Ndryshime të reja në Qeverinë e Qametit: Ministrat korruptohen, Piktori është i pakorruptueshëm!

[Albo]

VOA: Ndryshime në qeverinë Rama, ikën ministrja e Jashtme Olta Xhaçka



Nga Zëri i Amerikës

Në Shqipëri kryeministri Edi Rama paraqiti sot disa ndryshime në kabinetin e tij qeveritar, ku bie në sy, largimi i ministres së Jashtme Olta Xhaçka dhe zëvendësimi i saj me zotin Igli Hasani, ish ambassador i Shqipërisë pranë OSBE-së në Vjenë, dhe aktualisht koordinator i kësaj organizate për Aktivitetet ekonomike dhe mjedisore. Zonja Xhaçka drejtoi diplomacinë që pas zgjedhjeve të viti 2021. Javën e ardhshme ajo do të duhej të ishte në Nju Jork, për të drejtuar një sesion të Këshillit të Sigurimit, kushtuar një platforme të re të përgjigjes me ndihma himanitare, ndaj krizave të ndryshme në botë. Që prej 1 shtatorit Shqipëria ka rimarrë për herë të dytë presidencën e Këshillit të Sigurimit.

Zonja Xhaçka është në përballje me Gjykatën Kushtetuese, për çështjen e mandatit të saj si deputete, pas një kërkese të opozitës, e cila pretendon për një konflikt interesi, pasi bashkëshorti i zonjës Xhaçka, ka marrë statusin e investitorit strategjik për ndërtimin e një kompleksi turistik në bregdetin e jugut të Shqipërisë.

Ndryshimet kanë prekur dhe ministrinë e Financave ku Delina Ibrahimaj do të zëvendësohet nga Ervin Mete, aktualisht drejtor i Autoritetit të Mbikëqyrjes Financiare, dhe ish zëvendësministër i Financave në periudhën 2013-2017. Zonja Ibrahimaj, mbetet brenda kabinetit qeveritar, por si Ministre shteti për Sipërmarrjen, duke zëvendësuar zonjën Edona Bilali.

Nga qeveria do të largohet dhe ministrja e Arsimit Evis Kushi, e cila do të zëvendësohet nga Ogerta Manastirliu, ministre e Shëndetësisë. Në vend të kësaj të fundit, është propozuar zonja Albana Koçiu, aktualisht drejtoreshë e Departamentit të Administratës Publike.

Rikthehet në qeveri, ish ministrja e Financave Anila Denaj, e cila zëvendëson zonjën Frida Krifca, në krye të Bujqësisë. Kjo ministri u vu në qendër të vëmendjes në muajin korrik pasi Komisioni Europian njoftoi se kishte vendosur të ndërpresë përkohësisht rimbursimet ndaj qeverisë shqiptare për financimet e projekteve në bujqësi të realizuara në kuadër të Programit IPARD II për mbështetjen e bujqësisë dhe zhvillimit rural. Vendimi ishte marrë “bazuar në informacionin fillestar të dhënë nga Zyra Evropiane Kundër Mashtrimit [OLAF], pas një hetimi mbi akuzat për korrupsion në lidhje me zbatimin e programit IPARD II”, bëri të ditur Delegacioni i BE-së në Tiranë.

Zoti Rama njoftoi dhe shkrirjen e funksionit të Ministrit të Shtetit për Standartet dhe Shërbimet, që mbulohej nga zonja Milva Ekonomi, dhe zëvendësimin me Ministrin e Shtetit për Pushtetin lokal, post i cili ju besua Arbjan Maznikut, aktualisht një ndër nënkryetarët e Bashkisë së Tiranës.

Pa dhënë ndonjë shpjegim specifik, zoti Rama i bëri publike ndryshimet në qeveri, në fund të një fjalimi prej gati 90 minutash, në Asamblenë e Partisë socialiste (PS), dedikuar në një pjesë bumit turistik të këtij sezoni, e nevojës për t’ju përgjigjur me një qasje të re, dhe në pjesën e dytë, forcimit të rolit të organeve të Drejtësisë, me angazhimin për t’i dhënë atyre një mbështetje të pakushtëzuar, pavarësisht goditjeve antikorrupsion, që kanë prekur disa ish anëtarë të kabineteve qeveritare, dhe një numër të ndjeshëm zyrtarësh apo ish zyrtarësh të të gjitha niveleve në pushtetin qëndror dhe atë vendor.

Zoti Rama është në krye të qeverisë që prej vitit 2013. Pas zgjedhjeve të vitit 2021, Partia socialiste mori një mandat të tretë, si askush më parë. Qeveria e dalë pas atyre zgjedhjeve, pati pak ndryshime nga ajo e mëparshmja. Ndërsa vitin e kaluar, zoti Rama shkarkoi zëvendëskryeministrin Arben Ahmetaj, aktualisht në kërkim, pasi Prokuroria e Posaçme ka ngritur ndaj tij disa akuza që nga ajo e Shpërdorimit të detyrës, te pastrimi i parave. Në fillim të korrikut të këtij viti, zoti Rama ndryshoi papritur dhe ministrin e Brendshëm. Në vend të zotit Bledi Çuçi, i cili mori drejtimin e grupit parlamentar socialist, u emërua zoti Taulant Balla.

Koha Jone

[Albo]

Ndryshimet në qeveri/ Cilat janë kokat e ministreve që “preu” Rama



Nga kabineti qeveritar janë larguar Ministrja e jashtme Olta Xhaçka, Ministrja e Bujqësisë, Frida Krifca, Ministrja e Arsimit Evis Kushi. Xhaçka ishte akuzuar per shpalljen e bashkeshortit si investitor strategjik gje qe eshte theksuar edhe nga qeveria greke. Opozita ka kerkuar heqjen e mandatit te saj. Nga ana tjetar Krifca, vuajti vendimin e BE-së për të prerë ndihmat për bujqësinë. Edhe në një ministri shumë të përfolur u bë ndryshim, duke hequr nga shëndetësia Ogerta Manastirliun dhe duke e zvedndësuar atë me të panjohurën Albana Koçiu.

Gjithësesi Rama e ruajti disi Manastirliun duke e spostuar në pozicion, duke e çuar tek arsimi gjë që i kushtoi vendin Evis Kushit e cila do punojë këtej e tutje në sekretariatin e PS-së. Nga posti i rëndësishëm i financave u largua edhe Delina Ibrahimaj, e cila gjendet në një konfikt të hapur me Belinda Ballukun, por edhe atë kryeministri nuk e ka lënë pa gjë. Ish ministrja e financave, të cilën Rama e shkarkoi njëherë në qershor tani do të drejtojë dikasterin e sipërmarjes duke lënë jashtë kabinetit Edona Bilalin.

Jashtë mbeti edhe ministrja e shtetit Milva Ekonomi e cila që prej shtatorit 2021 ishte ministre e Shtetit për Standardet dhe Shërbime, por ministria e saj u shkri.

Lapsi

[Albo]

Emrat/ Rama zyrtarizon ministrat e rinj



Në Asamblenë e Partisë Socialiste, kryetari i PS e kryeministri Edi Rama zyrtarizoi ndryshimet në kabinetin qeveritar. “Kokat” që u prenë ishin Frida Krifca, Olta Xhaçka, Milva Ekonomi dhe Evis Kushi.

Ndërkohë Ogerta Manastirliu merr drejtimin e Ministrisë së Arsimit. Te Shëndetësia shkon Albana Kociu, e cila deri më tani ka drejtuar Departamentin e Administratës Publike.

Në vend të Frida Krifcës shkon Anila Denaj. Delina Ibrahimaj nga Financat “zbret” poshtë në një ministri pa portofol në vend të Edona Bilalit te Mbrojtja e Sipërmarrjes.

Milva Ekonomi shkon te Sekretariati për Programin në PS, ndërsa ministria e saj shkrihet dhe emërohet Ministër për Pushtetin Vendor, Arbian Mazniku.

Anila Denaj – Ministër i Bujqësisë dhe Zhvillimit Rural

Igli Hasani- Ministër i Punëve të Jashtme dhe Evropës

Ervin Mete- Ministër i Financave

Ogerta Manastirliu- Minister i Arsimit dhe Sportit

Delina Ibrahimaj- Ministër për Sipërmarrjen

Arbian Mazniku- Minister i Pushtetit Vendor

Albana Kociu- Ministër i Shëndetësisë


Lapsi

[Albo]

Analiza e DW: Rama riformatoi qeverinë pas goditjeve nga SPAK



Riformatimi i qeverisë së Tiranës nuk është i papritur. Kryeministri Rama e kishte paralajmëruar atë pak javë më parë, kur shkarkoi të gjithë kupolën drejtuese të PS, kryetar i së cilës ai është që nga viti 2005.

Ndryshimet në qeverinë shqiptare vijnë kur në këto 2 vite të para të mandatit të tretë qeverisës, PS po i plasin skandale korrupsioni njëri pas tjetrit. Struktura e Posaҫme Anti-Korrupsion, (SPAK) po heton ministra, ish-ministra dhe zyrtarë të lartë socialistë ndërkohë që një duzinë prej tyre janë në arrest me burg për korrupsion.

Ish-zëvendëskryeministri, Arben Ahmetaj, i shkarkuar nga kryeministri Rama vitin e kaluar, u arratis para dy muajsh dhe tani është në kërkim ndërkombëtar. SPAK e akuzon atë për shpërdorim detyre, pastrim parash dhe ka për atë një mandat arresti. Kryeministri Rama u shpreh në Asamblenë e PS, që i parapriu paraqitjes të hënën të riformatimit të qeverisë se “nuk do të mbrojë asnjë pushtetar që do të përballet me drejtësinë.”

Kush largohet dhe kush vjen në qeverinë Rama?

Ministrja e Jashtme, Olta Xhaҫka largohet nga kabineti qeveritar i kryeministrit Rama. Ajo ka qënë pjesë e qeverive Rama si ministre e Mirëqenies Sociale, Mbrojtjes dhe Punëve të Jashtme. Opozita i kërkon Gjykatës Kushtetuese heqjen e mandatit të deputetes pasi bashkëshorti i saj, ish-deputeti socialist Artan Gaçi, është shpallur investitor strategjik nga qeveria Rama dhe është lejuar të ndërtojë në bregdetin e Jonit, në Dhërmi të Himarës një kompleks turistik, në një tokë të blerë prej tij, për të cilën ka një padi në SPAK për falsfikim dokumentash pronësie. Në vend të Olta Xhaҫkës, Kryeministri Rama emëron Igli Hasanin, ish përfaqësues i Shqipërisë në OSBE, 2018-2021, aktualisht koordinator i OSBE-së për Ekonominë dhe Klimën.

Një tjetër ministre që largohet është ajo e Bujqësisë, Frida Krifca. Në korrik të këtij viti Komisioni Europian (KE) njoftoi ndërprerjen e përkohëshme të financimit për të mbështetur bujqësinë dhe zhvillimin rural në kuadër të Programit IPARD II. Sipas delegacionit të BE në Tiranë, ndërprerja u bazua “në informacionin nga Zyra Evropiane Kundër Mashtrimit, pas hetimit lidhur me akuzat për korrupsion në zbatimin e programit IPARD II.” Në vend të saj në qeveri rikthehet deputetja socialiste Anila Denaj, ministre e Financave dhe Ekonomisë, 2018-2021.

Ministrja e Financave Delina Ibrahimaj shkarkohet dhe merr detyrën e ministres pa portofol të sipërmarrjes. Në vend të saj Kryeministri Rama emëron Ervin Meten, ish zëvendësministër në Ministrinë e Financave, aktualisht drejtor i Autoritetit të Mbikëqyrjes Financiare.

Evis Kushi largohet nga Ministria e Arsimit dhe Sporteve. Në vend të saj emërohet Ogerta Manastirliu, Ministre e Shëndetësisë dhe e Mbrojtjes Sociale që nga viti 2017. Ministre e Shëndetësisë emërohet Albana Koҫiu, drejtore e Departamentit të Administratës Publike. Ministrja e shtetit për Shërbime dhe Standartet, Milva Ekonomi, ajo e Arsimit dhe Sporteve, Evis Kushi propozohen për në sekretariatin e PS.

Opozita: Qeveria Rama nuk i shpëton dot drejtësisë

Kryetari i PD Lulzim Basha e quajti PS pas riformatimit të saj “të damkosur nga SPAK për aferën e inceneratorëve që nuk i shpëton drejtësisë me tubime partiake”

“Drejtësia duhet të vijojë punën e saj për hetimin e aferës së inceneratorëve, sterilizimit dhe çdo denoncimi për korrupsionin shtetëror në çdo hallkë. E pandikuar nga presioni qeveritar apo politik i kujtdo qoftë. Kjo është mënyra e vetme për të vënë para drejtësisë abuzuesit me pasuritë e shqiptarëve dhe bashkëpunëtorëve të tyre” theksoi Basha të hënën në median sociale. Riformatimi i qeverisë Rama pritet të miratohet me dekret nga presidenti Bajram Begaj.

DW

[pirro2020]

Shumë dëgjuan dhe panë Assamblenë e PS me vëmendje. Më me shumë vëmëndje sigurisht e kanë parë ata teë Foltorës sepse ata kërkonin material jo për të kritikuar por për të sharë.
Përse? Pa i hyrë përkrahjes së ndonjë partie, mendoj se duhet vlerësuar puna për shndrimin e Shqipërisë në një vënd të botës perëndimore. Duke patur një të kaluar jo të mirë ku diktatura vendosi barazinë nëpërmjet varfërisë ashtu si Pol Poti në Kamboxhia, sot Shqipëria po përpiqet të integrohet në BE edhe me ndihmën e miqve të Shqipërisë ku një rol të madh luan SHBA.
Anët negative e kësaj ecje përpara të Shqipërisë janë tre:
- Mungesa e një Opozite konstruktive e cila duhej të lunate rolin e një Opozite me Programe dhe Projekte konkuruese ndaj Maxhorancës së sotme dhe jo të ishte e copëtuar dhe të luanin rolin e hetuesve të kohës së diktaturës
- Korrupsioni në nivelet e ndryshme qeveritare dhe locale i cili po luftohet nga drejtësia e re dhe SPAK, korrupsion i cili duhet mbajtur nën kontroll duke përzgjedhur në drejtim meritokracinë dhe profesionistët në qeverisje qëndrore dhe lokale, dhe jo të pa-aftët dhe militantët
- Roli negativ i fqinjit i cili ndërhyn në punët e brëndëshme shqiptare duke harruar se është i vetmi shtet në botë që mban një ligj Luftë 82 vjeçar aktiv , shtet që në mënyrë të vazhduar që kur është formuar si shtet Shqipëria e deri më sot ka pretendime të hapura dhe të fshehta me qëllim helenizimin e jugut shqiptar. Kjo po pengon integrimin dhe nxit armiqësitë të cilat shfrytëzohen edhe nga opozita copë copë shqiptare që nuk gjen mënyrë tjetër, veçse duke shitur edhe interesat e vëndit për të mbajtur karriket drejtuese të Opozitës dhe të shmangë përgjegjësitë e shkeljeve të ligjit ndër vite.
Një nga problemet e rëndësishme në fjalimin e Kryeministrit ishte vendosja e pavarësisë së pushtetit të tretë dhe Prokurorsë, pra Drejtësisë përballë Politikës shqiptare. Dihet së në një përballje të Drejtësisë me Politikën, gjithmonë ka fituar politika.
Dhe kjo qasje e maxhorancës për të bërë Drejtësinë e pavarur është llogjikë dhe në favor të një shteti të fortë dhe të stabilizuar. Vetëm në këtë mënyrë mund të luftohet korrupsioni i klasës drejtuese politike sin ë nivel lokal ashtu dhe qëndror.
Përshtypje bëri ndryshimi i disa ministrave praktikisht katër me ministra të meritokracisë, të paktën kështu njihen.
Sidoqoftë, Problemi më i çuditshëm ishe çvendosja paralele e një Ministreshe e cila nuk e ka drejtuar mirë Ministrinë e Shëndetësisë duke e vendosur në një Ministri tjetër po aq të rëndësishme.
DIhet se Sistemi Shëndetësor Publik krahas ndërtimeve llaç e tulla, ndryshimeve të Drejtorive, vuan tërësisht nga një keqmanaxhim dhe mungesë kontrolli absolut në punën epunonjësve të shëndetësisë dukeshkatuar një cënim në kujdesin ndaj pacientit dhe popullatës, për të cilin kam bërë shumë shkrime, por asgje nuk ka lëvizurpër mirë.
Kjo ka shkaktuar jo vetëm shpenzime ekstra të Buxhetit për shkak të PPP-ve të cilat ndoshta janë nisur me idenë për të përmirësuar gjendjen por për shkak të pa-aftësisë së administratës dhe të Ministrave të Shqndetësisë përfshi znj. Manastirliu të cilët kanë mbajtur në stafin e tyre njerëz jo profesionistë, këshilltarë jo profesionistë, kanë afruar rreth vehtes së tyre njerëz jo profesionistë dhe aspak meritokratë të shëndetësisë, kanë dëmtuar kujdesin ndaj popullatës dhe shpenzimet ekxstra të kësaj popullate qoftë për të blerë medikamente pa rimbursim, qoftë për vizitat tek spitalet dhe klinikat private, qoftë duke harxhuar para për analizat dhe egzaminimet, qoftë për shkak të mos mirëmbajtjes ndoshta me qëllim të aparaturave të egzaminimit mjekësor në Spitalet publike, qoftë duke mos aktivizuar kartën e Shëndetit, qoftë duke paguar nën dorë për tu shtruar, apo për tu egzaminuar, qoftë duke ulur cilësinë e shërbimit mjekësor publiK në favor të Spitaleve Private. Këto dëme ndaj popullatës së sëmurë Ministrja nuk i ka llogaritur si dështime.
Ligji për Autonominë e Spitaleve në fakt mbetet një thikë në shpinën e pacientëve që kërkojnë kujdes shëndetësor sepse ky tip autonomie po i bën spitalet jo më spitale publike por private. Dhe kjo është një gafë e kësaj Ministreshe dhe kësaj Ministria.
Dihet se QSU-të e Tiranës si spitale terciare duhet ti kënë të gjitha specialitetet, të gjitha medikamentet e nevojshme, të gjitha llojet e Egzaminimeve mjekësore spitalore, dhe të realizojnë të gjitha egzaminimet dhe analizat e nevojshme për pacientët e shtruar, por edhe ata që vijnë nga Spitalet dytësore rajonale në formë konsultash dheshtrimesh.
Kjo nuk ka ndodhur QSU-të e Tiranës nuk i posedojnë të gjitha dhe pacientët shkojnë tek privati.
Pa i hyrë në hak për PPP-ve, cilat për mendimin tim duhen anulluar sepse kosto e tyre është më e madhe sesa dobia që kanë sjellë, pikërisht për shkak të mungesës së profesionalizmit të Ministrisë së Shëndetësisë dhe vetë Ministres e cila ka mbuluar mungesën e profesionalizmit të kësaj Ministrie me fotot që del me personelin Shëndetësor, duke harruar të dalë me ndonjë pacient apo me ndonjë shqoatë të pacientëve të cilët kanë shumë për të thënë.
Dakort që e hoqi, dhe Ministrja e ardhshme ndoshta do të shohë kritikat dhe analizat për Sistemin Shëndetësor Publik jo me syrin e militantëve dhe dallkaukëve që sorollaten për të kapur ndonjë tender apo për të shpikur ndonjë PPP të re që të xhvasin buxhetin e Shëndetësisë si dhe ata të mëparshmit.
Sigurisht mendoj se një Ministre që ka dështuar në punën saj në raport me kujdesin ndaj Pacientit duke mos bërë reforma reale shëndetësore në systemin publik, por duke i lënë punët ashtu si do privati, si mund të drejtojë një institucion kaq të rëndësishëm si ai i Arsimit?
A mundet ajo të bëjë ndonjë reformë në Arsmin publik si p.sh., të propozojë një Ministri të re të Arsimit të lartë duke e ndarë nga Ministria e Arsimit actual?
Apo të korrigjojë Ligjin e Arsimit të Lartë të vitit 2015 i cili flet vetëm për iAL publike kurse private nuk përmënden?
Ose të rregullojë problemet e Arsimit të lartë professional?
Sigurisht që nuk do ti bëjë dot sepse ka dhe plot të tjera probleme arsimi fillor, i mesëm dhe i lartë për tu përmirësuar.
Gabimi i Kryeministrit egziston në mosnjohjen e dështimit të kësaj Ministreshe në Shëndetësi. Ndoshta ja kanë referuar ndryshe - bëmat -si suksese.
Shpresojmë për më të mirën por kjo Ministreshë ka dëmtuar rëndë kujdesin ndaj pacientit në Sistemin Shëndetësor Publik.

[Neteorm]

Kujt po i mburret Rama?!

Rama nxori dje një listë kërkimesh në google, duke u mburrur se medemek Shqipëria është në krye të listës botërore për turizëm.

Duke e lënë mënjanë vërtetësinë e kësaj renditjeje, vlen të shtrohet pyetja: Kujt po i mburret Rama?

Shqiptarëve që morën kredi për të përballuar çmimet stratosferike në bregdet? Apo po iu mburret 65% të shqiptarëve që nuk mundën fare të bëjnë pushime as këtë vit?

Krenohet me shifrat e turistëve, a thua se ata kanë ardhur për të kqyrur pikturat e Ramës apo për t’i dhënë dorën Taulant Ballës.

Edhe sikur Shqipëria të jetë vërtetë e treta në botë për turizëm kjo nuk është fare meritë e qeverisë, pasi vijnë në Shqipëri për klimën dhe natyrën (detin, malet, liqenet apo lumenjtë) për të cilën qeveria nuk ka asnjë meritë.

Qeveria do kishte një farë merite nëse nuk do kishte betonizuar plazhet, apo nuk do kishte lejuar zaptimin me shezlongje dhe me gardhe.

Qeveria do kishte një farë merite nëse do të kishte përmirësuar gjendjen e transportit urban, dhe nuk do i kishte lënë turistët rrugëve.

Rama mund të mburrej nëse do kishte rritur sigurinë në rrugë nga adoleshentët pa patentë, sigurinë në plazh nga skafet e policëve, sigurinë në det përmes rojeve bregdetare, apo sigurinë ushqimore nga ushqimet e skaduara.

Por krejt e kundërta ka ndodhur.

Në fakt, një pjesë e turistëve të këtij viti mund të mos kthehen më kurrë në Shqipëri për faj të mënyrës se si qeveriset ky vend. Ndërkohë që disa fatkeqë nuk u kthyen më në shtëpi, pasi humbën jetën në det, në plazh apo në rrugë.

Por nëse ka një renditje botërore, me të cilën mund të matet puna e Ramës, është renditja botërore e cilësisë së jetës, ku Shqipëria renditet ende ndër vendet e fundit në Evropë.

Është pikërisht cilësia e ulët e jetesës, që i detyron mijëra shqiptarë që të kryesojnë listën e azilkërkuesve të Evropës.

Dhe nuk është i vetmi vend. Në fakt, ndër vendet më turistike në botë gjen Egjiptin, Tajlandën, Nepalin, Madagaskarin, Kamboxhian, madje edhe Afganistani.

Njerëz nga e gjithë bota shkojnë për të pushuar në këto vende, por askush nuk do të jetojë aty. Madje shtetasit e këtyre vendeve rrezikojnë edhe jetën vetëm të ikin nga vendi i tyre.

Prandaj, nëse Rama do të mburret për pasojat e qeverisjes së tij 10 vjeçare, mund ta bëjë këtë vetëm atëherë kur Shqipëria të jetë një vend për të jetuar, jo thjesht një destinacion për të pushuar.



Dr. Endri Shabani

[Albo]

Ndryshimet në kabinetin e Ramës u diktuan nga ‘skandalet e qeverisjes’

Kryeministri Edi Rama riformatoi për herë të tretë brenda dy vitesh kabinetin qeveritar, por analistët politikë vlerësojnë se lëvizjet janë kozmetike dhe nuk e ndryshojnë imazhin e sistemit të ngritur prej tij.

Nga Blerina Gjoka


Kryeministri Edi Rama dhe Gramoz Ruçi pas mbledhjes së Asamblesë së Partisë Socialiste. Foto: LSA.

Kryeministri Edi Rama shpalli të hënën ndryshimet në shtatë poste ministrore në fund të një fjalimi të gjatë përpara Asamblesë së Partisë Socialiste, pa shpjeguar motivet e riformatimit të kabinetit të tij.

Ai vendosi të largojë nga kabineti i tij ministren e Jashtme, Olta Xhaçka, atë të Bujqësisë, Frida Krifca dhe ministren e Arsimit, Evis Kushi – ndërsa përsëriti premtimin se nuk do të mbrojë askënd që do të përballet me drejtësinë.

Ky ishte ndryshimi i tretë dhe më i madhi në qeveri prej kohës kur Rama mori një mandat të tretë qeverisës në vitin 2021.

Një vit më parë, ai shkarkoi zëvendëskryeministrin dhe ministrin e Financave, Arben Ahmetaj, i cili aktualisht është në arrati i akuzuar nga Prokuroria e Posaçme për korrupsion dhe pastrim parash në dosje të lidhura me aferën e inceneratorëve.

Në korrik, Rama shkarkoi edhe ministrin e Brendshëm, Blendi Çuçi si përgjigje ndaj zemërimit publik përballë një tjetër skandali që përfshiu Policinë e Shtetit dhe familjarët e afërt të ish-deputetit të Krujës, Rrahman Rrahja.

Të paktën dy nga ministret e larguara këtë javë kanë qenë gjithashtu në shenjestër të akuzave publike.

Ish-ministrja Xhaçka ka edhe mandatin e deputetes në pikëpyetje për shkak të një vendimi të Gjykatës Kushtetuese, që pasoi përfitimin nga bashkëshorti i saj i statusit të investitorit strategjik, ndërsa Krifca ikën nga Bujqësia pak muaj pasi Bashkimi Europian njoftoi pezullimin e fondeve IPARD në bazë të dyshimeve për korrupsion. Çështja është aktualisht nën hetim nga Prokuroria.

Ndryshimet e fundit në qeveri janë të lidhura sipas analistëve politikë me skandalet në qeverisje dhe hetimet që po kryhen aktualisht nga Prokuroria e Posaçme, SPAK.

Armand Shkullaku, një nga drejtuesit e medias online, Lapsi.al, i tha BIRN se këto ndryshime reflektojnë nevojën e kryeministrit Rama për të ndërmarrë një akt “pas dhjetra skandaleve që kanë rrënuar imazhin e tij”.

“Pikërisht skandalet dhe çështjet e nxehta të abuzimeve dhe vjedhjeve në dhjetëra milionë euro e kanë detyruar Ramën të bëjë lëvizjet e fundit, me shpresën se ato mund të krijojnë perceptimin se tani diçka po ndryshon dhe kohës së keqpërdorimeve po i vjen fundi,” tha Shkullaku.

Por Shkullaku vlerëson se korrupsioni në qeverisjen e Ramës “nuk është një çështje e emrave të përveçëm, por e një sistemi të tërë”.

Edhe Robert Rakipllari, drejtor i televizionit informativ News 24, i tha BIRN se arsyeja kryesore pas ndryshimeve lidhet konsumimin e qeverisjes dhe hetimet e SPAK.

“Ajo që gjykoj në këto rrethana është një lëvizje për të ulur koston e figurave të konsumuara në qeveri,” tha ai.

Rakipllari vlerëson megjithatë se ministret e shkarkuara ndajnë profile të ndryshme.

“Xhaçka është një nga ministret më serioze dhe me bilanc në drejtimin e politikës së jashtme, ndërsa Krifca u pompua si figurë e re menaxheriale, por që nuk rezultoi e tillë,” shtoi Rakipllari.

‘Ndryshime kozmetike'

Në pushtet që prej vitit 2013, kryeministri Edi Rama nuk i ka kursyer vartësit sa herë që pushteti i tij është tronditur nga skandale korrupsioni apo pakënaqësi popullore në rritje.

Ekipi i tij politik i vitit 2013 është zëvendësuar pothuajse tërësisht nga zyrtarë të profilit teknik – pa ndonjë lidhje të dukshme me Partinë Socialiste.

Në të njëjtën linjë, Rama promovoi në tre postet kyçe të kabinetit të tij ish.zv.ministrin Ervin Mete si ministër të Financave, diplomatin Igli Hasani në postin e ministrit të Jashtëm dhe Albana Koçiun në Ministrinë e Shëndetësisë.

Sipas Shkullakut, këto janë ndryshime kozmetike, pa asnjë risi për sistemin e ngritur tashmë nga Edi Rama.

“Qeveria Rama është duke prekur fundin e saj dhe nuk besoj se këto ndryshime do të prodhojnë ndonjë performancë çudibërëse,” tha Shkullaku. “Sistemi që Edi Rama ka ngritur është e pamundur të thyhet me ndryshime kozmetike, për më tepër kur ai vetë nuk ka vullnetin apo fuqinë për ta ndryshuar,” shtoi ai.

Mungesa e një analize qeverisjeje dhe vendimmarrja vetjake pa konsultim me organet drejtuese të partisë, tregon sipas Shkullakut, se PS është kthyer në një “repart ushtarak që thjesht ngre dorën për çdo vendim të kryeministrit”.

Shkullaku e shikon fjalimin e kryeministrit Rama si tregues të distancimit të tij nga emrat qeveritarë të akuzuar për korrupsion, duke mbrojtur sistemin e ngritur prej tij.

“Pikërisht në këtë tentativë për të shpëlarë sistemin që ai vetë ka ngritur, Rama projektoi dhe ndryshimet në qeveri, duke larguar disa emra të akuzuar për abuzime dhe futur disa të tjerë që kanë qenë larg kupolës drejtuese të Rilindjes,” analizoi ai.

Rakipllari mendon gjithashtu se emrat e rinj e forcojnë rolin dhe protagonizmin e Ramës në qeveri.

“Risia e vetme janë emrat e rinj teknikë, surprizë të zgjedhur nga Kryeministri, për të cilët nuk ka akuza apo vlerësim negativ,” tha Rakipllari, ndërsa shtoi :” me ndonjë përjashtim, ata nuk ofrojnë ndonjë garanci si në aspektin menaxherial, ashtu edhe politik”.


BIRN

[Albo]

“Hiq Lenën, vër Prenën”, Meta ironizon ndryshimet në qeveri: Një korrupsion skizofrenik



Kryetari i Partisë së Lirisë, Ilir Meta ka komentuar ndryshimet në kabinetin qeveritar, ndërsa nuk i kurseu ironitë.

Ai tha se qeveria Rama është gjithnjë e më rëndë, duke treguar kalbjen e saj.

“Hiq Lenën, vër Prenën. Gjithnjë e më rëndë do të shkojë e gjithë qeverisja e kalbur në rrënjët e saj. Një korrupsion skizofrenik.”, tha Meta. Ndërkohë ai shtoi se në 4 vite qeveria punoi për të vjedhur votat e shqiptarëve.

“Aksioni në Parlament e unifikon opozitën, kjo është çështje vullneti dhe jo negociatash. Opozita ka pasur mundësitë që të jetë më e bashkuar. Por s’ka ngelur shqiptar që se di se i gjithë shteti është organizuar që të 4 vite të punoj për të tjetërsuar vullnetin e shqiptarëve. Të gjithë shqiptarët e kanë nga një patronazhist.”, shtoi ai.

Video


Balkanweb