Lekët e korrupsionit: Drejtoreshës së Rilindjes Socialiste i vjedh pastruesja e shtëpisë mijëra euro

[Albo]

“Zëri i Amerikës”: Deklarata kontradiktore të Alda Klosit mbi paratë që kishte në shtëpi



Në Shqipëri, ish zyrtarja Alda Klosi, në banesën e së cilës dyshohet se u vodhën mbi 120 mijë euro dhe 30 mijë dollarë rezulton të ketë dhënë dy deklarime të ndryshme në polici mbi paratë që ajo kishte në shtëpi.

Më 15 dhjetor, ditën kur ka ndodhur vjedhja e denoncuar në polici, zonja Klosi ka deklaruar se nuk kishte patur sasi të mëdha parash. Sipas proceverbalit të deklarimit të saj, të cilin Zëri i Amerikës ka mundur ta shohë, zonja Klosi është shprehur se përveç bizhuterive, nga kontrolli paraprak ka konstatuar se i mungonte edhe një sasi parash për shpenzime dhe mbarëvajtjen jetike të përditshme.

Ndërsa, pas arrestimit të Rozeta Dobit, e cila punonte si pastruese tek banesa e ish zyrtares, në një deklarim të dytë, zonja Klosi është shprehur se “gjatë kësaj kohe ka menduar me qetësi për sendet që ka patur dhe se ditën e ngjarjes i janë vjedhur një shumë në valutë të huaj më shumë se 120 mijë euro, si dhe një shumë prej 30 mijë dollarësh”, të cilat ajo ka shpjeguar se ia kishte lënë xhaxhai.

Kontradikta në dy deklarimet ngre një sërë pikëpyetjesh, pasi duket e vështirë, që një person, që ka në banesë një sasi kaq të madhe parash, të mos ketë konstatuar mungesën e tyre, aq më tepër, kur sipas deklarimeve të djalit të pastrueses, nëna e tij kishte marrë të gjithë kasafortën. Pikëpyetjet shtohen edhe nga fakti se deklarimi i shumës së vjedhur është bërë vetëm pas arrestimit të autorëve të grabitjes, gati 3 javë pas ngjarjes dhe jo më parë.

Zonja Klosi ka mbuluar funksione të larta në administratë, si ish drejtoreshë e koncensioneve në ministrinë e Financave para disa vitesh dhe deri në korrik të 2022, shefe e kabinetit të ish zëvendës kryeministrit Arben Ahmetaj, për të kaluar më pas në Autoritetin e Mbikqyrjes Finaciare.

VOA

[Albo]

Alda Klosi hyri në administratë me një apartament dhe doli me disa të tillë



Alda Klosi është personazhi më i komentuar si në ekranet televizive, por edhe në bisedat e qytetarëve të thjeshtë. Zbardhen deklaratat e pasurisë së Klosit që nga dita ku ajo është emëruar në administratën e lartë shtetërore në 2016, si drejtore në ministrinë e Financave.

Atë vit Alda Klosi kishte një pasuri modeste, bashkëpronare me të shoqin Altin Klosi në një apartament prej 47m2 katrorë në Tiranë, me vlerë 2,5 milion lekë, një automjet Toyota Yaris i vlerësuar 180 mijë leke dhe disa llogari bankare me vlera të ulëta ose të papërfillshme, prej 7 eurosh apo 3,8 dollarësh. Bashkëshorti kishte dhe një truall prej 1000 m2 katrore në periferi të Tiranës me vlerë 9 milion lekë, ku përfshihet dhe një ndërtim prej rreth 90 m2.

Një vit më pas Alda dhe Altin Klosi blenë një apartament në Tiranë prej 72 metrash katrorë me vlerë rreth 32 mijë euro, financuar pjesërisht nga një kredi prej 2 milion lekësh, 950 mjië lekë të tjera I kanë marrë borxh dhe nga një garanci financiare të një prone me qira.

Në vitet e tjera pasuria e Alda Klosit nuk ka pësuar ndryshime të mëdha. Por në 2021 Alda Klosi tashmë e divorcuar papritur bëhet e pronare e dy apartamenteve banimi në Lezhe, me vlerë gati 8 milion lekë që të dy. Po në këtë vit Alda Klosi shlyen kredinë e marrë në 2017 për blerjen e apartamentit në Tiranë, dhe bëhet pronare me te drejta të plota.

Kurse në vitin e fundit 2022, Alda Klosi deklaron se ka përfituar tre pasuri si trashëgimi ligjore nga familja. Por teksa ka deklaruar pronat e marra nga trashëgimia, ajo nuk ka bërë asnjë deklaratë për të paktën 120 mijë eurot e vjedhura në shtëpi. Ajo thotë se shuma e vjedhur është për kurimin e xhaxhait, ajo kishte si detyrim ligjor ta raportonte si gjendje cash në shtëpi.

Koha Jone

[Albo]

Përgjimet/ Rozeta: Pse ke marrë lekë? Djali: Mora veç 50 mijë euro



23-vjeçari Havier Dobi, djali i sanitares që vodhi 120 mijë euro në banesën e ish-zyrtares së shtetit, Alda Klosi përmes një komunikimi me nënën e tij në paraburgim, bëri që policia të zbulojë që në shtëpinë e tyre ishin të fshehura mbi 400 mijë euro në aspirator. Rozeta i ka thënë të birit që do të marrë përsipër të gjithë fajin, dhe ai i është përgjigjur se do të nxjerrë lekët nga shtëpia.

Bazuar në këtë djali është urdhëruar kontroll i dytë ku u gjetën paratë e tjera në tubin e aspirimit. Më pas Rozeta kritikon te birin pse ka marrë shumë para. Ai i përgjigjet kam marrë vetëm 50 mijë euro. Biseda mes tyre është bërë kur ishin në paraburgim, ndërsa pëgjoheshin nga policia.

A do të futet në lojë SPAK-u, pasi janë mbi 400 mijë euro që janë ende jetimë. Prokuroria e Posaçme thotë se nuk ka nisur hetim lidhur me verifikimin e pasurisë së Alda Klosit. Këtë hetim po e kryen Prokuroria e Tiranës, por nëse do të futet në lojë SPAK do të varet nga vlerësimi i nivelit të zyrtares, sa e lartë do të konsiderohet ajo. Klosi dikur ka punuar si shefe kabineti e Arben Ahmetajt kur ishte zv.kryeministër, ish-drejtoreshë koncesionesh, ndërsa punon aktualisht në Autoritetin e Mbikëqyrjes Financiare.

Ajo ka deponuar se 120 mijë eurot qe iu vodhën, ishin kursime të mbledhura për kurimin e xhaxhait të saj të sëmurë. Por Rozeta Dobi ka thënë se edhe shuma prej 400 mijë eurosh është marrë po në shtëpinë e Klosit. Nëse deklarata e Dobit del të jetë e vërtetë, atëherë barra e provës për të vërtetuar pasurinë i takon Klosit.

Përgjimi:

Havieri: Çfarë ke thënë ti për mua?

Rozeta: Asgjë do të rri unë këtu.

Havieri: Lekët atje lart te shtëpia do i nxjerrë unë.

Koha Jone

[Albo]

Lind pyetja: Perse drejtoresha e Rames i mban leket ne shtepi dhe jo ne banke?

[Albo]

Nga 2 deri në 7 vite burg: Shpallet vendimi për ish-zyrtaren Alda Klosi dhe pastruesen me të birin



Ish-zyrtarja e Ministrisë së Financave Alda Klosi u dënua sot nga gjykata me 2 vjet e gjysmë burg. Ajo përfiton nga gjykimi shkurtuar.

Ish-pastruesja e saj Rozeta Dobi dhe i biri, Havier Dobi, që vodhën në shtëpinë e zyrtares 462 mijë euro, u dënuan me 7 vjet e ëma dhe 4 vjet i biri. Falë gjykimit të shkurtuar, Rozeta Dobi do të kryejë vetëm 4,9 vjet burg kurse i biri, 3 vjet burg.

Të tre këta persona bënë bujë me historinë e tyre, pasi zyrtarja mbante të fshehura në shtëpi mbi 460 mijë euro të padeklaruara e të dyshuara si të përfituara nga korrupsioni, ndërsa pastruesja e shtëpisë ia grabiti në bashkëpunim me të birin.



Syri

[Albo]

Po bëre korrupsion në Shqipëri, dhe siguron gati gjysëm milioni euro nga korrupsioni, dënimi i drejtësisë është vetëm 2 vjet burg!

Hajde drejtësi hajde!

Albo

[SERAFIM DILO]

Jane keto vendime qe pastaj shtyne njerezit qe punojne ne shtet te vjedhin pa frike sepse vjedhja shteterore denohet ne minimum ndersa ajo private ne maksimum .

Po punove pastrues ne privat dhe vodhe denohesh 7 vjet,po punove drejtor ne shtet dhe vodhe denohesh denohesh vetem 2 vjet e gjysem. Pyetja qe lind eshte denimi bazohet ne punesimin privat dhe shtet apo denimi eshte dhene ne baze te profesionit pastruese dhe drejtoreshe ?

Por egziston mundesia qe shkalla e denimit te jete dhene ne raport me leket e vjedhur. Pra, meqenese asnje person me minimum ineligjence e ve ne dyshim se drejtoresha ka vjedhur shume e me shume lek se sa pastruesja,denimi eshte dhene ne baze te formules se drejtesise se re ;sa me shume vjedh aq me pak burg ben. Me kete arsyetim llogjike se; sa me shume vjedh aq me pak denohesh kuptohet edhe se pse Fullhani,Meta e te tjere me radhe dolen e do dalin te pafajshem.

[Albo]

Konfiskohen 500 mijë euro dhe dy pasuri të Alda Klosit



Prokuroria e Tiranës konfiskon pasuritë e Alda Klosit, ish-shefe e kabinetit të ish-ministrit të Financave Arben Ahmetaj, e dënuar për fshehje të pasurisë. Bëhet fjalë për rreth 500 mijë euro cash, një apartament dhe një garazh.

Gjithashtu në vendimin e konfiskimit përfshihen edhe pasuritë e bashkëshortit të saj. Kërkesa ishte bërë nga organi i akuzës në Gjykatën e Tiranës.

Ndaj tyre ishte kryer hetimi për “refuzim të deklarimit, mosdeklarimit, fshehjes ose deklarimi i rremë i pasurive”.

Janë sekuestruar një apartament 85 metra katrorë dhe një garazh, me vendndodhje në Tiranë. Gjithashtu shuma monetare 368 mijë lekë, 15600 dollarë dhe 462 mijë euro.

“Nga analiza e fakteve dhe e dokumentacionit të administruar rezulton se pasuritë e paluajtshme të llojit apartament dhe garazh, që zotërohen nga ajo dhe nga personi i lidhur, janë pasuri të pajustifikuara nga të ardhurat e ligjshme. Këto pasuri të paluajtshme janë fshehur dhe nuk janë deklaruar në deklaratat e ILDKPI nga personi i hetuar A.K”, thuhet në vendimin e gjykatës.

Gjykata e Apelit ka lënë më 3 Tetor 2024 në fuqi vendimin e Gjykatës së Tiranës, për Alda Klosin, pastruesen dhe djalin e kësaj të fundit. Ish-zyrtarja e ministrisë së Financave, së bashku me sanitaren Rozeta Dobi dhe djalin e saj Havier Dobi, u shpallën fajtorë ‘vjedhje me pasoja të rënda” në bashkëpunim.

Vendimi përcakton se Alda Klosi dënohet me vendim të formës së prerë me 1 vit e 8 muaj burgim, duke ia rrëzuar ankimimin e bërë. Klosi e ka vuajtur dënimin dhe u lirua në muajin Maj 2024, teksa çështja e saj nisi prej vitit 2023, kurse denoncimi u bë në vitin 2022. Me 4 vite dhe 8 muaj burgim u dënua pastruesja Dobi dhe me 3 vite dhe 4 muaj i biri i saj, Havieri.

Klosi u hetua nga Prokuroria edhe për pastrim parash dhe çështjen e pasurive që i janë zbuluar, teksa u kërkua më 12 prill 2024 dhe sot u miratua konfiskimi i tre pasurive.

Njoftimi i Prokurorisë:

Me kërkesë të Prokurorisë Tiranë, konfiskohen pasuritë e shtetases A.K. dhe ish-bashkëshortit

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë, gjykata konfiskoi pasuritë e shtetases A.K. dhe ish-bashkëshortit të saj, të akuzuar për veprën penale ‘Refuzimi për deklarimin, mosdeklarimi, fshehja ose deklarimi i rremë i pasurive, interesave private të personave të zgjedhur e nëpunësve publik ose i çdo personi tjetër që ka detyrim ligjor për deklarim’ parashikuar nga neni 257/a/2 i Kodit Penal.

Nga procedimi pasuror nr.05, 2022, rezultoi se e pandehura/subjekti i hetimit pasuror A.K. e cila është përfshirë si subjekt deklarimi në ILDKPKI që në vitin 2016, nuk ka deklaruar në këtë institucion pasurinë që nuk e justifikon atë me burime të ligjshme të të ardhurave.

Nga analiza e fakteve dhe e dokumentacionit të administruar rezulton se pasuritë e paluajtshme të llojit apartament dhe garazh, që zotërohen nga ajo dhe nga personi i lidhur, janë pasuri të pajustifikuara nga të ardhurat e ligjshme. Këto pasuri të paluajtshme janë fshehur dhe nuk janë deklaruar në deklaratat e ILDKPI nga personi i hetuar A.K.

Sa më sipër, si dhe në mbështetje të neneve 3, 5, 7, 12/b, 14, 15 deri në 22, 23, 24, 28-38 e vijues, të Ligjit nr.10192 datë 03/12/2009 “Për parandalimin dhe Goditjen e Krimit të Organizuar dhe Trafikimit Nëpërmjet Masave Parandaluese kundër Pasurisë”, i ndryshuar, si dhe në nenin 302 të Kodit të Procedurës Civile, me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm Tiranë u konfiskuan pasuritë e mëposhtme:

– Shuma monetare 368.000,00 (treqind e gjashtëdhjetë tetëmijë) Lekë, 15.600,00 (pesëmbëdhjetë mijë e gjashtëqind) USD dollarë amerikan, 462.950,00 (katërqind e gjashtëdhjetëedymijë e nëntëqindepesëdhjetë) Euro, sekuestruar për llogari të procedimit penal nr. 9220/2022 dhe arkëtuar në llogarinë e Prokurorisë në 10.01.2023;

– Apartament me siperfaqe 85.09 m2 të shfrytëzueshme me numër pasurie 6/572+1-35, ZK 8210, Vol. 42,Fq 127 pasuri e ndodhur në Tiranë, në pronësi të shtetasit A.K.; dhe

-Garazh me sipërfaqe 14.06 m2 të shfrytëzueshme, pasuri e ndodhur në Tiranë, në pronësi të shtetasit A.K.

LAPSI