos shohë veten si demokrat, si socialist, por vetëm si shqiptar.

Sepse pikë së pari, ne jemi shqiptarë e pastaj jemi demokratë, socialistë apo pa parti.

Dhe shembullin më të mirë për të dalë mbi veten tonë, e ka dhënë PD, duke shembur tabunë më të rëndë të trashëguar nga komunizmi, tabunë e politikës së konfliktit, tabunë se nëse nuk je me mua, je armiku im.

Atë tabu që sot e ka kthyer PS-në në një organizatë kriminale të Rilindjes.

Atë tabu që sot burgos liderin e opozitës sepse e di se nëse ai është i lirë, ti e di se nuk fiton kurrë zgjedhje më.

Dhe harroje Edi Rama se do fitosh më zgjedhje në Shqipëri.

Zonja dhe zotërinj, bashkimi i PD e ka futur politikën shqiptare në një epokë të re.

Ne faktuam me bashkimin tonë se demokracia jonë e brendshme është e njëjtë me partitë e mëdha bashkëkohore, të cilat i kemi frymëzim.

Është ky unitet në diversitet që shqiptarët nuk e kishin arritur njëherë në 33 vite.

Është ky unitet në diversitet, dhurata më e çmuar e PD për shqiptarët.

Është kjo demokraci e brendshme që do e aplikojmë në qeverisjen tonë.

Prandaj kjo qeverisje, do jetë më e shkëlqyera që ka pasur ndonjëherë Shqipëria.

Prandaj dhe kjo qeverisje do shpëtojë pluralizmin.

Prandaj dhe kjo qeverisje do shpëtojë demokracinë.

Prandaj dhe kjo qeverisje do ripopullojë Shqipërinë.

Syri

[Albo]

Xhixho: Rama premtoi 300 mijë vende pune, por dëboi 740 mijë shqiptarë!



Deputetja dhe nënkryetarja e Partisë Lirisë, Erisa Xhixho e pranishme në protestën e thirrur sot nga opozita, u shpreh se qeveria aktuale erdhi në pushtet me gënjeshtra ku premtoi 300 mijë vende pune, por dëboi 740 mijë shqiptarë!

"Qytetarë të Tiranës dhe të mbarë Shqipërisë!

Nuk kishte se si të ndodhte ndryshe, përveçse të mblidheshim të gjithë sëbashku e për të nisur kështu nga ky manifestim madhështor rrugëtimin pa kthim të reagimit qytetar kundër narkoqeverisë; kundër bandës së pushtetit të korruptuar që vetëm pushtet i shërbimit ndaj qytetarëve nuk është.

Tirana dhe gjithe Shqipëria e dinë ku buron e keqja dhe se pse e keqja e pushtetit të tiranisë së korrupsionit dhe krimit ka vrarë shpresën e qindra mijëra qytetarëve.

Ndaj ne jemi sonte këtu për të ringjallur shpresën dhe për ta mbrojtur atë nga të korruptuarit e pushtetit të korruptuar.

Ne jemi sonte këtu për të dëshmuar se jemi të gjithë bashkë për një qëllim të madh.

Qëllimi ynë është një dhe vetëm një, për të bërë të qartë se mbi interesin vendit dhe të popullit, mbi interesat kombëtare nuk ka asnjë interes apo individ që të mund të na dominojë apo të na e errësojë perspektivën drejt fitores.

Misioni ynë është i madh, është i shenjtë dhe i panegociueshëm; është largimi i të keqes që përfaqëson pushteti i korruptuar dhe kriminal i inceneratorëve, pushteti i arrogancës dhe i grabiqarëve.

Kauza jonë e madhe lindi 32 vjet më parë, kur forca e popullit shkuli nga themelet e rrëzoi përtokë diktaturën komuniste nën thirrjet “E duam Shqipërinë si gjithë Europa” dhe kjo kauzë është sot më aktuale se kurrë.

Të nderuar qytetarë,

Rilindja në 11 vite bëri të kundërtën e premtimeve me të cilat erdhi në pushtet.

Premtoi qeverisje me duar të pastërta, por jemi të parët në Europë për korrupsion dhe të dytët në botë për rryshfet!

Premtoi 300 mijë vende pune, por dëboi 740 mijë shqiptarë!

Premtoi çmime të ulta, por paguajmë për ushqime më shtrenjtë se në Itali.

Po çfarë ka Kosova dhe Maqedonia që të gjithë treguesit i kanë shumë më lart në çdo drejtim që nga pensionet, çmimet e ushqimeve e të karburantit, pagat e mësuesve e pedagogëve, mjekëve etj, ndryshimi është vetëm një, atje nuk ka narkoqeveri si kjo e Edi Ramës, por ka qeveri që punon për qytetarët.

Qeveria Rama premtoi shëndetësinë falas, por sot shqiptarët paguajnë 60% më shumë nga xhepi për shëndetësinë se në të gjithë Europën.

Sepse paratë e tyre shkojnë në koncesione dhe në xhepat e klientëve të ngushtë të kryeministrit.

Premtoi zhvillim të bujqësisë, por favorizoi importin dhe falimentoi fermerin.

Kjo qeveri ka zbrazur 10 nga 12 qarqet e vendit.

Premtoi mbrojtjen dhe zhvillim të pronës private, por u shembi shtëpitë dhe rrëmbeu pronat e ligjshme të qytetarëve për t'ua u dhënë oligarkëve për kulla e resorte.

Premtoi politika për të rinjtë, por sot një çifti të ri i duhet mbi 70 vjet kursime për të blerë një apartament.

Të rinjtë e Shqipërisë po largohen masivisht vetëm për shkak të kesaj qeverie, që nuk u garanton asgjë, por u rrjep paratë e tyre e të prindërve të tyre për megaskema mafioze si ajo e inceneratorëve.

Jemi të 8-ët në botë për largimin e trurit. Në një vit Shqipëria humbet 36 mijë të rinj që largohen nga vendi, ndërkohë 23 mijë pensionistë shtohen në skemën e pensioneve dhe këta pensionistë jetojnë në mjerim me pensione nën nivelin e minimumit jetik dhe nuk arrijnë të blejnë dot as ilaçet e tyre.

Jemi vendi me arsimin më të dobët në Europë, me rënie progresive në të gjitha testet PISA të viteve të fundit. analfabetizmi funksional është ulur këmbëkryq në shkollat tona sepse arsimi nuk ka qenë kurrë prioritet për këtë qeveri dhe nuk është mbështetur me buxhet.

Jemi vendi me arsimin më të dobët në Europë, me rënie progresive në të gjitha testet PISA të viteve të fundit. Analfabetizmi funksional është ulur këmbëkryq në shkollat tona sepse arsimi nuk ka qenë kurrë prioritet për këtë qeveri dhe nuk është mbështetur me buxhet.

Kjo qeveri grabiti pasuritë publike dhe private duke mbushur xhepat e oligarkëve.

Të nderuar qytetarë!

Sot të jesh opozitar do të thotë të kesh dinjitet e të kesh respekt për veten, të jesh opozitar do të thotë të kesh guxim, shumë guxim.

Por ky shesh i lirisë dhe i guximit sot si ortek do kthehet në shpresë, çlirim dhe zgjidhje për gjithë shqiptarët!"

Syri

[Albo]

Albana Vokshi: Në çdo tryezë që ulet, Rama shet një copë nga Shqipëria. Vendi ynë është në rrezik



Deputetja Albana Vokshi hodhi akuza ndaj Edi Ramës ndërsa iu drejtua protestuesve në Bulevardin ‘Dëshmorët e Kombit’, duke e konsideruar atë si një tradhtar që shet çdo ditë tokën dhe detin e Shqipërisë.

‘Duhet të ishim më parë këtu në këtë shesh. Kemi kaluar dy vite të vështira, përpara një sulmi frontal për të shkatërruar opozitën. Përdorën të gjitha format, para, presione, kërcënime, pengje, lobime brenda dhe jashtë, por nuk ia dolën. Ja ku jemi këtu. Jemi më të fortë. U bëmë bashkë duke kapërcyer mllefet. Është një rrugë pa kthim, për ta hequr këtë mallkim që na ndjek dhe përndjek dhe që e ka emrin Edi Rama.

Një thirrje kam për shqiptarët, ngrihuni, protestoni jo për Partinë Demokratike, por për Shqipërinë tonë të përbashkët. Shqipëria jonë është në rrezik. Shqipëria po shitet si plaçkë lufte për interesa të një njeriu që është Edi Rama. Edi Rama nuk është kundërshtari ynë politik, por një tradhtar.

Në çdo takim që bën shet një copë tokë, shet një copë det. Në çdo karrige që ulet ka premtuar diçka për të shitur. Në asnjë tryezë nuk ulet si kryeministri dinjitoz i një vendi sovran por si një matrapaz’, tha midis të tjerash Vokshi.

Syri

[Albo]

Një protestë anti Blinken

Nga Andi Bushati

Protesta e 20 shkurtit, me pjesmarrjen që demostroi, i provoi të gjithëve se në Shqipëri ka një masë të stërmadhe njerëzish që nuk besojnë se vendi drejtohet nga “një kryeministër i shkëlqyer”, apo nga “një udhëheqës i shquar”. Në këtë kuptim, më shumë sesa një manifestim për të celebruar bashkimin e opozitës, më tepër sesa një mbështetje për liderin e persekutuar Berisha (dukej nga pjesmarrja që qe me e madhe sesa ajo e 7 korrikut 2022), më përtej se një përpjekje për të dobësuar qeverisjen autokratike, ajo ishte një mesazh anti Blinken.

Ata njërëz që u derdhën në bulevard ishin të deleguarit e asaj tërësie opozitare, që nuk i besojnë fjalëve që sekretari amerikan i shtetit tha pak ditë më parë në Tiranë, që e përbuzin injorimin që Blinken i bëri të gjitha opozitave, që shprehin mos dakordësi me linjën që diplomacia amerikane ndjek prej vitesh, kundër çdo faktori anti Rama në këtë vend.

Duke zhvilluar menjëherë pas vizitës së Blinken protestën më të madhe që prej majit 2021, kur Sali Berisha u shpall non grata, ata pjesmarës dëshmuan se nuk e hanë më për djathë sapunin që u ofron administrata aktuale e Uashingtonit.

Pikërisht këtë provoi edhe pjesmarrja në këtë manifestim e mbi 20 deputetëve që iu bashkuan opozitës reale, të cilët pas më shumë se dy vitesh kalamendje mes kërcënimeve për “ngrënie bari” dhe të bërit politikë të bazuar tek vota, zgjodhën këtë të dytën.

Të ashtuquajturit pjestarë të grupit Bardhi, që kishin rrefuzuar të mblidhnin “një kongres kundër SHBA-së”, megjithëse ai iu kërkohej nga antarësia, që kishin miratuar përjashtimin e liderit historik, për ta mbajtur mirë me ambasadën, që injoronin militantët në emër të një të ardhmeje strategjike për ta, u kthyen të gjithë në vathë.
Sepse për ata, ashtu sikurse për çdo qytetar të këtij vendi me dy pare mend në kokë, Edi Rama nuk mund të jetë dot kurrësesi, ai që u portretizoi në mënyrë të paturpshme, kryediplomati amerikan.

Pra, ata që u derdhën në bulevard këtë 20 shkurt e bënë për të rrëzuar shtatoren e një diktatori të ri, që Antony Blinken u rek të legalizonte tek piramida mauzoleum.

Si për ta theksuar edhe më shumë këtë mesazh, askush nuk e përfilli shantazhin që bënë disa përfaqësues të vulës, tashmë të shitur tek qeveria, se këtë të martë do të zhvillohej një protestë kundër “aleatit tonë të madh strategjik”.

Natyrisht duke mbërritur në konkluzionin se kjo ishte një protestë kundër mesazheve të Blinken, jam i ndërgjegjshëm se zjarrfikëset trushplarës të propagandës do të prodhojnë tituj për protestën “anti amerikane” të saliistëve.

Por, është thjeshtë çështje e tyre nëse ngatërrojnë qëllimisht, një person të vetëm të një administrate kalimtare, me peshën e dhe vlerat e hiperfuqisë. Për ta vlen vetëm një pyetje: si e shpjegojnë që protesta më e madhe e opzitës pas kaq vitesh, “rastisi” vetëm pesë ditë pas vizitës së sekretarit të shtetit?

Unë vetë e kam përgjigjen: kjo e sotmja qe diçka më e madhe sesa një demostrim i minorancës berishiste. Ajo ishte reagimi i një shumice që nuk pranon të tërhiqet prej hunde duke ia shitur Ramën si një udhëheqës të shquar dhe kryeministër të shkëlqyer.

lapsi.al

[Albo]

Gazmend Bardhi: Bashkimi ynë i sotëm na jep kurajo për të forcuar opozitën



Kreu i Grupit Parlamentar të PD, Gazmend Bardhi ka ndarë me ndjekësit në rrejtin e tij social Facebook fotot nga protesta madhështore e opozitës ditën e sotme, krahas të cilave shkruan të gjithë pjesëmarrësit janë pasuria më e madhe që ka Shqipëria!

‘’Bashkimi ynë i sotëm na jep kurajo për të përmirësuar veten, për të forcuar opozitën, për t’u bërë forca udhëheqëse e vendit me besimin e shumicës absolute të shqiptarëve” shkruan Bardhi.

POSTIMI I PLOTË

Sot, ne vërtetë jemi në opozitë. Vërtetë kemi kaluar momente të vështira, ndonjëherë jo të denja për të qenë në lartësinë tuaj, të dashur demokratë dhe qytetarë! Por ne sot kemi me vete pasurinë më të madhe që mund të ketë një forcë politike opozitare: ne kemi me vete kurajon tuaj! Kemi dinjitetin tuaj! Kemi dëshirën tuaj për të luftuar dhe vullnetin tuaj për të fituar!

Ju të gjithë ketu jeni pasuria më e madhe që ka Shqipëria! Bashkimi ynë i sotëm na jep kurajo për të përmirësuar veten, për të forcuar opozitën, për t’u bërë forca udhëheqëse e vendit me besimin e shumicës absolute të shqiptarëve.



Syri

[Albo]

Protesta, përfaqësuesja e Rinisë Republikane: Nuk do mund të na ndalë askush për ta bërë Shqipërinë Europiane



Studentja Albana Xhika në fjalinë e saj nga protesta komëtare e Opozitës së bashkuar në bukevardin “Deshmorët e Kombit” është shprehur se sot qytetarët e mposhtën frikën për tu përballur me regjimin mazhorist. Sipas saj, Shqipëria është kthyer në një vend ku njeriu i ndershëm konsiderohet si mëkatar dhe mëkati e banalja si virtyt.

Ajo shprehet se shqiptarët nuk do i ndalojë askush për ta bërë vendin e tyre si gjithë vendet e Europës.

Fjala e plotë:

PERSHENDETJE TE GJITHEVE

UNE jam nje studente ne stomatologji dhe perfaqesuese e rinise republikane.

JAM sot ketu sepse prinderit tanë dhe gjithe demokratet me 20 shkurt 1991 hodhen poshte bustin e diktatorit, simbol i shkaterrimit, vrasjeve dhe burgosjeve politike, shkaterrimit te besimit ne Zot, sepse donte te ishte vet Zot, ashtu sic kërkon Rama, të bëhet Zot i jetës, pronës dhe lirisë sonë.

UNE kam bindjen e plote se liria dhe jeta jane gjëja më e shenjtë per te gjithe ne dhe askush nuk duhet te ndikoje negativisht apo te mundohet ti shkatrroje ato sepse jane tonat dhe ne nuk ja falim as Edi Rames dhe as njeriu në këtë botë.

Shqipëria është vend i bekuar nga Zoti,por per fat te ket po e shkaterron qeveria. Ketu ska ekonomi, nuk ka liri, nuk respektohet prona dhe familja, nuk ka me merita por vetem servilizem ndaj pushtetit.

Shqipëria është kthyer ne nje vend ku njeriu i ndershem konsiderohet si mekatare dhe mekati e banalja si virtyt, mediokri si intelektual dhe intelektuali si mjeran.

RAMA dhe qeveria shan, fyen e perbuz cdo shqiptar, opozitqr apo socialist. Arroganca e tyre, korrupsioni dhe krimi nuk kanë asnjë krahasim.

Jeta është bërë e padurushme dhe ne kemi harruar te buzeqeshim e te gezojme.

JAM sot ketu, edhe ne emer te gjithë rinise shqipetare dhe ne emer te me shume se gjysem milioni shqiptar qe jane larguar dhe vazhdojne te largohen sepse nuk sigurojne dot nje te ardhme dhe dinjitetin ne vendin e tyre.

Jam këtu me bindjen se akush nuk mund ta mposht nje popull qe do lirine ,qe beson ne Zot,ne falimje dhe ne prone.

KAM bindjen se nese do luftojme te gjithe bashke kunder perbuzjes,dhunes,krimit, korrupsionit, kunder te pamoralshmes.

Nëse luftojme me dashuri per familjen dhe vendin tone ,nuk do mund te na ndale askush për ta bërë Shqipërinë Europiane.

JAM KETU për të tregua se:: Ne nuk kemi frikë përballë së keqes, përballë qeverisë, sepse ne duam dhe nuk urrejmë, Ne duam SHQIPERINE EUROPIANE.

Ajo që duhet të ketë frikë nga e mira është e keqja, është qeveria prandaj 20 shkurti është simbol i përmbysjes të keqes, qeveria duhet te friksohet prej nesh nga uragani i shqiptareve te cilet duan te zevendesojne urretjen me dashurine… shqiptaret qe vertet e kane shtepine e tyre te mikut e te Zotit,por mbi te gjitha e kane shtepine e shqiptareve!

Video

Syri

[Albo]

Përlotet aktori/ E nis fjalimin me vargjet e Naim Frashërit



Aktori Mehdi Malkaj e ka nisur fjalimin e tij i përlotur duke recituar disa vargje të shkrimtarit Naim Frashëri.

“Meqë jetojmë në momente historike, kam një dëshirë. Të themi katër vargjet e Naim Frashërit

Ti Shqipëri më jep nder, më jep emrin shqiptar,

Zemrën ti ma gatove, plot me dëshirë e me zjarr”, tha Malkaj.

Aktori ndër të tjera u shpreh se ka ardhur koha që ta heqin kryeministrin Edi Rama, pasi vetë ai nuk ikën.

Ai u shpreh se po të qëndrojë në pushtet do të copëtojë Shqipërinë.

VIDEO

Syri

[ilia spiro]

Sali Berisha deklaroi se “ne inaugurojmë sot misionin tonë në Tiranë dhe mbarë Shqipërinë, betejën pa kthim të mosbindjes civile kundër diktaturës së dytë

Anti amerikanizmi ne bulevardin deshmoret e kombit, beteja per mosbindje civile dhe revolucion eshte lejtmotivi i non grates. Nje fryme anti shtet nga nja 4-5000 mije militante te sales, interesaxhinj, nje turme qe shkon prapa tij, ne nje kohe qe Shqiperia nuk do ekzistonte si shtet pa USA dhe Austro Hungarine. Sondazhet tregojne se non-gratat jene ne minimum, PS merr me shume se 90 vende ne parlament ndoshta mbi 100. Populli shqiptar ne pjesen derrmuese eshte mirenjohes dhe i zgjuar. Shqiptaret presin drejtesi per vjedhjet, shkaterrimet, vrasjet e 1997, gerdecin, 21 janarin, etj. Sa kohe u jepet ze vrasesve nuk ben perpara ky vend.
ne bulevard nje turme rrugacesh me molotov,gati per "revolucion" kur t`ju beje me shenje non grata
PS mendon sot per zgjedhjet e 2033
,por....perkrahesve te non grates u takon te "hane bar"

[Albo]

Rama bën indiferentin: S’kam dijeni për protestën e opozitës



Edi Rama u mungua të tregohej indiferentë për protestën e djeshme të opozitës. I pyetur nga gazetarët ai tha se s’kishte asnjë dijeni për organizim të opozitës.

Protestën e quajti jo të opozitës, por një bashkim konglomeratesh me interesa të caktuara. Sigurisht që nuk e beson njeri se Rama s’ka parë protestën e as është informuar për të.

Thjesht ai në këtë komunikim publik publik tentoi ta zhvlerësonte atë sikur asgjë s’kishte ndodhur.

Në fakt një mobilizim të atillë opozitar nuk nuk e priste askush nga radhët e qeverisë.

Lapsi

[Albo]

E veçanta e kësaj proteste të opozitës është se u bë pa udhëheqësin e opozitës Berisha në krye të protestës. Ai është në arrest shtëpie. Burgosja e Berishës dhe vizita e sekretarit të shtetit amerikan në Tiranë një ditë më parë, ishin arsyet përse shqiptarët e vranë frikën e gjetën kurajon e humbur për t'i dalë zot fatit të tyre dhe fatit të vendit. Dhe të dyja këto ngjarje janë të lidhura me njëra-tjetrën. Departamenti i shtetit amerikan, dhe ky sekretar shteti, ishte personi që shpalli Sali Berishën person të padëshiruar në Amerikë gjoja nën akuza korrupsioni, pa servirur asnjë provë për publikun. Sot Sali Berisha është në arrest shtëpie, nën akuza qesharake, falë fiaskos së madhe amerikane. Berisha u përball me akuzuesit e tij në publik, bile ngriti edhe padi në gjykatë ndaj tyre, dhe Blinkeni nuk ishte përgatitur për një situatë të tillë. Ai priste që Berisha të trembej e të mbyllte gojën e mos dilte më në publik. Nëse qëllimi i tyre ishte mbyllja e gojës së Sali Berishës, dhe dëmtimi i imazhit të tij në sytë e publikut shqiptar, amerikanët dështuan në këtë mision. Turma e madhe e njerëzve që dolën në protestë dëshmoi se shqiptarët nuk besojnë se Sali Berisha është njeri i korruptuar. Ai ngelet njeriu më i votëbesuar në 30 vitet e pluralizmit shqiptar dhe gëzon ende besimin e qytetarëve të tij. Dhe për ironi të fatit, ish-kryeministri është në arrest shtëpie në një apartament në Tiranë në të cilën jetonte që në kohën e komunizmit para se ti hynte politikës. Dhe drejtësia shqiptare godet atë për korrupsion, kur gjithë kundërshtarët e tij politikë jetojnë në vila lluksoze!

Por nuk ishte vetëm Sali Berisha arsyeja përse shqiptarët dolën në protestë. Arsyeja tjetër është vizita e sekretarit të shtetit amerikan në Tiranë, një ditë para se të bëhej publik vendimi për dënimin e agjentit të kundërzbulimit të FBI, i cili u ble me para nga Rama dhe njerëzit e tij në Amerikë, ish-spiunë të Sigurimit të Shtetit komunist. Sekretari i shtetit amerikan erdhi në Tiranë në mbështetje të Ramës, pasi kështu ia dha urdhërin jo presidenti në Shtëpinë e Bardhë, por njeriu që e bëri atë kryediplomat, miku familjar George Soros e i biri i tij Alex Soros. Edi Rama dhe Erion Veliaj janë njerëzit e Soros në Tiranë. Shqiptarët e dëgjuan kryediplomatin amerikan dhe u shokuan e skandalizuan me të. Në mendjet e tyre thoshin: "Si ka mundësi që një vend i madh si Amerika, mbështet një njeri të korruptuar si Edi Rama, që i ka dalë e stërdalë boja me vite?!" Dhe pasi nuk i jepnin dot një përgjigje llogjike kësaj pyetjeje, e vazhdonin me fjalët: "Ky po na bën në të gjithëve budallenj! Kujt kujton se po i flet ky, ndonjë populli afrikan?!" Nuk ka gjë më të urryer për shqiptarët në gjak të tillë, se sa miku i mirë që të gënjen apo të jep urdhra në shtëpinë tënde! Anthony Blinken nuk e di këtë gjë, por tani e mësoi! Vizita e tij në Tiranë, do të hyjë në histori si momenti më i ulët në historinë e dy vendeve mike, Shqipërisë dhe Amerikës në këto 30 vitet e fundit!

Dhe dalim tek rezultati i këtyre dy ngjarjeve. Për herë të parë, shqiptarët që deri dje besonin se "edhe po të gabojnë politikanët tanë, Amerika do na vijë në ndihmë", e kuptuan dhe zgjuan nga gjumi. Amerika sot jo vetëm që nuk i vjen në ndihmë Shqipërisë, por Amerika dhe diplomacia e saj janë arsyeja përse kryeministri më i korruptuar në Evropë pas Zelenksit të Ukrainës, Edi Rama, vazhdon të jetë kryeministër edhe pse gjysma e gjithë ministrave të tij janë në burg, nën hetim për korrupsion, ose në arrati nga drejtësia. Shqiptarët morrën një mësim me vlerë: amerikanët nuk do të shpëtojnë Shqipërinë nga njerëz të korruptuar si Edi Rama, ata duhet t'i dalin vetë zot vendit të tyre!

Më mirë vonë, se sa kurrë!
Albo